ZI HOIH
Agelh ~ Khoi Lam Thang
Leitung-ah numei tam a, zi hoih tawm hi. Zite pen pasalte’ lungdam theihna pen le lungkham theihna pen ahi hi. Gamkhat lakzawh ding sangin ukzawh ding haksa zaw kici hi. Tua mah bangin zi neih pasal neih ding haksa lo a, nupa kilem a innkuan nuam phuh ding haksa zaw hi.
Zi hoih in a pasal’ mithek thei hi. Kiniamkhiat hi. A pasal tungah thupi a gen nop leh a lungnop laitak in gen hi. Innkuan pih le lenglate tungah aw khum-in kamsiam hi. A pasal it hi. Thupi sim in, vaangpia hi. A pasal ading ahih theihzah in sem a, gim ing, tawl ing, ci-in phun ngei kilkel lo hi. A pasal sangin a tungnung zaw, a thunei zaw, a lianzaw dingin om ngei lo hi.
Zi hoih in nungsang masang khen lo hi. Hamphat ding a om leh masangte masak hi. Thupi sim-in, nek ngaih ngiat hi. A masangte tawh kipumkhat ahih manin, a pasal adingin a sungte a thupi sim loh phamawhsak hi.
Kizem-in kipuah sinsen den hi. “Nupisate leltak kizepzep hang a mawkna hi” ci ngei lo hi. Teek deuhdeuh-in, vunte hong vuai hiaihiai ciang, ngaihbanna kiam thei a, tua bang hun ciangin kipuah kizem ding kisam semsem hi.
Zi hoihte dinmun a kaikhawm ngei khat in a nuaia bangin ciamteh hi:
1. A tate deidan lo-in, pantah hi.
2. A pasal zahtak a, a pasal vanzatte siangsak sinsen den hi.
3. A lungsim takpi tawh a pasal muang a, a mah zong nuamhuai-in nungta hi.
4. Neihsa kepsiam a, a innkuante phatsiam hi.
5. A pasal’ lawmte zong it-in, muang hi.
6. Paunak 31 a sim ciang amah tawh kibulh hi.
Zite a lungnop ciangin pasalte a tha uh nuam hi. Tate lungmuang a, innkuan sung nopcisak hi. A pasal in “Zi hoih tampi a om tei hangin nang kan a ahoih kuamah om kei” ci in phat hi.
Zi hoihte NU HOIH zong ahi uh hi. “Tate a gil a kial leh Pa ginat lohna, a zulhzau leh Nu ginat lohna” kici hi. Zi hoih in a tate pantah-in, makaih siam hi. A tate adingin a nu’ omna inn pen a lungkimna, a lungsim kituntuahna phual ahi hi. Nu’ hangin inn nuam a, a vakna pan a ciah dinguh ngak lah mahmah uh hi.
Tangvalte aw,
zihoih na deih hiam.
Na deih leh pasal hoih hih sawm photphot un.
--00—
Source:
Sihna in Hong Khen Kateng (Laibu)
Laibu Saal / Zomi eLibrary
