ZOLAI, ZOPAU
Agelh ~ Rev. Dr. Pum Suan Mung
Zolai pen American missionary J. H. Cope hong bawlsak hi a lungdamhuai mahmah hi. Laisiangtho, labu leh laibu tuamtuam hong bawlsak hi. Tua banga hong bawlsak lai-in Roman alphabet (ABC…) zangin a awsuah tawh kizui-in “lai” hong bawlsak ahi hi.
Laipau leh Kampau
Lai pen a bulpi-in laipau (written) leh kampau (spoken), ci-in nam nih-in kikhen thei hi. Thugenna, thungetna, tangkona, thusunna, cihte laipau leh kampau-in kigen thei tuaktuak hi. Gentehna-in, “Na dam uh hiam?” (laipau); “Dam maw?” (kampau).
Laipau Kampau
Ahi zongin A’i zong
Ahi ve A’ive/a’ve
Ahih hang A’ih hang
Ahi diam? Ai diam?
Ahi dia? Ai dia?
Ahih kei leh A’ih kei leh/ahih keh/a’ih keh
Hi ve-in hi ve’n
Nading Na’ng
Pai lehang Pai le’ng
Tua ahih teh Tua a’ih teh/Tua’ih teh, etc.
Lakam
Tua ban-ah la phuah cianga kizang kammal zong om-a, tua pen lakam kici hi. Gentehna-in, “Tang bang na dam uh maw?”
Lai Malgawm Zia
Cope Topa hong bawlsak Zolai pen hoih mahmah napi-in tuhun ciangin a tuamtuamin kikhel suk kikhel to, kiphuaktawm, kibehlap-in kigelhgelh ta hi.
Gentehna:
Pum=Pome;
Lian= Lyan;
Mung-Moong;
Suan=Swan;
Khai=Khine/Khaing/Khy;
Tuang=Twang;
Cin=Kyin/Chin;
Khup=Cope;
Pian=Pyan;
Cing=Kying;
Hau=How, etc., cih bangin a kigelh zong kimu thei hi.
Mangte leh Kawlte’ gelh dan khawng gawmtuah-in kiphuan tawmtawm thei hi. Tua bangin gelh ni ci lehang, gam tuamtuam-in gelh dan tuamtuam tek nei dimdiam-in, eite in a kua’ a pen zui ding cih a kithei nawn lo ding zahdong hong suak ta hi. Gentehna-in, “Tokyo” pen Japan-te in “Tawkio” ci-in, Kawlte in “To"co ci uh hi. Korea-te in Lee pen a lawhna uh ah “Ii” aw, “Choi pen “Chae” peuh in lo zel uh hi.
Zolai pen Zomite in tan 4 ciang bek kisin-a tua ban sin ding om nawn lo hi. Ahi zongin, Mangte’ grammar tungtawn-in i Zolai theihna kibehlap to thei lua hi. Zopau pen Mangpau pan-a kila hi lo-in, Pasian hong piak ngiat eima’ aituam pau ahi hi. Khatveivei haksa sa mahmah ahih manin, Cope Topa in a bawl Zolai Simbu sung ah, “Zopau a baih kei hi” na ci a, “Takkung pan-a kingah a cim taak them pen ‘meilah’ na ci sese uh hi,” ci-in na ciamteh hi.
Kammal Kikhel zia
Ei pau pen a zatna zui-in a lawhzia kikhel hi.
Gentehna-in:
Vanglian (adj.) +na= vangliatna (noun); minthang (adj.)+na=minthanna (noun);
Pusuak (verb)+na=pusuahna; paikhia (verb)+paikhiatna;
Nasem (verb)+na=nasepna; lasa (verb)+na=lasakna;
Thungen (verb)+na=thungetna; kikhawm(verb)+na=kikhopna, etc.
Kampau Zat zia
I kampau zatzia a kikhel dan en lehang, mi khat in a lawmte a man khakin, “Ka man na etsak o” a cih ding kimlai, “Ka man na ensak o” ci thei hi. A khiatna kilamdang mahmah hi. “Ensak in” cih kammal zang hi lehang, a minu/pa in a en ding hi lo-in, a midang khat a en dinga sawl sawn lai suak mawk hi. Gentehna dang khat en lehang, A nu in meh huan a vil dingin a tatu sawl hi leh, “Ka meh na etsak o” ci ding hi. “Na ensak o” ci lo ding hi. Tua ci hi leh, a meh en ding pen a tanu hi nawn lo-in midang khat suak ding hi. Gentehna dang khat ah, pawlpi ading thungen dingin siapa a cial nuam khat in, “Pawlpi ading thu hong ngensak dingin” ci lo-in “thu hong ngetsak dingin” a cih ding ahi hi.
“Leh” Zatna
“Leh” cih kammal pen mihing, ganhing leh na a nam tuamtuamte gawmna a lakkammal ahi hi. Tuhun ciangin mi pawlkhatte in “leh” aw pen tom tah ci-in “le” in gelh nuam thei uh hi. Gentehna-in, “Nu leh pa” cih ding hi napi-in “nu le pa” ci ziau thei uh hi. “Sep leh bawl,” “inn leh lo” cih bang kammalte zong “leh” ngiat mah tawh gelh tangtang ding kisam hi. Pawlkhat in a mun phatuam ci-in “h” a zang lo bang zong om thei hi. A mun a phattuam sangin a mal a man ding thupi zaw hi “Leh” kimlai “le” in gelh lehang a khiatna a tuampi suak hi.
