TEDIM THU KIH ZAK NA LAI
NOVEMBA KHA 1926
The Tiddim Chin Hills News
Bu 7 Nambat 11 |
A SUNG A OM THU TE
Tedim thu kih zak na lai
Leitung mihing te hih na thu
Sangmang pa khualzin na thu
Nipi ni thu hilh na
TEDIM THU KIH ZAK NA LAI
A kih pian na kum 1919
Khalkha khua khasim ki bawl hi
Lai bawl pa-------------------------Sang Mang Pa
Dangka sangte--------------------Thuam Hang leh Dam Khup
Kum khat a man hamu ahi hi. Khalkha khua Novemba kha 1, 1926.
LEITUNG MIHINGTE HIHNA THU
Piancit gam ah thu lam dang a om hi. Upa vaihawm za nga val a om hi. A kivaihawm ciangin a thu kim zo kei hi. Uk pa khat a kawih khit ciangin a deih kik lo a, a hawl khia uh hi. Ahih hangin mizawngte in a ngeina bangin naseem a, a lung mang kei hi.
India gamah mihing 300,000,000 a pha hi. Tua te sung pan mihing 100,000,000 zan simin gil kialin a ihmu hi. Tuate in a zawng mah mah a hih maninah puan khat bek nei a inn neu cik a lam hi. Ahih hangin lo tampi a om hi, an tampi a nei thei hi. Hindute in sa a that thei lo ahih cianginah ganhingte in amau lo a gai tawntung a, an tampi a nei thei kei hi. Amau kawltu sangin Mang Kaang kawltu in a hawih zaw hi. Kum khatin tua Mang Kang kawltu a tuh hi. Ahih hangin a tuh nawn kei hi. Bang hang hiam ci leh Mang Kaang kawltu nip a, a khum mah mah ahih maninah ngal leh zawngte in a ne khin hi. Ahih hangin tua zawng leh ngal a that thei kei hi. Bang hang hiam ci leh tua ganhing pum sungah mihing kha a om thei, a um mawk hi. ‘Ganhing ih that leh mihing zong ih that ding hi,’ a ci uh hi. Tua ahih ciangin hih thu man lo a um lai takin an a hau zo kei hi.
Topa Zeisu a nungta lai takin Zuda mihingte in ama thu umin a nung a zui kei hi. A nung ciangin Zuda mihingte in Tapidawte kiangah bawlsiatna a thuak ahih ciangin Zeisu thu a um zo kei hi. Ni dang lai inah Izuapah gamah Tapidaw kici hangin a lung pha lo mihingte in Zuda mi huatin a bawlsia tawntung hi. Engaland gam leh Amelika gam bek Zuda mite in hehpihna a ngah hi. Ahih hangin Mang Kaang gal a kido khit ciangun Izuapah Tapidaw te in Zudah mi a hehpih zaw hi. Tua ahih ciangin tua Zudah mi tampi te in Zeisu thu um a, Tapidaw a suak lai uh hi. Lusia gam, Awstia gam, Hungali gamah Zudah mi tul tampite in tui sung kiphumna a ngah uh hi. Amelika gamah zong Zuda mihing tampi te in Tapidaw a suak lai uh hi. Hih thu in lung damna thu a hi hi. Zuda mihingte in Zeisu thu a um leh Lawkite in zong Zeisu thu a um ding hi.
SANG MANGPA A KHUALZINNA THU
Engaland khua ka tun’ dek tak ciang in mei kai a, teembaw uk pa in bangmah a mu zo kei hi Zanah khat veivei teembaw khawl a mei pengkul a tum hi. Kihmu thei loin teembaw manlangin paileh teembaw dang tawh kituak a, kisia thei hi.
Nipi ni zing ciangin Plymouth kici, Engaland gam khua khat ka tung hi. Hih lai takah nipi ni ka tam hi. Tua khua ko Amelikahte ngaihsut ding a kilawm hi. Bang hang hiam ci leh Amelikah khua-a lal cil kim khatin tua khua pan a kipan hi. Kum1620kum in mizawng kim khat in amau nawp bangin Pasian biak nuam ahih maninah Engaland khua pai khia-iNamilika khua-ah a lal uh hi. Amau teembaw neu a, lam thei lo tham loin khua tun’na a om kei hi, kua mah om lo gam bek a hi hi. Teembaw tungah a tuang ciangin a tungah a din’na suang a om lai a ko ka mu uh hi. Ni tak lam kum 1620 a kipiang eite pawl kikhawpnaah ka pai hi. Thu hilh pa a siam mah mah hi. La zong a hawih mah mah hi. Ko ka lung dam a, lung siangthona ka ngah uh hi. Khua dang ka tun’ ciangin kham ngun, nai ka pua leh sia ka pia hi. Kumpi naseemte in komau van kheempeuh phelin a en thei hi. Ahih hangin kote iNamilika gamah ka pai lai a hih maninah komau van tawm bek a en hi.
