Zeisu Ading Nuntak Maan Ka Nungta
Living for Jesus
(Romans 12:1,2)
Agelh~Zam Khat Kham
Thomas O. Chisholm (1866-1960) Carl Harold Lowden (1883-1963)
Hih la a aw phuakpa Carl Harold Lowden in hih la hong piankhiatna thu hibangin gen ngei hi:
1915 kumin naupang kikhopnate-a sak dingin “The Sunshine Song” a cih la khat “light and summery” namin ka phuak hi. Kideih mahmah vet-a, pastor tampite in a la-aw hoihtak kikemin lapi khat ah kibulh leh, ci-in laikhakin hong gen uh hi. 1917 kum ciangin ka file-te sungah ka mukik-a, hih la aw ka tum hi. A rhythm leh tempo-te in “Zeisu Ading Nungta Ning” cih bang dan khat gen nuam keii leh kilawm kasa hi. Hih la-aw tawh kituak ki-apna lapi khat kiphuak leh cih ka ngaihsutna khat hong om hi.
Ngaihsunsun-in thu ka ngetnget khit ciangin a mal hong phuahsak dingin Thomas O. Chisholm cial ding ka khensat hi. Hih la-aw khakin a thulu ka deihdan genin, a sakkik ah bangci bang hi leh kilawm ding, cih kei’ ngaihsutna zong ka gen hi. Ni nih khit khawng ciangin Mr. Chisholm in ka la-aw khak hong khakkika, la-aw tawh kituak ding lamal bangci phuah ding cih a theih ngiat lohna hong gen hi. Ka la-aw ka khakkik a, Pasian in amah mah a telsak lam ka upna ka gen khit ciangin lamalte Pasian mahmah a phuahsak nading ka hanthawn hi. A sawt lo-in lamal khempeuh hong phuak khin takpi-a, tuni a i sak lamalte hipah hi. A ladal mahmah-in a awn-a simin kizuak khin a, pawlpi khat peuhpeuh in labu a bawl nak uh leh hel hamtang uh hi. Kampau nam tuamtuamin zong kiteikhia khin hi.
Hih lamalte a phuakpa Thomas Obediah Chisholm July 29, 1866 ni-in America gam Franklin, Kentucky ah singluang tawh kilam bukno khat sunga suak ahi hi. Sangsia semin nipi kal sima kihawm The Franklin Favorite editor peuh a sep khit, kum 27 a phak ciangin Dr. Henry Clay Morrison’ tungtawnin piangthak hi. Dr. Henry C. Morrison i cih bel Asbury College and Theological Seminary a phuankhiapa ahi hi. 1903 kumin Methodist pawlpi in Chisholm ordination pia a, Scottsville, Kentucky ah tawlkhat sunng pastor sem hi. A ci hong dam lo sim pha mahmah a, Winona Lake, Indiana ah kisuan hi. Tua lai-ah insurance salesman sema, 1916 kum Vineland, New Jersey-a a kituah ciangin zong semsuak lai hi. Laigelh uk mahmah khat hi a, poem dawng 1,200 val gelh a, 800 te Sunday School Times, Moody Monthly, Alliance Weekly, leh laihawm tuamtuamte ah suak den hi. A poem phuahte lakah tampi hymn minthang suaka, tuate lakah, “Na Thumaanna Lian Hi” (Great Is Thy Faithfulness), “He Was Wounded for Our Transgressions,” “Christ Is Risen from the Dead,” “O to Be Like Thee,” leh “Trust in the Lord With All Thy Heart” cihte minthang mahmah hi. February 29, 1960 ni-in Ocean Grove, New Jersey-a the Methodist Home for the Aged piteek puteek kepna inn ah si hi.
Hih la a aw a phuakpa Carl Harold Lowden bel October 12, 1883 ni-a America gam Burlington, New Jersey-a suak ahi hi. Kum 12 a phakin Hall-Mack Publishing Company-te’ tungah a laphuah maksapen zuak thei ta hi. A nidang ciangin tua company-a nasem dingin kisam hi. Kum tampi sung the Bible Institute of Pennsylvania (tu’n Phildelphia College of Bible kici) ah music hilh hi. Camden, New Jersey-a Linden Baptist Church ah zong kum 28 sung minister of music sem hi. Tua khit ciangin kum 12 sung Evangelical and Reformed Church Board (tu’n United Church of Christ kici) ah music editor-in om hi. Lowden in a khan sungin la-aw dawng tampi phuaka, labu tampi khenkhia hi. Collingswwod, New Jersey ah February 27, 1963 ni-in si hi.
Zeisu aa ding nuntak maan ka nungta
Sepna ah nuamsak ding ka hanciam ta
Lungdamna tawh A deihna ka sem hi
Hihbang hihna in kei lungdamna hi
Zeisu Topa Honpa aw, Nang tung ah kong kipia
Nong gupkhiatna ding in ah, Kei aa ding nong kipia
To dang kuamah ka nei lo, Ka lungsung hong teeng in
Ka nuntakna, nang tung kongpia Khazih nang aa ding in
Keitang si Zeisu aa ding ka nungta
Keimawh kei zumna ka-la-ni puata
Hong itna in, Amah hong zui nuamsak
A lam lahna zui-in, ka ki bup piak
Omna peuh Zeisu aa ding ka nungta
Amin siangtho sung ah na ka seem ta
Gimna supna te, ke’n ka thuak nuam hi
Hih bang te Zeisu aa ding thuakna hi
Tom khasung Zeisu aa ding ka nungta
Ama’ nuih maim ah manpha pen ka sa
A mangte zongin gum ding a si hi
A gimte a sung tawldam ding la hi.
