Steve Jobs (1955 – 2011) Tangthu
Agelh ~ Hau Za Cin (Phuitong Liim)
Apple Computer co-founder Steve Jobs in kum 56 bek pha in October 5, 2011 niin California khuapi khat Cupertino ah hong nusia hi. Lawm kholh siamlo leh mi huham, ama thulo thu a simlo leh mi tawh kikhawl siam mello hinapi a lunglut leh a ngaihsut vanglak a tawp dong a tunpih mateng a tawpsanlo pa ahi hi.
A lunglut vanglak ah a lungsim tam pialua ahih manin thudang tawh a buai manlo, mi ngaihsutna zong akhual manlo hizaw aci pawl om hi. Bangbang ahi zongin ama khuak pan a ngaihsut khiat vanzat tampi lak ah – Mac book, iPhones, iPod, iPad bekbek zong a dawmsan hinawnlo a, leitungah nathak, vanthak a ngaihsun khia tampi lakah mipite deih mahmah ding a ngaihsun siam mahmah lakah kihel denta ding hi.
Steven Paul Jobs pen San Francisco ah February 24, 1955 in sangnaupang lawm kingai kop khat sung pan zawlta in hong piang ahi hi. Anu min Joanne Schieble hi a, apa Syria gam pan piang Abdulfattah Jandali ahi hi. A pian in a nu leh pa in kemlo in mi pia uh a, Paul leh Clara Jobs te in a ta dingin na la pah uh hi.
Midang ta dingin a kilak khit a sawtlo in a nu leh pa kiteng veve uh a tanu khat nei in amin Mona Simpson hi a, tuin America gama laigelh siam minthang a hi hi. A picin dong nau numei a neih theilo a, a nau in zong u a neih theilo hi. Paul leh Clara in ata lak uh Steve pen US te electronics industry phualpi Silicon Valley ah khangkhiasak uh ahih manin a neu pan electronics lam hong lunglutpah ahi hi.
Buddhism Biakna Zui:
High school a kah ciang sang kong khak sung Hewlett Packard ah nasep ngah a a lawmpa Steve Wozniak tawh a semkhawm uh hi. A sangkah zom suaklo in kumkhat khit ciang video game bawlna Atari company ah sum thalawh a, a sum khol khempeuh tawh India zinding a vaihawm hi. India va zin takpi a, US a ciahkik ciangin a lu mettolsa in tung giap hi. India puantualpi khat silh deda a, zatui zaha tawh luvai in a om ngei thu leh Buddhist a suak thu gen a, a biakna hangin a sih ni dongin sa peuhmah ne nawnlo, anteh lohing bek a ne (vegeterian) ahi hi.
India pan a ciahkik ciang computer lunglut kipawlna ah a lawmpa Wozniak tawh kihel uh a, a lawmpa Wozniak ama zattawm ding computer bawl na kipan lingling hi. 1976 kum ciangin Jobs in a lawmpa computer bawl pen computer lunglut kipawlna geia computer zuakna mun ah 50 tak na zuakkholhsak thei bilbel hi. Computer zuakpa panpihna tawh computer machine Jobs in hong bawlkhia a Apple 1 cih min a phuak hi.
Apple pan kitawpsak:
Apple pen ama singgah duh leh limsak penpen ahi hi! Apple in a computer suak masa video games kimawlna Atari sangin minphatna hong ngahzaw mawk hi. Apple 1 pan a sum ngah khempeuh uh tawh hanciam kik uh a, Apple II a bawlkhia uh hi. Tua pen 1977 kum in California gamsung Computer Fair ah kizuak hi. Computer bawl man tam lut deuhdeuh ahih manin Jobs in mihau Mike Markkula kiangpan sum USD 250,000 leitawi a, tua teng tawh Apple Computer Company cih hong kipan uh hi. A thum (Jobs, Wozniak, Mike) un hanciam mahmah uh a, Apple II ading parts tuamtuam midang kiang pan lei kullo in amau a vekpi in bawlkhia thei uh hi! Lawhcing lua mahmah ahih manin kum 1993 kum in US Dollar Million guk sanga tam manzaw zuak khia uh hi.
Sum muhna hong tam luat mahmah, company hong gol mahmah ciangin Jobs in company paidan ding vaihawm siamna a neihloh luat manin Apple Computer sungah buaina nengneng hong pianga, a tawpna ah sumbawlna lam a sem siam mi sum tawh a cialta uh hi. Tua banga midang a cial uh ciangin a micialpa un Jobs pen “thumanglo, genhak” ciin ciamteh hi. “A khuaksungah nasep dan ding a ngaihsut siam hangin Company adingin hoihmaw, hoihlo cih ngaihsunlo in ama ngaihsut bangin a mawk gamta gawp a; tua pen company khantohna ding hoihlo hi,” ci hi.
