Zomite'n I Kepcing Ding Thu Nam (6)
Minam itna;
A masa penin Pasian deihna tawh Zomi ci-in i piankhiat lam hong gen nuam masa ung. Israelte'n a minam uh itin mun tuamtuam ah a tung uh hangin a minam uh kemcing uh hi. Ei Zomite pen mimal a zong kitam lo ahih manin minam itna takpi tawh minam manthan loh nadingin kemcing ciat ni.
Pilna;
Leitungah pilna a thupitzia i thei ciat hi. Pilna, siamna, nei kei le'ng mi maiah kitung zo lo ding hi. Ei Zomi Khangno a tam zaw in tulaitak sum thalawh dingin gamdang kipai tek hi. Gamdang a pai sung pan 100 ah 99% in sum zong ding bekin pai uh hi. Tua dana paite hong ciah uh ciangin sum leh pai bek mah hong tunin pilna hong tun lo uh hi. Tuapen mailam ah ei Zomite ading patauhhuai mahmah hi. Gamdang pai ten' hanciam takin pilna sin nading thupi ngaihsut le uh hoih ding hi. Lai Siangtho sang kah tam mahmahin pawlkhat in hun tomno sung a nek khak ding lametna tawh kah uh hi. Lai Siangtho sangkab a hoih mahmah hang mailam thukhualna tawh secular lamah zong Distance khawng tawh thuah le uh hoih ding hi. Mailam hunah pilna mah hong thupi ding a, mi nuaiah i omnop kei leh pilna, siamna tampi i neih ding kisam hi cih, hong thei sak nuam ung.
Zopau Leh Zalai;
Minam khat sungah pau leh lai om kei leh minam mangthang thei cih thu i theih ciat hi. A beisas hun lai-in Zogam sungah Zolai kisinin, tun kisin thei nawn lo ahih manin dahhuai mahmah hi. Kawlgam, Zanggam ah a tung Zomi Khangno tampi tak in Zolai, Zopau pau thei nawn lo, siam nawn lo-in i minam i hihna kiphawk nawn lo hi. Hih danin paisuak le'ng mailam khang khat, khang nih sungin Kawlgam, Zanggam aa om Khangno te'n ei pau leh lai thei nawn lo ding uh hi. Tua ahih manin Nu leh Pa, u leh nau te'n i tate, i naute Zolai, Zopau mangngilh loin a theih ciat ding uh ei mah tek i tavuan hi cih hong thei sak nuam ung. Zolai sinna a om leh zong i tate, i naute pello-in puak ciat un cih hong hanthawn nuam ung.
Ngeina;
Ngeina thei kei le'ng i Zomi ihihna zong picing tuan lo ding hi. Minam khatihih nak leh ngeina thei ding, kemcing ding hi hang. Khangthak MOMNO te zong laam tuamtuam theisak, laam sakin ngeina tuamtuam te bei lo, a mangngilh loh nadingun Nu leh Pa, u leh nauten' panpih ciat ni.
Biakna;
Topa Zeisu i theihna leh Pasian hehpihna tawh Zomite hih dinmun ciang dong kitung thei a hih manin Pasian i upna hih sangin a zah tampi i khantoh sak ding hong thupi ding hi.
Lia leh Taang;
Zomi Khangnote'n i theih ciat dingin ei zat Lia l'eh Taang mah kemciat, zang ciat ni cih hong hanthawn nuam ung. Pu Leh Pate hun lai peka i zat, Zomi Khangnote min mai ah i gelh a hi Lia leh Taang pen cik mah hun a mansuah lo ding hi hang. Midang ten' bangbang hong ci zongin minam itna tawh Pu leh Pate lai pek pan i zat Lia Leh Taang mah maizum lo takin, hangsan takin, zang ciat, kem ciat ni cih hong hanthawn nuam phapha ung.
Source:
MOMNO
LOM XVII, Hawm 3 Dota Kha (Dota) (March) 15, 2009
Laibu Saal / Zomi eLibrary
