BANG HANGIN VICTORY DAY KICI GALPI NIHNA AH GUALZAWHNA RUSSIA GAM-AH 9th MAY IN KIZANG A, EUROPE LEH USA AH 8th MAY IN KIZANG HIAM? REICHTAG BUILDING TUNGA MAAN KIZAIHNA
8th May, 11:01 pm Berlin time in Nazi Germany in Galpi Nihna ah a guallelhna uh tangko uh hi. Hih thu hangin Europe ah gualzawhna hong kilang hi. Ahi zongin Berlin time leh Moscow time a hun kibang lo ahih manin Nazi Germany zawhna dingin a poimawh diak ahi Soviet mite in May 9, 1945 in Gualzawhna Ni (Victory Day) zang uh a, mihingte' tangthu adingin sisan naisan a tam luanna pen galpi a beina ni ciamtehna dingin tu dong Russia in kum sim May 9 in Victory Day zang uh hi.
May 9 pen Russia gam-ah ni mawkmawk ni hilo hi. Kum 75 lian a beisa hun in Russia gam-ah Second World War kici Galpi Nihna i cih amau Great Patriotic War a cih uh a beina ni leh Nazi Germany tungah gualzawhna a ngah ni uh ahi hi. Galpi Nihna hangin leitung bup ah gal kidona leh kialpi hangin mihing 70 million kiim bang (tua hun in leitung bup milip 3%) na si hi. Soviet Union gam in Galpi Nihna ni 1,418 sung na do a, mihing 27 million val bang na sihlawh uh ahih manin mi tam si pen uh hi. Hih galpi ah a kihtakhuai thupiangte mihingte lungsim sungah a lauhuaina leh luang tamna khamna tu dong kimangngilh lo ahih manin Galpi Thumna a pian' ding a deih leitung tangthu kan lote buang kuamah om lo hi.
REICHTAG TUNGAH SOVIET FLAG KHAINA (Raising a Flag over the Reichstag)
Battle of Berlin kici kidona nasiat hun laitak May 2, 1945 in Soviet' Red Army-te in German' Weimer Republic i parliament Reichtag tungah Soviet laan va khai uh a, a laan khai laitak uh 1991 in Soviet Union gam a kitapkhap khit nungin a maan zaih ding vaihawm pa pen Red Army Naval officer leh photographer Yevgeny Khaldei hi cih kitheikhia panin kikipsak hi. Reichtag tungah Red Army laan kikhaina maan kizaihna May 13, 1945 in Ogonyok magazine ah kisuaksak masa a, tua khitin leitung bup-a publications tul tampi ah a kisuahsak banah Galpi Nihna (World War II) hun adingin maan poimawh leh Soviet gam in Nazi Germany tungah gualzawhna a lahna lim hi ci-in kiciamteh hi.
Battle of Berlin kici gal dona pen Galpi Nihna hun in European theatre ah a tawpna gal lian dona (final major offensive) hi a, Soviet Union in "Berlin Strategic Offensive Operation" hi ci-in ciamteh hi. 16 April 1945 panin Vistula-Oder Offensive kici gal kidona ah Soviet' Red Army in Germany front sungah va lut suak zo uh a, Germany nitumna ah manlang takin ni khat in 30-40 kms kikal mainawt uh uh hi. 16 April 1945 panin kidona kipan hi. Vistula-Order Offensive gal dona ah Red Army manlang takin a mainawt zom khit uh history adingin sisan naisan tam a luan'na pen leh mi tam sih penna lak-a khat ahi Battle of Berlin kici 20 April 1945 zan nung a kipanin 2 May 1945 dong kidonna piang hi.
1894 kum in a kilam Reichstag' architecture pen tua hun adingin thupi in gol hi. A building pen German history kiciamtehna lim dingin a kizat hangin Soviet' Red Army in fascist gal (enemy) ciamtehna lim (symbol) bangin ngaihsun uh hi. Reichtag building pen Nazis adingin democracy leh representative government lim hi a, 1933 in mei in a kat siat khit nungin khak uh hi. Reichstag building pen fascist power laizang dingin kizang lo zawsop a, Nazi party in a uk hun sung kum 12 kikkhak a, Reichstag a meetings neih dingte a kianga om Kroll Opera House ah nei zaw uh hi. Reichtag kulhbang kiim ah gal kidona nasia takin a piang khit zawh Soviet' Red Army galkapte in 2 May 1945 in Reichstag building la zo uh hi.
