NAUPANG LA – ZEISUN HONG IT KATHEI HI (ZOMI CHRISTIAN CHILDREN SONG 9) HD – YouTube
Zeisu’n Hong It Hi
Jesus Loves Me
(Mark 10:16)
Agelh~Zam Khat Kham
Anna B. Warner (1820-1915) William B. Bradbury (1816-1868)
La khempeuh laka naupangte’ deihpen la ahi hih la pen Anna Barlett Warner in 1860 kuma a phuah ahi hi. Anna Warner in hih la a sanggamnu Susan tawh a phuahkhop hi a, Susan’ gelh novel Say and Seal kici laibu sunga a gelh ahi hi. Tua tangthu a buppi-in bang hiam cih kuama’n thei nawn lo ding hi napi-in tua tangthu sunga Mr. Linden in cina-a si dekdek-a om Johny Fax a hanthotna kammal la a kiphuak hih la bel leitung buppi-a naupangte’ deihpen la hong suak hi.
Anna leh Susan Warner-te unau pen a pilna sang mahmah a nei, a piangthak mahmah unau numei nih ahi uh hi. New York khua Hudson gunpi gei-a inn hoih mahmah khat ah kuamah tawh kikawm khol lo-in teng uh hi. West Point-a US Military Academy tawh kinai ahih manin a unau un galkap sinte Pasian’ thu laihilhna Sunday School neihpih zel uh hi. A tenna uh “Good Crag” mahmah zong Academy’ tungah pia uh a, national shrine khat-in kikem hi. Galkap sin-a om tangvalte’ kha lam nuntakna vei-a a nasepna uh pahtawina-in a unau un a sih uh ciangin galkapte kipahtawina minphatna-in (military honors) kivui hi.
Meigong-a om New York khuapi-a mi minthang khat ahi a pa uh a sih ciangin a unau un sum le paii hatsakna tampi tuak uh a, laigelh kipan uh hi. Susan’ laibu gelhte’ lakah The Wide Wide World kici laibu minthang mahmah a, tua hun lai-a kikhawngpen Uncle Tom’s Cabin zom-a bu tam kikhawngpen ahi hi. A sanggamnu Susan zah-in laigelhna hangin a minthan loh hangin “Amy Lothrop” kici min zangin novel pawlkhat gelh-a, la pawlkhat kaikhawmin khenkhia hi. Hymns of the Church Militant (1858) leh Wayfaring Hymns, Original and Translated, (1869) te ahi hi.
La-aw phuaksiam William B. Bradbury in tua laibu Say and Seal sim-a, tua lamalte a muh ciangin naupangte’ ading la ngaih khat a muh lam thei hi. A la-aw ding phuaka, a sakkik phuahbeh a, khenkhia-in hawmkhia a, America gam bek hi lo-in leitung buppi-a Sunday School-te leh naupang kikhopnate-a kideihpen la hong suak hi.
Amah October 6, 1816 ni-in York, Maine ah suak hi. A tangval ciangin Boston, Massachusetts ah lal a, tua lai-ah “American pilna sinna le music-te’ pa” (father of American public school and music) kici Lowell Mason tawh kithuah uh hi. Tuiphum pawlpi lianpipi tampi ah choir director leh organist-in om ngei a, naupangte’ laka a nasepnate minthang deuh hi. A nasep minthangte’ lakah Music Festival kici naupang tul khat kaikhawm-a, puan kibang silhsak, ama’ laphuahte a saksakna la-pawite minthang deuh hi. La phuah bek hi lo-in, la tawh kisai laihilhna, la ngaihte khetkhiatna bekbek sepin nei a, 1841 kuma kipanin 1868 kuma a sihkhiat dong Pasian’ la, leitung la bu 59 kaikhawmin khenkhia hi.
Bradbury’ phuah la-awte lakah hih la “Zeisu’n Hong It Ka Thei Hi” (Jesus Loves Me) banah, “Ama’n Hong Kha” (He Leadeth Me), “Ka Hi Bangin” (Just As I Am), “Thunget Hun Nuam” (Sweet Hour of Prayer), “Depth of Mercy,” “Even Me”, “The Solid Rock” cihte minthang mahmah hi.
Zeisu’n hong it ka thei hi
Lai Siangtho in hong gen hi
Aneu a hat lo mite
Amah hat hong huh nav e
Zeisu’n hong it hi///
Lai Siang tho in gen hi.
Zeisu’n hong it man si aa
Vantung kong hong honsak ta
Ka mawhna hong sawpsak ding
Vantung ah hong lut sak ding
Zeisu’n ka zawngkhal khang in
Hong it lailai veve in
A taang vantung tokhom pan
Ka lupna hong vil Amah’n
