Zomite Pasian upna Pawlpi (Saptuam) Kikhenna
Agelh~Khansuan T. Guite
I biak Pasian kibang a, i upna zong kibang ban-ah, i Laisiangtho zat zong kibang na pi’n, bang hangin pawlpi/saptuam (church) kikhen thang zelzul i hiam? cih theihnopna kinei a, kidotna zong om zelzel hi. Pawlkhat in tua bang dotna leh theihnopna pen thusimh khollo in zong awlmawh selo hi. Pawlkhat leuleu in tua dotna thupi sa in, a mau muhna dan zui in a hang gen khia hi. A hang a kan ut, a kan utlo leh a awlmawh lo mi ki om hi.
Pasian kibang, upna kibang leh Laisiangtho zat kibang ahih manin mi khempeuh pawlpi/saptuam (church) khat ah kigawm ding cih thu zong a piang thei ding thu hituan lo hi. Tua mah bangin, minam khat i hih manin minam bup in pawlpi/saptuam khat bek ah om ding cih ahi zongin, khua khat leh beh khat i hih manin pawlpi/saptuam khat ah om ding cih ahi zongin kuamah in sawltan theihna omlo hi. I tupna kibangin, i lampi tawt a kibat hangin i pai utdan kibang khinlo ahih manin hi kha ding hi.
Ahi zongin mi mawkmawk khat na ngawn-in kilawmlo a sak, “tua ci zaw leh hoih zaw ding hi” a cih thu pawlkhat na om veve hi. Pilna nei makaite a hilo, mi nautang khat in zong a lungsim sungah “lawmlawm aw” cih thu agen tak ciangin tua thu pen kilawm nawnlo hi zaw ta hi. Pawlpi/Saptuam a kiphuhna pen “Laisiangtho zat kibang leh upna kibang mite in Pasian a biak khop theihna ding” ngimna hi masa pen hi. Tua biakpiakna kikhopna ah mi tam semsem in a mun leh mual in hong cin zawh nawnloh ciangin mun khen a biakpiakna neih pen mipi in sang thei hi. A mun leh mual, a kim leh kiangin a cin lo lah hi hetlo bek thamlo in a mimal zong kikhen tak hetlo upna leh zuih kibang mite kikhen a biakpiakna tuam neih ciangin “a pualam kicinlohna hilo in, a sunglam kicinlohna” khat a om thei na hi zaw hi. Tua sunglam kicin lohna pen Pasian leh mihing kikal a kizopna tawh kisai lo a, mihing leh mihing kizopna in sai zaw hi. Kammal dang khat in gen leng mihing in Pasian mai a zonna leh Pasian lungkimna ding zonna thu tawh kisai hilo a, mihing leh mihing kikal kilung kimlohna pan na hi zaw hi. Vantung gam lutna ding leh Gawtmun lutna ding thu tawh kisai masa lo zaw hi.
Pawlpi/Saptuam kikhenna pen hoih hi ci a, a gen pawl zong om ding a, hoihlo hi ci a, a gen pawl zong om ding hi. A piang na khempeuh pen a hoihna leh a hoihlohna tawh a tonkhawm den ahi hi. A hoihna lam in a leek zawh ciangin a hoih zaw in kimu thei a, a hoihlohna lam in a leek zawh ciangin a hoihlo in kimu thei hi. A piang thu khat nungzui (results) in tua a piang thu’ hoihna leh hoihlohna thu khen hi. A piang na khatpeuh a pian tak ciangin a hoihna i zuun nuam a, a hoihlohna i khaktan ut ahi zongin a pianna a hang bulpi kan masa in thei masa leng i sepna ah mazang zaw tawntung hi. Zomi thu-um mite sungah Pawlpi/saptuam kikhenna zong a hoihzaw ahi zongin, a hoihlo zaw ahi zongin a hang kan in thei leng ahoih zawk leh i zuunna nuam ding a, a hoih kei zawk leh i khak tanna nuam ding hi. Zomi Pawlpi/Saptuam sungah kikhenna a hang tampi om ding a, tuate in bang hi pen hiam cih tawh kisai in April 22- May 04, 2019 kikal sungin mipi tungah dotna (polls) khat kibawl a, tua polls tungtawn in mipi muhna a nuai a bang ahi hi. Tua polls ah ngaihsutna leh muhna hong pia mimal 210 pha hi. A mau te muhna in:-
Dotna:
Zomi sungah biakna pawlpi/saptuam a kikhenna a hang bulpi bang hiam?
