Vompi Khat le Lawmta Nih
Agelh ~ En Khat Thang
Khat vei, lawmta nih vasa beng dingin gamsung hong vak khawm uh hi. Gam thuk sim pian dong hong tunguh a, ganhing lauhuai khat peuh in, a suam theih ding lam thei tuak uh ahih manin khat le khat kamciam kipia uh hi. Tua pen; “Khat in a lau huai thei thu khat peuhpeuh i tuah a leh kipanpih ding, kihon ding hi hang” cih thu ahi hi.
A sawt het lo-in vompi golpi khat hong tuak takpi uh hi. Vompi a gal muh masa pa zong pau lo, phun lo-in sing kung tungah kah to vingveng hiau hi. A khat pa ahih leh vompi lah hong nai luata ahih manin singkung tung kah ding peuhmah hi thei nawn lo hi. Cimawh ta ahih manin lei ah bok sukin nak lo-in a si kineih hi. Vompi in vanehin a bil, a lu teng a va nap chuamchuam khitteh bangmah cih lo-in paikhiat san bilbel hi. Anungta nawn lo, a sisa limlim vompi in bangmah a cih selo dan hih tuak hi.
Vompi gam lapi a tunkhit ciangin singkung tunga pa hong tuaksuk in, "lawm aw, vompi in hong neh zawzen veh ee, na bil gei ah bang teng hong gen sim khiankhian a hia?" ci-in hong dong hi. Leilaka a si kineihpa zong hong thoto in "lawm aw, vompi in a citak lo, kamciam a pelh thei na lawmte um nawn kei in" hong ci veh aw. ci-in dawngkik hi.
Khat veivei eite in zong kamciam piak ding haksa salo napi hangin kamciam bangin gamtat ding pen baih het lo thei hi. Kamciam kimawk piak ding hi lo a, kamciam i kipiak nak leh lah pelh loh ding thupi hi. Bangzahta in lawmlegual in i kineih phial hang hamsatna i tuah taktak teh hong kitaisan vingveng thei zel hi. Leitungah lawm hoih ding pen haksa mahmah hi. I lawmte zong hong sihpih ngam ding zahin upluat muanluat theih hikhin lo thei hi.
Leitung mihau pen Bill Gates in "Na cih theih mahmah hunin mi tampi takin nang hong thei dinguh a, na cihmawh mahmah hun ciangin ahih leh na lawm hoih penpen kua hiam cih nang na thei ding hi" cih khat gen ngei hi. Na lawmnu/lawmpa a dingin nang e? lawm hoih khat na hi zo diam? Vaphual itna i cihcih i minam sungah a nungta lai hiam?
Source:
Hih Thute Manpha Sa Lua Ni Teh (Laibu)
http://www.moralstories.org/the-bear-and-the-two-friends/
Laibu Saal / Zomi eLibrary