Nipi a zing ciangin London khua ka pai hi. Mei leeng tungah nai ngaa ciangin ka tuanguh a, khat vei an ka ne hi. Kawl ngeina bangin an neek hun ciangin mei leeng a khawl kei hi. Mei leeng a pai lai takin an huan a hong pia sak thei hi.
London khua a lian mah mah hi. Leitungah London khua sangin a tam zaw khua a om kei hi. Kawl gam mi kheempeuh cia pha London khua a om hi. A lui mah mah hi. Zeisu asuah ma-in a kilam hi. Zawma kumpipa in Engaland khua a uk lai takin London khua a lian hi. Zawmate a ciah ciangin a neu kik hangin a sia tak kei hi. Kumpipa khua ahih maninah kum simin khang a, tu-in mihing 15,00,000 a om hi. Kumpipa omna tham loin London khua, gunpi geiah a om hi. Teembawte in a khawl baih thei hi. Engaland khua a hau kei hi. Tua gamah an neekna a a kicing kei hi, khua dang panin a pua hi. Tua ahih ciangin teembaw tampi nei a teembaw khawlna mun a sam hi.
Ni li-ah London khua ka tam hi. Ni simin keimah leh Deni in khua lakah ka vak hi. Tonu a hi leh puan a lei masa hi. Ni khatah ni dang lai Kumpipa inn ka en hi. Tu lai tak inn dangah a teeng hi. Tua inn luiah dawlmantelleh gal kaap tawm sim loin kua mah in a teeng kei hi. Engaland kumpipa in tua inn a lam zawh kum 1500 bang a pha hi. Tua hun lai takin thau a om kei hi. Galte tam a om ahih cianginah kumpipa in lau a inn lianpi sungah a om tawntung hi. Cingpi tawh tua inn thakhatin kisia thei hangin ni dang lai inah tua inn sim ding a haksa mah mah hi. Kulhpi sangpi om a, tua kulhpi kiimah tui kan a om hangin tu in tui a om nawn kei hi. Kan leh kulhpi ih et ciangin kumpipa in lau loin in a om thei, ci-ina ih thei baih hi.
Tua kulh pi sungah et nawp huai inn thum a om hi. Khat sungah kumpipa teenna hi. Tu in kumpi a zatna na khat bek a om kei hi. Ama teenna dei sungah ni dang lai hiam tampi kikawih hi. Dei khat sungah thau a tuam tuam tampi a om hi. Kim khat in khamtunmg thau tawh kibang hi. Leitung gam khempeuh azong hi thau a om hi. Hih thau deni a en nuam bel hi. In dang sungah cingpi veve a om hi. Tua cingpi a lui mah mah a, kim khat a kisia hi. Tua cingpi lakah suang cingpi tang ka mu hi. Dei sang khat sungah nam sau leh tem vive aom hi. Kim khat a neu hi, kim khat a sau a lian hi. Gal kap mangte a lian peente nam sau om a, a min ki-at hi.
A tung nung deisungah gal kaap sik puan leh puanak a om hi. Hihte ka et ciangin lam dang ka sa hi. A gik mah mah a, bang ci in gal kaapte in silin a pai thei ding hiam ka ngaihsun zo kei hi. Khe in a pai gal kaapte in tua puan tawm bek a siil hi. Sakol a tungate in a lu panin a khe dong in a pum neu khat bek a lang kei hi. A khutpi leh a khutme zong sik in a kilia hi. Tua mihingte a puk leh kihuh loin a tho kik zo kei hi. Amau sakol in zong sik a sil hi. A lu a ngawng, a awm in sik in kilia hi. A that ding a haksa mah mah hi. Sakol a tuang te in tote a hi a amau khut nuai khe in a pai gal kap tampi a om hi. Tua ahih ciangin in gal a kido ciangin tuate kithat kei hi, a nungzuite bek kithat hi. Thau a kipian ciangin tua sik puan le puanak a sam nawn kei hi. Mang Kangte in gal a kido ciangin sik kukhu bek a khuh hi.
