THUKIZAKNA (MEDIA) LE ZOMITE’ MAILAM
Agelh ~ Kap Za Khai
Thupatna
Tukum in ZACC in “Thukizakna (Media) le Zomite’ Mailam,” cih thulu tawh laigelh kidemna a vaihawmna sungah kei zong kihel thei ka hih manin ka lungdam mahmah hi. A thulu hoih in teelsiam ka sa mahmah a, tuhun hun luanzia tawh kituak thudik khat hi ci-in ka mu hi. Minam khat ading bek tham loin Minam khempeuh adingin thukizakna cih pen a thupi mahmah le a kisam thubulpi khat ahihna thu kikum ding hi a, a kicing pen ahih loh hangin a huamkim thei pen dingin hong hanciam ding ka hi hi.
Thukizakna Cih Pen
Thukizakna (Media) a khiatna tawh kisai in Oxford Advanced Learner’s Dictionary sungah, “the main ways that large numbers of people receive information and entertainment, that is television, radio, newspapers and the Internet,” ci-in na gen a, Rev. Dr. Thuam Khan Thang in, “thukizakna hi” ci-in Zomi le Media cih thusunna a neihna ah pulakkhia hi. A tomin genleng Mikang lai Media cih pen Zokam in Thukizakna cih dingmah hongsuak hi.
Thukizakna Kipatna
Thukizakna pen ‘aw’ tawh thukizakna, ‘lai’ tawh thukizakna le ciamtehna (sign) tawh kizom cih bangin kikhen thei a, tua thumte sung panin ‘aw’ tawh thukizakna pen Lai Siangtho tungtawnin enleng amasa pen media ahihna kimu thei hi. Pasian in mihing a bawl a kipanin ‘aw’ media a kipanpah ahi hi. Tua khit ciangin suangtung laigelh, savun tung laigelh, laidal tung laigelh cih bangin a dawldawlin hong khangtoto hi. Pasian mahmah in zong a bawlsa mihingte ‘a aw tawh hopih (Pian.3:9)’ in amahmah in suangpeek tungah thukham sawm gelh (Pai. 24:12), kawmzawl tungah gelh (Dan.5:5), bek tham loin Kamsangte zong laigelh dingin a sawl hi. A tawpna ah a tapa neihsun Jesuh hong sawlin eite le amah tawntung kizop theihna ding lampi hong phuangkhia hi. Tua ahih manin i biak Pasian mahmah zong pen Media Pasian cileng kikhial lo ding hi. Pasian in mihingte tungah aw tawh ahi zongin, lai tawh ahi zongin ciaptehna tawh ahi zongin, a nam thum in zangin hong kizom den ahihna Lai Siangtho le nisim i nuntakna ah kimu thei hi. Tua ahih manin a huampi in enleng thukizakna pen Pasian ii hong pat masak hi a, Amahmah pen media a zang masa pen ahihna Lai Siangtho bulphuh in kimu thei hi.
Thukizakna Khantohna le Zatna
Tanglai mite hunin mite in kam le lai le ciaptehna bek tawh na kizom uh hi. Kamtai le laitai thunih pen kizopna thupi pen ahi hi. Ahi zongin 15th Century a kipanin kizopnate hong khangto pianta a, a diakdiak in lai (Printed) tawh kizopna pen hong nak khan mahmah hi. Tua hun a kipanin tuni dongin kizopna pen a nam tuamtuam in a khang a khang in hong khangtoto hi: Broadcast media pen kizang pipen khatmah hi a, tua sungah film, radio, recorded music leh television cihte kihel hi. Tua banzom ah Digital media hong khangto henhan a, email, media sites tuamtuamte, websites tuamtuamte leh Internet based radion cih teng kihel hi. Tua bek tham loin Outdoor media kici AR advertising, billboards, blimps, flying billboards cihte kihel a, ciamtehna tuamtuam tawh lampi tuamtuam le mun tuamtuam ah kisuang media ahi hi. A kizang tawntung media in Print media hi a, lai tuamtuam ahi books, comics, magazines, newspapers ahi keh pamphlets cihte kihel hi.
Kum zalom sawmnih nungkhit ciangin mite in media pen nam giat in na khen uh a, laibu le lai, Internet, magazines, movies, newspapers, radio, recordings le television cih teng hi. Tua tawh a kizom kum zalom sawmnih le khat ciangin mite mah in media nam giat panin nam sagih ah hong ciangtankik uh hi. Lai pen (books, pamphlets, newspapers, magazines) 15th century hun pan hong khangto henhan hi. Recordings (gramophone records, magnetic tapes, cassettes, cartridges, CD le DVD) pen 19th century hun a kipanin hong nak khan mahmah hi. Cinema pen 1900, Radio pen 1910, Television pen 1950, Internet pen 1990, Mobile phones pen 2000 cih bangin media pen a hunhun in hong khangkhang hi. Hih media te pen mite in pilna le siamna zonna, sumlepaai bawlna, na hoih na pha bawlna, kivel kizopna, gal kidona cihte ah zang uh hi.