Kum 1984 kum ciangin Macintosh hong bawlkhia uh a, ahih hangin sum tampi suplawh uh hi. A vanbawl uh khawnglo, a khan ding zah in khanglo ahih manin tua supna khempeuh Jobs genhak man, ama thu bek a deihluat man leh ‘bu’ a sep luat man hi ci uh a, company sungah buaina lianpi hong pianga, a sawtlo in Apple Computer panin amah kihawlkhia hi.
Toy Story:
Apple Computer pan a kitawpsak khit ciang a lungsim so semsem ahih manin hahpan deuhdeuh a, NeXT Computer cih company khat hong kipan leuleu hi. NeXT a kipat zawh kumkhat a cinna 1986 kumin Graphics Group kici khempeuh Star Wars movie bawlpa George Lucas kiang pan lei a, a company zong NeXT cih panin Pixar ciin khek pah hi. Tua a van leite tawh ama company thak ah milim bawltawm bawlna (animation graphics hardware) hoih mahmah bawlkhia ziahziah a, tua a bawlte Disney milim ah kitam zat mahmah hi. Tua milim tampi lak ah khat Toy Story cih hi a, kum 1995 kuma kibawl hiin USD 350 million val meet mawk hi! Tua zawh in A Bugs Life, Finding Nemo leh Monsters Inc cihte zong a bawl hi.
Apple ah CEO sem kik:
Toy Story film cihte a bawl khit kum khat a cin ciangin Apple te in ama company NeXT pen USD 400 million tawh leikik uh a, a sawtlo in a lianpen tutna Chief Executive Officer mah ah tusak kik uh hi!! CEO thak a hih ciang a hun masa sunga a sep khialh tampi puahpha in a meet tamlo vanbawlna khempeuh khawlsak, beisak in electronics vanzat hoih nono bekbek bawl ding hong kipanta uh hi.
Tua lak pan a zuak khiat masak penpen kum 2001 a kihawmkhia iPod ahi hi. Music ngaihna lamdangpi leh a tuampi khat hong suak mawk ahih manin a neu liklek bek thamloh bil tawh ngaihna a kang (white) liklek bek zong lamdang a kisa hipah malam hi!! iPod minthanna dingin iTunes behlap a, internet pan mite in a ut bangbangin la, music kuikhia ziauziau uh hi (download music and songs at ease).
iPhones:
Kum 2003 ciang sinkha natna namkhat pancreatic cancer kici ngah a, kikhei ding utlo ahih manin annek kidawm in at loh in a damna ding a hanciam hi. Deihbangin dam lam manawh mello ahih manin kum 2004 ciang ki at a, a natna Apple Computer sunga nasemte simloh midang kiangah genlo uh hi. Kum 2005 ciangin Walt Disney Company te in a company khat Pixar pen USD 7 billion in lei uh ahih manin Disney ah amah sum tam sung pen suak a, ama sum meet tampen pah hi.
Tua zawh kum nih, kum 2007 ciangin mipi leh leitung khempeuh in a ngaklah leh a mitsuan uh iPhone bawlkhia uh a, a lei masa ding kituh in Apple zuakna sumbuk khempeuh ah mite nai tampi kigual khol liang uh hi.
Kum 2008 ciangin laptop lak pan a pan pen, a tangzang pen a kigen Macbook Air bawlkhia leuleu uh a, amah Jobs mah in mipi mai ah a sumkuang vun melpua puanak silh in Jeans lui mahmah mel tawh a ding hi. A mu peuhmah in “gawng” lua sa uh ahih manin lamdangsa, lungnuamlo in a om uh hi.
A natna nasia semsem hi ding cih upna lian semsem a, kum 2009 kumbul a kha guk nasepna pan tawlnga pak ding cih a kigen ciang bangin a si pah ding phial in a lungnuamlo leitungbup ah mi na tam mahmah hi. Ama bawl iPhone, iPod, iPad, Macbook te hang bekbek a mihing hizah in a cidamna a lungmanpih uh lamdang a sa liang hi. “Hormonal imbalance” ahih manin doctor te in tawlnga phot leh a deih uh ahi hi.
Kum 2009 April kha in a sin khek in sinthak thuah a, amah a khoi doctor te in a dampih pah ding hi ci uh hi. Ahi zongin January 2011 ciangin Apple company in, “Steve Jobs in a cidamna a hoihzawkna dingin tawmvei nasep tawlnga ding hi,” ciin a pulak uh ciangin mipi linglawng semsem hi. US President Barack Obama in zong va veh a, a natna ciang banghiam cih mipi theih dingin kipulakkhialo ahih manin mite in a sisuaksuak dingin muangmawh kik uh hi.
Kum 2011 August kha in Apple CEO a hihna pan tawp a, a tawpna laikhak ah: “Apple lawhcinna taktak mailam ah omlai hi. Tua lawhcinna gahpha zaw mu ding leh ka septheih bang sema huh lai dingin ka hanciam ding hi,” ci hi. Ahi zongin leitungbup in a lamet leh a ngaklah iPhone5 a pianma, iPhone4S a kihawmkhiat ni a zingciangin mi khempeuh in a pelh theihloh sihna hanmual lam hong zuatsan hi. A tangval laiin zawlta numei khat neizo a; 1991 kumin a zi Laurene tawh kitengin ta thum anei uh hi.