Tua inn sung zong Pasian biakna dei khat a om hi. Tua sungah mihing 50 bang a kikhawm thei hi. A nuai nung peenah thong a hi hi. Tua sungah kumpite a galte leh gilote a khum hi. Tua mihingte aading a haksa hi. Amau omna in lei nuaia om a khua etna a om kei hi. Lai a sim zo kei hi, lawmte a vak zo kei hi. A nung hiam, a si hiam a bete a thei zo kei hi. Tua thong sungah a sawt veipi a om thei hi. Tua omna-ah mihing bawl siatnah ding sik kawl tang ka mu hi. Kim khatin a guh a khiak thei hi, kim khat in a khut a khe a hen thei hi. A lai zangah ngawng tanna hei leh lu kawihna sing ka mu hi. Tua hei a gik mah mah a, mihing siam kei leh a zang zo kei hi. Ni dang lai-inah kumpite a gi lo lai takin migi lote a ngawng hei in a tan sak hi.
Inn dang sungah mi liante a khum hi. Tua inn lei tungah a om hangin a khua- etna a neu cik ahih ciangin a sungah a omte in tawm no bek a mu thei hi. Tua sungah kikhumte in suang tungah amau min a at hi. Tu-in tua a at na a lang hi. Kumpinu min khat ka mu hi. Kumpipa gal kaap mangte leh a upate a min zong a om hi.
Tua inn tualah mi thatna mun a om hi. Tua munah hei tawh a ngawng a tan ahih zongin, mei tawh a halin a hih zongin a that hi. Tua munah Kumpinu thum, Kumpipa khat le mi lian tampite a that hi. Tua na ka et ciangin ka dah mah mah hi. Khang lai mihingte in Pasian ki-itna thu a thei kei hi. Amau kheempeuh in amau deihna bek a ngaihsun hi. Upate in kumpite a suak nuam a, a suam hi. A suam thei kei leh kumpipa in a that hi. Kumpipa khat a si ciangin a inn luapa a neu lai hi. A khang lai takin a pa nau in kumpipa na a seem hi. Ahih hangin inn luapa in a khang kei hi. Kawi sung a om hiam tu dong in mihing a thei kei hi. Khat vei thong inn nuai ah tangval guh a mu hi. Tua guh in kumpipa inn lua paguh hi, ci in ki um hi. Tua hun a gi lona hun a hi hi, khua mialna hun a hi hi. Tu lai takin hih khialna a bawl kei hi.
Inn dang khat sungah kumpipa leh kumpinu kham lukhu leh a kizemna a kikawih hi. Tuate ka mu hi. Lam dang ka samah mah hi. Amau lukhu ni simin a khu kei hi. Thu a khen ding ahih zongin, a upa vaihawmte tawh a vaihawm ciang ahih zongin, tua lukhu a khuh hi. Suang man pha leh kham tawh kizem hi. Lukhu tak tak a hi leh puan san ahi hi. A zi a lukhu zong a hawih mah mah hi. Kham tawh kibawl pagan zong ka mu hi.
Ni khatah biakna inn a lui peen, a hawih peen ka en hi. Tua biakna inn sungah kumpipa a kikawih hi. A sungah kumpipa leh kumpinu le upa lian tampite a kivui hi. Mi lian khat a si leh a suang zuatpi sut khak a, a luang a vui hi. Ahih hangin tu lai takin kumpite luang, inn dangah kivui a, mi lian tawm bek tua inn sungah kivui hi. Ahih hangin han ih et ciangin han phual tawh kibang ih sa thei hi. Miliante lim tampi zong a om hi. Tua lim a bia kei hi. Tua mi liante a mangngillohnah dingin amau lim suang in a bawl hi. Tua biakna inn sung a en tampi a om hi. Jun kha leh Zulai kha iNamilikan mi tampite Zauap gam en ding in a pai hi. Tua Amelika mi tampi ka mu hi.
Ni khatah sa khawina phualah ka en hi. Deni in tua a en nuam mah mah hi. Sa tampi a om hi. Khamtung vom ka mu hi, vapi ka mu hi, Keel, ngal, sahang, sai a kipan sa tuam tampi a om hi. Tua sa khawina sangin a lian zaw leitung a om kei hi. Kawl sai kaang zong a om hi. Tua sai kang kazian Tapidaw khat in kumpipa a pia hi.
