ZOMITE LEH POLITICS MABAN - TUT MUN PAN LUNGGEEL
Politics i cih kammal pen Ancient leh Medieval Worlds panin hong kizang kammal hi. Politics cih kammal lian pen Greek kammal "polis" kici "city-state" a cihna panin hong kilakhia ahi hi. Political science cih kammal pen amasa pen dingin Greek political theorist leh philosopher "Father of Poltical Science" ci-a kiciamteh Aristotle in zang masa pen hi. Aristotle in political science cih kammal pen "nuntakna hoihna nei, deihhuaina om" (virtuous life) tawh ki-ukna om ding deihna tawh a nialna kammal dingin a zat ahi hi. Politics i cih pen gam khat ahih kei leh khawk khat (country or area) sung ki-ukna;kivaipuakna hoih (governance) om theihna dinga kipawlnate gamtatna genna hi a, adiak diakin thuneihna len parties sungah kinialna genna hi. Politics i cih pen pilna leh siamna sin khempeuh siam theih hilo a, political science sinna leh theihna nei lote adingin sai theih hilo hi. (Nautang leh mi mawkmawk tengin zong sai theih kim napi politics kalsuanna muibun thei lo hi).
Tu hun teh theology tawh doctor (doktal) buaih ngah khinsa, a sin laite leh degree nengneng ngah sia ten a tavuan un mangngilh in, cing ding uh tuute (pawlpi mite) awlmawh man lo liangin Pulpit tungah a ut bang teng uh a ot theih bek uh tawh hunsa nawn loin (deih khop loin, lungkim loin) cik mahin a sin ngei loh uh minam vai (politics) ah thuneihna a neih beh nuam lai tam mi mahmah ta uh a, buai ding buai lo buai loh ding teng buaipih masa in Siamsin (learners) ten politics a sai ding uh hoih maw hoih lo cih peuh tawh poll bawl liangin a buaipih tam mahmah ngeingai uh hi. Pulpit tungah a thugen uh kuamah in a nial ngei loh bang sasa lai-in a thugen khempeuh uh kinial ngam lo ding sa-in politics thu hong nak gen mahmah ta uh a, hong kinak bual mahmah ta uh hi.
Tua banga theology tawh buaih ngah politics sai nuam leh makai nuam ten sal panin Israel mite suahtakna dingin Pasian in a teel ngiat Moses bang gentehna dingin nak zat mahmah ngam dep uh hi. Moses i cih Egypt gamah Judahte a tam luatna ding uh leh Egypt gam mite a ukkhum ding uh dalna dingin Judahte tacil (naupangte) teng thah cimit hun lai-in a kiseelna naungek lawh Nile lui-a kisil Faro' tanu in mu in, ama' tapa bangin a kep dingin a lak ahi hi. Moses pen nautang mi mawkmawk banga kikem leh khangkhia hi deksuai lo a, Faro Kumpipa' inn sungah khangkhia pa hi. Gamvai (politics), galdo siamna dingin sinna nam tuamtuam leh pilna nam tuamtuam kumpi inn sunga ngah theih leh sin theih khempeuh a sin ngiatngiat a, a kipattahna teng a siampa ahi hi.
I theology doktal leh siate in Siansin khangno ten gamvai a sai ding uh kihta in, zadah mahmah uh a, biakna leh gamvai ah thu hong neih khum nuam tam mahmah in, online panin awngawng uh a, ngongtatna peuh thapia in kuku uh hi. Gamvai leh minam vai buplak nuam bangin hong kuku ta uh a, a thugente uh a thukimpih mi tam mahmah ta hi cih kimu thei hi. Tua bangin i pai tohtoh leh tanglai-a Pope in gamvai khempeuh buplak manin Central Europe gam a kum sawm thum sung Roman Catholic leh Protestant biakna zuite kikal ah kitualvatna leh mihingte tangthu (human history) adingin a siahuai pen biakna gal "Thirty Years War" (Religious War zong a kici, 1618 - 1648) lam manawh in, biakna doctrine tawh tuu leh keel banga Zomite saseh sat banga hong sehsat a, pawlpi thak phuankhiat beh bek a siam sia teng nungzui ihih khak ding lungngaih tham cing mahmah hi. Sila khatin to nih nasem thei lo ahih manin Siamsin khangno ten biakna siate a to (master) na a sep theihna dingun a taw uh i suih a, a tuu cing dingte uh a lim takin kep khinkhianna dingun sawl hun mahmah ta hi.
