Zi Li A Nei Mihaupa
Agelh ~ En Khat Thang
Khat vei, Putek khat in nitak a lup ma in a tupa tangthu khat gen pih hi. Nidang hun sawtpi lai-in, neih le lam, sum le pai tampi nei, mihau papi khat om hi. Mihau pa in zi li tak nei in, a zite zong ki-it, kilem thei lel uh ahih manin Inn khat ah om khawm uh hi. A zi nunung, a zi lina pen bel mihaupa in it penpen hi. Ngek bawl diakin nik hoih puan hoih nono tawh zemin, a cidamna ding hun pia in dawm mahmah hi. Tua bangin a ngek bawl hang, a zi neu in bang mah awlmawh se lo lelin mihau pa phattuamna ding zong bawl sak ngei lo hi.
A zi thumna nu zong mihau pa in it lua peuhmah veve zel hi. Zi thumna a dingin hun pia in, nasep hanciam ahih manin tua a zi in zong, a nasep huhin panpih thei mahmah hi. Tua ahih manin, mihaupa in hih a zi thumna mi dang khat peuh kiangah a tai suah ding dah lua peuhmah hi. Tua kawmkal ah a zi nihna zong it cihtak it kawikawi zel hi. A zi nihna nu ahih leh thu hoih nono ngaihsut siamin, gualnuam thei banah kamsiam tawh thuahin a pasal thanem hun ciangin zong thapiak siam citciat hi.
A zipi, zi masa bel mihaupa in en thei mel lo mawk hi. A paipaina ah a tonpih tawntung hang' bangmah a kizang thei lo ding bangzah phial in ngaihsun mai hi. A zipi in ahih leh a pasal sia leh, pha leh it cih takin it mawk hi. A poina ah mihaupa in a zi masa pen thusim bawl lo lua liang mawk hi.
Hun hong beibei in, mihaupa cidamna hong kiam semsem hi. Natna hau in, Zato siahuante in zong dam zo nawn lo ding ahih lam gen ta uh hi. Mihaupa lup mun ngak bekin hong om ta hi. A zi teng zong a nai ah om in, hong khoi ngeingai uh hi. Mihaupa in a zi lina, a it penpen nu hong hopih hi.
"Ngaihno aw! Ka sih teh kei guak sawl bang hei ding himawk ing a, nang kong it penpen na hih teh nong zui zo diam?" ci-in a dot leh zi neu in a lu peisanin, a gei pan kihepsan diang mawk hi. Mihaupa zong, a zi thumna nu kiangah "nang nong zui zo diam ngaih aw?" a cih leh "hi thei lo ee, ken hi tengah nopsa lai ing, nang si khin le teh pasal dang khat peuh na bel ding hing" ci-in dawng hi. Mihaupa zong lungtang kidawt vang zah phialin nasa ngeungau hi. A zi nihna hong dong leuleu hi. A zi nihna in zong "hong telsiam in U aw, nang tawh sih khawm ding pen hi thei nai lo hi. A hizongin hanmual dong bel kong kha ding hi." cih san sawnsawn ahih manin mihaupa zong nasa lua in pau zo nawn lo hi. Lamet tawpna a zi masa hong galet phei ta hi.
A zipi nu in "lung himawh kei in U aw, ken hong zui ding hing" ci-in dawng hi. Mihaupa zong lungdam lua in a zipi namin hong kawi tinten ta hi. Putek in tangthu’ deihna a tupa in a tel theih dingin hi bangin hong hilhciankik hi.
"Ka tu aw, Hih tangthu sung a mihaupa' zi lina nu pen bang dang hi lo-in, ei mihingte pumpi ahi hi. I pumpi zemin, i dop bawl hang' tua pumpi hoihna in i sih ciang hong zui zo peuhmah lo ding ahi hi. Zi thumna nu ahih leh neihlelam, sumlepaite a gen nuam ahi hi. I nuntak hun sungin i zon, i khol khempeuh i sih khit teh i tu, i tate ahih keileh, mi dang khat peuh kiangah na tung ding hi. I sih ciangin kitonpih thei lo ding hi. A zi nihna nu ahih leh, i innkuanpihte, i lawmle gualte ahi uh hi. I nuntak sungin hong huh hong kepuh hang, i sih ciangin hong zui lo dinguh a, hanmual ciang bel hong kha sam dinguh hi." a cih khitteh tupa pa in zong lunglut takin "Pu aw a zi masa ee bang hi ding a?" ci-in a dot leh, a Pu in;
"Hee! a zi masa pen bel ei mihingte' KHA, i sung a om den a kimu thei lo i kha ahi ve! Eite in a mah i phawk khak loh i thusim bawl loh hang, i kha in ahih leh a tawntung tawntungin hong zui ding cihna hi" ci-in hilh cian hi.
Tupa pa zong "tua leh Pu ken ka sih teh hong zui ding, ka kha a ding, a hoih penpen ngaihsunin nasem nuam ing, ka zi masa mah it pen ning maw Pu" ci-in a pu angah hong kingam hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
