ZOMI NAM NI THUGEN DAN PUAH PHATNA
Agelh ~ Khaibawi Zomi
THUPAT NA:
Minam picing khat ahih naak leh minam ni na neiciat uh hi. Tua ahih manin Zomi Nam Ni I bawlciang, I gamtat I luhek dan a naupang vai mahmah, a namtom lungsim mahmah khaphial zongin Zomite minam picing, minam liankhat ahih na hong phawk sak a, a picing gamtat ding leh nampi lungsim nei-a, thusaupi khual in thuman thu tak tawh Zomi a kici peuhmah kalsuan kul, nuntak kul ahih lam zong hong phaksak hi. Sitni.Pu. Chin Sian Thang in Minam Ni khat peuh aki bawl ciangin a gam uh suahtak ni, a mipi te'n matut gualzahna thupi tak aneih man ua, ki bawl hi acih mah bangin ZOMI NAM NI i bawlna a hang zong tua mah ahih lam hong phawksak hi.
ZOMI NAM NI HONG PIANKHIAT DAN:
Chin Affairs Council te makaihna tawh Oct 9,1950 in Falam ah kikupna minamvai nasia takin nei uha, I mi nam ni ding in Feb 20 ni zangin 1948 kum panin panni cih thukim na nanei uha, a kum kik 1951 kum in Mindat khua ah Feb 20 ni in Zomi Nam Ni na bawl uh hi. Kawlgam Priminister UNu leh Zomi ulian tampi tak zong kihel in President of Burma I lungdampihna lai zong simkhiatna nei uh hi.
BANG HANG IN TUA NI NA BIKHIAH UH HIAM?
Feb 12—23,1948 in Mha Thray Sithu Pu. Capt. Mang Tung, Burma President Soa Sha Thaike te’ makai in Falam ah tangmi 5000 bang kikai khawmin gam le minam vai nasia tak in ki kupna na nei uh hi. Hih khawmpi ah Tedim, Falam Hakha, Matu, Kanpalet leh Paletwa panin mi paitek uh hi. Tua hun ah Mangkangte hong piak ki ukna, Chin Hills Regulation Act zatsuakding leh zatsuak loh ding zong, ki kupna nasia tak in nanei uh hi. Pu. Capt. Mang Tung Nung in hun makaih Tuithang Khua-a, Pu.Thang Za Kai Sukte Beh (Sia.Kam Khaw Thang pano) in zingsang nai 10:00 hun pawl in ukpi ukna abei nading thusung in adeih loh na Lai tawh agelh apiak khitteh kamtawh genlai a, Falam lam pa’n tang mi Pu.Chun Mang Lai Zokhua leh Kanpalet pan tangmi Pu Hang Bung Thang te-in thu kimpih na gen uh hi. A deih laipawl om ahih manin mee(vote) khia uha, mi 5000 lak ah 4983 in deihlo in mi 17 bek in deihlai ahih manin tuani a kipan vote a tamzaw thukim nazui uh hi. Mangkang kumpite hong piak ki ukna Chin Hills Regulation Act mipi a tamzaw thukim na tawh kizangh nawnlo, sita ahih manin tua ni pen Zomibup ading mi namdangte hong ukna pan suahtakni, gualzawh ni khat hong suak hi.
CHIN HILLS REGULATION ACT AKI BAWL HUN:
Mangkang kumpi te’n 1896 kum in Zogam hongla uha, Zomi I pu I pa te’n Zothau leh lum le tei tawh a nado uh hangin, a gal vanzat uh kikhailua mahmah ahih manin a kum asim bang nadota le-uh na zolo uh hi. Tua ban-ah Kum 1896 August kha ni 13 ni-in Zogam buppi ukna dingin British Parliament ah Chin Hills Regulation Act hong bawl uha, tua tawh Kum 1911 Octo 9 ni-in Zogam hong uk uh hi. Tuatawh kum 50 sung hong uk uha, siahtung siahphei kaihna(tax) hong omin Zomi tampi tak-in gentheihna gimna tawlna thuaklawh pikpek uh hi. Hih ki ukna abei theihna dingin Zomi makai pawlkhat Ware khua ah Sept 29, 1932 kumin ki kupna nasia takin nei in, Chin Hills Union Organizations (CHUO) na phuankhia uh hi. Hih kipawl na min tawh mangkang kumpite tungpan suahtak nading ngetna lai zong piapah uha, ahi zongin mangkang kumpi ten asan zawhloh na uh thu leh CHUO pen ki pawlna manlo hi, ci-n Feb 20, 1938 in zasak kik uh hi. Hici bang thu a zaksak kik uh ciangin mipite tungah mangkangte hong ukdan a deihloh na uh, hong khang semsem zaw a, mipite sungah ki pumkhatna hong leh om zawsop hi.
