TEDIM GAM LEH MUHMAWH GAL
Agelh ~ Go Deih Mung
Thu patna
Tanglai in khua pen kimawk sat ngamlo, zong kimawksat theilo hi. Pau-lap nam nih om in, ‘muhtheih gal’ leh ‘muhmawh gal’ a ki-kihta ahihi. ‘Muhtheih gal’ cih ciangin gal-le-sa genna hi a, mi gilo, sa gilote kihtakna ahihi. ‘Muhmawh gal’ cih ciangin leitang keem kha ahih keileh dawite cih nopna ahihi. Tanglai inzong huihpi guahpi, mencim kekkia, pulpi zavat leh kangmei patau aakipan natna satna tuamtuam te na tuak uh a, tua pen ahang kithei lo ahih manin ‘muhmawh gal’ ci in, dawi gilo, kha gilote in hong nopnehna, dawi nasepna in na tuat uh hi.
Tua bangin lawki hun lai in muhtheih muhmawh gal a tuakloh nadingun kumsim in vokno tuk 4 gual khat go in ‘Tual biakna’ na nei tawntung uh hi. ‘Tual biakna’ ih cih in khuazang bup kipawl aa biakpiakna hi a, inn kim-in zu/sum kidong in kibawl hi. (Tapidaw leh Lawki omkhopna khua pawlkhat te bangah Tapidaw te in Tual biak nading sum kidong te pia nuamlo in hausa te leh Lawki te tawh kiho theilo in, tua hanga Tapidaw teng kibawlsia cihkhawng, Tapidaw teng in khuatuam sat cihkhawng zong om hi). Hih khuazangbup thupha ngetna Tual bawlna pen khuasung tawh kisai ahih manin zin leh leng a omleh kiciahsak phot in, zinthak zong kuamah kitungsak nuamlo in zin hong lut loh nadingin khualu khuataw ah sawl kibaang(kikhai) hi. Sawl kibaang mu napi in zin tung teitei a omleh ‘Zehphih’ ci in tual biakna aa kizang zu leh sa abei teng kiliausak hi. Tualbiak hun ciangin Siampipa in phuisam in “ka siam ka sa, ka khuazing ka khuavak aw na guahkong hong in, na meikong hong in, mimza tangza hong pia in, vokno siahkai thei, akno siahkai thei, miluang dok thei, saluang dokthei tetawh hong kipelhsak in. Sing lumlet thei, suang lumlet thei huihsia guahsia, kangmei patau tawh hong kipelhsak in. A kii-gaw, a ha-pak hong pia in, sumkong hong hon in, paikong hong hon in” ci in thupha ngen hi. Tua tualbiakna Tualsuang kimkot teng phiatsiang sitset in vutneel dikdek theh in kizalh hi. Azingsang ciangin tua laimun enkik uh a, mihing khekhap a omleh ‘tukum ki cidam ken ciai, asi ana tam ni ei’ kici in, Sa khekhap ana om leh ‘tukum salian kiman ding hi’ ci in Tanglamkai ana om leh ‘tukum an kihau ding hi’ ci uh hi.
Hih bangin ih pu ih pa te in kumsim kumsim in abiak apaai uh tungah muhmawhgal tuamtuam tawh a kipelh nading un thupha na ngen tawntung uh hi. Tapidaw biakna hong tung in a nungta Pasian ih theih ciangin zong Tualtuul, Siampi cihbang om nawn se loin eima deihtek, eima deihbang tekin ih cidam nading, ih nopsak nading Pasian kiangah thupha kingen hi. Ahi zongin vantung leitungah thuneipen Pasian ahihmah bangin vantung leitungah ama deihna bang, ama phalna leh ama hoihsak bangin na sem in, natna sihna, huihpi guahpi, huihdam guahpha, daupaina, tuahsiatna cihte hong tungthei hi. Tua hi a leitung mundang genloh ih Tedim gam bekzong en lehang thuhoih thupha ih san mahbangin tuahsiatna leh dongtuahna tuamtuam zong ih phukha toto hi. Tua banga ih tuahkhak geelkholhloh dongtuahna ‘Muhmawh gal’ pawlkhat te enkik pak leng;
Kialpi
Nidang lai Pu Za Suan te’ khanlai in a inn uh kaangtum a, kaangvam munah khuam gualkik nuam nawnlo uh ahih manin Baangzang khua saklam, tei singkung tampi pona munzang tengah ‘Teizang khua’ a sat uhi. Teizang innpi Khupson Pu Sel Kim in Pu Hawi Hang khanlai-a a Vahui galcial teng a zawngmangsak, Kalzang Khupmu Pu Sel Kim Teizang khua ah a lak ciangin beh dangte in zong Teizang khua hong zuan ciat uh ahih manin Teizang khua ah minam hong kibehlap gawp hi; Teizang khua ah mi a hong pawlcin mahmah hun khatteh innmun logam kikham nawnlo in kialpi hong tung ahih manin Teizang khua-ah nah nam thumvei po-in, Tedim, Tonzang, Falam, Halkha le India gam dongah khua inn 100 bangah na lalkhia mang uh hi.
