ZI NAM SAGIH
Agelh ~ Khoi Lam Thang
Innkuan sung nuntakkhopzia siksanin, zi nam sagih om thei kici hi. Tuate in:
1. Nu bang zi: A pasal it mahmah hi. An a limpen pia nuam a, puansilh a hoihpen guan nuam hi. A pasal in muang mahmah a, na khempeuh vaihawm pih hi. Dot bawl den hi. Pasal khualak vakpak bek zong ciah hak leh khua dakdak hi. Tatzia hekzia ding hilh den hi.
2. Sangam numei bang zi: A lungsim khempeuh tawh a pasal it hi. A sanggam pasal bangin ngaihsun hi. Zahtak hi. Kiniamkhiat-a, a kilawm loin gamta nuam lo hi. Thusia thupha unau bangin kikum khawm hiamhiam uh hi. A pasal lawmte itsak mahmah hi. A hoih tata deihsak hi. Nek ngaih hi.
3. Lawm bang zi: A pasal le a masangte it mahmah hi. A pasal a it lote it theih dingin tuat khol lo hi. Thu khat peuhpeuh lawmta bangin vaihawm uh hi. Nupa kiho se lo uh a, nui khawm pau khawm, nuamsa khawm-in, “lawm” zong kici pah lel uh hi.
4. To bang zi: Kithuneisak (saila) mahmah hi. A pasal zawhthawh bawl-in, hawmthawh den hi. Aw nem zang ngei lo hi. Kei thu hi, ci in a utut-in om hi. Zahtak kampau ngei lo hi. A pasal lo tawh kam lim lel hi. A hawh a ciah nading a pasal konlawh se lo hi.
5. Gal bang zi: Na khempeuh lencip nuam hi. A pasal’ muan dingin om lo hi. A pasal muangmawh den hi. Thu sit pahpah hi. Maisakna lungsim nei lo hi. Innkuan pihte hoihna nungngatsan in, khialhna, siatna muh khiat ding hanciam den hi. Keksa in om den hi. A lungkim kei leh kawkek pahpah hi.
6. Guta bang zi: Innkuanpihte’ theih loh-in, ankhing bek zong ne sim dawn sim nuam hi. Sum le paai zeek sim nuam hi. Selsim den hi. A nungsangte hamphat nuam hi. A masangte nek ngaih lo hi. Hun-awng a om nakleh vaksim pahpah hi.
7. Sal bang zi: Sawl teng bek sem hi. Bangkua vaite ama thu-in ngaihsun tawm thei lo hi. Vaihawm tawm ngam lo hi. A pasal kihta mahmah hi. A teekte kihta mahmah hi. Innteek lungsim nei lo hi. Mi’ nasem bangin a patausa in om den hi. Innkuan pihte nangawn mai-et saisai den hi. Mite mit-hek ensa-in nungta hi.
Na zi ding koici bang zi na deih hiam? Na lawm ngaih ee, kiteng le uh cin koi bang zi ahi tam?
Eih! Zi thu bekbek gen kha mawk ve hang ee. Pasalte zong a tuamtuam om thei ding hi ven. Zi nam tuamtuam 7 bang om ahih leh pasal nam bangzah a om tam!
--oo—
Source:
Sihna in hong khen mateng (Laibu)
Laibu Saal / Zomi eLibrary
