THUNGET NA
Agelh ~ Rev. Dr. Do Suan Mung
Na Tapidaw nuntakna ah tu laitak na dinmun sangin asangzaw na ut hiam? Pasian’ na nasep na ah tu-a sanga a zaizaw in nasem nuam hiam?Pasian kiangpan thupha atamzaw na sang nuam hia? THU NGEN IN. Tu-in thungetna tawh kisai Laisiangtho thuthukpi a hi lo, Nuntakna a zattheih pah lianlian ding thu pawlkhat i kikum ding hi. Thunget pen baih mah mah hi. Leitunga nasep lakah abaihpen hithei khamai ding hi. Pilkul lo hi. Hauh zong kul lo hi. Kamsiam zong kul lo hi. Pautheih nangawn kul lo hi. Lungsim panin thu kingen thei lai hi. Tua hi napi ei thu-um mite in thunget haksa i sa mahmah hi. Thunget ding sangin thungetna sanga haksazaw na khat peuh i sem nuam zaw thei hi. Tua pen Dawimangpa nasepna a hi hi. Thungetna tawh kisai in hih a nuaia kigen thute ciapteh huai hi.
Thungetna in Pasian septheih khempeuh sem thei hi.
I tapidaw nuntakna a guallehna khempeuh thunget loh hang a hi hi.
Mihingte in na i sep leh mihing nasep mah hi pah a, thu i nget leh bel Pasian In na hong sem hi.
Thungetna om lo nuntakna in vangliatna om lo nuntakna ahi hi.
Leitunga nasep dang khempeuh leitung ciangbek tawh ki sai hi.
Thungetna a hih leh leitung khengin vantung tokhom tawh kisai nasepna ahi hi. Thudangte tawh ki teh thei lo hi.
Topa Zeisu mahmah in thungetna thupi koih hi. Zingtung (Mk.1:35), zantawntung (Lk.6:12) thu ngen hi. Mi pawlkhatte in ki buailua in thu ki ngen man lo, ci thei hi. Maku 1 sung en lehang Topa Zeisu nikhatbup buai mah mah hi. Ahi zongin azingciang zingtung in tho in thungen hi(v35). Buailua in thu ngen lo ding hilo zaw in, buai lua ihih teh thungen tek tek ding cih hizaw hi. I khut tawh sem-a,i khe tawh i pai sangin i khuk tawh pai leeng i tupna kitung baihzaw hi. Topa Zeisu in thuhilhna sau(discourse) ahilhnate sungah Mualtung Thuhilhna a masa pen ahi hi. Hih thuhilhna sungah thungetna tawh ki sai nihvei na gen-a, “ngen” cih kammal nga vei na zang hi. Inndei tungnung a anunungpen a thuhilhna ah(John 14-16) sagih vei vilvel thungen dingin hong sih vaikhak hi(14:13;14:14′ 15:7-8; 16:23; 16:24; 16:26). John 17 sungah amah mahin eite a dingin thusaupi hong ngetsak hi.
Pasian nasepna ah thungetna a thupipen a hi hi. India gama sangmang pai masapen William Carey in India a pai mapek in a khedep khuina sai ah leitung gamlim khat khai in khamangthang ta ding veina tak tawh thungen den hi.India gamah Pasian in thupi takin zang hi. John Knox thungetna vangnei lua ahihman in England kumpinu in,”Scotland galkap bup sangin John Knox thungetna kihtazaw ing,” na ci hi. Pasian mizat minthang khempeuh thungetna hatte ahi hi. Korea gam thu-um mite thunget hat uh ahih manin thu um mi pung mahmah a, a gam uh zong Pasian in thupha pia in khangto mah mah hi.
