Tuikhuk Khat A Om Hi
There Is a Fountain
(Zechariah 13:2)
Agelh~Zam Khat Kham
William Cowper (1731-1800) Early American Melody
Arranged by Lowell Mason (1792-1872)
Hih la a phuakpa William Cowper (Kooper ci-in kisim) pen English classic literary circle-a mite’ zahtaak mahmah khat ahi hi. Alexander Pope (1688-1744) leh Percy Bysshe Shelley (1792-1822) te’ hun kikal sung tenga English laigelh siam minthangpen khat-a kiciamteh ahi hi. Leitung thu-a a gelh laite lakah Mangkam-a Greek novel Homer a teikhiat zong khat ahi hi. A la phuah (poem) lakah The Task minthang mahmah a, “John Gilpin” a cih poem bang a kideih mahmah khat ahi hi.
Cowper bel England gam Great Berkhamstead ah November 15, 1731 ni-in suak hi. A pa Pasian’ nasem khat hi a, a nu bel kumpi nam sung pan-a piang khat ahi hi. A neu lai tawntung a pumpi dam lo het lo a, a lungsim zong nehno mahmah den hi. Tua banga lungsim kho zo lo a a omna zong kum 6 bek a phak lai-a a it mahmah a nu in a sihsan man hi deuh hi. A sih kuan nangawnin a nu in a sihsan mawkna hangin dah lo kap lo-in ni khat zong tum ngei nai lo hi, ci ngeungau mawk hi.
A neu lai-in upadi (law) sin dingin a pa’n pantah hi. A laisinna khempeuh a zawh ciangin a laivuanpi ding kihta lua mahmah a, a lungsim kisia zo phial-in gui-awklup ding nangawn sawm ngei hi. Kha 18 sung mihai kepna ah kikem hi. Tua mun ah a om sungin ni khat Laisiangtho sima, Romans 3:25 ah, “Ama sisan upna tungtawnin thoihdamna-a kithoihna in Pasian in amah hong pia hi” (ZIV) a cihna mun simkha hi. Hih Laisiangtho mun a simkhakna tungtawnin Zeisu Khazih tawh kizopna taktak hong nei thei a, a mawhna khempeuh a maina hong phawk hi. Tua pen 1764 kum hi a, ama’ kum 33 pha ta hi.
A pianthak khit, a lungsim kisiatna pana a damkik khit ciangin Reverend Morley Unwin-te inn kuan tawh hong kithei a, tuate innkuan in nakpi-in panpih uh hi. Reverend Unwin a sih khit ciang nangawnin a zi Cowper adingin a lawm hoihpen in omsuaka a sih dongin kem den hi.
1767 kuma Reverend Unwin a sih ciangin “Lamdang Lua Hi, Ong Hehpihna” (Amazing Grace) a phuakpa John Newton in Reverend Unwin’ zi le tate leh William Cowper mahmah ama’ omna Olney ah a kisuan nadingun zol hi. Tua mun pen Newton in Anglican pawlpi khat kema pastor a sepna mun ahi hi. Tua lai mah ah hih laphuak minthang tegel ki-it mahmah uh a, kum 20 val sung kikhawl uh hi. Tua banga a kithuahna panun 1799 kumin Olney Hymns kici labu minthang mahmah khat hong khenkhia uh hi. Tua labu sungah la dawng 349 oma, tuate lakah dawng 67 Cowper’ phuah hi-in, a dang khempeuh Newton’ phuah ahi hi. “O For a Closer Walk With God” a kici la zong William Cowper phuah mah ahi hi.
“Tuikhuk Khat A Om Hi” a cih la thulu pen a tungin “Peace for the Fountain Opened” kici hi. Cowper’ phuah late lakah a kideihpen khat hi a, Zeisu Khazih sihna hangin mawhmai nadinga kisam khempeuh kizosiang taktak hi, cih hong telsak phadeuh hi. Thuciam Lui sunga Zechariah 13:1 a, “Tua ni ciangin David innkuan leh Jerusalem khua-a teng mite a mawhna uh leh a siantho lohnate panun a sawpsiang dingin tuikhuk khat kihong ding hi” (Kei’ own translation) a cihna mun bulphuh-a kiphuak ahi hi. Ephesians 2:13 tawh kizawitawn mahmah hi.
A nuntak sung tawntung lungsim gimna (melancholia) in bawlsia mahmah hi. Tua bang hun ciangin amah leh amah thah a kisawm hun zong om mai hi. Ama’ phuah late lakah a ngaih phadeuh late tua bang hun khit cianga a phuah hi sezen hi. A sihkhiat dong Pasian in nungngatsan kha ding cih a patauhna pan suakta zo mahmah lo mawk hi. Ahi zongin a sih madeuh-in a lupna tungah a mai tai mahmah-in om-a, “Vantung kongkhak hong kikhaksan het kei taktak mawk veh e” ci hi. A pumpi zawngkhal dena a lungsim a kip loh hangin mi tampite a hehnem ding leh tha a pia ding lai tampi gelh-a la tampi a phuak dinga Pasian’zat mi thupi mahmah khat ahi hi.
Hih la a aw bel England gama kiphuak hi lo-in America gam kiphuh cil lai hunte a kisasa la-aw khat a kila ahi hi. “Father of American Church and Public-School Music” kici zawzen Lowell Mason in arrangment a bawl ahi hi. Amah January 8, 1792 ni-in America gam Medfield, Massachusetts ah suak hi. A khangno lai-in Savannah, Georgia ah tenga, 1827 kumin Boston ah kisuan-a, tua lai-ah a ten sungin Boston School of Music phuan hi. Boston-a sangte ah music a kisin nadingin a phuangkhiapa ahi hi.
Tua khit ciangin Europe gam lamah zin-a laihilhzia sin hi. America a tunkik ciangin music kikhoppite vaikhawma mite in paakta-in mi zo mahmah hi. 1851 kumin New York City ah kituah a, tua lai-ah hymn leh la tampi kaikhawmin khenkhia hi. La-aw dawng 700 val phuak h,i ci-in kiciamteh a, tuate lakah hih la, “Vanglian Kumpipa Hong Sihna” (When I Survey the Wondrous Cross) banah, “Vuuk Paakna Gam Mual Panin” (From Greenland’s Icy Mountain), “Nang Tawh Naizaw Nuam Ing” (Nearer My God to Thee), cihte kihel hi. “Leitung Lungdam Topa Hong Pai” (Joy To the World) la a gualpa (arranger) zong hi lai hi, a aw bel George F. Handel’ (1685-1759) phuah hi, kici hi. 1855 kumin New York University in Doctor of Music degree pia a, America gama sang khatpeuh in tua bang degree a piak masaknapen ahi hi.
Sih khuk a dimin ki hong a, Sisan tui bang luang hi, (Tua si tawh ki phum mawhnei te, Mawhna tawh ki pelh hi. (Mawhna tawh ki pelhhi)2
A si mi mawh pa’n tua sih khuk, A muh ciang a nuam a, (Hih mi bang ka gitloh hang in, Mawhna kipelh theita.(Mawhna kipelh thei ta)2
A liamma-ah hong luangsi pha, Upna ka muh man in, Hong phelna ding itna la pha, Ka sihma teng sa ning,(Ka sih mateng sa ning)2
Nung ciang hih agik I pom teng, Sih han sung om lai in, (Topa hong phel lungdam teng, Vantungah la sa ning, (Vantungah la sa ning)2
It huaituuno na si manpha , Bei hun nei ngei lo ding, Gupna ngah miteng ki khawm ding, Mawh ngei nawnlo ding hi. (Mawhnei nawnlo ding hi)2