Reichstag building pen German history ciamtehna lim (symbolic) ahih banah Nazi Germany' lungtang ahih manin Berlin adingin a ciamteh tham ngimna nei-in kimuitum pen (most symbolic target) suak hi. Reichtag tungah Red Army laan a kikhai hun pen a building kiim-ah kidona a nasiat hun lai-in zan a kikhai ahih manin a maan zaih kua hiam cih kitheikhia zo pah lo hi. 30 April, 1945 in Soviet makai Joseph Stalin in International Workers' Day ahih kei leh May Day i cih uh 1 May ni-in a galkapte un Reichtag building a lakna dingun nawh in thu pia hi. Soviet gal vanleng nih in a building tungah puan sau a san a kibawl gol (large red banners) bang zah hiam khiat khum hi.
Tua khitin parties nih headquarters - 380th Rifle Regiment panin M.M Bondar leh 756th Rifle Regiment Capt. V.N. Makov' kiangah reports tampi tung a, 30th April in Reichtag building tungah Soviet laan kikhai hi ci-in thu tampi vei va tung hi. Hih bang reports Marshal G. K. Zhukov' tungah a tun' khit zawh in a galkapte in Reichtag building la zo uh a, a building tungah Soviet laan (flag) khai uh hi ci-in tangko hi. Ahi zongin a building ah correspondents mite a tun' tak ciangun Soviets laan kikhai mu lo uh a, a pualam ah German thautang in a kapkhiatsak kimu hi.
Reichtag building pua leh sungah kidona nasia takin a piang khit nung 30th April 1945, 22:40 hrs in Red Army kum 23 mi Rakhimzhan Qoshqarbaev a kici a building tungah kahto in Germany gam lim lahna (symbolizing) dinga kizang numei lim a kibawl "Germania" statue kumpi lukhu (crown) ah Soviet laan va khai hi. Soviet laan a khai hun pen zan ahih manin maan zaih dingin mial lua hi. A zing ciangin German te'n Soviet laan kikhai va lakhiatsak kik uh hi. A tawpna dingin 2 May, 1945 in Red Army galkapte in Reichtag building khempeuh la zo uh hi.
2 May 1945 in gal kidona a bei pian khit a dai khikhe (pacified) Reichtag ah Red Army Naval officer leh photographer Yevgeny Khaldei maan zaih dingin va kah hi. Khaldei in laan golpi khat tua mun-a khai dingin a pu (uncle) in sabuai tuamna puan (tablecloths) thum a khuikhawm a tawi hi. Reichtag building ah Soviet laan a kikhaina a official story ah bel a laan khai dingin Red Army nih a kitengkhia ngiat - Meliton Kantaria (Georgian mi) leh Mikhail Yegorov (Russian mi) kicite Soviet flag a khai dingin kizangin maan kizaih hi kici hi. Ahi zongin laigelh (authors) pawl khatte hih maan kizaihna a gam vai tawh kisai-in a hang (political reasons) kilaih a, a laan khai taktak pen Aleksei Kovalev hi zaw hi ci uh hi.
Ahih hangin Reichtag building tungah Soviet laan a kikhai laitak maan zaih Khaldei in Reichstag ka tun' in ka maan kizaihna uh (photoshoot) hong huh dingin lampi a hong pai kha galkapte ka zang hi ci hi. A maan zaihna ah a building tunga la om Khaldei kihel in mi li dawk hi. Maan zaihna ah Reichtag building tunga Soviet laan khai pa pen Kiev khua panin kum 18 mi Private Kovalev leh mi dang nihte pen Gagestan khua mi Abdulkhakim Ismailov leh Minsk khua mi Leonid Gorychev (Aleksei Goryachev zong a kici) ahi hi. A maan kizaihna dingun 35mm f3.5 lens a nei Leica III rangefinder camera zang uh hi.
Sources:
The Express; The Wire; Sputnik and Wikipedia