Sang Mang Pa.
NIPI NI THU HILH NA
Novemba kha ni 14 ni
Kalet in Nawp Tuamna a Ngah hi
Zawsu Lai Siangtho 14
6 Tua lai takin Zudah mihingte in Gilagala khuaiah Zawsu kiangah hong pai a, Kenet suan Ziphut ta Kalet inah: Topa Pasian in Kadisianania munah nangmah tawh keimah tawh ka om khawm Pasian mi Mawsi a thu piakna nang na thei hi. 7. Hih gam etnah ding in Pasian in sil Mawsi in kei Kasisiabania munah hong pai sakin kei kum sawm li ka pha zo hi. Kei ka up mawk bangin ka gen kik hi. 8. Kei tawh bang ah ka paipih ka u ka naute in mihing te lung khiatnah dingin ahih hangin, keimah in ka Pasian nunah lim takin kong zui hi. 9. Tua ni in Mawsi inah:
Nang in Zahova Pasian nung lim takpiah na zui ahih ciangin nang na khe sikna na leitung inah nang a tawntungin na ta, na tu khangin na luah ding hi, ci in thu a ciam hi. 10. Itazila mihingte gam lak ah a zin lai takin Zahova in tua bangah Mawsi kianga ah a thu piak a kipan tu dongin a thu om tawntung bangmah in kum sawm li leh kum nga ka pha zo hi. 11. Ahih zong in Mawsi hong paisak ni ah ka tha a hat bang mah in tu ni in zong ka om hi. Tua lai takah tai nang, tum nang gal do nang ka hih zawh bangmah in tu in zong ka hih zo hi. 12. Tua ahih ciangin tua ni-ah Zahova hong thu piak in hih mual tungah Anak mi omna ahih zongin a gol a to mah mah khuapi kicin nang ahih zongin tu ni in na za zo hi. Tua ahih ciangin Pasian in ko tawh a om khawm a hi leh a thu bang mah in tuate ka hawl khianah ding uh kote in ka thei uh hi, ci in a gen hi.
13 Tua lai tak in Zawsu in thu pha pia a, Hebeng gam zong Ziphu ta Kalet in a luahnah dingin thu a pia hi.
Khiatna Thu
Itazilate in Zezikhaw khua a sim khit ciangin Ai khua zong a sim uh hi. Tua khua pan in khang lam pai in kumpite nga tawh kido a, a zo hi. Tua laitak in sak lam kumpite kita a, a kikhawm uh hi. Zawsu in a thei ciangin manlangin delh a, amaute a ngaihsun lo lai takin tunga, a zo khin hi. Tu ciangin Kana gamah kuamah in Itazilate a nang zo kei hi. Ahih hang in amau galte a hawl khia kei hi, amau tawh a om khawm hi. Tua a galte in Itazilate a lung a sia sak a, a tawntung amau a khial teem uh hi.
Kana gam a sim khit ciangun Itazila upate kikhawm uh a tua gam a hawm sak hi. Pawl sawm leh pawl nih om ahih hangin Levui kici pawl khat in lo kho lo in siampi na bek a sem hi. Tua mi pawlte in gam a ngah kei hi. Zawta in ta nih nei a, tua ta nihte suante in gam zong a ngah hi.
V 6. Zuah. Itazila pawl khat a hi hi.
V 7. Kadisiabania mun. Tua mun Itazilate a tung masa hangin gam en gilote thu um ahih maninah Kanan gam a tung thei kei hi.
V 9. Kalet kita lo ahih maninah Mawsi in nawp sakna a pia hi.
V 10. Anak mi: Tua mihingte a gol mah mah a, gam ente in a lau mah mah hi. Kalet in putek tawh kibang in gam nuam a ngen kei hi. Amah in bangmah seem loin nuntakna a zong kei hi. Gal hang peen omna a ngen hi. Kua in nawp sakna a ngah ding hiam. Zeisu in hih thu gentena zangin a hilh hi. Topa khat in a sila thum tungah a sum hawmin a khualzin hi. Nih in sum bawl a, met tam a ngah hi. Khat peen kita in a topa sum seel a a tun ciangin a pia kik hi. Tua kita pa in dan a thuak hi/ A lawmte in nawp tuamna a ngah hi. Upna nei lo in eite in ih om mawk leh ngah hi. Upna nei loin eite in ih om mawk leh bang ci nawp tuamna ih ngah thei ding hi.
