TEDIM THU KIH ZAK NA LAI
ZUN KHA 1926
The Tiddim Chin Hills News
Bu Nambat 6 |
A SUNG A OM THU TE
Tedim thu kih zak na lai
Leitung te gamtatna thu
Khamtung sivuaizi thu
Nipi ni sim na ding thu
TEDIM THU KIH ZAK NA LAI
A kih pian na kum 1919
Khalkha khua kha sim in kih Bawl hi.
Lai Bawl Pa---------------------Sang Mang Pa.
Dangka Sangte ---------------Thuam Hang,Dam khup.
Kum simin a man hamu a hi hi.
Khalkha khua Zun kha 1,1926
LEITUNGTE GAMTATNA THU
London khuapi-ah mihing 1,000 sungpan kha 11 kum simin a si zeel hi.Tua mah bang in khamtung te a si leh kum khatah Ton Zang khuapih 7 bek a si ding hi. Khuasak khua mihing 5 bek a si ding hi. Ahih hangin khua sak khua te 15 bang a si zeel hi.
Ni kum Mualpi Siavuaizi ma-in Lusei Tapidawte in amau te buh zuak lo ahih maninah bangmah dangka a pia kei hi. Tua kum amau in Sang Mangpa khut sungah dangka 247 a pia uh hi.
Eipi kha Phalam Mangpipa a khua a ciah hi. Bang hang hiam ci leh a gil zang a na hi. Zangun khua panin damna a ngah zo kei hi. Kum khat ah Mawlaik Mangpipa phalam khua a om ding hi. Tua pa khamtungah kum sawt vei pi a om zo hi.
Ni dang lai inah Phalam leh Khalkha uk sungah paltan galkap kih ngah zo kei hi. Ahih hang in tu kum paltan Mangpa khat khamtungah kha thum bang ah om hi. Tua pa in Khalkhate zah khat val a ngah hi. Ahih hangin Phalam te tampi a ngah zo kei hi.
Izuap khua ah Zumeinia kih ci gam neu khat a om hi. Tua khua kumpipa a inn lua pa a tangval lai takin mi zawng nungak khat tawh kih teeng sim hi. A pa heh a, a kih khen sak kik a Galik kumpipa tanu a ta tawh kih teeng sak a, ta khat a nei hi. Ahih hang in tua inn luah pa a zi masa a ngai zaw hi. Tua ahih ciangin ni kumin ama khua dangah pai in a pa kiang ah lai a khak hi. Kumpipa ka suak nuam kei hi. Ka zi zong ka deih nawn kei ding hi. Ka zi masa tawh ka om ding hi. ci in lai sungah a gelh hi. Tua ahih ciangin tua inn lua pa a ta in a pu inn lua a suak ding hi.
Phalam Mangpipa Matu gam lamah pai lai takin mi khempeuh in amah tawh kih lem hi. Gal kap tawm bek a pai pih hi. Ama thu ngai nuam lo a hih leh dan a tat hi. Khat vei galte khua hausa pa te tangpi te Kawl sik tang tawh a hen hi. Ahih hang in tua te in Mangpipa a deih lai hi. Tua gilote khua pan a ciah khit ciangin Kampalet Mangpa a tung hi. Khuapihte in lam piah dawngin: ‘ka khua na tum thei kei ding hi,’a ci uh hi. Mangpa in. ‘Gam lapi panin ka hong tung hi, ka gim mah mah hi,’ a ci hangin a hehpih nuam kei hi. Tua tham lo in Phalam Mangpipa aading buzung a sak zong mei tawh a hal uh hi. Kampalet Mangpa in a thum uh ciang in. ‘Zan khat beek na giak thei ding hi,’ ci in thu a pia hi. Tua a hih ciangin a zing ciangin tua Mangpa a khua a ciah hi. Ni kum ciangin Kumpite in tua khuapihte dan a tat kha ding hi.