Tua mahbangin, a langkhat ah, “leh” pen na nam nih gawmna kammal hi tah, ci-in kizang khial thei mahmah hi. Gentehna: “Lungdam leh angtang mahmah ing” kici thei hamtanga, man leh kilawm mahmah napi-in, lungdam leh antan thuah ahi phial zongin, “leh” sangin “in” zat ding ahi hi. “Lungdamin angtang mahmah ing” cih ding ahi hi. Mangpau pan-a a la i hih leh zong, a “and” pen ei’ pau-in “in/in-ah” cih kammal nih zopna hong suak hi. Tua ahih manin, tua Mangpau (It’s my pleasure and honor) cih bang a khia ding hi lehang, “ka lungdamna leh ka angtanna” ci-in zang leh hang, “lungdam-in angtang ing” i cihna hi a, “leh” cih kammal kizang thei ding hi.
Tua tawh kizom-in, Mangte in “and then” a cih pen “leh” tawh hong kisai nawn peuhmah lo-in, “tua khit ciangin…/tua khiat ciang…/’ciangin…/’ciang…/ tua teh…/tua leh…) cihna hong suaka, “leh” cihna peuhmah hong hi nawn lo leuleu hi. Tua mahbangin, Mangpau-a “but” tawh kisai zatzia a tuamtuam omte lakah, “ahih hangin” ci-in a kilehbulh thu genna kammal zong tuhun ciangin “ahi hangin” cih kammal kinak zat sim mahmah ta hi. “Ahih hangin” ci-in gelh tangtang ding ahi hi. “Ahi” cih kammal i zat nop luat leh, “ahi zongin” cih kammal zang suk pah lehang hi pah leh hi. Tua ban-ah, “tua ahih manin” (Mangpau-in ‘so’ leh ‘therefore’) mahmah zong “tua ahi manin” hi lo-in “tua ahih manin” ci-a gelh ngiat ding ahi hi.
“Banghang hiam cih leh” Zat Zia
ZIV Laisiangtho in “Ahangin” a cih pen i Tedim Lai Siangtho ah, “Banghang hiam cih leh” ci-a kitei Manglai-a “for” ahi hi. Mizote in, “A chhan chu” ci-in Paite pau-in, “A ziak tu,” ci uh hi. Kawllai siangtho ah, “A kyaung mu ka” ci-in a tuamtuamin kizang hi.
Gentehna:
For he is good= amah hoih ahih manin
For all have sinned= banghang hiam cih leh mi khempeuh a mawh uh a,
“Le” A Khiatna
“Le” i cih pen
(1) gamlak mualdawn khawnga po lopa nam khat min
(2) lenuai; lekawi=khutzep
(3) ganhing a zual nai lote
(4) Mihing a tei luate
(5) Numei a khuaval mahmahte
(6) “zong” cihna (I sanggam Paite lamte in zang deuh uh), etc. “Leh” zatna ding mun ah “le” i zat khak leh a khiatna tu-a bangin kilamdang lian hi.
“Hih” Zatna
Pawlkhatte in a aw tom tah, ci-in “Hih” ding kimlai “hi” ci-in gelh thei hamtang uh hi.
“Hih” mah-a i gelh kei leh a khiatna man nawn lo hi.
Hih=a nai-a om mi, gan, na khatpeuh, etc.
Hih= Mangpau-in “this” (A tom ding deih-in ‘s’ phiat lehang, suak thei het lo ding hi).
Hih pen Hi in at leng a khiatna kilamdang hi.
Gentehna: Here (=Hih lai ah) & There (=Hua lai ah) kilamdanna >T hi. T lakhia le hang Here (=hih lai ah) suak lian hi. "Hih"(=a gei a om mi, gan, na khat) kimlai "h" la khia le hang hi (=a hi hi) cihna suak lian hi. Tua a hih manin "h" pen mawk lakkhiat theih hi lo hi.
Neihsa Lahna
A tung a (' ) Apostrophyte pen lai leh kammal tom lakna a kizang hi a, tu in "Neihsa lahna" in a kizatna en ni. Gentehna: Pasian' gam Pasian' kammal, Nang' a, Kei' a...
For zatna ah
for= a ding
Gentehna: Kei a ding Zeisu hong si hi = Jesus died for me
For = a/ka hih manin
Gentehna: Vantung pan a hong pai suk ka hih manin =For he came down from heaven
for= sung
Gentehna: Sawtpi sung ka ding hi = I stood for a long time
for=na ding
Gentehna: Hih a kizat nading bang a hiam? =What is the use of this for?
Laigelh zia leh Laisim zia
Kawlte in, “I gelh ciangin a malgawm man-in gelh ding, i sim ciangin a awsuah manin sim ding” a cih uh mahbangin a gelhzia a tuam, a simzia a tuam om thei hi.
Gentehna: Kum 120= kum za leh kum sawm nih
Tai 1500= tai tul leh tai za nga
Nai 7:30= nai sagih leh a lang (papite in nai sagih leh nai lang, ci thei gige uh hi), etc.
Thukhupna
Tua ahih manin a hoih ding i deih luatna hangin suk khel to khel lehang, Kawlte in, “Puah lua lehang sia suak thei zawsop hi” a cih mahbangun, i sangmangpa Cope Topa’ hong bawlsak bang leh lai thei masa leh mipil masate’ hong hilhnate nusia lo, khel lo-in hoihtak limtakin kemcinga, I zat suak ding thupi mahmah hi. I neihsa Zolai Zopaute kiptaka i kepsuak ding thupi mahmah ding hi. Tua hi-in, tuhun ciangin pilna siamna leh theihna tuamtuam hong khaktohna tawh kizui-in Manglai, Kawllai leh kampau nam tuamtuam panin kammal thakthakte ei’ lai leh ei pau-in letkhia-in I behlap tohtoh ding ahi ahi.
Laibu Saal / Zomi eLibrary
