UPNA TAWH JESU
PUANMONG TEEP LAWN DING A KISIN KHIA NUMEI
Maku 5:21-34; Luk 8:43-48; Matt 9:20
Agelh ~ Rev. Dr. John Thang Hum &
Dim Lun Zam
Topa Jesu leitung ah hong omlai in, hehpihna a ngen mite khut hawmsa in ciah kik ngeilo uhhi. Tua mite thupha ngah zia leh mimal in Jesu kiang anaih zia uh ki banglo hi. Pawlkhat ten, Jesu tungah aw lianpi tawh kiko a, pawlkhat te anu, apa, a siapa, cih bangin palai semin, pawlkhatte a lawmten pua in, pawl khat te ki lawng teekteek in, pawlkhat te, thupiakna na tawh dam in, pawlkhatte amau mahmah in vapai in Jesu tawh va ki mu uh hi.
Hih igen ding numei no nu ahihleh, kuama huh ding cial lo in, Jesu a-inn ah va pai a, a va lawn ding zong ngen selo in, amahmah ngiatin a valawng teekteek nuam nam ahi hi. Jesu kiang apai dan zong mi theihding utlo in, va paisim khiankhian hi. Amai lampan pai lo in, anung pan delh hi. Bangcidan in Jesu kiang zuan hita leh Topa’n upna tawh ama’ kiang apaite guak ciahsak lo in, a lunggulhna uh pia hi.
Hih numeino nu amin ki genlo hi. Ahi zongin ama’ upna ih etteh ding hoih hi. Ama natna pen siluang natna kici hi. Judahte ngeina ah numeite a numei ngeina aneih sung teng kuamah tawh kisukha theilo ding hi. A sukhate zingsang pan nitak dong a sianglo hi ding hi (Siam 15:19). Tua ahih manin hih numeinu milak pai khia ngam lo ding theihsa hi. Tua ban ah anatna hangin zong gimkhin mahmah dinga, amah leh amah ki cimtak kha ding hi.
Topa Jesu kiang vapai a, a puan valawng kha leng dam ding cih upna ngah hi. Upna i cih pen, i sung pan hong pian nang baihlo a, tua hong piangkhin leh bel, neucik khatin na lianpi sem khia thei hi. Upna aom nak leh kuamah in asep ding khaktanzo nawnlo hi. (Leitung kiimvel a pai Columbus in leitung kiimvel in pai leng, ka omna mun ka tung kik ding cih upna nei a, tua bangin khual hong zin leh leitung gam thak tampi mu in, a omna mun tung kik takpi hi.)
Upna in mihing sungah hangsanna leh utna pia hi. Hih numei in Jesu’ nasepna azak ciangin aman zong va muh ding ut hi. A taktak in midangte bangin anu leh apa, a sanggam te khatpeuh sawl in ngen thei ding hi napi tua bang ding utlo a, amah teekteek in valawng nuam sese hi.
Tuhun ciangin thu-ummi tampi te in, thadah ci ding maw, tello ci ding maw, Jesu kiangah amau teekteek in apai sangin midang khat tungtawn a vaneh ding, amau mahmah in a thunget sangin, midang khatpeuh cial ding, siate nget peuh man dingin ngaihsun uh hi. Thupha taktak leh damna taktak pen ei tektek in Pasian tawh kizopna i neih ciangbek in hong om pan hi.
Numeino in Jesu alawn ciangin Jesu tung pan vangliatna pai khia hi. Topa’n “Kua in hong lawng hiam,” cih a dot ciangin, Peter in, “Topa aw, mi tampi in nang hong nawk kha uh hi,” ci-in Topa in anawk kha leh a lawng taktak mi khen thei sinsen hi. Pasian in ama’ mi leh ama’ milo khen thei hi. 2 Tim 2:19 ah, Topan ama’ mite thei (midangte tawh tuam khen), ci ngiat hi.
Hih numeino in a lunggulh ahi, cidamna ngahsa in ciah hi. Topa Jesu kihei in, numeinu kiangah, “Na upna in nang hong damsak zo hi, lungnuamtakin ciah in,” ci hiau hi. Topan’ amah anawk kha khempeuh tungah thupha pia lo hi. Upna leh, lunggulhna tawh alawng taktak te bek in damna ngah hi. Ama thu kigenna dang ih theihloh hangin, hih damna hangin a innsung, a khua sungah khanlawhna om ding a, amahmah in zong Jesu zui ding ki ngaihsun thei hi.
Thukhupna
Numeinu’upna in, a omna pan thokhia sak a, Jesu kiang zuan sak hi. Upna taktak anei mi-in tutu nuamlo dinga gamtang khianuam ding hi. Mite genna zakna thupi a, tua khit ciangin, eima mimal in Jesu kiang i vapai ding thupi zawlai hi. Mi pawlkhat in tuhun in biakinn pai nuamlo a, Pasian munkhempeuh ah om, ka inn pan zong kibia thei, ci uh hi. Sumpi bang mite khak ziau in amau ngiat biakinn pai nuamlo zong om hi. Biakinn ah eimau mah va pai teekteek na, eimahmah in thungetna, siate ngaklo a, ei mahmah in Lai Siangtho simna pen ki lamdang mahmah hi. Hih siluang natna nei numei nu in izuih ding thu manpha hong musak hi.
Dotna
Hih Jesu puan mongtep lawng numei banghang amin ki gen lo hiam?
Ama’ omzia bang ci bang hi a, bang hang Jesu mu nuam hiam?
Jesu kiangah thupha a lakdan bang ci bang hiam?
Jesu in numei no in amah a lawnlam bangci thei hiam?
Peter in Jesu kam bang ci dawn hiam?
Eite ading hih numei nu upna in bang hong gen hiam?