Kawl gamah gihlote a khang zeel tham loin a hang zeel hi. Kha lui ah tangval khat leh nungak khat leeng tuang in a vak uh hi. Kawlte in tua leeng khawl sak a leeng uk pa a that dek tak hi. Tua ciangin tangval pa in tua mi gihlote a nang ciangin tem tawh a that hi. A nungak in nakpi in hehpihna a thuum hangin amah zong a that hi. Tua ciangin amau ngun leh kih zemna kham la in a tai uh hi. Ni dang ah suum buk pa nasem pa khat in motaka tuangin ngun 80,000 dangka khawl na inn ah a pai pih hi. Tua gun 50,000 ip khat sungah om a 30,000 ip dang sungah om hi. Mi gilohte in motaka man a dangka 30,000a om ip sut uh hi. Ip dang a mu kei hi. Menzi pa a lung mang mah mah a pawlik a khang sak ding hi.
Lusia gam mihingte in a kumpipa a suam khit ciangin. ‘Ka kumpipa leiba ka lo nawn kei ding hi,’ a ci uh hi. Tua ahih ciangin mi pawl dangte in amau tawh kih hoh nuam kei hi. Tu dongin mi dangte in amau tawh a hoh kei hi. ‘Na kumpipa leiba in mi khem peuh leiba a hi hi,’ a ci uh hi. Tua ahih ciangin tu kum tua Lusiate khua pai-in; ‘kumpipa leiba ka lo ding hi,’ a ci uh hi.
Piantitte leh Speinte in Apilika gam sung a galte a zo zo hi. Ahih hangin Suzi gamah Piancitte in a galte a zo nai kei hi.
KHAMTUNG SIVUAIZI THU
Tu kum Mat kha ni 4 ni Tapidawte 200 bang Khalkha uk pan, Phalam uk pan, Tedim uk panin Bukphil khua kih khawm uh a, Sivuaizi a bawl uh hi. Ni thum sungah lasa, thu ngen, thu hil, kih hohpih, kih haw uh hi. Pasian in hong heh pih hi. Sivuaizi ma-in ni sawm leh ni nih tawn tung guah a zu hi. Ahih hangin ka kih khawp uh lai takin khat vei bek a zu hi. Guah a zu leh kih khawp na buuk a kih sia ding hi. Tua tham lo in Bukphil khua lamah naupang bukkhu natna tampi a tung hangin Bukphil khua-ah atung kei hi. Ahih hangin dahna thu khat zong a om kei hi. Ka kih khawp uh lai tak in Bukphil Tapidaw tangval khat a si hi. Tua pan in ni sawm val a na zo hi. Ka ciah khit uh ciangin a kih phum hi. Lusei Tapidaw tampi a pai in kih um mawh hangi n lusei lamah zong cinatna om a hih manin ah mi tawm bek hong pai thei hi. Za Huat, Khai Suan leh Lal Bawngte in kam phen uh a, mi khempeuh te in thu khempeuh a thei uh hi.
Ni 4 ni tak ciangin ka kih khawm uh a, Sia Sang Ling, Sia Dam Suang leh Sia Nawl Klingte in thu hong hilh uh hi. Tua ciangin Sivuaizi upa thum bek hong pai a hih maninah upa dang kua kah tel uh hi. Upa vaihawm kheempeuh a min in: Aung Duai, Vial Nang, Thang Cin, Sang Ling, Nawl Kling, Awn Khua Ning, Pu Sing, Lian Lut Lo, Bawka, Thuam Hangte a hi hi. Tua upate in zing sim le zan simin kih kawm a, thu kih vaihawm uh hi. A vaihawm na thu Tapidaw dangte a za sak uh a, tuate in a vaihawm uh hi. Thu kim a hi leh kih ciama laibu sungah kih gel hi.
Tua ciang in Sivuai ukte a kawih sak hi. Uk pa dingin min thum kih gen hi. Ahih hangin Sia Thuam Hang kih kawih hi. Sia Sang Phen lai at pa kih kawih hi. Sang Mang pa dangka keem pa kih kawih hi. Ahih hangin amah khua a ciah ciangin Steit mangpa in ama za a lai ding hi, a ci uh hi.
