ZALUI KHUAPHELEP MEI THU
Zalui tui pana mei lak nadingin gamdang misiamte in galpi nihna hun lai-in khatvei en khin zo uh hi. Kawlgam-a khuaphelep mei saite in zong 1974 kumin teh ngei zo uh hi. Ahi hangin tuate in a ban a zom kei uh hi. Ahi zongin Austria a om leitung bup nate leh siamna khantoh nading vaihawm pawl leh Kawlgam-a tuitha tawh mei lak nading vaihawmte in 1980 kumin Kawlgam sung mun sagih ah mei lak ding vaihawm uh hi. Tuate lakah Zalui-a mei lakna khatin kihel hi.
1981 March kha-in mei lakna bawl ding kipan hi. A masa-in mei lakna a zat ding vante nawn nading mawtaw lam kito hi. A kizawh ciangin siktawn leh bilatmi-a kipan a kisam khempeuh kinawn hi. Tui lak nading tuilam kito hi. Tui bempi bawl nading mun zong kito hi. Tui bempi sungah tui cubic pi 71,000 ta hi. Tui a tawm ciangin tui bempi sungah sunin tui kikhol a, zan ciangin kikhah hi. Tua ahi manin sun leh zanin mei kivak thei den hi.
Tui lakna tuilam bul tui nuai-ah kibawl hi. Tua ahi manin tui a khan hangin bangmah nawngkaina a piangsak kei hi. Tui a kiam ciangin tullam sungah a vekin luangkhin a, meivak nadingin tui a kisam ngei kei hi. Tui lambulah a ninte khaih khiat nading kibawl hi. Tua hi kei leh nin in tui khakin a letkhia ding hi. Tui lambul le tui bempi kikal pi 8481 a pha hi. Tui lampi pi 2.6 zai a, pi 2.2 thukin khutpi nga a sah hi.
Tui bempi le set kikal a kikhokhiatna pi 487.63 ahi hi. Set le tuibem pi kikal a tuizawlpi a sauna pi 992.39 a pha hi. Mei lakna set nih om a, a thahatna kilowatt 200 tuak ahi hi. Mei set phual leh Tedim khuapi sunga meihawmna phualpi kikal tai 4.6 kigamla hi. Mei nasemte, tuibul, tuibempi, set phual leh meihawmna phualpite ah sun leh zanin a om uh hi.
Zalui khuaphelep mei bawl 1984 January 27 ni-in kiman siang hi. Tua huna gam vaihawm uliante leh tangpite kithutuak tak-a kisemkhawm ahi manin a dang gukte sangin kizo masa zaw hi
Hih khuaphelep mei hangin phattuamna tampi kingah hi. Sun Ich zanin mei tang a, a sap man tawm hi. A Khangtosa gamte bangin khuapholep meitha zangin na kisem hi. Sing atma, buh leh vaimin gawina, kaphi gawina, sathau gawina leh buh khiahma a kipan a tuam tuamin kizang hi. Tu-a i zatnate sangin mailam ciangin a thupi zaw-in kizang lai ding hi. Hih Zalui mei in i gam nakpi-in a khangtosak hi. Mailamah a khangtosak lai ding hi.
Kisinna
Zalui khuaphelep mei lak bang kumin kipan a, bang hunin kiman siang hiam?
Tui bempi sungah tui cubic bangzah ta hiam?
Set le tui bempi kikal-a tuizawlpi pi bangzah sau hiam?
Mei lakna set nite a thahatna bangzah tuak ahi hiam?
Zalui khuaphelep mei hanga kingah phattuamna teng gelh in.
Source:
Zolai Simbu Tan 4
