Zawdan Gun Gei Ah
On Jordan’s Stormy Banks
(I Corinthians 15:19)
Agelh~Zam Khat Kham
Samuel Stennett (1727-1795) Traditional American melody
Adapted by Rigdon M. McIntosh (1836-1899)
Lam-etna tawh lawpna i cih Pasian’ mite’ pianzia khat ahi hi. Thuciam Lui sungah, Israel mite’ lam-et den pen ciamsa gam Canaan ahi hi. Thuciam Thak thu-ummite’ lam-etna leuleu bel, i Honpa leh i Topa tawh a tawntunga i mankhop ding ahi hi.
English Baptist minister khat ahi Samuel Stennett’ phuah hih la pen 1787 kuma kikhen John Rippon’ labu Selection of Hymns sungah kihel-a a kikhetkhiat masaknapen ahi hi. “Heaven Anticipated” (Lam-et Vangam) ci-in thulu kiguan hi. Tua huna kipan a koimapeuh-a evangelical thu-ummite’ deihpen la khat-in om den hi.
Samuel Stennett pen ama’ hun lai-a Dissenting (non-conformist) pawlte’ laka a kizahtaak mahmah thuhilhsiam khat ahi hi. Pawlpi tuamtuam-a mi khempeuh in a zahtaak mahmah khat ahi hi. Tua hun lai-a kumpipa King George III nangawn tawh kilawmta uh hi, kici hi. Tua banga evangelical thuhilhsia minthang mahmah khat cih bek hi lo-in mite a thuzawhna zangin England gamah biakna lam suahtakna a om nading leh social reforms tampi a pian nadinga a hanciam khat ahi hi.
1727 kumin England gam Exeter ah suaka, a pa mahmah zong Baptist minister khat ahi hi. A pa in London khuapi Little Wild Street a Baptist pawlpi kem dinga sapna a ngah ciangin amah zong a pa huh-in om hi. A kum 20 pha pan hi. 1758 kuma a pa a sih ciangin amah mah in pastor sem suaka, a sih dong kum 37 sung sem hi. A pawlpi mite’ lakah English philanthropist leh prison reformer minthang John Howard zong kihel hi.
A nasep sung tawntung hymn dawng 39 phuaka, tua hun lai-a evangelical labu minthangpen ahi 1787 kuma kikhen John Rippon’ labu Selection of Hymns sungah kihel hi. Tuni donga kisa Stennett’ phuah late lakah “Hong Hon Topa Zeisu Tal Ah” (Majestic Sweetness Sits Enthroned) leh hih la “Zawdan Gun Gei Ah” (On Jordan’s Stormy Banks) te minthang deuh hi. 1763 kumin University of Aberdeen in Doctor of Divinity Degree pia hi. Samuel Stennett in Pasian’ ading muibun taka a nasep khempeuh zo-in August 24, 1795 ni-in “Canaan gam nuam” zuanin pai ta hi.
Hih la aw pen “Promised Land” kici a, 19th century bul lama America gama kisasa traditional melody khat ahi hi. Hih la-aw tawh kisa leitung la tampi om hi. Hymn aw-a a kizat cilna bel 1835 kuma kikhen Southern Harmony labu sung ahi hi. Tua khit ciangin Southern musician Rigdon M. McIntosh in hih la aw khel-in, minor pan major ah laih-a, a sakkik behlap hi. 1895 kuma H. R. Christie’ labu The Gospel Light sungah a kihel huna kipanin tu-a i sak bang lianin kisa hi.
V1:
Zawdan gungei-ah ka ding a
A gal lam ka en hi
Khanan gam nuam hong kilang a
Ka luah na ding gam hi
Cho:
Tua gam nuam sungah ei ih khawl ding hi (khawl ding hi)
A nop tawntung gungal lam in-ah (gal lam in ah)
Nung ciangin Mossi leh Tuu-no lasa ding hi
Zeisu tawh maang tawntung ding hi
V2:
Tua gampha bel sungah inn ah
Khuavak tawntung om hi
Pasian leh Zeisu vang in ah
A taang tawntung ding hi
V3:
Cik ciang tua gam ka tung ding hiam?
Khuamial om lohna ah
Ih Pa maitang lungdamna dim
Cik ciang ka mu ding hiam?
V4:
Ka sin sungah lungdam na ding
Leitung sawt pi om lo
Zawdan gunpi kilok hangin
Lungdam in ka tum zo