Ni 5 ni zing sang nai 7 ciang in ka kih khawm uh a, Bawka in thu hong hilh hi. Ahilh khit ciang in mi dang kim khat in thu a ngen uh hi.
An ka ne khit uh ciangin kih khawm kik uh a, thu kih vaihawm uh hi. Sum keem pa in ama thu hong za sak hi. A thu a nuaiah kih gelh hi.
Ni kum pan in laibana ------------------23-7-6
Siate kuli man----------------------------49-4-0
Siate khasum ----------------------------2644-0-0
Pilung sivuaizi piakna -----------------200-0-0
A beisa khempeuh 2916-11-6
Tapidaw Pawlpi piakna -----------------1293-6-6
Mang Kang te hong piakna-----------1000-0-0
Hentada Kazian hong piakna--------252-0-0
Pilung sivuai hong piakna-------------400-0-0
Wooding Topa hong piakna-----------123-2-2
A kih ngah khempeuh 3068-9-8
Kum a beih ciangin a val 151-14-2
Dangka keem pa in a ci: Lungbang sivuai ziah note: Lai Siangtho Sang Inn lai sinte kha sum kum simin peek khat a khang ding hi, na ciamte uh hi. Ahih hangin ni kum Mualpi khua na kih kawm uh lai takin in, sum om lo ahih maninah tu kum kah khang sak zo kei ding hi, nah ci uh hi. Ahih hang in a nung ciang in sum ka ngah lai hi. Tua ahih ciangin tua siate a kha sum a khang hi. Tua ahih ciangin tua siate a kha sum a khang hi. Tua tham loin kuli man 49 bang ka pia hi. Mualpi khua panin nomaute in, kuli tha man ka pia zo kei ding hi, na ci uh hi. Ahih hangin hih ngun 49, tu kum kuli tha man ahih kei hi, Ni kum sivuai ma in a zakna kuli tha man a hi hi, a ci hi.
Tua ciangin Sivuaizi upate in amau kih zakna hong za sak uh hi.
Autoba kha kote Phalam khua ah kih kawm uh hi. Aung Duai, Za khup, Thang Cin, Ngai Ling, Leh Cin Langte bek a om hi. Thu li ka ciamteh uh hi: Sia Thuam Hang, Sia Lal Bawng le Sia Thang Cinte tui phum sia kawih ding ka kih lawm ka sa uh hi.
Pilung sivuai dangka 200 ka pia ding uh hi. Sum a om leh Lai Siangtho a sin Siate kha sum a khang ding hi. Sum om lo ahih maninah tu kum thu hilh siate in kuli tha man a ngah zo kei ding hi, a ci uh hi. Hih thu khempeuh Tapidaw te a thu kimin a pha sa uh hi. Tu zing ka kih khawm uh a hih thu kah ciamteh uh hi.
Bawka in kum thum sungah Aizawl khua ah lai a sin hi. Tu in a zo ahih maninah thu hilh sia kih kawih leh kih lawm hi. Ama nasepna mun Zahau uk sungah Tibual khua khongah a hi ding hi. Amah leh Zahau Tapidaw te in a teen na khua thu a vaihawm ding uh hi.
Nawl Kling Phalam khua kum thum a om zo hi. Ahih hangin a khua Khalkha uk sung Hnialawn khua a hi hi. Bawka Phalam uk sungah om leh Nawl Kling in a khua a om nuam hi. Ka khua ka om le Phalam uk sungah ka khual zin lai ding hi, a ci hi. Phalam khua an kih vakna a haksa hi. Tua ahih ciangin Sang Mangpa in man a pia thei manin ama kha sum peek nga khong ta in. Tua peek nga sang Mangpa in a pia ding hi, a ci uh hi.
Hih kam nih Tapidawte in a thu kim uh hi. A kih belap lai ding hi.