Nidang lai Tungdim leh Man Lun, Man Tuang te khanlai inzong kialpi, puulpi na tung ngei in, theipum haipum tawh na nungta uh hi. Tua bang kialtun lai in Tungdim in Sesi setang (Taang leh sii) huan in vok khat go aa, inn sak inn khang theih ding lau ahih manin a vokgawh uh a kam hum in Kelkong ah sawl khai hi. Hih thu Pu Man Lun ten a theih tak ciangin;
(a). Sing cing pangzang ka tute, sesi huon te sawlkhai te vohkam huum te vaw .. ci in la na phuah ngei hi.
Ukpi Pu Kam Hau hunlai inzong Tedim gamah kum 3 sung kialpi ‘Singpitaam’ kici a tung hi. Ukpipa Kam Hau in a Saihapak, Zampite le Sumsan beel tawh anntang Kawlpi ah a khek hi. Tua antangte pen mipite lakah a hawm uh hi. Antang a bei ciangin a neihsa gantate- sial, bawng, lawi, keel, vok le ak tampi tawh antang a khek leuleu uh hi. Tua ci-in kum 3 sung mipite ann ngawl lo-in a koih uh hi. Mipite tungpan-a a lak siah tuamtuamte zong tua kial hunsung ki-awl hi. Tua ahih manin kial-a puksi kuamah om lo hi. A upate le mipite lungdam mahmah uh a, Ukpipa om kei zenzen leh kisimang khin ding, aci uh hi.
1960 kum in Tuimui, Lingthuk, Mauvom khua leh a kiim tengah Zusa laang in mautaam tung ahih manin kialpi tung hi. Kikial lua ahih manin Mauvom khua aa kumpi te ii Kial huhna antang koihna godown pen Tuimui te in luh uh a, kumpi te in man in thong kiasak uh hi. Tua hangin khasia in la na phuak uh a,
Sung neek ding ban aa sam cilo, lun in va bang man ta zel aw ee.
Lun in va bang man ta zel aw na ee, lun mang sung kial aw na ee... na ci uh hi.
1967 kum sungin Tedim gam sungah kial hong tunga an haksa mahmah hi.
1987 kum in Tedim gam ah Tuuktaam, mautaam tungkik hi.
2008 kum in Tedim gam Thangkaai kual leh Cikha gam Malkual teng ah Mautaam tung in Zusa laang ahih manin kial tung a, hih thu leitung thuthang naleng ah kitangko aa, mun tuamtuam panin huhna kipia kawikawi hi.
Mencim
Kawlzang gam panin Pulepate pawlkhat in Innlai lui le Phailai luite kituntuahna mun-ah, Luika khua na sat uhi. Khua sat khit hunah minam tuamtuamte;- Khuangsang mi, Thado, Hmar; Paite; Khaute; le Vaiphei kici miteng in a zot ciangin khua lianpi khat suak hi. AD. 1200-1300 hun pawlin Luika khuapi panin mi tampitak lalkhia uh a, inn 80 bang a om lai uhi. Tuate in zong a khuasiam gulpi a thah manin Luika khua kicim in men in vukcip a, a silo teng in Baangzang khua in, tua mencipna hangin Luika khua a bei hi.
1930 kum sungin Thalmual khua mem kicimh a, inn thum kisia hi. 1949 kum sungin a nihveina kicimh a, inn 10 kisia-in inndang tampi, mimin vukcip hi. 1966 kum sungin a thum veina, kicimh leuleu a, inn 49 kisia in, kitai kek ciat hi; kum tampi khitteh khualui mun mahah kiteng kik hi. 1991,1992 kum sungin a liveina khua cim leuleu a, khua mun kinusia in kitai kekciat mang a, pawlkhat te taikhia in khuathak sat uh a, tu in ‘Thalmual khuathak’ kici suak hi.
1997 kum in Tampi khua kicimh hi.