CHIN HILLS REGUALTION ACT KOI MUNTENG AH KIZANGH:
Chin Hills Regulation Act pen Zogam bek ah ki zangh hilo in North Cachar Hills, Garo Hills, Khasi, Jaintia Hills, Naga Hills leh Mikil Hills dong-ah na zangh uh hi.
ZOMI NAM NI IN HAKSATNA TUAK TOTO:
“1948, February 20 ni pen Zomite lunggulhna teng tangtut khit theih ni, ci mah ta leng, Aung San ki thahna leh Gen. Ne Win ii kumpi kahnate hangin i hamphatna teng kibuaksuah kik khin hi. Tua ahi zongin Zomi Nam Ni i neihna in Minam Khat i hihna hong lak veve ahih manin a manphatna kiam tuan lo hi.” Kum 1956 kumin Chin Affairs Minister Pu Za Hre Lian hun lai-in Zomi Nam Ni pen December ni 4 ni hihsak ding, a sawm manin 1958 kum dong buai lawh hi. Revolutionary Council kumpi hun, 1966 kumin BSPP Party, Mindat Unit Organiser U Myint Thein in Zomi Nam Ni pen February ni 9 ni hihsak ding leh a min zong Chin Special Division Day cih dingin hanciam kik hi. Zogam in State a ngah zawh, 1975 kumin Chin State Council zum in February 20 ni pen Chin State Ni cih ding gingsak leuleu uh hi. 1981 kum panin Kawlgam kumpi in Zomi Nam Ni zat limlim phal nawnlo uha, Chin State Day cih ding mah-in Chin State Council Hakha panin Calendar leh Post Card khawng kumpi Sum tampi bei in bawl uh hi. Tua cibang thuteng aom ciangin Kum 1991-1993 ciangin Sang naupang Siamsin kipawlnate makaihna tawh Feb 20 ni ZOMI NAM NI ci-in Zangkong University, Mandalay University aom Zomi Sang naupangte in ZOM NAM NI, ZOMI PHUNPI NI, cisuak ding hihang, ci-in Chin State Council te cih pen sang nawnlo in 1981 – 1988 dong ZOMI NAM NI ci-ngiat in na bawl uh hi.
1991 Kum ciangin a 44 veina kibawl a, galkap kumpi in Chin State Day cih ding in Signboard sung lela liang uha, Pawi abawl uh hangin kuamah pailo in amau omnaciat ah ZOMI NAM NI mah ci-in nabawl uh hi. Tua laitak political Party Mara people’s Party, Chin National Leaguage for Democracy, Myo Khui Party, Zomi National Congress leh Independent te’n Kawlgam Khuapi Zangkong Bo Aung Kyaw Street, No.393 First Floor ah UNLD member khempeuh tawh ZOMI NAM NI nabawl uh hi.