England gamah King William IV asih vat ciangin a zaa luah ding Victoria kici numeino khat a hi hi. Kumpi zaa ngah ding cih a theih ciangin Solomon kumpipa mah bang in Pasian kiangah nakpi tak ki-aap in thungen hi. Pasian in a thungetna dawnga kum 64 sung Queen Victoria in England gam uk hi. Ama uk sungin England gam thahat mahmah a leitung khempeuh phial uk uh ahih manin England Kumpinu ukna sungah nitum ngei lo hi, kici zawzen hi. England te in India,Kawlgam cih khawng hong lak uh pen hih kumpinu uk sung a hi hi. Laisiangtho zong thupi koih mah mah hi. Khatvei, India ukpi khat kumpinu kiangah hawhin, “Hih zah a gamneu khat in leitungbup na ukzawhna uh a hang bang a hi hiam?,ci in dong hi. Kumpinu in kam tawh zong dawngse loin sabuai tunga om Laisiangthobu kawkziau hi. America te in England te khut sung pan a suahtak nading un gal a do lai-un a makaipipa uh George Washington in gualzawh na ding in vuuk lakah khukdin in thungen a gualzo takpi uh hi. Anungta Pasian kianga thungetna omlo in gam leh minam khangto ngei lo hi. Akhangto minam i ut leh thunget loh phamawh hi.
Tu-in “Ngen” cih kammal en dih ni. Ngen cih ciang in e’n nei lo in, anei dangkhat om in ama kianga ngen cihna hi. Tua ahih manin, thu i nget ding teh, i neihloh,i kisap, i deih i theih phot ding kisam hi. Ngeina lel banga thunget ding hilo hi. I deih, i lunggulhte i theih khit ciangin tuate khempeuh anei Pasian kianga nget ding ahi hi. Deih khat i neih ciangin midangte kianga nget ding hilo hi. Khasiatna bek kilemlawh kha ding hi. Mihing i muanpen te inzong hong piazo khollo thei uh hi. Hongpia zo phial ding hi taleh hong pianuam lo thei lai hi.Pasian in bel hong piazo banah hong pia nuam mahmah hi. Midangte in khatvei nihvei hong huhzo thei ding hi. Ahi zongin ngen mun lua le teh hong maitai nawnlo ding hi. Pasian ahih leh ngen mun semsem le teh hong maitai semsem hi. Ngen ding a napai ciangin maitai takin hong dawntuah lian hi. Na ngetphet in piak dingin khensat pah lian hi(Dan 9:23). Mihingte in tawm nanget ciangin hong pia zo in, tampi na nget ciangin hong pia zolo thei ding hi. Pasian leu leu in tampi ngen le teh,”ka ta in ka hauhna leh ka citna hong muang hi,” ci in nuam mahmah a nang ngetna sang nangawn in a tamzaw hong pia lai ding hi.. Pasian kiang a a ngente a khasiasa a kilehkik kuamah om lo hi.
Tapidaw te in zingsang thawh ciang, Annek ciang, nitak lup ding ciangin ngeina dankhat in thu ki ngen hi. Thungetna taktak pen tua ciang bek hi lo hi. Thungetna taktak in mualte ki khinsaka, vantung kiloksak hi. Mihing tha tawh a piang theilo ding nate piangsak hi. Tua bang a pian theih nadingin minute nih,minute thum sung khawng thunget tawh pianglo hi. Nai tam pi pi, ni tam pi pi hun lakkul thei hi. Antan akul hun zong om hi.thungetna tak tak ineih ding ciang in i phawk masak ding thu pawlkhat om hi.
Amasapen in, Pasian’ hong itna i phawk ding kisam hi. Pasian in hong it in thupha hong pia nuam mah mah hi. Topa Zeisu in Matthew 7 sungah, No mihoihlo te nangawn in na tate uh na hoih pianuam na hih uh leh vantung a om na pa un note bangzah in na hoih hong pianuam zawkaan ding cih thei lo na hi uh hiam, na ci hi. Khat veivei eite in Pasian in eite hong deihsak lo, na hoih hong pia nuamlo cihdan in i tuat thei hi. Tua ahih sangsik in nang deih, nang lunggulhna sangin Pasian hong piaknopna lian zawtham lai hi.
Anihna ah, Pasian pilna i phawkding kisam hi. Pasian in nakhempeuh thei ahihman in eite aading a ahoihpen zong thei hi. Mun tampi ah eite in ei a dinga hoih pen nangawn i thei kei hi. Ahoihpen sangin ahoihlozaw khat peuh i lunggulh thei hi. Tua hun ciang in Pasian in ei nget hong pia lo in ahoihzaw hong pia hi. Thungetna ah supna om ngei lo hi. Pasian hong deihsak ahoihpen i ngetkhak leh i nget lianmah kingah pah a, i nget i ngah kei leh lah i ngetsang a hoih zaw Pasian in hong pia lel hi.