Novemba Kha ni 21 ni
Zawsu in Kiciamna a Bawl Kik hi
Zawsu Lai Siangtho 24
14 Tu in Pasian kihta ta un la siangthona thu pha ngaihsutna tawh kibangin seem ta un. Gunpi gal khat ahih zongin, Izipt gam ahih zongin, napu na pa uh a a nasep ngei pasiante pai khia un la Pasian takpi bek seem un. 15. A hih kei leh gunpi lang khatah na pu na pa uh a na sep ngei Pasian note teenna Amawli gam mite pasian kawi pasian kiseem ding tu ni in tel khia ta un. Kei leh ka inn kuanpih te ka hih uh leh Toapa Pasian in na bek ka seem ding hi, a ci hi. 16. Mihingte in: A dang Pasian nasepnah Pasian pai khhiat nang in kote tawh ka ki gamal uh hi.
17 Kote Pasian in mi sila ah ka omna Igipt ah ka pate leh kote hong la khia a, ak lian mah mah a lim a mel in kote maiah hong lak zo hi. Kote ka paina mun leh ka zinna mun khempeuhah ni tampi in hong ngak zo uh hi. 18 Pasian in zong hih gam teng mite Amaliki mi khempeuh kote mai ah a hawl khiazo hi. Pasian na ka seem ding uh h. Tua Pasian in kote Pasian a hi hi. a ci hi. 19. Zawsu in: Note in Pasian na na seem zo kei ding uh hi. Tua Pasian in a shingtho Pasian om a, a mawhna o m hi a up baina Pasian a hi hi. No na mawhnate a thuak kei ding hi. 20. Note in Pasian pai khia a, Pasian a dang na seem leh uh cin hong hehpih khit ciangin khat vei kihei kik dinga, hong sim mawh hong bawl sia ding hi, a ci hi. 21. Mihing te in: A hih kei hi, Pasian na bek ka seem ding uh hi, ci in a gen kik uh hi. 22. Zawsu in zong: Note in Pasian na na sepnah ding in tua Pasian na tel khia zo uh hi, kei thu in keimah pum eteci in ka pang zo hi, a ci leh tuate in: Tetci na pang zo hi, a ci uh a 23. Zawsu in: Tua a hi leh note kianga om pasian dangte pai khia un la Itazila mi pawlte Pasian lamah na lung sim uh niam khiat ta un, a ci hi. 24. Mihing te in: Eite in Pasian in bia ding hi, ama thu ih ngai ding hi, ci a a kithu man khit ciang, 25. Zawsu in tua ni in mihingte thu kham bawl a, Sikhem khuapi a thu khenna a kawih hi.
Khiatna Thu
Itazila mihingte lakah milim leh dawi biate vive a om hi. Zawsu vuai a, a si hun a naih ciangin mi upate Sikhem khua a sam a, Pasian thu a mangngillohnah ding in khat vei thu a hilh kik hi. A thu panin Pasia n vangletna leh hehpihna thu a hilh hi. Izipt khua panin a la khiatna thu zong a hilh hi. Tua ciangin kiciamna a bawl kik hi.
V 14. Gun lang khatah: Tua gun upata gun hi a Abiahang a suahna khua tua gun lang khata om hi. Abiahang a pute, pate in milim a bia uh hi.
V 15. Amawli mi: Kana gam mi pawl khat ahi hi.
V 21. Zawsu in a nial bang in nakpi in Pasian ka bia ding hi, a ci uh hi.
23 Mi kim khat in mi lim a bia sim uh hi/
25. A kiciam ciangin Zawsu in tua Sikhem khua ah suangpi khat phut a: Hih suagn in kiciamna lima hi ding hi, a ci hi.
Khamtung Tapidaw te in Itazilate tawh kibang hi. Tua ahih ciangin khat vei vei ih kiciam kik leh a pha ding hi. Leng gah tui leh khomun ih neek ciangin ih ciam thei hi. Pawlu in: Ni simin ka si hi, a gelh hi. A ci nawpna in, ni simin Zeisu biaka kipan kik hi.
