AMA’ THUSIM
Agelh ~ Kap Za Khai (Photoh)
Kawlpi-a teng ka lawm in ama kiang ahawh dingin hong sam ahih manin zingsang tungin motor cycle tawh ama kiang ka paiphei hi.
Amah le kei pen neulai-a kipan a kikhawl le a ki-it mahmah lawmta ka hi uh a, amah kum (10) a phak hun ciangin a innkuan un Kawlpi-ah kituah uh hi. Ka kikhen hun laitka ka lawmta-un kikhen zoloin ka kikah uh, tudong phawk lai ing. Ka nu in ka kah uh hong muh ciang hong paiphei-in ko tegel hong kawikawm in, “Bawite aw, kap kei un, na gol uh ciang kimukik ding hi uh teh… kap nawn kei un…” ci-in hong hehnem hi.
Khal huih hong hiauhiau-in, singkung tungpan singtehte a pulh hun laitak ka lawmte innkuan pen pianna khua nusia-in Kawlpi lamah manawh uh hi. Kawlpi-ah a ten kum a kipan tuni dong kum 20 bang sawtta hi. Ka lawmpa’ mel ka mitkha-ah bawl kawmin, kimuhkal ding ngaklah kawmin, kei zong Kawlpi lamah ka kinawh mahmah hi.
Kei pen ka lawm tawh ka kimuh ciangin nuam mahmah le dah mahmah ing. Ka nuamna pen amah tawh cidamin kimuhkik theihna hang hi a, ka dahna pen amah taksa kimlo a, ka muh man hi. Ama khe a veilam kitanin ciangkhut tawh lam a pai hi.
Ka lawmta-un kikawi-in, tua khitteh tutna-ah tu-in neulai thute le tuahkhak thute ka sutkhiakik uh hi. Ka lawmpa pen taihinn hoih khat zong nei in hau mahmah hi. Zi le ta zong nei khin hi. A hauhna thusim theinuam ka hih manin,
“Lawm aw…i kikhen khit a kipan na nasep dante hong genkik dih ve…” ci-in ka kun hi. Ama’n hi bangin hong gen kik hi.
“Lawm aw, i kikhen khit ciang, kei pen tan 10 dong sangkah ing. Ahi zong tan 10 ong zolo ka hih manin motor nungzui sem ing. Bang hang hiam cih leh ka pa pen kumpi nasem ahih hang damlo zel ahih manin innkuan sung nuntakna haksa ka sak man hi. Tua kawmkal-ah ka naunu’ sangvai zong omlai ahih manin kei zong ka hih theih zah na semin sum ka zong hi.”
“Motor nungzuihman sum manman ngahlo kahih manin namgim khuk-ah zin ing. Kum 3 sung na ka sep ciang’ namgim khuk thum ka nei a, tua khuk thumte zong a sawtsawt ciang hong kang hi. Ka sum ngah pawlkhatte ka lawm khat tawh vanzuak vanlei sepkhopna-ah zang ing. Hih nasep pen kimet mahmah hi napi’n ka damloh sungin ka lawmin sumteng na taipihin sumbuk le van nengneng bek na koih lai hi. Kei zong ka dam ciang a cil mahmah mihau khat kiangah sum leitawi in ka sumbuk zuakmah zomsuak ing. Kum nih a sawt ciangin ka sumbuk gei-a inn khat mei kangin, ka sumbuk zong lawhphei-a tua sungah ka neih lianpi teng bei lawh ing. Hi bang hun laitak ka pa’n hong nusia lai-in inn vai, lo vai khempeuh ka nu le ke’n ka van hi. Tua laitak mihaupa’n sum hong siik-in pia zolo kahih manin zuminn pan thonginn ah hong puak hi. Thong sungah kum khat sung ka om kal-in mihaupa in ka inn le huang na zuaksak lailai-in ka nu le ka nau pen ka paneute innah kituah uh hi. Ka naunu pen tua hunin tan 10 a zawh hang College kah zolo hi.”
“Thong pan ka suahtak khit ciangin sum leitawi in Mogok ah suangto-in ka pai hi. Tua sungah tuahpha lel ing. Ahi zongin damlo zel kahih manin nasep mapai mello hi. Ka sum ngahte ka nu khak in inn le huang ka leisak kik a, ka naunu zong college ka kahsak hi. Hi bang tawh kum 5 bang ka sep khit, nikhat ni ciang ka nasepna mual hong cimin ka tai leh suang khat in ka khe hong dengkha-in liam pha mahmah ahih manin hong kitansak hi.”
“Mogok pan ka ciah ni-a kipan tuni dong vanzuak nasep mah na semsem ing. Ka saipi na muhnop leh…” ci-in kongvang pua lamah a khut a kawk phei ka et leh lamka thumna munah a gol mahmah vanzuakna sai taihinn pi khat ka mu hi.
“Lawm aw… nang pen gal hangpa hi teh… mi khempeuh’ kihtak haksatna phu zo a, guallelna le suplawhna tampi na tuah hang, nasem teitei-in aniampen dinmun pan a sangpen dongah nang le nang kilamto zolai teh…” kipahna aw tawh ka cih leh, ka lawm hong nuihmai kawmin, “Nang bel hong ci mah ni teh, ahi zongin kei le kei bel na kihawmthawh den ing” hong ci hi. Ke’n zong,
“Lawm… hi bang dinmun na tun theihna banghang hiam?” ci-in ka dong hi. Ama’n hong dawngkik lo in zing-an hong nekpih hi. Annek khit ciang nai 4 sung tawlnga-in thu tuamtuam ka kihoho uh a, tua khitteh ka ciah hi. Ka ciah ma-in ka lawm in lai-ip nih le van tampi hong pia hi. Inn ka tun ciang lai-ip khat ka hon leh laidal kang sitset tungah a kigelh laigual tomno khat ka mu hi. Ka lawmpa nuntakna a thahatsak hih laigual ka muh ciang kipahna tawh a gingkhia-in ka sim hi.
“Cikmah hunin lungkia ngei ken…!”
NB: Zomi Siamsin Magazine, Vol.III, Nov.2009
