THUSUAK NAM THUM
(Three Dissimilar voices)
Agelh ~ Rev. Do Khan Khai
Thupatna (Introduction):
Tulai pau a thusuak cih kammal kong zat hi. Kei zong thusuak a umthei pawl, a neithei pawl hing. Ahi zongin tulai Zomi Christiante sungah Lai Siangtho Pasian kammal sangin thusuak thupi a sazaw, thusuak tungah aki nangawn ki omta ahih manin thusuak tawh kisai tawm a tomthei penin I ki theisak sawn nuam hi. Hebrew kam in “Ro’eh” leh “Nabi’im” in nakhen uh hi. Ei Zomite in zong tuni Pasian hong hopih aci tawh, tuni ka thusuak ah aci tawh, ka mangin aci tawh cih bang dan a tuamtuam in kigen hi. Tuate pen a nungta Pasian tung pa’n maw ahih kei leh dawi kiang pan maw, ahih kei leh phuahtawm thusuak maw cih Lai Siangtho mah bulphuh ngiat in tawm I gen nuam hi.
1. Pasian kiang pan hong pai thusuak (the voice from God):
Abraham leh Sarah pen leitung mit tawh enleng, tekta in Sarah zong numei ngeina khasim laivuan nei nawnlo hitase mah leh Pasian in ta na neiding hi, bek nacilo in nangma sung pan a piang tapa mahmah in na gamhluah ding a, nasuan nakhakte vantungah na et aksi zah in tamding a, nang sung panin minamte, kumpite ka piangsak ding hi naci hi. Amau um zolo uh ahih manun nui uh a, Abraham bangin kum 100 apha pasal khat leh kum 90 apha khat in ta neiding ahi hiam?ci-in na muanglah uh a, tulai pau leh satan in haza hiam a sila nu Hagar tawh tapa Ishmael hong nei uh hi. Pasian in a hopih masak in agen kammal na mangngilhlo in gen kikta leh Abraham in muangzolo hiam, Ishmael hong nungtasak peuh lecin ci-in nadawng hi. Tua Pasian kamciam pen nikhat thu in tungpahlo napi in a cihsa uh mah bangin tuazawh kha kua khitteh ta nei uh hi, (Piancil 15,17, 18:1-15., 21:1-21). Pasian cih mah bangin tuni dongin leitungah Abraham suan leh khakte a tam pen leh a pil pen kumpi thahat pen suak uh hi. Pasian kiang pan a hong pai thusuak I cih pen bang zahta in a khaktan omta leh tangtung veve cih hong phawksak hi. Kamsang Daniel mangkhiat siamna, Babylon uliante leh dawi aisuamte theih zawh loh a theihna zong pen Pasian hopihna pan himawk hi. Thakhat thu in Pasian in a genpah hikhinlo in thungetna hunla masa phot hi. Amah in vantung Pasian in eite hong hehpih in tua thuthukte genkhia theiding in Babylon gamsunga mipil dangte tawh thahna I thuakkhawm khak loh nading in thu I ngending hi, ci-in a gen hi, Dan 2:16-21). Kamsang Daniel thusuak in amah leh a lawmte bek a suakta hilo in Babylon gam a dawibia ulian khempeuh zong a sihna ding pa’n un suakta hi.
Thusuak or kamsang tawh kisai Sia. Gideon Thawn thugen thupi ka sak mahmah khat in bang hiam cih leh thusuak khawng, kamsan na khawng na neih uh leh a phisian nading tawh hipah neipah un, tualo pen mi tampi in thusuak neithei lel hi, ci hi. Pasian kiang pan a hong pai thusuak in pen gimthuaknading, sihna ding tawh hong ki pelhsak cih kamsang Daniel leh kamsang Mikaiah te tungtawn panin zong kimu thei hi.
2. Dawi kiang pan a hong pai thusuak (the voice from devil spirit):
Kamsang Mikaiah leh Israel kumpi Ahap kamsang 400 te Ramothgilead simding vai ah kinial uh hi. A dang kamsang 400 te in Israel kumpi pa maipha munuam in Pasian hopihna hilopi, galsim dingin kuanto in na zoding hi ci-uh hi. Kamsang Mikaiah asam kamtai pa nangawn in adang kamsangte cih bangin kumpi pa ading ahoih lam in gen in cita leh Kamsang Mikaiah utlo in na kuantoh leh na si ding hi ci hi. Israel kumpi pa Ahab zong heh in thongsung ah khum a, Zedekiah bangin apang betsaklai hi. Pasian hopihna kician tak-in tel ahih manin thuakngamzaw hi. Israel kumpi pa in Pasian ,mizat kamsang Mikaiah thugen umlo in dawi kamsang mi 400 te thugen umzaw ahih manin galsim dingin vakuan teitei a, atom in genleng a si sa in hong ciah hi. Israel kumpi Ahap kamsang mi 400 te thusuak zong pen a phuahtawm uh hilo in amau zong hopihna mah a ngahngiat uh hi, ci-in Lai Siangtho in na gen hi. Bang naci gen hiam cih leh Topa a kumpi tokhom tungah tu-in a taklam leh a veilam ah vantung mite adin laitak kha khat in kei mah vapai in ama kamsangte khempeuh sungah zuaukha ka va hiding a, ka vazol ding hi, ci hi. Kamsang Mikaiah in Israel kumpi Ahab deihsaklua ahih manin a thuman hilh in Topa in hih na kamsang 400 te sungah zuaukha koih khin hi, cita leh zong umlo in galdo a paiding utcih tak ut mawk hi, (1 Kumpi 22: 19-31). Israel kumpi Ahab amel kisel in Judah kumpi Jehoshaphat Israel kumpi pa danin aki bawl hang, galte in na khenthei uh a, sihlawh veve hi, (1 Kumpi 22: 30-37).
