ZELOFEDAD TANUTE
A hamphatna dinguh a lathei numeite
Gamlakvakna 27:1-11
Agelh ~ Rev. Dr. John Thang Hum & Dim Lun Zam
Israel minam, Joseph suan te sung pan in Zelofedad in tanu nga-Mahlah, Noah, Hoglah, Milkah leh Tirzah nei hi. Tapa neilo ahih manin a pa a sih ciangin angah ding uh van/nate ki pia nawnlo hi. Hih pen a unau teng un kikum in, thumanlo ahihna makaipi Moses tungah va gen uh hi.
Thuman gen thei
A pa uh pen Pasian tungah khialhna khat hangin a si hih tuak hi. Ahi zongin tua khialhna pen Korah in Moses a langpan lai a, Korah leh a pawlte Pasian in dan pia a, asih sak te lak ah kihel lo in, tua dan khialhna namte zong hilo a, ama’ mawhna hang a si ahih lam gen thei uh hi. Tua bang agen uh ciangin Moses in zong thupi lak a, Pasian kiangah athute uh dot sak hi. Pasian in thukim ahihna, a hamphat na ding uh piak huai ahihna gen hi.
Midang te a dingin zong, kong honsak suak
Hih unau numei tengin amau ngah ding, a phut khiat zawhna hangun, amau bek hilo, midang te ading zong thupha lampi kihon na hong piang hi. Hih thupiang tungtawn in, tapa neilo Israel te a ding zong hamphatna ngah theih nading lampi honna hong suak hi. Tua hamphatna anuai a bang hi (Aneu 8-11)
Zelofehad' tanute' thugen man hi. Amau pa' sanggamte lakah neihsa gamh amaute tungah na pia ding a, amau pa' gamh amaute' tungah na tungsak ding hi. Israel mite tungah hih bangin na gen ding hi: “Pasal khat si-in, tapa a neih kei leh, ama gamh a tanu na luahsak ding uh hi. Amah in tanu a neih kei leh, ama gamh a sanggam pasalte tungah na tungsak ding uh hi. Amah in sanggam pasal a neih kei leh, ama gamh ama pa' sanggam pasalte tungah na pia ding uh hi. Ama pa in sanggam pasal a neih kei leh, ama gamh ama innkuan tawh a kinai ama behpa' tungah na pia ding uh a, amah in tang ding hi. {Topa} in Moses a thupiak bangin hih pen Israel mite tungah thukham leh ngeina kip hi ding hi, ci in,” a ci hi.
Numeite kinelhsiah ding Pasian deihna hi hetlo hi. Israel mite tangthu ah numei nelhsiahna na tam mahmah hi. Pasian in numei leh pasal a kibang in hamphatna ngah khawm ding a kipat pan a geelsa ahi hi. Mihing khangsimna ah numei a ki hel ngeilo kim lai, Topa Jesu khangsimna ah numei 5- Rahab, Tamar, Bathseba, Ruth leh Mary te hong ki hel hi. Hih in numei zong Pasian’ kumpi gam phuh na dingin ki zangh thei hi cihna hi.
Pawlpi pawlkhat in numei te Pasian zatna ciangtan hi. Mipi mai ah dingin thu gen theilo ding, makaiza pia lo ding, cih bangin pawlpi thukhun nei uh hi. Lai Siangtho sungah Pasian in numei te na lian pipi sem dinga azat tampi ki mu hi. Ahang pen Pasian hong piak kha (husan) pen a ki bang hi a, Jesu tatkhiatna in numei leh pasal dei dan lo in siampi sep theihna za ki pia hi (Gal 3:28; 2 Peter 2:9-10).
Thukhupna
Hih Zerofedad tanute phut khak thute ih muh ciangin, thangah huai mahmah leh, etteh ding thupi i mu hi. Minam khatpeuh sungah numeite ki nuaisiahna om tawntung hi. Zomi te lakah nidangin numei te sangkah ding kiphallo hi. Gamh luah ding zong kipia lo hi. Numei pen pasal nei dinga, a pasal leh a tekte vak ding, na sep hahkat ding cih ciang bek in ki ngaihsun hi. Tu hun ciangin tua bang a tawkik ngaihsut leh lungsim puakzia te kikhel in numeite mun khempeuh ah hong madawk mahmah hi.
America ah numei te’n nasep azon ciangin ngah baih zaw uh hi. Ahi zongin a nasep zia ding pen kang ngamlo in, a pute cih bangbang in sem hi. Hih a hangpen numei pen patau baih leh lungmuanna nei zolo, pasal tungah kinga mahmah ahihna hang ahi hi.
Hih Zerofedad tanu te bangin ngah nading leh hamphat na ding a om te hangsan taka, maiphu a, lakngam ding leh lak siam ding zong kisin huai mahmah hi. Lai Siangtho sungah Pasian in numei pasal deidan lo in hamphatna aki bangin hong pia khin hi. Ih lak siam ding leh, I lak ngam ding ki sam hi.
Dotna
Zerofedad tanu lii te min gen in
Banghangin apa si baih hiam?
A ngah dinguh hamphatna-gamh Moses tungah ah bangci nget hiam?
Hih tangthu pan I lak theih ding bang om hiam? Thu-um mite in Pasian sungah I ngah ding hamphatna bangteng hi a, bangci lak theih ding I hiam?
Leitungah I ngah nate bang ci zat kik ding I hiam?
