ZAREFATH KHUA MEIGONG NU
(Kamsangpa aneih khempeuh a piakna hangin
kial sung tawntung a nek ding a kitat satlo Numei)
1 Kumpi 17:8-24
Agelh ~ Rev. Dr. John Thang Hum & Dim Lun Zam
Hih lai ah zong amin kigen lo, a pasal min leh, a tapa min zong ki gen lo Zarefath khuami nupi khat ii’ thu i sin kik ding hi. Aminte uh a kigen loh hangin thangah huai mahmah thu hong gen hi. Hih nupi nu zong a pasal in sih san a, a tapa bek tawh nungta, meigong khat ahi hi.
Zarefath khua pen Sidon leh Tyer khua kikal, tuipi gei ah om khua khat hi a, tulai in Lebanon gam sungah om hi. Luke 4:26 na ah kigen Zerefath acih pen hih khua ahi hi.
Kumpi Ahab in Israel gam a-uk hun sungin, baal milim biakna nasia tak in bawl a, ama’ nung lampan a thapia pen azi, Jezabel ahi hi. Jezabel in Pasian kamsangte kithah ding thu pia hi. Kumpi na asem Obadiah in Pasian kamsang 100 gamlak ah sel in nisim in anvak hi. Hih hun sungin kamsang Elijah zong gamlak ah bu a, Pasian in va-ak zangin nisim in anvak hi. Hih Zarefath numeinu tunga thupiang pen hih hun sunga a piang thu ahi hi.
Upna ki zia-et
Kamsangpa hih Zarefath khua numei kiangah pai in ki sawl hi. Kamsangpa ava pai laitak in, meigongnu in anhuan nading singkeu na tomtom hi. A muh ciangin, kamsangpa in “Pasian in thupha na ngah nading nang kiang ah kei hong pai sak hi,” ci a, tua khit ciangin tui leh an (moh) a bawl sak ding gen hi. Meigongnu in, mohvui themkhat bek a neih laina leh tua aom neih sun teng bawl in a ta tawh a nek khit teh si ding ahihna gen hi. Elijah in a om bangbang a bawlsak nading leh a lung hihmawh loh na ding gen hi (1Kum 17:13-14). Meigongnu in zong Pasian muang a, Pasian mipa thugen zong um ahih manin kamsangpa gen bangin sem hi. Pasian in a kamciamna a kem Pasian ahih manin kial hun sung tawntung, nutate nek ding kitatsat saklo hi.
Pasian in Abraham tungah a kamciamna kem hi. Tapa kong pia ding acih mah bangin pia hi. Abraham in Pasian pen Jehovah-Jireh ci-in min pia hi. Paul in zong, “Pasian in ama’ kicin na om bangin note kisapna khempeuh hong pia ding hi,” ci hi (Phi 4:19)
Topa Jesu in zong hih thupiang na gen kik hi. Hih kial hun sung meigong tampi om napi, hih meigong nu kiang bek ah, Elijah kisawl hi, ci hi (Lk 4:26). Ahang pen hih meigongnu adang meigong te tawh ki banglo hi kha ding hi. Haksat mahmah laitak in zong a Pasian taaisan lo in, a kip let leh, a tapa khat bek aneih Pasian lampi ahilh, Pasian muanna anei meigong hi ding hi. Pasian in tua bang mite thei gige hi. Mi te in Pasian thei mah ung a cih ciat hangin Pasian in ama’ mite thei hi, 2 Tim 2:19, ah ci-hi.
Meigong khempeuh Pasian pahtak ahih lohna Paul in zong gen hi. Meigong pawlkhat te ci-leh-sa deihna zui in pasal nei nuam uh a, Pasian deihna zonglo uh hi. Tua bang mite lutang tawh kikhen uh a, a nuntak hangin a si hi (I Tim5:5-6) ci in gen hi.
Thukhupna
Hih meigongnu in mi namdangte hi napi Pasian mipa kampau banghangin um thei ai tam? A uptheih na ding thu pen, kial hong pianna a hang pen Elijah thungetna hang hi a, Pasian a nungta Pasian taktak ahihna ki gen kawikawi khin hi.
Pasian mi (te) zahtakna, thupi bawlna, pen Pasian tungah thupha bawlna ahi hi. Mitampi in zong tua bang ahihna hangin a teci panna za khin hi hang. Pasian mi cih leh Pasian zatpak mi cih zong omlai hi. Pasian in amah azahtaklo mi pawlkhat a kisap na mun ah zong zang pak thei hi. Ahi zongin Pasian in amuan, Pasian mi hih ding thupi hi. Elijah leh Elisha te Pasian mi hi a, Pasian mizat zong ahi hi.
Piakkhiatna limlim guaksuak ngeilo hi. Ama’ khekhap tawh kizui in hong ciah kik hamtang hi. Adiak diak in meigong, tagah, mizawng daipaam tung leh Pasian mite tungah piakna in guaksuaklo hamtang cih ki mu thei hi.
Hih meigongnu piakkhiatzia leh Jerusalem biakinn pi sungah aneih khempeuh a pia khia, meigongnu, Jesu in thu gentehna aneih nu tawh ki bang hi. Ahang pen aneih khempeuh uh khat zong sit lo in piakhia tuak hi. Pasian in bangzah pia khia cih sangin, na piak khit the bangzah nang ading val lai cih en hi.
Dotna
Meigongnu hun laitak a, Israel gam om dan gen in.
Elijah in baal kamsang te bang cih hiam?
Elijah in Ahab thu ahilh na ding Pasian kiangah bang ngen hiam?
Pasian in banghang Elijah meigongnu kiangah sawl hiam?
Meigongnu in banghang Elijah cih bangin gamta hiam?
Kamsangpa thugen a ngaih manin bang hamphatna ngah hiam?
