Zudawnna Hangin A Kingah Thute
Agelh ~ Kap Za Khai
Kawlgam mi laigelh siapi P. Moe Nin in ama kiangah ahawh laigelhsia Tet Toe kiangah ‘No khangnote zudawn peuhmah kei un’ ci-in na hanthawn a, Laigelhsiapi khat mah ahi U Pone (Chemistry) in zong ‘Innkuan sungah zudawn a om leh tua innkuante khangto ngeilo ding hi’ na ci hi. Lai Siangtho sungah zong zudawnna hangin a khangto sangin kiamsukna a ngah mi thu tam kimuh zaw hi. Buddhism sungah zudawnna hang kingah thei thusia nam (6) na pulak uh a, tuate in:
Neih le lam kiamsuk hi.
Kitot kiselna piangsak hi.
Natna tuamtuam ngahsak hi.
Vang kiamsak hi.
Thusim kilang khiasak hi.
Ngaihsut theihna kiamsak hi.
Tua bek tham loin zu kham ciangin (1) mi that ngamna, (2) mi’ neihsa gukna, (3) nulepa (sex) mawh bawlna piangsak, (4) mi khemna piangsak cih bangin a nungthu tampi kingah thei hi.
Lai Siangtho sungah zong zu leh guihtheih khamtheih zatna hangin a kingah thei siatna pawlkhat kimuthei hi. Tua-te in:
Omzia tatzia hong kidawmsak lo, sia sak hi (Pian. 9:21-22).
Gim piak samsiatna hong ngahsak hi (Isa. 5:11-12).
Dam lohna, sihna ciang dong hong piangsak thei hi (1 Sam. 25:36-37).
Pasian piak mangmuhnate mu theisak lo hi (Isa. 28:7b).
Thukhen dingte hoihtak khentheisak lo hi (Isa. 28:7c).
Kamtam sakin kitawngsak hi (Pau. 20:1).
Neihlelam zawnna hong pia hi (Pau. 23:21).
Gal neisak, dahna tuaksak, liamna ngahsak, mitsan sak hi (Pau. 23:29-30).
Internet sunga ‘Thulela kikaihkhopna Blog’ pan kisuaksak zudawnna hangin kingah thei siatnate zong hi bang ahi hi: Pumpi Cidamna Hong siasak thei a, sin bawk, sin keu, sin cancer, si khang, li phiat, lungtang gol in lungtang thanem, gilpi natna, gilzang bawk, khuak leh thagui thanemna, kam leh gawl sung cancer, zu gu kahna, lu liamna leh sihlawhna dongah hong tungsak thei hi. Lungsim lam tawh kisai in, zu in, lungkiat baihna, lungkham luatna, thu ciapteh zawhna kiamna, lung-apna, cihte hong ngahsak thei hi. Mi dang tawh kizopna ah zong zu in, innkuan sung buaina kitotna, sumlepaai kitasapna, mi buanna, cycle le motor accident, cihte hong piangsak thei hi.
Hih atunga thute i et ciangin zu leh guihtheih khamtheih zatna hangin ahoihna thupha sangin ahoihlo thu tamzaw ahihna kimuthei hi. Hihte tungtawnin zong ei leh ei ki-it leng, innkuanpihte it taktak leng zu leh guihtheih khamtheih peuhmah zat huai vetlo ahihna tel ni. Tua manin Lai Siangtho in zu leh khamtheih tui tuamtuam zat ding hong kham ahi hi (Isa. 5:11-12, 22; Rom 13:13; 1 Kor. 5:11; 6:9-10; Efe. 5:18).
