Zo Minam leh Federal- Khen- 10
Agelh~Khansuan T. Guite
Ei le ei ki-ukna (Autonomy or Self-Governance)
Autonomy cih kammal pen Greek hi a, ei le ei ki-ukna (self-government) cihna ahi hi. Ei le ei ki-ukna (Autonomous Administrative Division) in Kumpi gamkhat sung a om mun leh mual zui a gamkhenna (Geographically Area) ahi zongin, minam neute (Minorities) kisapna zui in ahi zongin gamsung vaihawmna a nuamzaw ding deihna tawh kigel vaihawmzia khenna namkhat ahi hi. Ei le ei ki-ukna gamkhenna huamsung a om mite in a mau’ gamsungah Thukhunpi phalna ciang tawh kizui in a mau leh a mau suakta tak in vaihawm in ki-uk thei uhhi. Suakta tak a ki-uk theihna i cih hangin gam kumpi khat ukna nuai pan a suahtakna (independence) cih bang hilo a, tua gamkhenna sunga om minamte kisapna ciang a vanzo ding ukna neihna ciangbek suahtakna (Limited Independence) ahi hi. Gam sung vaihawmna khat ah ciangtan nei suahtakna (Limited Independence) zatzia pen a tuamtuam in kimu thei hi.
A khatna a, ei le ei ki-ukna i cih pen gamsung kumpi khat in Lokho mite kipawlna, Nasem mite kipawlna, Biakna kipawlna, Gamvai sem party kipawlna, Tualsung nasem kipawlna tuamtuamte in kumpi thukhun palsat lo in a mau kipawlna sung ciangah suakta tak in vaihawm theihna, nasep theihna tawh phalna leh zatna nam ahi hi. A mau’ kipawlna tawh kisai thukhun, zuihding paizia leh ngeina dante pen a mau leh a mau kibawl tawm in zang thei tek uhhi. Ahi zongin Leitung kumpi gam khempeuh in tua bang kipawlna tuamtuamte kiphuh khiat ding tak ciangin zuih kimding thukhun khat nabawl masa hamtang uhhi. Kumpi in zuihding thukhun a bawl na hangin tua kipawlnate pen a suakta vilvel hithei nawnlo in ciangtan suahtakna a neita uh ahi hi. Cihnopna ah a mau kipawlna huamsung ciangbek ah suahta tak in a mau bawltawm thukhun tawh kivaihawm leh ki-uk thei uh a, a pualam (Kipawlna dang) tawh kizopna ah a suahtakna uh kiciangtan ta cihna ahi hi. Gentehna in Kipawlna khat sunga om mikhat peuh in khialhna (crime) a neih leh kipawlna i paizia zui in thu kikhenkhum lo ding a, kumpi thukhun zui in thusit in thukhena thuak ding hi zaw hi.
A nihna namte in a hih leh leitang vai tawh kisai ei le ei ki-ukna ahi hi. Belpawl gam (Federal State) ahi zongin, Lomkhawm gam (Unitary State) ahi zongin, gam khempeuh ah gam uk kumpite in a mau’ ukna leh vaihawmna a nuamzaw dingin gamkhenna nei uha, tua gamkhen sungah vaihawm kumpi phuhkhia uhhi. Gamkhenna sunga om ukna nei kumpite in a mau leh a mau ki-ukna leh vaihawm theihna nei uhhi. Tua gamkhenna huamsung a om kumpite in a mau gam sung vaihawm zia ding leh ukna paizia ding thukhun, paidan leh sepzia ding bawltawm thei uhhi. Gambup vai leh gamkhen dangte sungah ukna thuneihna nei tuanlo uhhi.
A thumna namte in minam kibatlohna hangin, gamsung kisapna zui a kibawl ei leh ei ki-ukna nam ahi hi. Gamkhat peuhpeuh ah minam kibatlohna hang ahi zongin, kibatlohna thu dang khatpeuh hang ahi zongin tualsung kikekna (Social Cleavage) a om tak ciangin, a kibang namteng gawm khawm in ei le ei ki-ukna (autonomy) piakna tawh kisiatna leh kigal bawlna beisak a, gamsung ah kilemna le daihna piangsak hi. A mau it leh thupi sak ngeinate, pupa tawnziate kepcing sak, biakna venbitsakna hangin buaina tampi vensak theihna om hi.
