HUNTHAK KHA MANGTHANG
Agelh ~ Kap Za Khai (Photoh)
Leitungah Pasian’ hong lainat penpen thu in amah a theilo kha mangthangte a Tapa tawh hong zongin ama kiangah tunpih in tawntung nuntakna piak ding ahi hi. Pasian hong sawl a Tapa a um kha mangthang khempeuh in, a beisa hun ah bangzah in mawhna leh khialhna a neih uh hangin Pasian in maisak in itna tawh tuam in tapa za leh gamh luah za pia beh lai hi. Pasian in ama tawntung gamh pen leitung mite tungah pia nuam mahmah ahih manin nisim in a sawltakte ahi evenglist-te ahi zongin, pastor-te ahi zongin, mi tuamtuamte ahi zongin zangin ama kiangah a zuan ding kha mangthang zongsak den hi.
Tua bangin Pasian sawlna a omna tawh kizui-in mimal leh pawlpi in kha mangthang zon ding kihanciam ciat a, kha mangthang mat ding kilunggulh mahmah hi. Kha mangthang mat nadingin a munmun, a phualphual ah camp leh crusade kibawl ziahziah in Pasian’ thugenna kitawlnga lo hi. Mi pawlkhatte in gammial ah paikhia in kha mangthang tampi Pasian kiangah tunpih uh hi. Mi pawlkhat leuleu in tualsung mission ci-in a omsa pawlpi sungah Pasian thugenin pawlpi mi kituh niloh uh hi.
Mi pawlkhatte muhna ah kha mangthang pen gammial bekah tham loin pawlpi sungah zong tampi om veve ci uh hi. Hi kha mah ding hi. Lungdamna thu a za ngeilo kha mangthang tampi a om bangin, lungdamna thu zaza napi-in a piangthak theilo mi bangzah i pawlpi sungah a om diam? Tua dan mite pen gupna ngah ding leh tawntung nuntakna ngah dingin Pasian’ sapna ngahte sungah kihel lote i ci ding hiam? Lai Siangtho in bel, “Mi khempeuh in hotkhiatna ngahin, thuman a theihkim ding Pasian in deih hi (1 Tim. 2:4)”, ci ahih manin pawlpi sunga a piangthak theilo kha mangthangte vai lim ngaihsut kul mahmah kha ding hi.
Topa Jesuh hun lai-in zong Jesuh’ thuhilh zaza napi-in a piangthak lo mi tampitak om ahihna Lai Siangtho tungtawnin kimu thei hi. Amaute in Jesuh thuhilh za munlua uh ahih manin a piangthak lopi a piangthak mah kisasa uh hi. Ahi zongin Jesuh sihna pan a thawhkik khit ciang bekin a piangthak taktak mi bangzah pha cih kilangkhia taktak pan mawk hi. Tuhun ciangin zong i cihsa mah bangin camp leh crusade bawlna tawh kha mangthang kinak zon mahmah a, sumlepaai, neihlelam, pilna siamna tampi suahkhia in Pasian adingin na kisem mahmah hi. Tua bangmah in kha mangthang pawlkhatte’n zong a mawhna uh kisikkik in upna tawh Jesuh Khrih sangin Pasian piak nuntakna ngah uh hi. Ahi zongin mi pawlkhatte pen a pianthak leh a pianthak loh uh zong kithei loin Pasian thugenna khempeuh ah pai in thungai uh a, gupna ngah kikkik thei uh hi. Tui bang thum vei li vei kiphum uh hi. Tua bang hi napi-in a nuntakna uh bangmah kikhelna leh kilamdanna nei tuanlo uh hi. Tuadan mite pen kei muhna ah, “Hunthak Kha Mangthang” ci-in min ka piak ahi hi. Lai Siangtho thu leh Pasian thu thei mahmah napi-in a piangthak theilote, kam bek tawh piangthak in Kha Siangtho a neilote cihna hi.
Tua bang hunthak kha mangthangte i kimlepaam ah tam mahmah ding hi. Pawlpi sungah buaina hong pia dente, pawlpi khantohna a nawngkaisakte, mission sep ding veina a nei lote, Jesuh’ hilhna bangin a mang lote ahi uh hi. Pawlpi sungah hunthak kha mangthangte pen pawlpi mi mawkmawkte zong hi thei a, pawlpi upa-te leh makaite banah pawlpi siate zong hi thei veve hi. Hih thu pen leitung mitmuhna tawh sangin Pasian muhna ah kilangzaw mahmah ding hi. Aihkeh pawlpi sunga Kha Siangtho tawh a kidimte in zong mu ding uh hi.
Kha mangthang zonna ah hih hunthak kha mangthang zonmah haksa pen dingin ki-um hi. Amau pen Pasian thu tawh kisai limlim a zak, a theih, a tel tamlua ta in lungsim leh khuak sungah dim phitphet khinta ahih manun kiguanbeh thei nawn lo hi. Tua hangin Pasian’ mi zatte thuhilhna a zak uh hangin sangzo nawnlo, a lungsim sungah guang nuam nawnlo, nuntakpih nuam nawnlo uh hi. Amau neih leh theih bekmah man pen, dik pen, kicing pen sa uh ahihna tawh kizui-in thudang peuhmah bangzah in hoih a sak uh hangin kipuah sawm nawnlo ngiat uh hi. A tawpna ah leitungbup a om mi khempeuh in amau kiangah thu kidong den leh ut ta uh hi.
Amau bekmah pawlpi sungah panmun sang ngah taak cih leh, pawlpi thulela khempeuh ah amau kihel loin a piangthei lo bangin kingaihsun ta uh hi. A sawtsawt ciangin hih bang mite in Khrih’ pumpi pawlpi pen amau neihsa mihing kipawlna company suahsak sawm ding uh hi. Tua bang hunthak kha mangthang leitungah ni khat khit ni khat hong tam semsem ta hi. Amaute adingin kikhel theihna Pasian in lampi koihsak ahihna zong kiphawk leh hoih ding hi. Amau leh amau hoihtak leh kiciantak ki en pha kikkik in, kisikkikna leh upna tawh Jesuh kiang zuatkik ding kisam hi. Tua bang ahih kei uh leh lozau sungah taang tawh a po khawm tahum kungte tawh kibang lel dinga, ni tawpni ciangin Pasian in amaute meiphual sungah lawnkhia ding hi (Matt. 13:28-30).
Hunthak kha mangthang hihna pan suahtak nadingin, Pasian’ hong deihsakna bangin amah kiangah lungsim leh pumpi tawh a bucing ki-ap ding kisam hi. Lungsim kongkhakte hongkhia in Jesuh Khrih lutsak ding kisam hi. Thulela kitheihsaknate paikhia in, kiniamkhiatna tawh Jesuh khephung ah zuat ding hi. Piangthak masa photphot in. Tua khit ah Khrih’ nungzuih ding hi. Pawlpi vai a tawpna penpen ah koih ding hi. Amasa dingte nunungsak in, a nunung dingte i masak den khak manin pawlpi sungah hunthak kha mangthang a khang semsem zong kihi thei ahih manin i pawlpi kalsuanziate limtak ki en kik in kipuahpha kik ni.