Adiakdiak in 1970 kum a kipan Globalization kici pilna le siamna le gamthak zonna bulphuh kizopna puakkhapna hong om ciangin media pen hong nak khan mahmah a, ahih hangin leitung pen khuaneu khat bang hong suakkhia hi. Hih hun a kipanin a omsa media-te tungtawn in a thak tampi hong kibehlap a: Global System for Mobile Communication (GSM), Code Division Multitude Access (CDMA), MPEG player 3 (MP 3), MPEG 4 Video player (MP4), Portable Document Format (PDF), Internet Protocol (IP), Wireless Local Area Network (WLAND), International Business Machine (IBM), Global Organization Of Oriented Group Language of Earth (GOOGLE), Universal Serial Bus (USB), Facebook (a phuankhia Larry Page & Sergey Brin), Yahoo (a phuankhia David Filo & Jerry Yang), Twitter (a phuankhia Jack Dorsey & Dick Costolo), Linkedin (a phuankhia Reid Hoffman, Allen Blue & Koonstantin Guericke), Email (a phuankhia Shiva Ayyadrai), Gtalk (a phuankhia Richard Wahkan), Skype (a phuankhia Niklas Zennstrom, Janus Friis & Reid Hoffman), Mozilla Firefox (a phuankhia Dave Hyatt & Black Ross), Wikipedia (a phuankhia Jimmy Wales), Youtube (a phuankhia Steve Chen, Chad Hurley & Jawed Karim) cihte pen tuhun dongin a kinak zat mahmah media-te hi a, 2013 nung a kipanin Viber, Messenger, le News Application atuamtuamte hong khangkhang lai hi.
Zomite leh Thukizakna
A tunga media khempeuh pen leitungbup in a zat uh hi a, bek tham loin ei Zomite in zong hihte hangin i nuntak khuasakzia tampi kikhangto mahmah hi. A beisa hunte en phakik lehang Zomite khamtung gam i tuncil in media kithanem mahmah hi. A diakdiak in i omna khuate khat le khat kizopna tawm mahmah le lampi zong haksa in kizop kikawmna tawm ihih manin thu muhna, kipumkhatna leh kizopna lam-ah khantohna cihte om lo hi. Khat le khat, khua khat le khua khat thu kitheih sak nop ciangin thaulawn, kamtai sawl cihte tawh kizom uh hi. Tua pen 14th – 1900 A.D ciangdong huam hi.
Adiakdiak in 1900 kum bul a kipanin sangkahna hong kipan khia a pilna nei hong tam semsemna tawh kizui in Laibu bawlna leh lai khantohna zong tuikhang bangin khangto henhan a, leitung bup level dongah na a sem Zomi vontawi zong tampi hong omta hi. Lai media ii thupha cih ding ahi hi. Tua bek tham loin Zogam ah Telephone, TV le Radio, mawtaw, mawtaw cycle nei tam mahmah le mun tampi-ah electric mei, tuitha mei, le solar mei-te kingah zihziah a, nidang bang nawn loin kizop kipeh kithuzakna hong nuam in hong manlang mahmahta hi.
Zomite khantohna pen 2001 kum panin hong puakkham hi ci leng kikhial lo ding hi. Thu dangdangte sangin Kizopna tawh kisai genleng Zomi leh Zogam khantoh nadingin 2000 kumin Zomi Computer and Internet Association (ZOCIA) hong kiphuankhia hi. Zogam-ah IT tawh kisai khantohnate: Post Office-74, Telegraph office 35, Computer telegraph 6, Telephone office 37, Telephone line 7909, Exchange 26, direct line 5833, auto/manual phone 5833, Microwave station 5, Rural telephone exchange 11, E-mail/ Internet 11, Satellite station 16 cih teng hi. Tedim ah internet a kizat pen 2007 kum pan hi-in IPStar tawh hi. Kalaymyo ah pen 2005 kumin IPStar zangin internet kipankhia hi. Hih internet hangin gam khempeuh ah lai-ip kulse loin lai, man, video, la cihte kikhak thei ziahziah hi. Internet hangin Khamtung gam panin leitungbup ah kizopna kinei theita ahih manin Zomite khantohna kinawh mahmah a, tulaitak a anungta lai pulepate bangin lamdangsa mahmah uh hi.
