Zo Minam leh Federal- Khen- 9
Agelh~Khansuan T. Guite
Ei deihna a khensatna leh ukna (Self-determination)
Minam tampi kigawm khawm kumpi lian ukna gam (Empire) sungah minam tuamtuamte i nuntakna leh nekzonna kisapna zui in ei deihna a khensatna le ukna (Self-determination) pen zat loh phamawh thu khat ahi hi. Europe gam Austro-Hungarian Empire (kumpi gam), Ottoman Empire a kitap khap ma hun lai-in, tua kumpi gam sunga tengkhawm minamte pen a mau nuntakna leh nekzonna a hoih zaw dingin ei deihna a khensatna leh ukna (self-determination) kipia tek hi. (Note: Austor-Hungary Empire a kitap khap ciangin Romania, Bulgaria leh Hungary gamte hong piang khia hi). Tua a hih manin, mipil pawlkhat in ei deihna a khensatna le ukna (Self-determination) kipat cilna pen Europe khuamualpi (Continent) sunga om Empire pan kipan hi, ci uhhi. Cihnopna ah Empire khat sunga tengkhawm minam tuamtuamte in a mau minam leh nuntakna kisapna zui in Self-determination kipia tek a, a tawpna ah tua thu zangin minam khat in gamkhat tek in dingkhia hi, cihna hi. Self-determination cih kammal pen Politics vai a hita leh, Thukhun (law) vai ah hita leh a deihna kician tak in leitungbup san theih dingin kigelh thei nailo a, a huampi a gen in a zang gamte zatdan leh sandan zui in gamdang khat ukna pan suahtakna la in gam tuam phuh theihna ciang dong huam thei hi. Minambup kipawlna vai hawmna sungah Self-determination huamna leh tangvaina tawh kisai in kinialna om tawntung hi mah taleh, mihing hamphatna (human rights) tawh kisai in ahi zongin, gam vaihawmna (politics) tawh kisai in ahi zongin tuni ciang mah lum leh tei bangin kizang veve hi. Self-determination huamsungah Mihing hamphatna (Human rights) ngahna ding nasepna ah gam ki-ukna pan suahtakna ngah ding cih ngim masa ahih loh hangin gamleivai (Political issues) tawh kisai hamphatna ngahna ding malakna ah gamsung pan suahtakna ding ngimna kihelkha veve hi.
Leitung galpi khatna (World War I) bei khit ciangin gamkek uk khumna (colonization) sunga om minamte’ thumuhna leh ngaihsutna kihong semsem ahih manin, a mau’ tenna gam ciatciat ah gamkek minam ukna panin suahtak theihna ding mapanna hong khang mahmah hi. USA President (lui) Woodrow Wilson in Leitung galpi khatna a bei khitteh, minam khat le khat kikal-ah daihna (peace) a om na dingin ngimna nei in thu sawm-le-li (Fourteen Points) a tangko khiatna sungah gamkek uk khumna nuai a om minamte in suahtakna a ngah ma hun-un Self-Determination thu zang thei ding hi, cih thu a omna panin minam leh gam suahtakna malakna zong hong thahat semsem hi. A taktak in USA President Wilson i thusun Thu Sawm-le-Li pen a mau gam i metna ding gelna hi a, a suakta nailo gamte tungah a mau gam vanbawlte zuak theihna ding ngimna khat zong kihel gige hi. Uk khumna sunga om minamte in hih Thu Sawm-le-Li pen sangthei mahmah uh a, ahi zongin gamkek ukcip gamte in langpan uhhi. Tua hangin suahtakna ngahma hun in a mau minam kisapna zui a kizang hi a, hunkhat ciangin suahtakna ngahna ding kalbi masa a kizang ahi hi, kici thei hi.
Self-Determination in inntuanna (succession) a huam leh a huam loh tawh kisai in dawnna tomziau tawh kidawng theilo hi. 1923 kum a kiphuh khia USSR gam pen a kipat cil in Gamke (state)- 6 tawh kiphuh khia hi a, 1940 kum ciangin Baltic tuipi kim a om gamte thatang zangin a lakna pan un kumpi gam (15) kigawm khawm ahi hi. USSR gampen Federal gam tawh kilam khia a hih hangin pawlmi gamte i utna lungsim tawh kigawm hilo a, thatang hatna tawh kipum gawmkhop gam ahih manin gamsung ah daihna a omna theihna dingin pawlmi gamte tungah inntuanna (succession) piak ding thukhunpi sungah gelhlut kul hi. 1947 kum Kawlgam thukhunpi sungah Kawl mi a hilo minamte in inntuanna (succession) pen gambup tawh kipawl khit kum (10) a cin ciangin inntuan thei ding cih thukhunpi ah kigelh lut hi. Kawlgam lamkhiat dingin minam khempeuh in utna tawh kipawl ahih hangin Kawlmi makaite kamciamna leh minam neute kidalna dan a kisem ahi hi. Minam neute a dingin ukcipna leh ukkhumna a omlohna ding kidalkholhna lum (shield) a kizang ahi hi.
Kum zalom (20) bei kuanlam ciangin mihing hamphatna kiu pan a et in, tualsuak minamte (Indigenous people) a dingin self-determination ngah theihna dingin mapanna hong tam mahmah hi. Tualsuak minamte (Indigenous People) i cih pen gam khat suang/phut zolo a minam dangte i ukna nuai a om minamte a hihna zui in, a kim a kiang ua om minamte in pupa pianzil ngeina zui in a dem mang ding uh kivenna in self-determination a deih uh ahi hi. Gam khatpeuh ah tualsuak minamte in ukna nei minam dangte dep gawpna hangin a mau pupa pianzil ngeinate a bei mang na ding pan kepna a hihi. USA gam sunga Red Indians minamte, Australia gam ah Aborigines minamte in gamkek mangkangte ukna panin a mau minam ngeinate a kepcing theihna dingun, mihing pianpih hamphatna zui in self-determination a ngen hi a, gam ukna pan inntuan khia in gam thak phuh ding ngimna hi masa lo hi. (Note: Kawlgam sung a om minamte pen tualsuak minam cih ding hamsa hi. A hangin Kawlgam sunga om minamte pen a cil pek pan a teng minam hi a, a nung lamciangin minam dang khat in ukkhumna nuai a om cih taktak ding a hamsat man ahi hi.)
Self-determination sungah Inntuanna (succession) ciang huam hi, huamlo cih pen a zang minamte zatna leh ngimna tungah kinga zaw kici thei hi. Mipil pawlkhat in Self-determination sungah inntuanna huam hi, a ci om hi. Tua bangin a gen mite in a genkak theih uh thu bel, leitung galpi tegel khit ciangin gamkek uk khumna (colonization) nuai a om minamte in a mau gam leh minam suahtakna ding ngimna tawh na sem uh a, lawhcinna ngah uh ahih manin gamsung pan inntuan khia gam thak bawlkhia uh hi, cih ahi hi. Hih thupai zia ah pen gamleivai (politically) ngimna zangin, self-determination kizang hi cih thei hi. A langkhat leuleu ah, tualsuak minamte in a mau minam ngeina leh pupi pianzil a kep cing theihna dingun a nget uh hi a, gam leh minam suahtakna ding sangin a mau minam hihna kepbitna ding ciang huam hi. Tu hun in, self-determination tawh kisai in muhzia nam nih om cih theih hi a, inntuanna huam maw, huamlo cih pen a thuluanzia bek in khensatna pia thei hi.
December 27, 2019
Tual Khan Suan