Galkap thahat leh ngongtatna gum a kuku ten hih thu na lungngai masa un: US in 1945 in Super Power a ngah khit nungun Vietnam War ah Galpi Nihna hun-a chemical galvan kizang sanga a leh nih val a tam zaw Napalm leh Orange Agent zang in, galvan hoih nono teng tawh Galpi Nihna hun in Europe leh Asia gam sunga bomb kikhia zah sangin bomb tam khia zaw uh hi. Tua hi napi-in US leh a kipawlpih South Vietnam gamte Saigon khuapi 30 April 1975 in People's Army of Vietnam (PAVN) leh militia group National Liberation Front of South Vietnam (Việt Cộng a kici zaw) ten lak sakin, Saigon khuapi panin US galkapte, diplomats leh a innkuanpihte uh leh US tawh kipawl-a a gum South Vietnam mite guallel dipdep in, "Operation Frequent Wind", “Operation Babylift”, "Operation New Life" tawh helicopter tawh galtai a kihepkhiatna uh pen history adingin galtaite kihepkhiatna lianpen (greatesrt human evacuation in human history) leh US President li guallelhna hi ci-in na kiciamteh hi. Vietnam War history na sim un la, a documentary film na en masa phot un. Galkap thahatna tawh mipite thuneihna leh suahtakna suhsak zawh ding hilo hi.
Siamsin ten politics a sai ding deih loin ngaihsutna khuak thak, laikung leh ngongtat lohna (non-violence) tawh Zomi political movement kalsuan ding deih lo ten Martin Luther King Jr. in non-violent protest (ngongtatna zang lo-a lungphona) leh civil disobedience (tangpi tangta in kumpi leh thukham man lo mang lohna) tawh Civil Rights Movement (African-American civil rights movement or American civil rights movement) na makaih a, mikang leh mivomte kikhentuamna;kituamkoihna (segregation) nasiatna pen Alabama state sungah Montgomery Bus Boycott (1955–56), North Carolina state ah Greensboro sit-ins (1960), Tennessee state ah Nashville sit-ins, 1963 Birmingham Children's Crusade leh Alabama state sungah 1965 in Selma panin Montgomery marches (1965) kici tawh lamzuihna nei-in, non-violent activities tuamtuam tawh gualzawhna a ngahna thu na sim un la, "Selma" film beek na en un.
Alabama a ngongtatna tawh Civil Rights Movement bengdai nuam pa Alabama Governor term li len George C. Wallace in US president li vei a tuh hangin lawhsam a, kithah sawm (assassination plot) in thau tawh a kikapliam manin a khantawn zeng (paralysed) hi cih thu na phawk un. Tua hun a Alabama police chief len pa zong a term kikna ding a tuh hangin mivom candidate tungah lel lai hi. Ngongtatna tawh gamtatna sawt gualzo ngei lo hi. Ngongtatna tawh kiphinna dingin mivomte a makaih leh 1964–1965 in Civil Rights Movement gum in kihel pan Malcolm X kici February 21, 1965 ( kum 39) in Manhattan, New York ah kikaplum hi. Ngongtatna deih ten ngongtatna mah thuak uh a, thau muangte thau mah in si uh hi.
Civil Rights Movement sunga Moderates kici ten kituambawlna leh kideihsaktuamna (discriminatory practices) beisakna dingin Congress tawh kipawlin nasemkhawm uh a, a ciamteh tham ding federal legislation tampi bawl uh hi. Non-violent tawh Civil Rights Movement kiphinna pen tu hun lai-in biakna makai minthang mahmah Billy Graham nangawn in na gum lo hi (a tawpna lamah gum hi ci zong om napi mikangte leh biakna makai mikangte in a gup manin sihna a tuah khit nungin a gup pen thumanna leh hangsanna lahna hilo hi) Texas Senator leh Democrats Senate majority leader Lyndon B. Johnson in Senate Judiciary Committee ah Civil Right bill khak hi. 1957 in House of Representative ah Civil Right bill vote 285-126 (Republicans 167–19, Democrats 118–107) tawh kipassed a, tua khitin Senate ah vote 72-18 (Republicans 43–0, Democrats 29–18) tawh kipassed a, President Eisenhower in a bill September 9, 1957 in thukimna suaikai hi. Tua khit nungin Civil Rights Act of 1960, Civil Rights Act of 1964, Voting Rights Act of 1965, Civil Rights Act of 1968 (Fair Housing Act), Ratification of a federal constitutional amendment: 24th Amendment (1964) legislation kibawl a, tua lo Civil Rights Act tuamtuam kibawl toto a, 1991 dong Civil Rights Act of 1991 (providing the right to trial by jury on discrimination claims and introducing the possibility of emotional distress damages, while limiting the amount that a jury could awardhi) kibawl hi.