Belpawl Gamte (Federal States) ah gamsung thuneihna (power) pen Gambup kumpi in gamke (state) kumpite tawh kikhenna (division) nei hi. Gambup kumpi (Federal Government) in gamke kumpi tungah a khenkhiat thuneihnate vasawk sak, va tuhkhia thei nawnlo hi. Gamke kumpi in a neih thuneihnate sungah Ukna thuneihna (Executive Power), thukhun bawlna (Legislative Power) leh Thukhen thuneihna (Judicial Power) kihel vek hi. Tua thuneihna nampi thumte Gamke kumpi in a zatna ah gambup kumpi in a vasawksak theihlohna pen ei le ei ki-ukna ahi hi. Gamke khat in a mau gamke sungah thuneihna nei a; ukna, thukhun bawlna leh thukhen theihnate a mau huangsunga, a hoihpen dingin septheih, zattheihna neikim tek hi. Ahi zongin gamke khat le khat kizopna ciangin gambup kumpi (Federal Government) in zong thuneihna neikik leuleu hi. Hih ei le ei ki-ukna in ei gamsung vai ciang ah ei gamhuam sung a hoihna dingin kivaihawmna leh ki-uk theihna hi a, inntuan khiat theihna (cessation) kihello hi.
Kawlgam sungah kilemna leh daihna a om theihna dingin Belpawl gam (Federal State) lamkhiatna bek in i deihna tangtung sak ding hi ci’n gam lamkhiatzia (Structure of State) khek ding kisam hi i ci hi. Belpawl gam (Federal State) i deihna a hang in, minam zui (or) a kibang a namnam zui-in gamke (State) kikhen ding, tua gamke sunga om minamte in ei leh ei ki-ukna (Autonomy or Self-Government) nei thei ding ahih man ahi hi. Hih mun-ah thu ngaihsut ding khat in, Kawlgam sungah Belpawl gam (Federal State) lam khiatna ah zong minam zui bekin gamke (state) khenkhiat ding zong a kilawm hangin Kawlgam bup a minam om khempeuh tungah gamke (state) piak ding cihzong piangthei khin tuanlo zel dinghi. Gamlei maitaing (geographic) zui in gam khenna bawl ding hi leng zonglah Kawlgam kiphuh khiatzia tawh etkak leng a hoihpen hi tuanlo vive hi.
2008 Kum Kawlgam bup thukhunpi zui a kilamkhiat Kawlgam pen Belpawl Gam (Federal State) a hihloh hangin a namnam zui a kigawmkhawm minam leh kisapna zui in gamkhenna nei in ei le ei ki-ukna (autonomy or self-government) angah minam leh gamkhen pawlkhat om hi. Tua gamkhen munte pen Gamke (state) dinmun ciang a hih loh hangin a mau gamhuam sungah ukna leh vaihawm theihna thuneihna ciangtan pawlkhat kipia hi. 2008 Kum Kawlgam thukhunpi pan a hong piang Kawlgam sunga ei le ei ki-ukna (Self- Administered Zone) a nei gamkhen teng:-
Naga Self- Administered Zone (Leshi, Lahe leh Namyum Township thum teng gawm khawm)
Danu Self-Administered Zone (Ywangan, Pinday Township nih gawmkhawm)
Pa-O Self-Administered Zone (Hopong, HsiHseng leh Pinlaung Township thum kigawm khawm)
Pa Laung Self-Administered Zone (Namhsan, Manton Township nih kigawm khawm)
Kokang Self-Administered Zone (Konyan leh Laukkai Township nih kigawm khawm)
Wa Self- Administerd Zone (Hopang, Mongma, Panwai, Hahpan, Metma leh Pangsang (Pankham) Township guk District nih) kigawm khawm
Ei le ei ki-ukna pen Gambup sungah vaihawmna ah a noptuamna ding ngimna tawh a khenkhen a kibawl hi a, gamsung kilemna leh cidamna a om na dingin a hoih mahmah khat ahi hi. Minam kibangteng gawmtuah in khenkhat ahi zongin, minam ahih tektek loh hangin gamlei maitang a lemtang teng gawmtuah in khenkhat in ahi zongin, kibatna dang a nei mi tuamtuamteng gawmtuah in khenkhat in ahi zongin kigi khat tawh vaihawmna neihsakna in a mun leh mual a teng mite a ding a hoihzawk bek thamlo in gambup kipsuakna dingin zong sekdo zaw hi.
Date: January 12, 2020
Tual Khan Suan