NIPI NI SIM NAH DING THU
Zawta Lung Kipna Thu
Kihpatna Lai Siangtho 30
1 Isimilah mite in Zawta paipih a Izipt gamah tun uh ciangin Izipt Phazaw kumpipa pawlik mangpipa Pawlika kiangah zuak uh hi. 2. Pasian in Zawta lamah om ahih ciangin amah in a hanciam a zawh theina tawh a Topa inn sungah om hi. 3. Ama lamah Pasian om a, amah in a hihna khempeuh a zawh thu a Topa in na thei hi. 4. Tua ahih ciangin Zawta in a Topa kiangah mai pha ngah nasemin a om hi. A Topa in zong a inn kuan sungah Zawta a uk in a kawih a sum a nei khempeuh zong Zawta a keem sak hi. 5. Tua bangin Zawta a innah sum a uk ciang a kihpan Zawta hangin Pasian in tua mangpipa inn sung pua a khantohna thu pha apia hi. 6. A Topa in a neih khempeeuh Zawta a pia a, a an neek sim loh a dang sum a neih lam thei lo ciamteh loin om hi. Zawta in a lim a mel hawih mah mah a hi hi.
19. ‘Na inn teeng pa in kei hong hih cih bawl hi,’ ci a, a gen ciangin a pasal Zawta tungah heh a. 20. Samin Kumpipa in mi a khumna sungah Zawta kih khumin a om hi. 21. Ahih hangin Zawta tawh Pasian a om a hehpih ahih ciangin amah in thong uk pa kiangah mai pha a ngah hi. 22. Tua ahih ciangin thong uk pa in thong kia mi kheempeuh Zawta khut sungah pia a thong sungah thu kheempeuh Zawta in khen hi. 23. Tua ahih ciangin thong uk pa in thong sungah thu kheempeuh va en nawn lo hi. Bang hang hiam ci leh Pasian Zawta lamah om ahih ciangin amah in ahihna kheempeuh a zo thei hi.
Khiatna thu
Zako a ciah ciangin a pu Abiahang teen’ngeina-ah teeng hi. A zi Zakhila a ta Zawta a it peen maninah tua Zawta ute in eeng a, khat vei man a, Izipt gam lam pai sum zuakte kiangah a zuak uh hi. Tua ciangin amau in Zawta puan keel si sungah diah uh a, a pa kiangah: ‘Sahang khat peuh in Zawta pet lum kha hi,’ ci-in puan a lak uh hi.
V. 1. Pawlika: Pawlik mangpa hi. Isimilah mi: Tua te in Zawta lei mi hi. Amau in Abiahang zi no Haga suante a hi hi. Izipt gam: Tua lai takin leitung gam lian peen hi. Musalmante in tua gam a siim khit ciangin kih sia a, gam hawih lo hi.
V. 4. Iziptte in amau sila khat a inn sung teng a uk sak hi. Zawta thu man pa ahih maninah hih na a seem sak hi.
V. 6. An neek sim loh: Iziptte in Hindute tawh kih bang hi. Amau maiah mi kheempeuh nin a, amau an a tam sak thei kei hi.
V. 19. A zi thu: Pawlik mangpa a zi in Zawta ngai a a luppih nuam hangin Zawta in a ut kei hi. ‘Ka Topa tungah hih bangin ka khial thei kei hi,’ a ci hi. Tua ahih ciangin a Tonu heh a. ‘Zawta in hong luppih sak nuam hi,’ ci-in a zuau-in a mawh sak hi. A Topa in Zawta dong loin a zi thu a um hi.
V. 22,23. Zawta khial lo ahih manin a maizum kei hi. Tua ahih ciangin thong uk pa kiangah hehpihna a ngah hi. Thong uk pa a datam mahmah ama nasepna kheempeuh Zawta a hih sak hi.
Pasian in Zawta tawh a om hi. Zawta a ute in amah a siah sak nuam hangin Pasian in a hehpih hi. Zeisu vantung a kah ma-in a nung zuite kiangah: ‘Van le lei a bei dong mateng nomau tawh ka om khawm ding hi,’ a ci hi.
Pasian in Zawta tawh a om hi. Zawta a ute in amah a siah sak nuam hangin Pasian in a hehpih hi. Zeisu vantung a kah ma in a nung zuite kiangah: Van le lei a bei dong mateng nomau tawh ka om kawm ding hi, a ci hi.
