US ah Bangkua Sung Buaina Tam Mahmah
US ah Ka Muh Khak Thu Pawl Khat (Azom)
Agelh ~ Awn Za Pau
Bangkua sung lemlohna cih pen mun khempeuh ah a om ding ahih lam ih theih kimsa tek mah ahihi. Ahi zongin US tung ei Zomi sinkhak tuahkhakte pen Kawlgam a ih tuahkhak ih sin khakte tawh kibang deuh lo hi. Adang a piangthei thute kong ban gen nawn kei ding a, tate leh nu leh pate kikal thupiangte bek kong pulaak ding hi.
Zomite pen neek-awl taak-awl liang a inn leh lo a lei ngamte ih hihi. US hong tun zawh uh ciangin kum 5 kum 6 sungin inn lei ding hong kidem bawlta uhhi. Tua kawmkalah tanu tapa hong nei uh a, tate zong sang kah theihna ding dinmun hong tungta uhhi. Tate sang hong kah uh ciangin, inn bill piak ding sum zon lohin phamawhta ahih manin a nupa in sum hong thalawh uh hi. A tate uh lah khat leh nih sangkahta uh ahih manin, anupa in kikumin khat in zanlamah semin khat in sun lamah sem hi. Cihnopna ah a tate sangkah hun zingsang lam a, tate vaii tawh kisai a sem a bawl thei ding leh tate sangpan hong ciah ciang a, a don a kem thei ding cih deihna ahihi.
Tua bangteng kawmkalah nu leh pate in a sang vaii peuhmah theihpih kha man peuhmah lo uhhi. Pau leh ham zong thei peuhmah mawnglo uh ahih ciangin, sang pan a tate tungtawnin vaikhaknna a neih uh hangin bangmah sepna bawlna bawl ngei thei lo ahih manin, tate leh nu leh pate kikalah kitheihneihna om ngei meel lo uhhi. A tate uh sang a kah uh hangin, inn a anu apate tung pan, a sang vaii peuhmah theihpih loh banah donpih zo ngei lo in tate pen sangah, mite lakah zong gualneek zo lo in om milmel lel mawk uhhi.
Tua bang hun hong tun petpet ciangin, tate leh nu leh pate tungah, kizopna hong tawm semsem hi. Tate in nu leh pate tungah itna leh zahtakna hong tawm semsem hi. A tanu a tapate zong a sangkahna ah nuamsa lo in a pau nuam mahmah lo pawl khat, pawl khatte a laisimnate a lunglut peuhmah lo pawl khat na om uhhi. Tua bang dante a om ciangin ama sianu a siapate in sang a counselorte tungah na ap pah uh a, a bul kankan uh ciangin a suahpih natna hi peuhmah lo in bangkua sung pan hong piangtawm lungsim natnate na hi mawk hi. Tua ahih manin nu leh pate in tate pilna ding leh khuasuahna ding mah, a masa pen a ih bulphuh ding kisam kasa mahmah hi.
Sawnsawn ah Mikangte in na tate uh sat kei un na khut uh tawh zong vel/vua kei un akici pen na tate uh hilh kei un, koih khong lel un cih lamin a la a ngaihsun pawl khat na om ta leuleu uh a, tute tate hilh lo a, akikhahzau honpi khat mah na om ahih manin, a tazau naupang tampi tak mah na om leuleu hi. Ih gensa om bangmah in sangah a siate in hilh theih hilh mawh na hilh uhhi. A zenzen in a nu pa a sanggam khat peuh in vua in sat in hi leh 911 sap ding pian vive na theisak khin uh ahih manin, ei zuihsa ei zatsa ngeina tawh na kibang nawn lo hi.
Mihing ih cih pen a pil a siamsa a suak ki-om lo hi. Pilna siamna ih cih in ih manphatna hi. Tua ahih ziakin ih tu ih tate pilna ding mah thupisak masa ni. A pilsinna sang sungah a lawm a gualte tawh kihual kileekkim leh maingal tak a, akikholh theihna ding thupi mahmah hi. A sangah nuam a sak himhim ding thupi mahmah hi. Tua mah bangin a innah zong nu leh pate tawh omkhop nuamsa in, inn lum lo lum taktak mah a, hong neih ding uh thupi hi.
