Tuhun khuahun Siat Sungah Nuntakna
Agelh ~ Kap Za Khai (Photoh)
Kawlgam khuahun siat laitak koi bangin nuntak kalsuan ding cih ngaihsut kawmin i nuntak hun hong bei semsem hi. A kicingpen a hihloh hangin tawm genkhia ding hileng;
(1) Thuman takin nungta ding
Vanman khang semsem leh nasep haksa semsem ahih manin khuapite ah guta, buluh, ngongtatna tawh sumlepaai, nektawm zong hong tam semsem ta hi. I neihsa suaikhi, suaitau, zungbuhte nangawn kibulh ngam nawn loin kiselcip ta hi. Hih bang hun laitak ei Zomite in nuntak nading sumlepaai peuhmah gukna tawh ahi zongin, khemna tawh ahi zongin, ngongtatna tawh ahi zongin i zonkhak loh ding thupi hi. Bang zahta in nuntak haksa zongin Pasian in hong sik ding hi, cih upna muanna tawh nasepna ah citak thuman takin nungta lehang Pasian in hong tamasak lo ding ahi hi.
(2) Pasian upna citak ding
Nuntak haksat hun ciangin Khristian tampi takin Pasian um napi’n Pasian tungah citak lo thei hi. I meet nading, I hamphat nading ahih nak leh Pasian’ deih loh lungsim leh gamtat kinei thei hi. Sum meet tam lak luatna, tawikhai khemna, mi’ thatang mawk suahsakna cihte in Pasian tungah i cihtak lohna lakna ahi hi. Pasian um takpi-in a thu sungah i cihtak takpi leh na khempeuh ah lungduai, itna nei, veina nei, a thuman lo peuhmah deihlo, cih lungsim i nei dinga, ei hangin innkuan cidam in, pawlpi cidam khangto ding hi. Pasian tungah cihtakna in khuahun gamvai bangzah a sia zongin, nuntak bang zahin a haksa zongin Pasian kiphunsan ngei lo dinga, Pasian’ maipha kizongzaw ding hi.
(3) Kimlepaam lai-natna nei ding
Khuahun a siat ciangin mi pawlkhatte in hunpha bang ngaihsun in singkung lopa phukin sumzonna in nakpi in nei thei uh hi. Tua banah khuasung venglepaam khual loin ut bangin gamlumna, kitot kiseelna cihte zong om thei hi. Bang bang ahi zongin ei angsung hamphat ngah nading bekin midangte nawngkai’ sak loh ding thupi hi. Pasian bawlsa kimlepaam suksiatna ahi zongin, khuasung kimlepaam, venglepaam nawngkaisaknate ahi zongin Khristian khat hihna tawh pelh ding kisam hi. Tua sangin ei hangin piansaknate leh i tenna kimlepaam in nopsakna, phattuamna, kipaakna ngah ding thupi ahi hi.
(4) Neihsa kepcing zeeksiam ding
Gamdang sumkhek khang semsem cih pen i sum a man kiam semsem cihna hi a, sep thaman sum ngahte peuhmah pheng zat het loin cil bawlin khol siam ding kisam hi. Khuahun hong sia semsem leh sum kisapna hong lian semsem ding hi. I ngah sumte suai tawh khol ding maw, sum meet kha ding maw, a sumtang mah in koih ding maw, inn mun in kem ding maw cih pen ei’ geelsiamna bang hi ding hi. Cihnopna ah ngah peuhpeuh sum teng pen ‘Topa’ thupha hi ei..tua suahni ei, tua ah zang ni ei’ cih tawh zangkhin pahpah lo ding cihna hi. Pasian in sumlepaai hong piak pen kepsiam, zeek siam ding dinga hong deih ahi hi.
(5) Gam le minam ading nasem ding
Gam le minam ading koi bangin nasem ding ihiam? Cih pen lungngaih huai hi. Kawlgam ah state tengin ai-tuam ki-uk theihna deih uh a, tulaitak hileh galkap ukna deih loin I kidodo laitak ahi hi. A sia a piang zong, a pha a piang zong thuakzo ning i cihleh bang mah a theilo bangin om hihiat ding hi a, i thuak takpi leh zong kuamah mawhsak ding hi lo hi. Ahi zongin hih kidona zo limlim leng hoih ding i cih leh mimal thatang in maw, sumlepaai in maw, thulela piakna tawh maw, i hihna bangbang tawh maw kihel ding kisam hi. Gam leh minam ading a sem tawmin a mawk ciakciak i tam ciangin, midangte’ ukna nuai ah ki-om den ding hi. Tua ahih manin i pau khiam in i sep khan zaw leng Zogam zingvai Zomite’n hong hawmzo taktak ding hi pan hi.
Hih a tunga thu 5 teng lo, a dang thu tampi om lai hi. Khuahun siat paulamh in ei’ mimal phattuam nading peuhin midangte ading siatna, supna, khasiatna, khitui luanna peuhmah i sepkhak loh ding thupi hi. Job in khuahun siat a thuak laitak in Pasian samsia ngei lo a, kuamah zong ngawhse lo hi. A mahmah kingawh zaw hi. Khuahun bang zahin sia taleh, nawkzawhna pen ei’ lungsim puakzia bek tawh ki sai ahi hi.