Amah banga mihau Microsoft founder Bill Gates tawh a kibatlohna khat pen Jobs in a hauhna sum leh pai mi cimawhte huhna dingin piakhia ngeilo hi. A biakna Buddhism upna ahih hangin kim leh pam hoihna ding khualna cih zong nei mello a, a van bawlna phualpi ah kim leh pam a siasak thei ding van leh nate pelh ding hanciam leh kin masak in nei khollo ahih manin kim leh pam hoihna ding a khual pawl Greenpeace te in nakpi in gensia ngei uh hi.
Steve Jobs pen amah bek a kimuang, amah ngaihsut bang a ngaihsunlo te tawh kimemat ding leh kikholh luat ding kisam asa khollopa hi napi, amah a kimuan mahmahna hang leh a hanciam mahmahna hangin mite deihtheih ding nam van hoihnono hong bawlkhia zo veve pa ahi hi. Ama ngaihsut bang a ngaihsun banlo te tawh a kikholh manloh hangin ama ngaihsut bang a ngaihsun bante tawh na lian tampi hong semkhia veve cihna hi a, mi lamdangpi khat bel hi mawk hi!!!
A lamdang mahmah khat bel mite mit ah a etlawm mahmah ding, a tangzang, a zat nuam, a melhoih nono mite in nisim naisim a avelvel nop dinguh a ngaihsutkhiat, a bawlkhiat theih banah sum leitawi lianga zong a leinop dinguh bawlkhia thei himawk hi. Mipite kiangah, “Bang deih na hiam ciin a deih uh bawlsak ding hilo a, a deih ding uh khat i bawlkhit ma-in tua i bawlsanga hoihzaw deihkik man uh hi cih tel ding ahi hi,” ci hi. Mipite deih ding mipiten a ngaihsutkhiat ma un en i muhkholhsak khit ding kisam hi a cihnopna hi. Muhkholhna a kisapzia a laknuam ahi hi.
A sih ding zong mukhol khin hikha ding ahih manin hih bangin na gen ngei hi: “Kuamah a si nuam omlo hi. Vantung gam tung ding a kicite zong sih ding ut masa peuhmahlo uh hi. Ahi zongin sihna pen i vekpi in i tuak ding i pelh theihloh vai khat hi a, a silo ding kuamah i om kei hi. Tua ahih manin sihna pen nuntakna tawh a kizom lak pan a hoihpen himai ding hi. Banghang hiam cih leh nuntakzia kikhelsak hi. A thak a pian theihna dingin a lui nate paipih hi. Tu laitak in nang a thak na hi a, a sawtlo in a lui na suak dinga nang zong na lengmang ding hi. Tangthu gen tawh i kibat hangin a taktak ding thu a gen ihi hi. Na hun a kiciangtansa hi a, sau veilo kha ding hi. Midangte nuntakna en kenla, nang nuntakna a hoih a manpha pen ding ngaihsun in nungta in.”
Behlapna: Amah phawkna kammal pawlkhat:
Apple Computers Office:
Dahna lianpi tawh Steve Jobs sih thu kong tangko uh hi. Mipil, mi hanciam, kuhkal leh ngaihsutna ciim nei ahih manin i nuntakna nakpi takin noptuamsak hi. Steve hangin leitung nuntak nakpi in noptuam hi”
US President Barack Obama:
“… America na thak bawlte lak ah mi ngaihsutloh bang a ngaihsun ngam, leitung nuntak kilamdangsak thei ka hi cih zah donga ngaihsutna hangsan a nei leh a ngaihsutna picingsak dinga pilna a neipa ahi hi… Computer tawi ziauziau dinga a bawl ban ah internet i puan ipsungah hong puasak ziauziau ahih manin thukizakna a manlang bek hilo in a tangzang mahmah hong suaksak hi….”
Zomi te lawm Ciamnuih Group a piangsak Facebook founder Mark Zuckerberg:
“Nong pattahna leh lawm hoih na hihna ka angtang hi. Ka khutsuak khat in leitung kilamdangsak thei hi cih nong lahkhiat manin ka lungdam hi. Hong phawk mahmah ning.”
A lawm Steve Wozniack:
“Lungsim manlang mahmahpa hi ciin ka ciamteh den ding hi. Company nasep dan ding ngaihsut kholhna ka genkhop uh ciang ama ngaihsutna dikpen den phial hi. Na ngaihsunkhol khin cihna hi… tua ahih manin a pil tuam mahmahna leh a ngaihsut siamna, vanbawlte ah bang behlap leng mite deihna khangsak ding cih a muhkholhna pen a lawhcinna thuguk ahi hi. Madawk mahmah hun ding thei a, nungzuih a kul hun ding zong khentel siam mahmah hi….”
Mangpha khakna: Mangpha Steve Jobs!