Athumna ah, Pasian hatna i phawk ding kisam hi. Pasian in sepzawhloh nei lo hi. Pasian a dingin a haksa leh apiangthei lo cih bang om lo hi(Pian 18:14, Lk 1:37). Mihing ta ding in abaih leh ahaksa cih om hi. Pasian a ding in tua bang om lo hi. sum peek khat ong piak ding leh tul zakhat ong piak ding Pasian a ding in abaihna ki bang hi. Mihingte in lampi khatbeek om nawnlo i cih laitak in Pasian in lam tulza tampi neilai hi. Pasian in i ngaihsutna, i thungetna sang nangawn in alian zawtham pekin na sem thei hi(Eph 3:20). Pasian sepzawhna thei-a Pasian i muan mah mah ding kisam hi.
Alina ah, Pasian thumaan na i phawk ding kisam hi.Pasian in hong khem lo hi (Gaml 23:19). Kamciam hong piak bangin sem hi( Joshua 23:14). Ngen leng hong pia ding ci in kamciam hong pia zo hi(Mt 7:7). I nget leh hong pia takpi ding hi. Mihingte in kamciam piaziau pongin tangtungsak lo uh hi. Tua pen thunih hang a hi hi. Akhatna ah, kamciam apiak zawh teh a lungsim ki khel in a kamciam bangin sem nuam nawn lo hi thei hi. Anihna ah, a kamciam piak bangin semnuam mah mah napi thu tuamtuam piangin a sem zo ding munah om nawnlo cih zong hi thei hi. Pasian ahih leh alungsim ki khel lo in, sem zo nawn lo cih zong om lo hi.
Thungetna ah i phawk ding pawlkhat om lai hi. Maingak taka Pasian kiang zuat ding ahi hi(Heb 4:16). Lau zong kul lo hi. kidop zong kul lo hi. kineih se zong kul lo hi. A kilawm banga i nget theih loh te Khasiangtho in hong huh lel hi(Zm 8:26-27). Tate in pate kianga adeih teng uh a nget bang a lungsiam siangtho leh muanna tak tawh Pasian kiangah i deihte i nget ding a hi hi.
Tu-in, Thungen dinga i pat tak tak cianga zuih ding thu pawlkhat i gen beh nuam hi. Amasa a i phawk ding thu khat ah, thungen dingin huntuam khat, ni tuam khat la ding ci-a na geel ciangin Dawimangpa patau pahlian hi. Thu na nget theihloh nadingin lam tuamtuam tawh hong khaktan ding hi. Na upmawh loh thu tuamtuam hong piang kha ding hi. Tua bang hong pian ciang in na thungetna ding peuhmah ki pelhsak tuan kei in. Dawimangpa in na thupha saan ding hong haza hi ci-in phawk inla Dawimangpa zawhsaw hamtang in.
Amasa in, Thunget nading mun hoih khat seh in. Hong nawngkaisak a om lohna gamdai mun ahih ding thupi hi. Topa Zeisu a kipan Laisiangtho sung a mi thupite in thu anget uh ciangin gamdai mun zuan uh hi. Topa Zeisu mahmah in damdai muna thunget ding hong hilh hi(Matt 6:5pan). I thunget pen mite muh ding leh mite theih ding kisam lo hi. Pasian muh leh Pasian theih ding bek thupi hi. Thunget hat khawng kisialh nang hi lo hi. Phazise-te sut loh ding thupi hi. Gamdai mun hileh Pasian bekmah ki lungngai theipah hi. Tua ahihman in, thu nanget ding teh kuama muh loh na, aging tuamtuam a omlohna mun teel ding thupi hi. Telephone a ki pan hong nawngkaisak thei ding khempeuh pua lo ding hi teh. Leitung vantunga lianpenpa tawh kiho nahih manin midang tawh kiho ding pen thuneu lua hi.
Tua banah, hih bang a Pasian tawh naitak a ki thuah ciangin kam a genzawhloh nuamna hong tung thei hi. Lungdam lua in eikia mah zong ki nui kha thei hi. Lundam lua in i khitui a luan hun zong om hi. Laisiangtho mun khat i simna tungtawn in Topa’n hong hopih teh thakhat thu in i omna pan bang kidiangkhia thei phial hi. I omzia zong a tuamtuam in kilaih nuam hi. Khukdin zel, tu zel, lum zel, ding zel, laipai zel cih bangin ki-om thei hi. Khat veivei bang boksa phial a thunget nop hun zong om thei hi. Hun khatkhat teh i lungsim ah lasak nopna khawng zong hong om hi.”Hong paisan ken migi Topa”, “Hong it zaw ning Topa” cih khawng sa hiauhiau lehang biakinn sunga mihonpi tawh i sakte tawh ki bang peuhmah lo in khum ngaungau hi.
