UPNA TAWH NUNTAKNA (James 2:26)
Agelh ~ Kap Za Khai (Photoh)
Thuciam Thak Lai Siangtho sungah sepna a bulphuh pen Lai Siangtho in James hi a, Khristian gamtat nuntakzia hong hilh pen thubu cileng zong kikhial lo ding hi. James 2:26 sungah, tua ahih manin hu a diik lo, hu a sang lo pumpi pen a si ahih mah bangin sepna tawh a kizom lo upna zong a si ahi hi, a cih mah bangin Khristian nuntakna cih pen sepna leh upna a kithuah khawmden ding nuntakna ahi hi. Hih sungah “Sepna” leh “Upna” ci-in kammal thupi mahmah nih na om a, adiakdiak in “Sepna” cih kammal tunga lai gelhpa James’ ngaihsutzia leh a laimal deihna encian ding hihang.
James in upna tawh nuntakna thu a lak nadingin mi nihte’ nuntakna tawh na genteh hi. Abraham leh Rahab hi. Hih sungah Abraham’ nuntakna bulphuh in gen ding hihang. Pasian in Abraham kiangah a tapa neihsun ahi Issac tawh amah a biakpiak nadingin sawl a, Abraham in mangin sem pah hi (Pian. 22:1-12). Hih in Pasian tungah Abraham in a upna leh a itna a lakcianna ahi hi. Abraham in tua bangin a lak loh hangin Pasian in Abraham’ upna thei veve ding hi lel a, ahi zongin Abraham in tua banga a lakkhiatna hangin Pasian leh amah kikal-ah a bucing lungsim kizopna piangsak hi.
Abraham’ thumangna in Pasian lungdamsak in a kizopna uh kipsak bek tham loin amah zong Pasian’ lawm hong suak hi. Tua ahih manin James in mi khat peuh in a upna bek tawh hi lo in, a sepna tawh a kizuih ciangin Pasian tawh kipawl theihna ngah pan ahihna thu na thei uh hi (2:24), na ci hi. Hih munah i muh theih thu in Abraham’ upna in ‘sepna’ ahi Pasian thumangna, zuihna leh Pasian deihna bangin gamtatna cihte piangsak cih thu ahi hi. Tua pen (Piancil 22:1-12) sunga thu pen James in la-in ama laikhak (James 2:20-26) sungah a zang kik hi a, ama Pasian thu ngaihsutna (theological concept) bang hi leh sepna cih pen Pasian thumangna, zuihna leh ama deihna bangin gamtat nuntakna ahi hi.
Upna thu gen ding hi leng, upna pen gupna ngah nadingin a kisam khat hi a, tua upna in ama cihtak thumanna pen sepkhiatna tawh amah leh amah hong kilaangkhia hi. Upna pen a piangkhia masa thu hi a, sepkhiatna pen i up man a, a gahkhia a gah hi. Hih upna sungah lungmuanna, zahtakna, thumangna, cihtakna leh itna cihte kihel hi. Abraham’ nuntakna zong tua bangmah hi. Issac tawh Pasian a biak na in ama upna leh a thumangna hi (Pian.15:6; 22). Hih in Pasian itna sungah zuihna leh nuntak pihna omlo pi-in upna om thei lo ahihna hong lak hi. I upna bangin gamtat lohna peuhpeuh mawhna ahi hi (Rom 14:23b).
James sungah Sepna i gen ciangin gupna ngah nadingin sem ding cihna hi lo a, Pasian i up leh Pasian thu mang ding, ama deihna zuih ding, kiniamkhiatna leh itna tawh upna gah, gahsak ding cih nopna hizaw hi. Upna leh sepna, gamtatna, zuihna leh thumangna cihte pen kikhen thei lo hi. Gupkhiatna hong ngahsak thei upna in itna sungah zuihna leh gamtat sepkhiatna nei den hi (James 1:27; 2:8; 1Kor.13; John 14:15). Hih in James hong laknop ahi “sepna leh upna” kizopna thu laigil ahi hi.
Thukhupna in enleng, upna tawh nuntakna cih thu sungah upna piang masa zaw den dinga, sepna ahih leh upna’ gah ahi hi. Kuamah in mihing sepna tawh gupna kingah thei lo hi. Pasian maipha kingah zolo, thupha kingah zolo hi. Ahi zongin upna kician i neih leh tua upna tungtawn in Pasian thumangna, ama deihna bangin nuntak gamtat sepna cihte hong luangkhia lel ding hi. Tua ahih manin ei thu-ummite in zong James hong hilhna bangin upna sungah zungthukkha masa ding hang a, tua khit ciangin upna gah ahi kiniamkhiatna leh itna bulphuh kawmin Pasian thumangna, zuihna, gamtatna leh sep khiatna tawh mainawt khawm ciat ni. Tua hi leh agah limci in hong khum mahmah ding hi.
