US Tun Zawh Kum Sawm Khit Ciangin
US ah Ka Muh Khak Thu Pawl Khat (Azom)
Agelh ~ Awn Za Pau
US ka tun kum uh pen 2008 kum hi a, tua hun lai in lampi a tuamtuam tawh a na tungsate leh Guam pan a, a pai pawlte cih lo buang R tawh honglutsa tam lua nai lo hi. Ahi zongin ko tun zawh akipan Malaysia pan leh Thailand pan hong tung ditdit uhhi. Tua hun lai in Mangpau Manglai athei lo a za ngeilo vive hi tek uhhi. A Manglai cih thadah Kawlpau zong a thei lo hontang vive na tam zaw lai uhhi. Kawlgamah zong Mandalay, Yangon apha ngei naii lo, gam nawl khua leh tui pan vive zong na tam uhhi.
Kei mahmah zong Japan ah kha thum sung ka om lai cih lo buang, Kawlgamah Mangpau zat hun ding a om kei hi. Kawlgamah mikangte hong pai ciangin a Mangpau pen kitelgawp ih cih bang lo in, amau gam amau leii ih tun ciangin amau leh amau kihona ngei bangin hong hopih ciangin, a awsuah uh kitel pahpah het lo hi. Lai in hong gelh leh bel na lamdang het lo ding hi. USA ah zong Northern English leh Southern English ci’n na khen lailai uhhi. Tua bek hi lo in gamke a tuamtuam ah zong khuatuam vive tek mah na hi uh a, a mau khua leh tui pau tawh hong pautek bang hi leh ih tel het loh ding adil in om lai ding hi. Ei lam a awsuah dan akilamdang tampi a om mah bangin amau kiangah zong ana tam sem zaw lai uh ahihi. Amau pau pen ih santheih taktak kholloh hangin, mangsia khiat kawmsa in kidawng kikkik thei hi. Amau hong gen tel peuh leng ei zong eimau Mangpau theih danin gen leng ih awsuah a maan loh hangin amau zong na mangsia khiat thei leuleu uh a, khat leh khat kitel veve hi. Kei bang zong Mangpau kisinna ci kawmin, zumkong mangkong zato inn paina ding kiciamkholhna (appointment) pai ding a om leh, akuamah peuh a sum a paai la kilkel lo in lawptakin ka paipih pahpah den hi.
Tua kawmkalah mi hong tam semsem ciangin Tulsa khua sungah biakna pawlpi zong hong kiphut ditdit leuleu a, tua kipawlna pastorte in a pawlpi mite bangkua vaii khempeuh vaiipuak laaksak pah uh ahih manin, a pua lam pan kamphen cial kullo in mi hong tam semsem hangin hong lem suaksuak lel hi. Kum hong beibei a, hong tungthakte tanu tapate zong sang hong kah pah tangtang tek uhhi. Ei zong ih kum hong tam semsem ciangin ih tha ih ngal leh ih ngaihsutna ih khuakte zong hong dualdapta hi. Tua bek hi lo in ka khuazaakna hong sia semsem a, a tawp khakna-ah mikang pau zong tel semsem zaw lo-in, amau honggen ziauziaute pen kiman thei vatvat lo zaw lai hi. Ih mipihte tate zong high school bang hongtun petpet uh ciangin Mikang pau zong ei sangin hong siam zaw tham lai uhhi. Amau bek hi lo anu apate zong a nasepna pan ahi zongin a vahna a ciahna pan na zaza uh a, bangmah dang tawh helh kha lo ahih manin, mikang pau pen, agen kik ding haksa asa bek uh hi a, ei zong sangin na sangsiam thei zaw lai uhhi.
Ka tun zawh kum 10 acin ciangin, kei zong akuamah peuh kiangah kamphen dingin hong sam nawn kei mai ta un, ataktak kamphen akisap leh telephone pan zong Zopau leh Kawlpau tawh kisam thei lua hi ka ci a, ka tawp bawlta hi. A taktak in bel khangnote in ei sangin a mikang pau a telzawk uh hangin, zato vaii tawh kisai medical terms cih khawng athei nai hi peuhmah zong hi lo uh a, kiho ziauziau theihna ciang bek mah hi lel hi.