Dawnna:
Mun leh thu neihna (position & Senior Pastor) kituhna = 141/210 (67%)
Doctrines (Thu up guipi) kibat lohna =34/210 (16%)
Tanau meltheih, beh leh khua kibat lohna = 12/210 (6%)
Biak piakzia tha ngahlohna = 8/210 (4%)
Sum le paii vai ah diktatlohna = 8/210 (4%)
Mission na sepna ah utna mun kibat lohna =4/210 (2%)
A dangdang = 3/210 (1%)
Zomi mimal 210 khat in a mau muhna a genna pan in 67% (za- ah sawmguk le sagih) in mun leh thu neihna (position & senior Pastor) kituhna hangin biakna pawlpi kikhen hi ci uhhi. Zomi bup in hih dotna a dawng, or muhna agen hi leng, Zomi bup’ 67% kiim in pen tua bangin a mu ding hi ci’n a tunga polls result pansan in ki deih kaih thei hi. Tua mah bangin in dotna kidong a dangte zong Zomi bup in a dawng kik ding hi leng, hih dotna a hong dawng mite dawnna tawh kizawi tawn pian dingin ki deih kaih thei hi.
Zomi sungah biakna pawlpi/saptuam a kikhen thang ziazua na a hang pen mipi a tamzaw muhna ah panmun leh thuneihna kituhna hang hi zaw hi. Hih a hang bulpi pen i sittel tak ciangin Pasian leh mihing kikal kizopna leh Vangam lutna ding tawh kisai kha hetlo hi. A kiu dang khat pan en kik leng, panmun len thei ding teng leh thu neihna nei thei ding mite hang hi kici thei hi. Panmun len theilo leh thu neihna nei theilo ding mite in tua mun pen tuh selo ahih man ahi hi. Panmun len thei ding mite leh thu neihna nei thei ding mite in tua mun a ngahna dingin leitung ci leh sa vai in beh leh phung, khua leh tui leh pawlpi makaite tungtawn in na sem kha pahpah uh ahih manin pawlsung ah buaina piang thei zel hi.
Pasian biakna vai ah a thupi masa ding a kilawm thute hangin pawlpi/saptuam sung kikhen hi hang a ci pen mi tawm zaw hi. Pasian thu leh la, Pasian tawh kizopna vai hangin pawlpi kikhen tawm zaw a, mihing kikal vai thu hangin pawlpi kikhen tam zaw cih mipi muhna tungtawn in kithei khia hi. Pasian thu leh la ah kituak na pi’n pawlpi/saptuam kikhen veve pen vaihawm dan leh panmun gualh dan kisapna khat om ahih man ahi hi.
Pai nopna kibang lopi mite pen lam tonkhop dingin a ki tal kaih theih hilo hi. Ahi zongin pai nopna kibang pen i lampi zong kibang ahih manin tonkhop ding sawm leng kiton khawm thei ding hi. I tonkhop theihna dingin ki ho lem kul a, kitheih siam tuak leh ki khual tuak (compromise) bawl kul hi. A mai a pai ding, a nung a zui ding leh khut kilen a pai ding cihte kician tak in a kisapna mun ah gel theih pen thupi hi. A mai a pai ding kituh den kei in, kikhualna omlo in “ei bek a masa den ding” in i kikoih leh i lawm te’n hong zui ut lo ding hi. A tawpna ah ei bek a masa den ding a i kiseh a, mun i tuhtuh leh ei bek paiziau ding suak thei hi.