Novemba kha ni 28 ni
Gidon leh Ama mi Za Thum
Thu Khente Lai Siangtho 7
4 Khat vei Pasian in: Mihing a tam lua hi. Tui ngah munah sam in. Tua munah nang aading ka ze-et ding hi. Tua lai tak ciangin hihte nang tawh na pai ding uh ka ci ciangin tuate a pai ding hi. Hih pai thei ken te ka ci leh a pai kei ding hi. a ci bangmah in 5. Gidon in tui geiah mi sam a, Pasian in: Ui in tui a neek ciangin a liak bangmah in a lei tawh liak a tui ne pawl khat khuk ding a bawk suk a, a dawn pawl khat, tua mi pawl nih na khen in; Gidon kiangah a gen hi.
Tua ciang in a na khut kuak tawh la a, a liak a, a tui ne za thum a pha hi. A om lai a dangte khempeuh in tui ne ding a khuk ding a, a bawk suk uh hi. 7. Pasian in: A liak a, tui ne za thumte nang I ken kong gum ding a, Midian mihingte nang ma khut sungah kong pia ding hi. A om laite in amaute teenna a ciah ta hen Gidon kiangah a gen hi. 8. Tuate in an neek ding leh pengkul la a, a om lai Itazila im pawlte khempeuh a teena lamah Gidon in pai sak a tua mi za thum te bek amah tawh kibang in a kawih hi. Midian mihingte in mual kuamah giak buuk lamin a om uh hi.
19 Tua bang ah Gidon leh a kikhawlpih mihing za khatin zan kim lam ciangin gal vil buuk kipatna pama tunga pengkul a tum uh hi. 20. Mi pawl thumte in zong pengkul tum a, a bel a sukham a, a khut veilamah meiva ahih zongin a khut tak lamah pengkul ahih zong in tawi in tum a: Topa Pasian leh Gidon tem, ci-in a awng uh hi. 21. Tuate in buuk phual kiimkotah a om na tek a om a, a galte khempeuh in awng in a tai khin uh hi.
Khiatna Thu
Zawsu leh ama tawh kibang upate a si khit ciangun Itazila mihingte in Pasian leh amau ciamna thu mangngilhin dawi leh milim a bia uh hi. Zawsu a ci bangin Pasian heh a, Itazilate a heh pih nawn kei hi. Amau galte hong pai a khua a sim ciangun Pasian in a huh kei hi. Tua a galte in amau an la a, a lo a sia sak hi. A hih hangin ama mihingte in kihei a Pasian a bia kik ciangin a hehpih a thu khen kici mi liante piang sak Itazilate in a zo kik hi. Tua thu khen mangte gamtatna thu Thu khen Lai Siantho sungah a gelh hi. Tua thu khente hun in kum 400 bang pha hi.
Gidon tangval laitak in Pasian in a sam hi. Nang in Itazila mihingte na gum ding hi, a cih ciangin Gidon in: Tangval ka hih maninah bang ci ka gum thei ding hiam, ci in a nial hi. Pasian in ama vangletna a lang sak ciangin Gidon in pasalte a kikhawm sak hi. Mi tampi suah a, a tam lua hi. Pasian in: A lau theite ciah ta un, a ci ciangin mi tampi te a ciah uh hi. Ahih hangin a tam lua lai hi.
V 7. Bang hang in hih bang in a bawl hiam. Mi khat peuh in bawkin tui ne leh tua mi a manglang kei hi. Itazila a galte a tam hi. Ki ngaihsun lote in a zo zo kei hi. Tua ahih ciangin a manlang in tui neek za thum bek a pha hi. Midian mi; Zawdan lang khata om gal kum simin Itazila gamah hong pai in amau lo a sia sak ngei hi.
V 19-21. Gidon in ama galkapte pawl thumin a khen sak hi. Tua galkapte khempeuh beel khat pia tek a, tua bel sungah meila a kawih hi. Pengkul zong a pia tek hi. Tua pawl thum midiam gal kap phualah zan kim ciangin Midiante in bangmah a mu zo kei hi. A om khawl ciangin Gidon in thu pia a, beel a sutham a, a kiko uh hi. A ihmu Midiam gal kapte in khanglo a, a kiimah khuavak tampi mu a, kiko aw a zak ciangin Itazila gal kaap tampi om ci in lungngai a, a tai uh hi.
Mihing a tawm hangin Pasian upna tawh a galte a tam hangin a zo thei hi. Pawlu in: Ka lung hong khauh sak Pasian hangah na khempuh ka bawl thei hi, a ci hi.