BANG HANG IN KAWLTE TAWH KI PAWLKHA MAWK I HIAM:
Mangkang kumpite tungah suahtakna I ngahna ding ngetna thu General Aungsan in azak ciang in amau Kawlte kia in lah Mangkang kumpite tungah suahtakna a ngetnget uh hangin na ngahzo mahmahlo uha, CHUO makaite Dec 13, 1946 in samngiat in ki pawlkhawm a mangkang kumpite khutsungpan suahtakna ngahnading, semkhawmni ci-in ki kupna na nei uha, tua thu tawh kizom in a nih veina thu kikup pen Feb 12, 1947 ni in, Shan gam Pinlong khua ah nei-in a ki thukimna uh Pinlong agreement kici hi. A nih veina ki kupna ah Pu. Pum Za Mang damloh na tawh kihel zolo ahih manin ama tang dingin Saizang ukpi Pu. Thawng Za Khup na sawl hi. Zogam panin Pilong Agreement ahthukimna Suai a vakai pen Pu Thawng Za Khup, Pu Hlur Mung, leh Pu Kio Mang te ahi uh hi. Hih ki kupna ah Shan State, Kachin Hills leh Chin Hills sung aom makaite pawlkhat na kihel uha, anuai thukimna limtak na bawlkhawm uh hi.
KAWLTE leh NAMDANGTE KHUTSUNG I TUNNA A HANG:
Pinlong thukimna (Pinlong Agreement) hang in Jan 4, 1948 kumin Mangkangte khutsung pan suahtak na Zogam, Kawlgam leh Mualtung gamteng in ki ngah a, Union of Burma ci-in ki pawlna min na phuankhia uh hi. Ahi zongin Bogoke Aungsan mi gilo te’n thau tawh hong thahvat ciang un hih aki thukimnateng uh Kawl te’n tuni dong hong sem nailo uha, zawhthawh thu tawh hong uk in amau sila, amau ukcipna sungah tuni hong koih uh hi. Tua ahih manin khangthak Zomi te’n I pu I pa te lunggulhna a tangtun’ theih nading in I pilna, I siamna, I neihsa sum le pai, tha le ngalte itsiitlo in I nak hanciam mahmah ding, Zomi Nam Ni I bawl ciangin hong phawksak diak hi.
THUKHUPNA
Mangkang kumpi te’n Zogam hong lak ma un Zomite pen ei le ei a ki uk hi-in I gamveng Kawlte leh Indiate a kipan kua mah in hong uk ngeilo uha, suakta tak-a, a nungta, a kalsuan minamte I hi hi. Zogam zong, Zomi I pu I pate satsa mah hi-a, Zomite ten ma-in kua mah nateng ngeinailo hi. Tua ahih manin Zogam leitang pen Zomite neihsa, satsa, go le gamh dinga, Pasian hong piakngiat khat ahi hi. We are indigenous people in our country, not immigrants people in our country. Zomi Nam Ni I bawlteh bang hunteh Zomi Independence Day or Zomi Freedom Day ki ngahding, ki bawlzo ding hiam cih limtak ngaihsun a, I thungetna ah I apding thupi mahmah hi. Tua dingin I biak Pasian mai zongin thumanna(truth) thutanna(justice) cihtakna(faithfulness) tawh I ki makaih, I ki nungzuih, I kalsuan, I sepkhop kul ding hi. Tuate ki hellopi in Zogam leitang leh Zomi te’n suahtakna kingah ngeilo ding hi, cih tukum Zomi Nam Ni ah akua mahpeuh in phawkidng in kadeih hi.
Ref:
1.Capt: Mang Tung Nung: A 7 VEINA ZOMI NAM NI TEDIM KHUAPI AH
2. Pro.C. Thang Za Tuan: ZOMI NAM NI HONG PIANGKHIATNAZIA
3. Pu. Chin Sian Thang: ZOMI NAM NI
4. Tg. Vungh Za Pau: ZOMI NAM NI HONG PIANKHIATNA THU
5. J. Thang Lian Pau: ZOMI NAM NI THU
6. Rev. Dr. Khen Za Sian: ZOMI NAM NI
Source :
from: Khaibawi Zomi laizomzomi@gmail.com [zomi] <zomi@yahoogroups.com>
reply-to: zomi@yahoogroups.com
to: zominam <zominam@yahoogroups.com>,
ZD Group <zomidaily@googlegroups.com>,
zomi@yahoogroups.com,
tongsan <tongsan@googlegroups.com>,
ANZ-ZOMI <anz-zomi@googlegroups.com>
date: Thu, Feb 16, 2017 at 10:06 PM
subject: [ZONET] ZOMI NAM NI THUGEN DAN PUAH PHATNA
mailing list: zomi@yahoogroups.com