Zawta a neu lai takin a pa kiangah kheem na, ze-et na a thuak kei hi. Tu-in khua dang panin keemte nei loin a thuak hi. Ahih hangin a khial kei hi. Ih neu lai tak ih pate inn sungah Pasian thu um a haksa kei hi. Ih let ciangin a haksa zaw hi. Tua ahih ciangin Zawta bangin lung ih kip sak ni.
Zun Kha ni 20 ni
Zawta in Mi Lian a Suak Hi
Kihpatna Lai Siangtho 41
37. Tu bang Zawtah a gen thu Phazaww Kumpipa leh a nasemte in a deih uh hi. 38. Kumpipa in: Pasian lung a ngah hih bang in mihing kawih ih ngah ding hiam, a ci hi. 39. Zawta kiangah zong: Pasian in hih khempeuh nang kiangah hong hilh ciang in bang bang mi pil a om kei hi. 40. Nang kumpipa inn ukna na suak ding hi. Nang kumpipa inn ukna na suak ding hi. Nang thu bang in ka gam sung mi thu kah khen ding hi. Kumpi tokhom bek in nang sang ka lian zaw ding hi, ci thu a pia hi. 41. Khat vei in: Izipt gam khempeuh uk ding nang ka kawih hi, ci in Zawta thu pia a 42. A khut zung buh suah in Zawta khut a buh sak hi. Dial puan pak silh sak a, a ngawngah a kham khau awk sak khit ciangin 43. Nambat nih a leng a tuang sak hi. Bawk in a bia un, ci in a maiah kih ko sak hi. Tua bang in Izipt gam khempeuh a uk sak hi. 44. Phazaww kumpipa in: Kei phazaww kumpipa ka hi hi. Tua ahih ciang in nang thu loin Izipt gam khempeuhah kuamah in a khut a khe tang thei lo ding hi, aa ci hi. 45. Phazaww kumpipa in Zaphanataphaphana ci in Zawta min thak pia a Awna khua siampi pa Pawti pheza tanu Atanak tawh kih teeng sak hi. Tua bang in Zawta in Izipt gam ukna tawh a kiang pana pai khia hi.
46. Zawta in Izipt kumpipa phazaw kiangah thu a ngah laitakin a khang kum sawm thum pha hi. A kiang pan pusuak a Izipt gam khempeuh ah pai hi. 47. A kih hau kum kum sagih tawntung lei a gah a tam mah mah hi. 48. Kum sagih tawntung Izipt gam neel ding khempeuh kih khawm a a khuapite ah kih khawl hi. Khuapi kim nai lo te pan kih ngahte khuapi khempeuh a kih khawl hi. 49. Buh a hi leh tuipi lian gei sehnel bang a tampi a kih khawm a kih sim zo lo ahih ciangin kih sim lo in a om hi.
Khiatna Thu
Zawta thong ah sawtpi a om hi. Khat vei kumpipa in mang a muh ciangin a khiatna khua mah dang in a hilh zo kei hi. Thong sungah om lai takin Zawta ama kih kumpihte nih mang uh ciangin khiatna a gen hi. Tua te khat in hih thu kumpipa a za sak kiangin Zawta a sam sak hi. Pasian pilna tawh a kihiatna a gen thei hi.
V 37. Zawta thu: Zawta in: Kum sagih tawntung an kih hau ding hi. A nung ciangin kum sagih tawntung an a po kei ding hi. Tua ahih ciangin Topa in mi pil khat cial in la, kum sagih lai takin an tampi kawih sak le an haksa kum sagih sungah an a om ding hi, a ci hi.
V 42. Khut zung buh: Kumpite letmat ah hi hi Lai peuh na dang peuh a tua let mat tawh a khak ciangin kuamah in a phel thei kei hi. Tu in Zawta in kumpipa hangah gam a uk tak tak hi.
V 43. Awna khua: Izipt mihingte in ni le kha le aaksi a bia uh ciangin tua khua panin a bia uh hi. Tua siampipa mi lian mah mah a hi hi.
