THANGVAN DAWNG I TUN CIANGIN:
(When we all get to heaven) a phuak Eliza E. Hewitt (1851-1920)
Agelh ~ Rev. Dr. J.M. Ngul Khan Pau
2017 kumin Imphal, Manipur ah mun tuamtuam panin Priscilla Center a sem makaite khawmpi nei uh a, kei zong thugenpi dingin hong sam uh hi. North East India state 4 panin hong paikhawm numei makaite' tawh Nipi ni ka zangkhawm uh a, ken thugenna "Pasian kihelna neu cih omlo" (Little is much when God is in it) cih thulu zangin thugenna ka nei hi. Tua zingsang kikhopna ah Meitei nupi 20 gualin hih la hong sa uh hi.
Thangvan dawng i tun ciangin
Deih teng le lailung damna ngah ding hi
Kumkhua in lasa ni, Topa Jesu i phat ding hi.
Amaute Hindu panin hong kikhelte ahi uh a, Priscilla Center Imphalte'n amau Pasian thu tawh na pattah uh hi. Amau a pasalte uh AIDS natna tawh a sikhin vive na hi uh a, amau mahmah zong a pasalte' tung panin hih natna na ngah uh hi. Hih bangin a pasalte uh hong khuai uh ciangin a tekte'n, "Nang hangin ka tapa si hi, hamphatna hong puak loin kamsiatna hong puak na hi hi, inn panin paikhia in," ci-in a nawhkhiatte ahi uh hi. Ka lungtang hong vut ngeungau ahih leh hih meigongte kingakna ding nei lo, inn le lo panin kihawlkhiate'n hih leitungah lametna nei loin "Thangvan dawng i tun ciangin… Jesu i phat ding," a cih un hong lawng mahmah hi ding hi ven, pulpit tungah ka khitui hong takdatdat hi.
"Aw Topa, leitung lam a et uh ciangin lametna ding nei lote'n vantung lam hong et toh uh ciangin lametna kongpi nang sungah om," ci-in ka lungdam, ka khasiat hong suak hi. Hih meigongte'n Jesu upna tawh a sa'n manun nisim thungetna leh lametna tawh nungta uh hi. Upna tawh Jesu mu khin zo uh a, ahi zongin ni khat ni ciangin amau mittang tawh mu ding cih lawpna tawh hong sa uh hi. Amau pumpi AIDS hangin damdamin a kiam hangin amau kha nuntakna pumpi pen Khris hangin nisimin thaksuak den hi.
Hih meigongte ka et ciangin Lai Siangtho mun nih ka lungsim sungah hong kilo hi. Khatna, Matt 25:37-40 sung ah "Tua ciangin mihoihte in, ‘Topa aw, cikin na gilkial hong mu-in an hong pia a, cikin na dangtak hong mu-in tui hong pia ka hi uh hiam? Cikin khualmi na hih laitakin hong mu-in zin hong do a, cikin puan neilo na hih laitakin hong mu-in puan hong guan' ka hi uh hiam? Cikin cina na hih laitakin hong mu-in hong veh a, cikin thongkia na hih laitakin hong mu-in hong hawh ka hi uh hiam?’ a ci ding uh hi. Tua ciangin Kumpipa in amaute kiangah, ‘Note kiangah kong genin-ah: Hih ka sanggamte a neupen khat nangawn na limbawl uh ciangin kei tungah a hong bawl na hi uh hi,’ ci-in a dawng ding hi. Leitungah a it dingte'n a pampaih uh meigongte itna tawh a kem numei makaite ka et ciangin hih kammal Topa'n ni khat ni ciangin amau tungah gen dingin ka um hi.
Nihna, Galati 6:9-10 sungah sawltak Paul in, "Tua ahih manin na hoih sepding cimtak kei ni. Lungkia loin i sep nak leh a hun ciangin thaman i ngah ding hi. Tua ahih ciangin hunhoih i ngah simin midangte tungah a hoihin i gamta ding a, a diakdiakin thu upna sungah i innkuanpihte khempeuh tungah i hoih gamtatding i phawk ding hi," cihna ka phawk hi. Tutung Covid19 in hong phawksak ahih leh leitungah i kisap taktak na tawm mahmah hi. April panin October kha dong khedap hoih kibulh kha loin ki-om a, puantungsilh zong Video thugen ding ka hih kei leh ka silh ngei kei hi. Kong gen nop ahih leh na neih tampite Topa'n hong kepsak hi a, piakkhiat dingin hong kepsak ahih lam phawkhuai hi. Na pha sem ni, Topa sungah a cimawhte donin kem ni. Topa'n thupha hong pia ding hi. Amen.
Laibu Saal / Zomi eLibrary