Hih thu ah hong phawksak tampite lak ah I ut luatna khempeuh, thusuak khempeuh, kamsangte genkhempeuh a nungta Pasian kiang pan a hong pai hilo thei a, dawimangpa or khanin kiang pan a hong pai zong hithei cih hong phawksak hi. Tuate na khensiam kei leh a thuakding nang mah na hipah hi, cih zong hong phawksak hi.
3. Phuahtawm thusuak (the voice from our minds): 1 Kumpi 13:18.
Na khat I deih man, I hih nop mah, I ngahnop man, I painop man, I sepnop man, I ut man, I minthan nop man, mi I mai-et nop man cih bangdan a tuamtuam thusuak zong omthei hi. Tuate khempeuh pen Pasian kiang pan leh dawi kiang pan ahih kei leh eima phuahtawm, I ngaihsuttawm thusuak I ci ding hi. Hite zong pen a khauhpai dan ei mi mawkmawkte gen loh Pasian mizat Judah kamsang pa khat bangin sih lawh hi. Amawk sih mawkmawk hilo in humpi nelkai thahna thuak hi. Lai Siangtho Kumpite masa a lian 13 sung limtak sim lecin kician mahmah hi. A thu paizia tawm enpak ni.
Kumpi Solomon a sih khitteh Israel gam kitam in Judah leh Israel aki khenkhit a, Israel te kumpi masa pen Jeroboam in Israel mite lampial pih in Pasian mizat Judah kamsang pa thugen zong zadah hi. A matcip sawm leh a khut kongkawcip a, zankik thei nawnlo in biakna tau zong ki phelkham hi. Ahi zongin kisik in Pasian mizat kamsang pa tungah a thum kikteh Kamsang pa in zong thungetsak a, a khut angei hong bang kik hi, (1 Kumpi 13:1-6). Pasian in nakzat mahmah cih hong phawksak hi. Ahi zongin Israel kumpi pa Jeroboam zong a lungdamlua in a inn ah zui-in tawlnga in na thaman zong kong pia ding hi ci-in Judah kamsang pa asap leh na inn phellangkhuat nong pia zongin kong zui kei ding hi. Hih lai mun ah ann leh tui ka ne ka dawn kei ding hi, ci-in ciahsan hi, (1Kumpi 13:7-10). Pasian cih bang manglai, zuilai cih hong phawksak hi.
Phuahtawm thusuak a zuihkhakna en ni. Bethel a teng kamsang khangham khat in a nalamdang bawl or a thupiangteng a tate tung panin a zakteh munuam, theinuam ahih manin va lehdelh in khem a, kei zong nang mah bangin kamsang khat hi-ing, Topa sawl vantung mikhat kei tungah thu hong gen a, amah ann le tui ne in adawn theihna ding na inn ah paipih kik in hong ci hi, ci-in vakhem hi. Lai Siangtho in zong amah in “Pasian mipa tungah zuau genin a phuahtawm ahi hi,”na ci hi, (1 Kumpi 13:18). Pasian in Judah Pasian mipa ompih mahmah zangh mahmah, ahih ding dan zong genkhin hita leh phuahtawm thusuak mangkha in Bethel a kamsang pa nungzui in a inn ah ann ne tui dawn ahih manin a ciahna lampi ah humpi nelkai in na thatlian hi,( 1 Kumpi 13:20-24). Pasian in bangzahtak in hong zanghkhin in ama tung pa’n zong kamsanna neikhinta mah lecin Pasian cih na zuihkei a, phuahtawm thusuak or kamsanna na zuihkhak leh gimna leh sihna nangawn kithuak thei ahih lam zong hong phawksak hi.
Thukhupna (Conclusion):
Hih thute khempeuh a tomin ngaihsunleng, thusuak a kici khempeuh va neungaihsut, vasimmawhbawl, va pampaihtheih hikhin pat hetlo in I pilvang mahmah kisam ahih lam hong phawksak hi. Tua ban ah Israel kumpite leh Judah kamsang Pasian mizatte nangawn buaisak in sihlawh mawk uh hi. Tua ahih manin thusuak I cih pen neu ngaihsut, simmawhbawl khalo in pilvangtak a I omtheihding I ki deihsak hi.
Laibu Saal / Zomi eLibrary