Zawta, Izipt gam a atun ciangin sila a hi hi. Kum sawm leh kum thum khit ciangin kumpipa nuai a lian peen a hi hi. Itazilate a kumpipa a lian peen a neu lai tak in ganhing cing a hi hi. A let ciang in kumpipa a suak hi. Amelika gam president a lian peen a neu lai takin mi zawng mah mah hi, zanah lai a sin man bek hi. Tuate khempeuh thu man pha hi a Pasian in hong hehpihin a huh hi. Zawta, Izipt gamah tun ciangin sila dang bang in suak le a si dong in sila a hi lai ding hi.
Zun kha ni 27 ni
Zawta Ute in a Mawhna a Kih Sik Kik u hi
Kihpatna Lai Siangtho 44
18. Tua lai takin Zudah in a kiangah nai a: Topa aw, keimah na sal pa in kam khat kong dot thei ding thu hong pia in. Ka tungah heh kei in Nang in Phazaw kumppipa bang na hi hi. 19. Nang in Na pa om hiam na nau om hiam ci in na hong dong a, 20 ko in: Ka pa in a teek ta hi. A teek ciangin a neih tapa neu khat om hi. Amau upa si zo hi. A nu sungah piang amah bek a om lai hi. Tua ahih ciang in a pa in amah it phamah mah hi, ka ci uh ciangin 21, Tua naupang kah mu nuam hi. Hong paipih un ci in thu na hong pia hi. 22 Ko in tua naupang a pa tawh kih khen zo lo ding hi. Kih khen leh pa a si ding hi, ka hong ci uh ciang in 23 Na nau uh nah hong paipih kei uh leh nung ciangin ka mai nah mu kei ding uh hi, na hong ci hi. 24. Tua nung ciang in ko in nang mah sila ko pa kiang ka tung uh a, na kam teng kah gen uh hi. 25. Ka pa in: Khat in an neek ding tawm va lei kik un, hong cih ciangin 26. Ko in: Ka nau tawh loin ka pai zo kei ding uh hi. Tua mang pa mai ka mu zo kei ding uh hi. Ko nau tawh hih leh ka pai thei ding uh hi, ka ci uh ciangin 27. Na sila ka pa un: No thei bang in ka zi in tapa nih a nei hi. 28. Khat ka kiang pan pai khia a a man takpi in amah a tel in kih keii gawp ta hi, ka ci hi. Tu dong in ka mu nawn kei hi. 29. Tu in hih nau zong ka kiang pan paipih in si sak leh uh cin, dahna tawh kah sam kang sihna gam na tung sak ding uh hi, hong ci hi. 30 Tua ahih ciangin na sila ka pa nuntak na ko naupa tungah om ahih ciangin 31. Ko naupa mu kei leh ko pa a si ding hi. Na sila kote in dahna tawh ka pa sam kang sina gam ka tung sak ding uh hi. 32. Na sila keimah in ka nau na kiangah kong paipih kik kei leh pa aw, na maiah mawhna thuak tawntung ta ning, ci in ko pa aading ka kih kham hi. 33. Tua ahih ciangin keimah in ko naupa tangin na kiangah sal in hong om sak in la, ko naupa a ute tawh a ciah theinah ding thu hong pia in. 34. Ko naupa ka tonpih kei uh leh ka pa kiangah bang ka ci pai ding uh hiam. Tua bang hi leh ka pa tungah tung gimna ka mu ta ding hi, a ci hi.
Khiatna Thu
Kum sagih lai takin Izipt khua bek hi lo gam dangah zong an a haksa hi. Izipt gamah an a om ci in Zakoh in a thei ciangin a tate an lei ding a sawl hi. Zawta in a ute a mu ciangin a thei hangin amau in Zawta a thei kei hi. Zawta a nau Benzamin a ute tawh hong pai khawm lo hi. Zawta in tua Benzamin a mu nuam hi. Tua ahih ciangin: Na nau nong paipih kei uh le an ka zuak kik nawn kei ding hi, a ci hi. A hong pai kik ciangin Benzamin a pai pih uh hi. Zawta in Benzamin a mu ciangin a lung dam mah mah hi. A ciah uh ciangin Zawta in ama hai Benzamin ip sungah a kawih sak hi. Tua ciangin a pawlikte del sak a hai a mu ciangin a ute khempeuh kihta in a pai kik uh hi.
