Uiphuk Nih
Agelh ~ En Khat Thang
Guah ciin ni khat, Uiphuk honpite kikaikhawm in nuamsa lua hi dinguh hiven guah tui amm in khual hongzin uh hi. Mualbo khat le khat kikal hong kantan khawmuh hi. Tua leh lamet lohpi-in a mai pena pai, uiphuk nih guam thuk sung khatah hong kia citciat uh hi. Guam thuk sim ahih manin uiphuk honte in a lawm nihte hong diangtokik zolo dingin lamen ahih manun "no gel guam sungah si suak lel un hong kahtokik zo peuhmah lo ding hi uh teh" cih san ngeingai uh hi.
Ahi zongin, guam sunga uiphuk nihte pen hanciamin hong diangto teitei uh hi. Uiphuk honpite in a cih ngei sa bangun "gim lel uh teh! diangdiang se dah un!" ci-in awtsan lai uh hi. Guam sunga uiphuk khat zong thasanin a dian leh hong suakta dektak hinapi uiphuk honte in, "lawmlawm teh a suakta zo ding kisa na hiam? A si ding veve guam sungah si suak lel in" ci-in zahpih bawl uh ahih manin tua uiphuk khat zong tha bei-in guam sungah hong si ta hi.
A cianlai uiphuk khat zong hanciamin guam sung pan hong diangto zela, guam tung pan uiphuk honpite in a cih ngei bangun "na lawmpa tawh si khawm lel in, suakta kei ni teh" cih san ziahziah mawk uh hi. Ahi zongin, guam sunga uiphuk in hanciamin hong dian tohtoh leh hong suakta petpet mawk hi.
Uiphuk honpiteng in zong a lawmuh hong naih ngeingai-in, "kalaisai! ko nang zong lawmpa khat dana guam sungah si lel ding kong sak uh hiven, a tung pan kong awtsan ngeingai uh za kha lo na hi maw?" a cih uh leh;
A suakta uiphuk in zong "kei ka bil in khuaza thei lo hiven, no tengin a tung pan thapia-a nong kiko ziahziah uh kong muh ciang thangah gawp in deihtak kong diantoh leh hong suak ta hing, nong thapiaknate uh ka lungdam mahmah" cih san hi.
A tatakin, eite i nuntak khuasakna ah, ih khantohna dingin nasep buai, gimletawl thei lo bang phialin kalsuanin i hanciam laitak, kimlepam pana gensiatna, zahpihna, khaktanna, elbawlna, engkona cih bangte tampitak i tuak kha thei ding hi. Tua bang hun ciangin a bengngong (khuaza thei lo) bangin i om theih ding zong kisam mai ding hi. Kimlepam' gensiatna a awlmawh se lote pen gualzawhna tawh kinaih semsem cih phawk ni. Ngimna le tupna kician nei peuh leng i kim, i pama ging ziazua khempeuh thathak ngahna hong suak lel ding hi.
Source:
Hih Thute Manpha Sa Lua Ni Teh (Laibu)
http://www.moralstories.org/two-frogs/
Laibu Saal / Zomi eLibrary