2008 kum in Tuilangh khua kicimh in inn 2 min in vuk aa, inn 3 kisia hi.
2009, Oct.5 ni in Sihtui khua ah min kicimh in inn 1 vuk in mi 3 si hi.
2015, July-August kha in Zogam ah guah tamlua ahih manin inn leh lo kisia, lei kisia, lampi kisia tawm lo hi. Hih thupiang minthang mahmah aa, Kawlgam thuthang inzong tangko in, hih 2015 thupiang hangin dongtuak galtai a 100 val aa sim om hi. 2015 kum mencipna hanga inn kisia, lei kisia cihte amal aa gencian theihlohzah phial in amunmun, a khuakhua ah om hi. Innlehlo kisia bek hilo in Khua pawlkhat zong mencipna hangin a khua uh nusia in khuathak na saatlawh uh hi. Laibung te Khaikam khuathak ah; Thenzang, Kahngen leh Vongmual te Teklui khuakhung ah; Aipha te Thangzang ah; Thangnuai te Taakmual ah Tuivial te a khua khung uah cihbang in kituah uh aa tudong tengsuak uh hi. Hih cipsiatna hangin inn leh lo bek thamlo logam leh lolai zong pawlkhat sia in, anteh ankung te men in luang khia in pawlkhat te hawk in taikhia mang ahih manin annek tuidawn ding haksatna a thuak zong om hi. Hi banga Tedim gam bek hilo Kawlgam sungah guahtui hanga cipsiatna hangin kumpi in August 4 pan September 15, 2015 dong (ni 45 sung) gamdang ah antang zuakkhiat ding phallo hi. Tua banah dongtuahna mun te ah antang man leh vanman te akhan loh nadingin zong zaksakna nei uh a, ih Tedim gam hong uk Pu Go Suan Khai inzong veng hausate lamlakin sumbukte hong tatsiat het loh nading uh genpih hi. Kawlpi leh Tedim kikal lampi zong sialua ahih manin motor te pai theilo in, mipi te kibuai mahmah aa, ih inn aa omsa antang tuibuk te, khuasunga omsa vanlehna tebek kimuang ahih manin kipatau tek mahmah hi. Tua bang hun laitak in Lawibual ah Pa No Bawi bangh-in antang lei dingte sit bawl phot a, a khol nuam bek-a leite leisak loin ip khat ta bek pia hi, kici hi. Tedim ah antang ip khat Ks. 50000/- tawh lei ding nangawn a om nawnloh laitak Ks. 29000/- tawh akizuak theih nadingin akisam zahzah Niangnu (Ciau) leh Tonzang ah antang lei ding ip khat Ks. 70000/- tawh akimuh nawn loh nung ah Ks. 36000/- tawh lei theih dingin Mingalar Restaurant (Tedim) te in hong puak uh hi. Khua tuamtuam ah zong men cim in, inn leh lo a kisia te zong khua sunga kipawlna tuamtuam te, INGO, NGO, CSO leh Tedim phualngak ZYA te in deihtak panla in huhna ngetsak kawikawi in hong vaihawm uh a, cimawh gilkial dangtak tampi te kipanpihzo hi.
Pul natna
Zan khawng in khuano mite Hiangzang ah nuamsa a a teen laitak un pul natna tunga lo-buk, gamsung mun tuamtuam ah khua pial in kihemciat uh hi. Pulnat om sungin mi (80) si hi. Pul ven ciangin a damlai sunteng kikaikhawm kik uh hi. A hih hangin a khua uh gim neih ahih manin teenna ding munhoihna “Phun(ai)” en uh hi. A phun’ ngahna mun uah teeng pah dingin pawlkhatte in a inn uh phelin kituah pah uh hi. Phun’ ngahna mun ah teng uh ahih manin ‘Phun’om’ khua ci pah uh hi.
Sukte Pu Khan Thuam khanlai inzong Rallang panin Pu Khan Thuam Mualbem khua a tun zawh a sawtlo-in, pul natna om in mun tuamtuam ah hong lal ciat uh hi. Khan Thuam in Dimlo khua beel a, tua laitak aa Mualbem hausa Kaihmaang in Tedim khua Pum Go (Guite) beel in om hi. Tua bang laitak natna dangkhat tawh Pum Go Tedim khua-ah hong si hi. Pulnatna hong ven ciangin, a taina khua ciat panun Mualbem khua hong zuan kik uh hi.