Zomite sungah Website nei masa pen in Pu Pau Khan Thang hi a, http://private.fuller.edu/~pthang hi (tun kien thei nawn lo). Tuni dongin Zomite’ neih website a kician tawh a kician lo tawh gawmleng Chin/ Kuki/ Mizo/ Zomi mintawi websites bekbek 200 bang om hi. Leitungbup Zomite khat le khat kizop kithuzak ziauhziauh nadingin Zonet (http://groups. yahoo/group/zomi) pen Pu Gin Mang (Canada) in 13 April 2000 in na bawlkhia a, Zomite i neih masak pen Mailing Group hi in, a kihel mi 2645 bang pha hi. Tua lo adang ahi Zomi Domains & Web Hosting (www.zomionline.com) piakna pen 2005 pawl in Pa Paul Khaipu (Sydney) na nei thei a, Zomail (Zomi Branded Emailing Service: www.mail.zogam.com le www.mail.zomi. org) kici email account thak deihte bawlsakna media zong hong om hi. A diakdiak in Zomite ading thupha lian khat in Zomi Online Library (www.zomilibrary.com) i neihna ahi hi. Hih pen ZONET makaihna tawh 2008 a kipan hi a, tu-in documents 400 nai bang omta hi. Gamdang bekbek-ah zong Zomi tawh kisai IT Websites (52) bang om khin hi. Hih website-te panin i theihnop bangbang thulela khempeuh i omna peuhpeuh pan computer le phone tawh kizong thei, kimu thei, kingah thei hi.
Thukizakna le Zomite’ Mailam
A tungah i muhsa mah bangin Zomite zong leitung tawh kihual in media lamah kikhangto khawm mahmah ahihna i muh mah bangin mailam ah zong tuasang in nakpi in kikhangto mahmah lai dingin i lamen hi. Banghang hiam cih leh IT pilna ahi computer, software, le a dang electronic pilna tuamtuam tawh buaih a la Zo vontawi tampi i neih semsem man ahi hi. Tu-in zong gam tuamtuam a Zo Aksi Siapite’ sermon le thuhilhpiaknate Zogam panin direct in i en thei a, leitungbup thuthang tuamtuamte zong minute khat zong sawt loin i thei ziahziahta hi. Tua mah bangin Zogam sungah thuthang tuamtuamte zong gamdang leidang ah i khak ziahziah hi. Hih in Zomite thukizakna lamah i khantoh semsemna thupha ahihna teci ahi hi. Zomite thukizakna lam ah i khantoh semsemna in i mitte hong vaksak semsem in i thutheihna hong zaisak semsem hi. Khantohna hong pia mahmah in na dangdangte ah zong namdangte eng het loin ei le ei i dingzo den hi. Tua bang i hih den theih nadingin Zomite in thukizakna tawh kisai i hih theihnate kemcip in phungsak semsem ding kisam hi, cih phawk huai hi.
Thukhupna
Thukizakna (Media) le Zomite’ mailam cih thului sungah Media thu le Zomite’ media mailam tawh kisai in a kicing in kigelh zo lo ding a, ahi zongin Zomite pen thukizakna (media) lam ah kikhangto semsem in i nuntak khuasakzia zong kizawitawn in khangto khawm ihihna siangtakin kimu thei hi. Ni dangin tuibuk theii bek a thei puteek piteekte in tu-in computer, phone, internet cihte zang thei ziahziahta a, leitungbup tawh kizom theita hi. Khutmee zang thei peuh leh IT sungah ut peuhpeuh, deih peuhpeuh a kien thei le a kingah thei hita mai hi. Ni danga “ngei loh” teng tu-in “kicing semsem” ta hi. Hih in thukizakna (Media) ii thupha hang hi a, mailam ah tu-a i dinmun sangin nakpi in i khangto mahmah lai ding hi. Ahi zongin i thukizakna (media) te pen minam khat le khat kikona, kidona, kikhenna, kigal neihna cih bangin a sia lamin zang het loin Zogam le Zomite leitungbup tawh i khantoh khop nadingin zatsiam ciat ding thupi ding hi. Tua ahih manin ei Zomite in Pasian hong piak i thukizakna (media) tuamtuamte Zogam le Zomi phattuam khantoh nading le Pasian’ minthanna ahih semsem nadingin hanciam in zangsiam ciat ni.
NB: 2015 ZACC laigelh kidemna ah a thumna ngahna hi.
Reference: “All the World’s a game,” The Economist. 2011-12-10. Retrieved 2013-06-28. Cited from file://C:/Users/Lin%20Wai/Documents/ documents%20collection/Mass_media.htm. “Mass Media,” Retrieved November 28, 2011. Internet accessed on 21.2.2016. Disciple Kap Sian, “Zomi leh ICT”: Zolus Journal, No. 11, 2007. Nang Khen Kham, “Globalization le Zomite”: Zomi Siamsin Magazine, Vol. 2, Kalay: Zomi Siamsin Kipawlna, 2008. Paul Khaipu, “Zomi le IT”: Tongsan Kum (5) Cin Phawkna Magazine. 2006-2010. Zolai Zunna, IT Mintom Lakna, Khol 26, Hawm 125, January 2016.
Laibu Saal /Zomi eLibrary
www.zomielibrary.com