A hih theih leh hih bang a Pasian tawh naitaka kiho nading pen amun i khelkhel sangin munkhat ah tuamneih leeng hoih hi. Innkhan sung zong hi thei hi. Gamlak munkhat zong hithei hi.Nang nopsakna pen mun, na suahtaakna pen mun ahih ding thupi hi. Amun na teel khit ciangin ahun ding zong sehkhol lecin hoih hi. Nai bangzah sung, ni bangzah sung thungen ding cih sehkhol ding hoih hi. Ahi zongin, Khasiangtho makaihna tungtawnin a hun pen ki laihthei hi.
Na thungetna ding mun pen na pai ciangin Laisiangtho bu,labu, Nisim thalaknabu tuamtuam, Thungetna tawh kisai laibu tuamtuam leh Pasian mizat minthangte’ taangthu bute kengin a hunhun in sim le teh Pasian in tuate’ tungtawn in hong hopihin tha ong pia thei hi.
Na thunget nading mun na tun taktak ciangin tawlkhat sung dai hithiat in om in(Late 46:10; Late 131:1,2). Leitung vai peuhmah na lungsim sungpan hemkhia inla Pasian bek lungngai in. Tu-in, Pasian hehpihna tokhom mai ah hong ki puakto ta hi cih phawk in.
Amasapen in, Khukdin suk inla Pasian phat in(Adoration), Ama itna, a vangliatna, a pilna, a siangthona, ctp. Anihna ah, na lungsim sunga na phawk mawhna, kisuanna khempeuh Topa mai-ah sungkhia in(Confession). Lungsim siangtho lopi a thungetna Pasian in hong dawnglo ding hi(Late 68:18, 1pit 3:7, 1john 1:9). Athumna ah, Pasian thupha na ngahsate sim in la lungdam ko in(Thankfulness). A beisa na nuntakna sunga na thupha ngahte ngaihsun kikkik inla, abanban in sim le teh Topa tung na lungdamna hong lian sem sem ding hi. Alina ah, tu laitaka na kisapte Topa tung ah ngen in(Supplication). Hih lai-ah, na ngetnop thute na lungsim sungah ahi zongin, lai tawh ahi zongin gualhsa in nei in. Ahih theih leh thunget khatah nget ding tamlua kei leh hoih zaw hi. A thupi mahmah nasak thu li thu nga ciang ngen in. Lungsim takpi tawh hih bangin na thungetna pan lecin hih teng bekbek in zong nai tam simsim hun hong la ding hi.
Hih bang a na thungetna na patkhit ciangin Laisiangtho sim in. Laisiangtho pen i ban sim sangin thungetna tawh kisai munte sim leng tha kingah zaw hi. Late Laisiangtho bang sim ding a ahoihkhat hi. Laisiangtho nasim ciangin tampi zawh sawm kei in. A kamamal te hoih takin ngaihsun inla lungngai in. Cikmah a naphawk ngei loh thangah huai thuthuk tampi na mukhia ding hi. Tua ciangin thunget nopna lungsim hong suak dinga thungen kik ding hi teh. Hih bangin, thungetna, Laisiangtho simna, laibu dangte simna, lasakna cih bang in hong kilaih kawikawi ding a hun ciangtan sinsen om se lo in Khasiangtho makaih bangin hun hong pai to to ding hi.
Hih banga Pasian tawh naitaka na om ciangin na Laisiangtho simna tungtawn ahi zongin, laibu dangkhat tungtawn ahi zongin, na lasakna tungtawn ahi zongin Pasian in hong hopih thei ding hi. Hih Pasian hopihna pen aw gingkhia hi khollo zaw hi. I lugnsimtawnga Khasiangtho hong hopihna hi-in, aw gingkhia sangin zong ki telzaw, ki cian zaw hi. Laisiangtho tungtawna hong hopih ciangbangin nidanga i sim ngei sasa Laisiangtho mun mah hi napi a lamdang takin khiatna khat hong neideuh hi. Hong bun deuh hi.