V 18 Zuda: Zawta u khat hi
V 20. Tua ta Zawta nau Benzamin hi.
V 27. Ka zi: Zibekah ah hi hi. Ta nih: Zawta leh Benzamin hi.
V 28. A ute in Zawta Ismilahte kiangah a zuak uh hi.
V 32. Zudah in a pa kiangah: Benzamin ka hong ciahpih kei le ka ta khat na that thei ding hi, a ci hi.
Zawta a u a lung kih kheel zo hi. Zawta a zuak uh ciangin amau pa a hehpih kei hi. Tu in a pa uh hehpih uh a, Benzamin a suakta sak nuam hi. Ni dang lai inah a pa un Zawta a it maninah a that nuam hi. Ahih hangin a zuak khit uh ciangin lung dam loin a om zo hi. Tua ahih ciangin Zawta tungah a khial mah bang in Benzamin tungah a khial nuam kei hi.
Zudah in Benzmin tang sisak suak nuam ahih ciangin Zeisu lung tawh kih bang a nei uh hi. Amahmah kih ngaihsun loin mi dangte a ngaihsun hi.
Zawta in a ute khialna a phel sak hiam. A phel mah hi. Amau khialan a ngaihsun kei hi.
Zulai Kha ni 4 ni
Itazilate in Izipt GAmah Lal Suk uh Hi.
Pusuak Lai Siangtho 1
1 Amau inn kuante tawnpih le hap Zakoh in Izipt gamah hong tunpih Itazila mite a min in: 2. Zuben, Simong, Levuih, Zudah, 3. Itakha, Azbalun, Benzamin, 4. Dan, Natali, Gat, Asia tuate hi. 5. Zakoh suan pawl te khempeuh sawm sagih pha hi. 6. Zawta, Izipt gamah om zo ta hi. Zawta leh a ute a kihpan tua lai khang khempeuh si khin uh hi. 7. Itazi la mite in ta nei a khang phamah mah uh a, a lian to phamah mah in gam khempeuh a zeel uh hi. 8. Tua mah in gam khempeuh Zawta thei lo kumpi thak hong piang hi. 9. Tua kumpipa in: Itazila mite ko mi sang in tam zaw hi, lian zaw hi. 10. Hong pai un, pilna tawh bawl hi. Tua hi lo leh amau hong tam ding uh hi. Nung ciangin gal om leh galte tawh kawp in ei hong do ding a ih gam sung pan tai khia ding uh hi ci in ama mite kiangah a gen hi.
11 Tua ahih ciangin Izipt mangte a bawl sia phamah mah dingin a uk a keemte kawih uh hi. Itazila mite in sum khawl khemte kawih uh hi. Itazila mite in sum khawl nah ding pitong khua le Zamateh khuapite a lam uh hi. 12. Ahih hangin bawl siatna a thuak bang in a khang seem seem uh a Izipt mite lung mang uh hi. 13. Nakpi in a bawl sia uh hi. 14. Sing nasepna, lo khawhna a gim sak mah mah in sawl uh a sawlna khempeuhah gim samah mah uh hi. 22. Phazaw kumpipa in: Izazilta ta suak pasal kheempeuh gun sungah na pai ding uh hi. Numei a hi leh na khawi ding uh hi, ci in a mite khempeuh thu a pia hi.
Khiatna Thu
Zawta in amau te ute kiangah kih lak ciang in: ciah un la na zite na tate hong paipih un. Bang hang hiam na ci uh leh kum sagih kialpi a om lai ding hi. Hong pai suk le u teh lopa tam omna gam hawih kong pia ding hi, a ci in thu a pia hi. Tua te ciah uha: Zawta a nungta hi ci in a pa kiangah a gen uh ciangin Zakoh a lung dam a, Izipt gamah pai suk hi. Ama tawh a tate sawm leh khat a inn kuanpihte tawh a pai suk uh hi. Zawta in a pa a mu ciang in lungdam in Gosen kih ci gam khat a pia hi. Tua gamah lung damin a om uh hi. Ahih hangin kialpi a bei ciangin a khua ciah nuam lo in Izipt gamah teeng lai uh hi. Kum 480 zawh ciangin a suante in Mawsi khat nuaiah a khua a ciah uh hi.
