Vietnamese Nutate Thu
Agelh ~ En Khat Thang
American le Vietnam gal ven zawh ciangin Vietnam gam pen zawnna lianpi tawh hong kizom hi. A pasal gal sungah si ahih manin, Nupi khat a tapa ngek lai tawh meigong in hong om hi. Nupi nu a mel hoihin moi lai sim hi. A it, a ngai tampi om tham napi’n pasal kik nei nawn lo-in, a tapa ahih theih tawpin hanciamin pilna sin sak hi.
Nisim nasep gim mahmah tase leh, a tapa sangkah sak zo ahih manin lungkim mahmah hi. Naupang no zong kum 16 pawl hong val ciangin lai hat hi diven scholarship ngahin America gam ah sang va kah hi. Sang hong zawh ciangin NASA ah nasep hoih hong ngah suak ahih manin America ah ten suak tawh hong kizom hi. A Nu ahih leh a tapa thu galzakin lungdam luankhi tawh a mah kia Vietnam ah teng suak hi.
Tangvalpa in a Nu phawkin khasimin US$100 ta kitatsat lo-in khak den hi. Gal huhau in, Vietnam hi ta leh America a kipan leitung bup phial kihaksa ciat hi. Tua hun lai a dingin US$100 pen mannei in zatcing lua peuhmah hi. E-mail, phone cih dante kizang nai lo ahih manin Nuta te a kizopna uh hong tawm semsem hi. NASA ah engineer sem tapa in khasim a Nu sum khak den ahih manin a ma tumtakin hong lungkim mahmah hi. Christmas holidays cih bang ngah zel hinapi Inn lam ciah ding ngaihsun kha ngei lo hi.
Ni khat, a Nu in sih san ta hi cih sikkhau sat hong ngah petmah ciangin, a Nu luanghawm vui dingin hong ciah hi. Dah mai se lo-in, a Nu luanghawm hong vui hi. A khitui zong luang se lo hi. Hi bang teng hong sep khit ciangin, a Nu lawmte khat lai-ip khat tawi-in "hih lai-ip na Nu in nang a ding hong nusiat hi" ci-in pia hi. Tangval pa in tua lai-ip sah sim tham hong hon ciangin US$ 100 dal honpi khat leh a Nu khutma lai gual thum khawng hong mu hi. Tua tak ciangin NASA engineer tangvalpa ki-ip zo lo-in hong kap khia petpet ta hi. Tua lai sungah ki-at pen hi bang ahi hi;
“Son, I don’t spend too much money. I miss you a lot. Every time I hear a motorcycle passing by, I run out the door but it wasn’t my son. I saved this money for you in case when you get sick.”
Nute pen a tate mipil, misiam, mihau, milian a suah lungdam tawntunguh hi. Sumlepai i khak zong lungdam uh hi. Tuate sangin a lunggulh zawk uh ahih leh, a tate uh hong phawkin hong munuam penpen uh hi. Nisim phialin kongvang ah hong galet tawntunguh hi. Lungdam luankhi tawh vai hong dawn ding leitungah na Nu sim loh midang om khol lo ding hi. Mun dang gamdang omte in i ciah zo pah kei leh zong hopih tangtang leng i Nute a lunglen uh phatuam hi. Hih lai ka gelh kawmin kum 13 val US ah omin ka ciah teh ka Nu in lungdam lua in khitui luangin hong dawntuah ka phawk hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