Hih Pasian hopihna pen ei leitung lungsima i bawltam ngaihsunna, lunggulhna hi lo hi. Hih thu nih i khensiam theih ding thupi mah mah hi. Tuhun ciangin mi pawlkhat in,”Pasian in kei hong hopih” ci-in amau ut khatpeuh, a lungsim ua suak khatpeuh mawkgen thei uh hi. Pasian hopihna pen Pasian kammal tungtawn leh Pasian kammal tawh ki tuak thuman thutak tungtawn bek hi ding hi. Pasian Kammal tawh ki tuak thuman thutak i cih ciangin Laisiangtho simna tungtawn lian a hi lo, laibu dang khat simna,lasakna, hunzatna ngaihna, ctp.ahi hi. Hih bangin Pasian in hong hopih khit nak leh i thungetna angah ihi ta a, a kigen zolo lungnopna i lungsim tawngah hong om hi. I phawk ding thu khatah, hi banga Pasian in kamciam hong piakkhit ciangin azing athai in hong tangtungsak pah khol lo hi. A tangtun nadingin sauveipi mah ngaklai kul thei hi. Abiahang nuntakna ngaihsun in.
Hih banga Pasian tawh hun i zatkhop ciangin hun khat leh hunkhat anopna ki bang den lo hi. Khat veivei nuam mahmah in khum ngaungau a, khat veivei lah nop lua cih ding om mel loin, keu suah, hawmsuah thei hi. I phawk ding a thupi mahmah khatah, Tua banga a keusuah, a hawm suah ciangin Pasian in hong ompih lo hi tuan lo hi. I thungetnate zong hong za lo zong hi tuan lo hi. Ei lungsim thuakna(feeling) leh Pasian ompihna thuman thutak(fact) thunih zong i telsiam ding thupi hi.
Antan thunget tawh kisai tawm gen beh lai ni. Tuhun ciangin mi pawlkhat in antan thunget phengzat, thaang zat lua uh ahih manin midangte in antan thunget lipkhap ngaihsut uh hi. antan thunget pen pawlpi khat a ding hi peuh sa in amau aa ding a sa lo mi pawlkhat om hi. Ahi zongin, Laisiangtho i sim ciangin antan thunget pen Pasian thu-um ta dingin athupi mahmah ahihna ki mu thei hi. Antan i cih ciang in an bek a tang zong hilo in pumpi ci leh sa deihna khempeuh tanna ahi hi. An leh ci leh sa lunggulhna tuamtuamte sangin deihzawk, lunggulhzawk khat nei cih lah na hi hi.
Laisiangtho lui sungah Mawsi, Ni 40 sung an ne lo in Pasian tawh hun na zang hi(Thuhilhkikna 9:9,18). Joshua leh Israel te antanna(Jos 7:6), Israel mite antan na(Thukhenmangte 20:26), Phillistine te tawh ki do lai a antan na(I sam 7:6), Jehoshaphat leh Judah mipite ( 2 khang 20:3) antanna te ki mu thei hi. Tua banah , Ezra 8:21-23, Nehemiah 1:4, Esther 4:15-16, Dan 10:2, Late 35:13 sung te ah antan na dang te kimu thei lai hi.
Laisiangtho thak ah, Topa Zeisu in nasep a kipat madeuh in gamlakah ni 40 leh zan 40 antangin a Pa tawh na ki thuah hi( Mt. 4:2). A nungzuite kiangah, “Note in an na tan uh ciangin,”ci-in “an na tan uh leh”, ci lo hi. Antang ding cih pen theihsa danin gen hi. Maku 9:29 ah dawilut khat damsak nadingin antanna leh thungetna lo tawh piang lo hi ci hi.(Hih Laisiangtho mun pen Maku gelhcianna ah ki hel lo hi aci pawlkhat bel om hi). Cornelius inzong antang in thungen hi(Sawl 10:30). Pawlu leh Barnabas gammial nasep a kipat ding un thuum mite in antangin thungen hi(Sawltak 13:2-3). Khua tuamtuam ah pawlpi makai ding a koih uh ciangin zong antang in thungen uh hi(Sawltak 14:23).