President Johnson in Civil Rights Act of 1964 thukimna suaikai a, hih thukham hangin ci leh nam (race), vun piandan (colur), biakna (religion), pasal numei (sex) leh pianna gam hanga kideidantuamna kikham a, voting registration a kisam dingin a kikim lo (unequal) application ciin'na kikham a, nasepna ah kideidantuamna kikham a, sanginnte, nasepna munte leh tangpi tangta khawlna munte leh zin tunna munte (public accommodation) ah mikang leh mivom kideidantuamna leh kikhentuamna (racial segregation) kikham hi. Voting Rights Act of 1965 bill tawh minam neute (minorities) tungah vote khiat ding dalna kiphiat a, federal government in voting registration leh election encik a, state khempeuh ah minam neu tungah vote khiat theihna ding hamphatna (voting right) kipia hi. Fair Housing Act of 1968 in inn leh lo zuakna ah kideihsaktuamna leh kideidantuamna kham hi. Civil Right Movement hangin African Americans mite kideidantuam diakna Southern States ah mivomte politics ah hong lutkik thei uh a, khangno leh siansinte in tha hong ngah uh hi.
Civil Rights Movement a makaihsiamna leh a ngaihsutna thuthuk (philosophy) hangin 1964 in Martin Luther King Jr. in Nobel Peace Prize pahtawina ngah a, Taliban gam-a ngongtatna tawh siamsinna sanginn a numeite sangkah ding a dal Talibante ideology a lehdo ngam Malala in a ngah ma Nobel Peace Prize ngah naupang pen suak hi. Memphis, Tennessee ah black sanitary public work nasemte mikangte tungah nitha kipia zah a kipiak loh lungphona gum dingin March 29, 1968 in Walter Bailey' Lorraine Motel Room 306 Martin Luther King Jr. zin tung a, white supremacist ngongtat James Earl Ray in 6:01 p.m., April 4, 1968 in second floor balcony ah Martin Luther kap liam a, 7:05 p.m. Thursday, April 4, 1968 in a sih hangin Martin Luther' nasepkhiat hoihte leh ngaihsutna thuthukte (philosophies) thahsak zo tuan lo hi.
I gam leh minam maban limci ding i deih leh pilna leh siamna sin, politics sin-in theihna nei Siamsin khangnote lo lametna dang om lo hi cih phawk hun ta hi. Tu hun i ngah theih ding i phattuampih theih dingte bek na lamet leh tu hun-a makaite bek thapia in la, Siamsinte langpang in. Zomite tu hun leh maban adingin Zomite khangthakte ading leh hamphatna ngah theihna ding lametna na neih leh Siamsinte leh khangtote thapia in la, lam man lak zaw in la, tuu leh keel banga kikhenna ding lampi sial saksak nawn kei in.
Democracy ki-ukna nuai-ah om ta ihih manin makai khat pepeuh a cinh lo, a gina lo, a thuman lo leh thu mu thei napi sepkhiatna tawh lakkhia thei loin kampi bek tawh na hoih gengen thapaite pen meetang leh mee kuang (vote & ballot box) tawh vik khiat pahpah a, laihkhiat lianlian hun hita hi. Siansin ten dictatorship bangin hong ukkhum ding peuh kihtakna pen thu om lopi kihtakna hi. Singkung gina khat tui buakbuak in, ek lei tawh i phungvuh thapai det hangin gah hoih gah tuan lo hi cih phawk ding kisam hi. Makai ut teta a, Moses paulap nuam den tengin Moses in pilna nam khempeuh kumpi inn sunga kingah thei teng sin in, a siam masak bangin hong sin phot uh hen la, hong siam phot ta uh hen! Lawi tung tuan siampa sakol tung tuan a siam pahna ding thu om lo a, saili kapsiam pa, thau kap siam ding hi cih 100% kici ngam lo hi.
Theology buaih ngah ten political science sin masa loin a siamna ding uh om vet lo a, pawlpi mite tuu bangin a cing ding uh leh kha mangthang a mat ding uh a tavuan lianpen uh hi zaw hi. Zomi cih minam kammal peuh Zoomi tawh laih ding doktal leh biakna makaite Zomite maban politics makai dingin kisam nawn lo hi. Kum zalom 21 hun hita hi. I siamna leh i tavuan ciat sem in, makai za kituhtuh kei zaw leng i politics cidam ding a, i minam khangto thei pan ding hi.
Photo: "Gam it hi ing, hong zui in," cih otpih a makai khempeuh nung zuih pah ngamhuai lo hi cih phawk ding kisam ta hi.
Tut mun pan a lunggeel : Thang Khan Lian