Dicemba kha ni 5 ni
Zuta leh Nami Thu
Luta Lai Siangtho 1
14 Tuate in khat vei a awm hong ging sakin hong kap uh hi. Tua lai takin Awzapah in a sungnu a nam hi. Luta a hi leh a sungnu lam nehin a bel hi.
15. Nami in: Na unu a pai kik zo hi. Na unu zui ta in a ci leh 16. Luta in: Kei in na nung hong zui lo a ka pai kiknah dingin hong hansuah kei in. Na paina khempeuh kong zui ding hi. Na lupna peuhah kei ka lum ding hi. Na mi pawlte in keimah mi pawl a hi ding hi, na Pasian in keima Pasian a hi ding hi. 17. Na sina ah kei zong ka si ding a, na hanah ka vui ding hi. Sina longal a thu dang in hang tawh ka kikhen leh Topa Pasian in kei tungah tua thamlo in hong hih kik ta hen a ci kik hi. 18. Luta in a theih ciangin dam takin a om hi.
19. Tua gel in khual zin a Betlen khuapi a tun ciangin khua zangpi in kiko a: Hih mi in a kua a hi hiam. Nami hih lo a hi hiam, ci in a dong uh hi. 20. Nami hong ci kei un, Maza hong ci un. Bang hang hiam na ci uh leh a lian bel pa in kei a kha mah mahna hong pia zo hi. 21. Kei in a hauna tawh a dimin kong pai khia hi. Tua ahih leh ka zawng mah mah a, ka pumpi bek a om ciangin Pasian in kei hong puak kik zo hi. Pasian in kei hong niam sak a, kei hong zawng sak ahih ciangin ka min Nami in bang hangin nong ci hiam, a ci kik hi. 22. Tua bangah Mawba gamah hong zui Mawba gam numei mo thak Luta tawh kibang in Nami in hong ciah a, buh at hun lai tak in Betlen khua a tung hi.
Khiatna Thu
Luta Lai Siangtho neu a mihing khat nuntakna thu a sungah a om hi. Itazilate thu khente a manglai takin kialpi khat vei a tung hi. Betlen khua mi khat in an zong ding in Zawdam lang khatah Mawba khua ah a zi tawh a tapa nih tawh a lal hi. Tua Mawba mihingte in Itazila galte hi a dawi biate a hi uh hi. Ahih hangin tua Mawba gam panin Betlen pa a tapate in zi a la hi. A nung ciangin inn tek pa leh a tapa nih a si hi.
Tua ciangin Nami, a min kici inn tek nu a khua a ciah hi. Angeina bangin a tapa zite in lampi a thak hi. Khua nawla tun ciangin Nami in: Tu in ciah in. Kei ka khua kah ciah ding hi, a ci hi.
14. Awzapah leh Zuta in Nami tanu a hi hi. Awzapah a ciah hi. Luta a ciah kei hi. V. Tua thu gen ding a haksa hi. Mawba gam leh Itazila gam a kigam la hi. A kam ahiih zongin, a ngeina a hih zongin, a biakna ahih zongin a kibang lo hi. Nami a suahipi leh bete in amah a sang ding hiam, a hawl khai ding hiam a ahih maninah a kikhen nuam kei hi.
V 16. Itazila te kiciam ciangin sa khat a go hi. Hih thu sung panin Luta in: Sa ka go mah bang inPasian in hong that ta hen, a ci hi. V 19. Nami a lal zawh a sawt ahih ciangin a khuapih te iNamil thie kei hi.V.20. Nami a cinawpna in nawpna a hi hi. Maza a ci nawpna in kha a h hi. V21. A hauna in pasal leh tapa a hi hi.
Atun ciangin bang a hih hiam. Nami mi zawng ahih mainah Luta in lo neite nung zui a a neng khia tang a la hi. Tua lo nei pa in Nami suah pi a hi hi. Luta ngai a, a mopih hi. Luta a Zise a hi hi. Zise a ta Davui kumpipa ah hi. Tua ahih ciangin Luta mi azawng hangin a suante kumpite a hi uh hi. Luta in a nu a it maninah a khua a bete a nusa in khua dangah a pai hi. Tua mah bang in eite in Pasian ih it maninah ih ngeina ih nete ih lawmte nusia in Pasian lam ihtawn hi. Pasian in Luta hehpih in thu pha ahpia mah bangin Pasian in eite thu pha hong hepih ding hi.