Pu Mang Gin, Khoi Lam leh Kam Hau te hunlai inzong Sasih khua(Suangpi khua lui) pen khualian khat hi a, hun khat ciangin sumphuk leh gilsan natna hangin Sasih khua kilawi siang in, Sasih khua beilawh hi. Tua panin tu-a Suangpi khua akisat ahi hi.
1892 kum, Voklaak khua a 2 veina kisat hunlai, khua tui a kikhuat laitakin, a tui khuat uh uih-in, 'Kua veih hiam?' ci-in a kidot uhleh Pu Za Suang in, a ciamnuihna tawh 'Kei ka hih leh, ka ngoi, gilsan in dok hen' a ci tadih hi. Tua kammal kimangmawhin gilsan veisuak takpi banah, tual phuisam laitakin, a singbawk muhkhak uh pen, 'tawlbawk tawh kibang' a cihkhakna hangin zong, Voklaak khua ah tawlbawk natna beimawh hiding hi' ci-in, Khangluite in thuciin a na nei ngei uhi.
1917 kum in Vangteh khua ah natpi tung in mi tampi si hi kici hi.
1918-19 kum sungin Piantit pai te hong ciah ciangin Piantit Pulpi kici natpi hong tung a, mi tampi si hi. Pakzang ahzong tung ahih manin a tenna khua uh nusia in Pu Kai Za Tuang thumuhna tawh kituahkhia in tulaitak-a atenna uh Pakzaang khua na satlawh uh hi.
1935 kum in Thalmual ah zavat natna hangin mi 35 si a, gam sungah kitai kek gawp hi. Tua kum pen, "Dawi tai kum' kici hi. (Pa Tel Kho Zam)
1942, April-July kikal kha 4 sung Tungzang khua ah zavaat (Gilsan) pul natna tung hi. Khua tuamtuam ah tung ahih manin khua khat leh khua khat kikawm theilo, kikawm ngamlo in ki omtek hi. Hih tungtang ah khua tuamtuam ah a si tampi tak om a, Tungzang ah mi 74 si in, Tuithang ah mi 2 si in, Phaiza ah mi tampi mah si hi kici hi. Hi banga mi tampi asih ciangin ‘Dawi gal’ hi kici in, Dawi in a muh peuhpeuh a ne hi ci in kilau mahmah tek ahih manin inn pua pialngam kuamah om lo in, lo kuanlo, gam pha loin tawlkhat tek ki om a, Lawki zong kitam lai ahih manin sialkong tungah Sawl kibaang hi. Misi a tam semsem ciangin khua sungah zong ki omngam nawnlo in Lo lam ah a tai zong om in, kha 2-3 sung bang om uh a, Uileeipiteh kine hi ci uh hi. Hih natna te hong laan semsem ciangin Dr.Hau Za Cin Pau in natna kidalna zatui va sun kawikawi in, a na tezong zatui zatang tawh hoihtak bawl hi. Tua panin natna hong daaikik hi kici hi.
1946 kum in Luang-el khua ah natpi tung in mi 30 val si uh a, sun leh zan cih omlo misi kivui uh ahih manin Ak nangawn in ziin leh vaak mel tello in, zongh khuangman lo liang hi kici hi.
1956, June 10-19 sungin Tungzang khua ah naungek natna tung in naupang 25 si hi. Tua tungtang in Tonzang pan in RC nungak siangtho te pai in tuisiangtho thehna leh zatui zatang tawh bawl uh a, natna daipah hi. Tua tungtang in RC pawlpi kiphut suakpah hi.
1960 kum in Mauvom khua ah Gilsan zavaat natpi tung in mi 20 val si hi. Tua kum in khua sungpan lo lam zuan uh a, tua a lo zuatna uh logam zong tudong in Gilsan Zau cilai uh hi.
1969 kum in Vongmual khua ah a tuinaak pan un sisan bangin guu luang in, a ne kha a dawnkha te ci na in si uh hi.
1972 kum in Laaitui ah pulpi zavat natna hong tung a, naupang a banban in si hi. Tua hun laitak in Dr. Sian Za Kam (Laaitui khuami) in Tedim ah asep laitak ahih manin hih thu azak ciangin hong delhpah vingveng hi. Khua sungah ekbuk teng leh vokbuk tengah Tho-kangza kapsak in, tui minsa dawn ding hong vaihawm in, a na laitak te zatui zatang tawh deihtak hong bawl ciangin hih pul natna hong bei hi.
1996 kum in Dimpi khua ah sungpai zavat natpi piang a, mi 26 si hi.