Pawlpi thangthu i-et ciangin Pasian nasem minthang ahih nak leh antan thunget na zang ciat uh hi. Martin luther leh John Knox te in nipi khat nihvei antang in thungen den uh hi. Jonathan Edwards in an naktan lua hih manin khat veivei pulpit ah thugen dinga a om ciangin ding zolo dek dek hi. Charles Finney in nipi khat a tawmpen khat vei angtangin thungen hi. D.L Moody, George Muller cihte inzong antan thunget zang uh hi. Tuhun a Pasian nasem minthang te in zong antan thunget zang uh hi. Leitung bup-a Christian University gol pen, Liberty University a phuankhia pa Jerry Falwell inzong antan thungetna nakzat mahmah hi.Hihte pen gentehna a i-gen pak hi a,atom in ci leng, Pasian mizat a kici peuhmah in antan thunget zang uh hi.Antan thunget zang ngeilo napi Pasian inlah zang mahmah cih bang mi a om khollo dan hi zaw hi.
Antan thunget thupi mahmah ahih manin Dawimangpa in thu tuam tuam tawh suksiat sawm hi. Amasa in antan thunget thupi lo hi cih hi zongin, tuhun a ding hi kei, no pawlpite zatdan hi kei, cih ahi zongin thu tuamtuam tawh thu-um mi nautangte leh Pasian nasem pawlkhatte lungsim ah guanin antan thunget a zat ding uh dal hi. Pasian nasem pawlkhat bang antan thunget thupi sa lo in, azat loh manun Pasian in azat ding zah in zang lo hi. Anihna ah, Dawimangpa in antan thunget azangte azat dan amaanloh na ding in khem hi. Up khialhna tuamtuam guan hi.Tua hih manin antanna tawh kisai in Laisiangtho hong hilhnate i phawk ding kisam hi. Amasa in, antanna pen Pasian thupiak dangte zuihloh na ding hi tuan lo hi(Isa 58: 1-11). Mi pawlkhatte antan thunget bang hat sim zaw zen napi gilo lua mahmah,huaiham lua mah mah, thadah lua mahmah,zuauphuak lua mahmah cihbangin om uh hi. Tua kawmkal ah , antang uh ahih manin midangte sang bang in a khamizaw, ahoihzaw peuh kisakha tuak lai uh hi. Antan na pen hoihlohna dangte sel na ding hi lo hi. Anihna ah, Phazise-te banga midangte thupi muh na ding leh kiphatsak na ding zong hi lo hi(Mat 6:16-18). Athumna ah, Gupna ngah nading a zuih ding thukham zong hi lo hi. Tuhun teh mi pawlkhat te in ki sialh na ding peuh in antang uh hi. Phazise-te bangin ngeina banglel a antang pawl zong om hi.Pawlkhatte bangin Zeisu in ni 40 antang ahih teh dem ding in ni 50 tang ding peuh ci thothop uh hi. Atom in ci leng, mihing kiphatsak nading ngimna tawh antanna kitamzat mah mah hi. Laisiangtho sung i-et ciangin sih ding hin ding thei loh zah-a haksat mahmah hun, Vailianpi khat hawmkhiat hun cih bang khawng ciang bek in an ki tang hi.Ahih kei leh Pasian tawh kinai nadingin ahunhunin an tang uh hi.
Tua ahih manin, Sanggam, antan thunget azang nai lo nahih leh tu-a a ki pan Laisiangtho tawh ki tuak antanna azang dingin kong hanthawn nuam hi. Pasian hoihna athakin mu bek thamlo in Pasian hong zatna zong hong lianzaw ding hi. Antanna azang khin na hih leh zong na antanzia Laisiangtho tawh ki tuak maw, ki tuak lo cih sit pha-in Laisiangtho tawh kituak antanna zatsawm ta in.
Hih banga nai bangzah hiam, ni bangzah hiam khat lungkim taka thuna ngetkhit ciangin a tawpna ah lungdamkohna tawh na thungetna khup in.Ka thungetna Pasian in hong za zo, hong sang zo hi ci-in kha muang takin om in. Topa in ama hun-in na thungetna gah hong musak taktak ding hi. Thungetna tawh ki sai i thugensa khempeuh a nuntakpih thei ding in Topa’n mimal khatciat thupha hong pia ta hen.
Source :
Rev. Dr. Do Suan Mung
Thuhilhnate (Volume II)
