Voksa Bak Nih le Naupang Khat
Agelh ~ En Khat Thang
Kawlgam khuata mizawng veng khat a om temple khat ah mihau khatin naupangte kaikhawmin an vakna khat va nei hi. Naupangte zong an lim, meh lim nek khak ding lawp takin hong kigual ngeingai uh hi.
Anteh kan, be meh le voksa bakpi nih ciat kuang sungah thuk sa in hawm sakin a nek ziahziah uh an vak innkuan te in enin, lungkim mahmah uh hi. Tua leh, ankuang sungah voksa om lo-in, be meh le buh bek lukun a ne naupang khat mukha citciat uh hi.
An hawmte kiangah hih naupang voksa pia kha lo na hi uh hiam? ci-in a dot uh leh an hawmte in a kibangin naupangte a piak kim lam uh gen hi. An vakpa lung himawh ahih manin, naupang pa gei ah pai-in hopih ding a sawm leh, naupang pa lukhu tawi sung pan voksa bak nih a kitun muh sak hi.
Naupang pa zong khitui luang kawmin an vakpa hong hopih a "ko ka inn vuah sa meh ne zo ngei lo, ka Nu in voksa duh mahmah ing cih gen zelzel ahih cianga, ka Nu a ding puak nuam ka hih manin kei nektang voksa a sel sim hing" ci-in gen hi. Thu piang takpi khat ahi hi.
Eite in, zing-an i nek ciangin ka NulePa in zing-an bang a ne uh tam cih i phawk kha hiam? Sun-an i nek laitak in ka NulePa in bang peuh a na ne uh diam? Nitak-an i nek laitak in ee ka NulePa te in cidamin a duh uh a ne zo ding uh hiam? cihte ngaihsut huai ka sa hi.
Nikten puansilh hoih nono i lei hunin, ka NulePa te in a puan luite mah uh a na silhsilh lai uh diam? I duh khat peuh i nek pakpak hunin ka NulePa te in bang a duh uh tam maw cih i ngaihsut sak kha ngei hiam? Khasum i san simin ka NulePa te in zat ding sum a kitasam uh tam maw? cih ngaihsut sak ding hi hang.
Mihing pianzia pen ei le ei bek mah a kikhual nuam kihi in, zi le ta, pasal te bek kiphawk kha tawntung zaw hi. NulePa te ahih leh kimangngilh kha zel thei mawk hi. I kideih sakna ahih leh phawk huaite i phawkkhak ding cih thu ahi hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