1996, May 6 ni in Sekpi khua ah a tuinaak pan un Si-gel luang a, beelkang khap 7, beel 3 dimbang kidawh man hi, kici hi.
2000 kum in Tuitawh khua ah natpi tung a, mi 26 bang si hi.
2000 kum in Theizang khua leh a kiim teng ah zong sungtholh natna laang mahmah in kal khat sungin Theizang te mi 9 bang si in kal khat sungin nisim in misi kivui hi, ci hi.
2001, Aug - Oct kha 3 sungin Muallum khua ah natpi tung a, mi 16 si hi.
2019 kum beikuan in Sen gam Wuhan khuapi pan kipan in leitung ah Corona virus hong piang a, hi hangin pul natna hong tung a, kha 4 kha 5 sungin leitungbuppi ah kizel hi. Hih natna in kilawh baihin kisi ahih manin Leitung cidamna lam Kipawlna (WHO) te in Leitungbup pulnatna (Pandemic) in ciamteh in March 11, 2020 ni in tangko khia uh hi. Kawlgam ah zong March 23, 2020 ni in, Yangon le Tedim khua nih ah hong tung ta hi ci in Kawlgam cidamna lam pan in tangko khia uh hi. Kawlgam ah hih natna a kimuh masakpenpen na zong Kaptel khua hi a, INGO khat ahi PSI te ii clinic ahi SUN clinic Kaptel panin hong muhkhiat uh ahi hi. Tua panin Kawlgam ah hong thang semsem aa, Tedim khua sung mahmah leh khua tuamtuam pan zong COVID-19 natna hangin mi tampi si hi. Leitung bup a linglawngsak natna COVID-19 pen leitung kumpi thuneihna tawh dal zawhding hilo hi. Leitung ah pulnatna tampi a om hangin tutung-a zah-a kizel natna, 21st century ah om nailo hi. Khualzin gamvak kikham in, nasep silbawlna mun tuamtuam te leh Biakinn leh sanginn te zong kikhak hi. Tua bek hiloin innciat ah om ding, midangte tawh kikholh loh ding, muktuam bulh ding cihciang kitung hi. Khua tuamtuam inzong eima khuatek ah natna akilawhloh nadingin khuanawl tek ah gate bawl in a phamawh mahmah lobuang kuamah kilut saklo, khualmi limlim lutsak vetlo cihbangin na kisem tek hi. Gamdang aa om tenzong lunghimawh in sumlehpai, vanlehna tawh ma kipang tek aa, a diakdiak in Zato lam nasem te in sunlehzan ihmu manlo phial, tawlnga manlo phial in na hong sem uh a, khuasung aa CSO leh khangno volunteer te kipiakkhiatna te hangin hih COVID-19 hangin a si tampi ih om hangin a na tampi ten zong damna ngahkik banah a na nailo te zong kilawh loin tuciang a phadawm dinmun tawh a ki om laitak ahi hi.
Thukhupna
Hih a tunga ih genpak muhmawhgal ih cih te in atunga ih gen tengbek cihbang hiloin, ih phawkpak teng ih genpak hi a, Nasepna tezong tu aa zahbek cihna hilo in, ih kitheihpihloh, ih ki phawkpihlo thasanna, piakkhiatna, kipiakkhiatna leh supna baina zong tampi a om ahi hi. Hih thupiang te ih etkik ciangin leitungah a piang nakhempeuh te in Pasian theihloh kal aa piang omlo a, Pasian in deihna nei-a apiansak ahihlam hong phawksak hi. “Bang hang hiam cih leh na khempeuh ama pian'sak hi a, na khempeuh ama hang leh ama minthan'na ding bekin a om ahi hi. Mi khempeuh in Pasian phat tawntung ta hen! Amen.” (Rom.11:36)
Thu tawk nate
Rev. Pum Khan Nang, Zomi Encyclopedia Tedim Edition, 1976
Muallum khua Pasian thu tunzawh kum 100 cin leh A 29 veina GLKP laibu (2009)
Theizang khua leh Tuiphum pawlpi tangthu (2004)
Rev.Tun Khan Zam’ kaihkhop Tungzang khua tangthu (2022)
Pu Lang Lien Thang, Tungdim khang tangthu (2014)
Rev. Thang Siam Lian, Zomite Ngeina leh Innpi te tangthu (2015)
Rev.Thang San Mung, Tedim khua leh Mang thu kituahna
Editorial, TEDIM POST, Vol_2_No_26, August_1_2015
Editorial, ZOMI POST, August, 2015
