Ka Neuthu Mangmawh Pawlkhat - Part​​ 2​​ (Pa​​ phawkna No. 07-10)

(Astract from Ka Pian Sinthu Vol I)

Agelh ~ Awn Za Pau

07. Kapa Aang Lum

 ​​ ​​​​  Ka neu lai in ka pa’n phalbi zingsang cih bangteh puanza liangvat kawmin, a anglum sungah hongtawi a, khua sungah akisa ngei gunh khollo Thahdo la ci-in a sak dan a tumdangpi khat sa kawmin, innlim ah hong tutpih sek innka ah hong khuadakpih sek in hong tawitawi aa, tudong ka mangngilh thei kei hi.

08. Kapa’ Hongpiak Daan​​ (Punishment)

 ​​ ​​​​  Khat vei zan khat kei upmawhin nitak nai 9 bang a sat naii tam, kanu leh kapa kikal a ka lup lai ahihi. Ka kipatna zong thei nawn keng inh a zan kah pen ka khawl thei mahmah kei hi. Kei mahmah zong tawp ning ka cih hang kitawp thei peuhmah lo in ka kap ngawh semsem hi. Ka nu’n hong khoi le lah tawp thei lo, hong taii thuah le lah kap nuam semsem, a sawt ciangin kapa zong lungtom hi ding hi ven, lupnapi pan hong pumtuah in, bangkua khanglui kongkhakpi​​ (Guapek kiphan akipheisawn)​​ hong in innlim sangkil nuai ah hong khia aa, kongkhakpi hong khaksan hi. Innka lam ka et phet in kha pen lim taan mahmah seusau a, ka innka uh leh ka tangzom/tangbante uh kilim muh mahmah hi napi, laulua kisa in tawn daidai in ka kap ngawh semsem hi.​​ 

 ​​ ​​​​  A sawtlo in kongpi hong in ka pa’n hongpi kik pah a, lupnapi tung ka tunma in ka kah ka khawl thei pah hi. Ka nung ngaihsut teh hong nusiacip ngam hetlo ding, kongkhak vang pan hong ensim gige ding cih ka phawk sansan hi. Kah zong kham kei leng, akitawp thei mahmah lo hi cih ka phawk hi.

09. Kapa Honggen Sikha Thu

 ​​ ​​​​  Kapa in ​​ amau tangval lai in Innpi sawm​​ (Pu Do Tual inn)​​ ah khuazat khit ciangin, sawm tangval ki-muang pianteng in sialkhau muanhuai mahmah hual khat khun sa in a sawmte kongbiang kongkan pua lamah paikhiasak hi. Amau inntual panin sikhate tawh khau kisuh ding toto uh a, a sawtteh sikhate tawh khau ka kisut thei takpi cih khawng ahong gen ngei ka za hi. A khau kisut khawng khah vat leh kongbiang san teng ah sikhate tuuk in luum hethat uh cih khawng hong gen ngei hi.

 ​​ ​​​​  Tua banah innnuai innka khuamte zankim zankhang mahin kisimsak uh a, tua pen ‘khuamgual sim’ kici in sikha tona dan mah suak hi. A kihangsan sak akimuang mahmahte’n va sim takpi a, tua a va sim tak ciangin sikhate in tua a innka khuam gual leh a luteng na sutuah kawikawi ahih manin, a sawtteh nasa in innnuai pan hong kilehkik pah uh zong om hi ci hi.​​ Bangmah sikha hi ta leh dawite hi ta leh khemna a thuaklote pen a vang nei mahmah sikha leh dawite naleng in bangmah a cih ngam loh in kigen pah hi.

10. Lobuk Ah Kapa Gul Thikthilil In Khiim

 ​​ ​​​​  Sim lam kapu kapate khang pekpek a ka lokhawhna uh Hawl ah amah kia lokuan a, sun an aneek khit ciangin tawmvei tawlnga in lobuk sung a taangkat tungah thallup ditdiat pen, a sawtlo in a ihmut suakin mengme diaidiai hi. A mengmet dan zong nidang tawh kibanglo in huih dam nung hiauhiau in a zaknop la ngaih mahmah dan tawh kithuahin, a bil ah a zakkhop lian bektakin aging a zak ciangin, bangtan vei sawt hiam cih theihloh kal in amah zong lamdang sa in a lungsim ah nidang tawh kibanglo a sakteh, a ngaihsutna lungsim khat in tumdangsa in kikhanglo sak dingin kiziazia phot hi.​​ 

 ​​ ​​​​  A phawk taktak teh atung a et pah leh ama lupna tung santak lobuk innsun ci-ingh san tengah gul gol mahmah khat kivial ngenngan in ​​ amah a ngimngim laitak mu kha hi. Amah zong tho to pahin sing tumh khat la in a den pah leh a lu kha lo in a gul suakta aa, ​​ lau kisa in phit kawmkawm leh a ngawng tungsak leh peeksak deda kawmsa in lotaw lamah kitholhsuk hi, ​​ cih zong hong gen ngei hi.