V 7. Itazilate a pu a pate khua om lai a hi leh a khang zo kei ding hi. Bang hang hiam ci leh gal tampi a kiimah om hi. Izipt gamah om launa om lo hi. Hih thu Pasian thu a hi hi.
V 8. Tua kumpipa amin Zamateh hi. A ma han leh luang ki mu zo hi. Zawta a si khit ciang in Itazilate in kumpipa kiangah hehpih na a ngah nawn kei hi. Sal bang a suak hi.
V.10. Izipt gal ni suah na lam pan hong tung hi. Tua lam gam gi geiah Itazila om na hi.
V. 11. Tua khua nih kih mu zo hi. Kial pi a tun ciangin a hih hangin, gal kih do a hih hangin an kih ngahnah dingin tua khua nih ah an a kawih khawl hi.
V.12. Mihingte in bawl siat na a thuak ciangin a khang thei hi. Zeisu khang pan in tu dongin Itazila mihingte in bawlsiat na a thuak uh hangin kum sim in a khang sem sem hi.
V.22. Tua ahih ciangin thu khat a pia leu leu hi. Tapa a that khin le kumpipa suam nahding launa a om kei hi. Tua gunpi a min Nail hi a leitung gunpi lian te khat a hi hi.
Zeisu a pian ma in leitung mihing khempeuh te in sal a khawi hi. A hih hangin ki it na thu a thei uh ciangin a khawi nawn kei hi. Tu laitak in sal khawite Musalman te bek hi. Mang Kang pute pate in Aplika mihingte sal a khawi uh hangin tu in a suakta sak zo uh hi.
Zulai kha ni 11 ni
Mawsi Pian’ na Thu
Pusuak na Lai Siangtho 2
Tua laitakin Levui mi pasal khat in Levui numei khat tawh kiteng a numei gai in tapa khat a nei hi. 2. Tua tapa mel hawih mah mah a muh ciangin kha thum tawntung a seel cip uh hi. 3. A nung ciangin a seel zo nawn lo a, phai ki gan luai bawlin tui pan leh sing nai tawh zut khit ciangin luai sungah naupang kawih a, gun gei phai lakah a kawih hi.4. A cing ding in a u numei a pam pan dingin a om hi. 5. Phazaw kumpipa ta nu kih sil dingin pai suk a, a sila numei te tawh gun geiah a vak lai takin phai lakah luai mu a, a lah dingin a sila numei khat a sawl hi. 6. Luai sin a hon ciangin kap a om naupang mu a, a hehpih in ‘Hih naupang Hebia mi hi ding hi’, a cih ciangin 7. Naupang a u nu in: ‘Hih naupang nading a hong cin sak ding, Hebia numei khat ka hong zon sak ding hiam?’, ci in a dot ciangin 8. Kumpipa ta nu in: ‘Va zong in,’ ci in thu pia a, numei no pai in naupang a nu a sam hi. Phazaw kumpipa ta nu in; ‘Hih naupang la in la, kei ading khawi in. Tha man ka hong pia ding hi’ ci in thu a piak mah bang in tua numei in naupang la a, a khawi hi. 10. Naupang a hat ciangin Phazaw kumpipa ta nu kiangah pia a, tua ta nu in tapa in nei a, a min Mawsi a phuak hi. Bang hang hiam ci leh tui lak, pan kah la khia hi, cih nawp na hi.
Sawltak Tangthu 7:22. Mawsi in zong Izipt mihing pilna khempeuh sim a kam, tawh nasep na tawh a siam hi.
Khiat na thu
Itazila mihingte in gimna a thuak uh ciangin Pasian kiangah hehpih na a ngen uh a, Pasian in amau thu a ngai a Izipt gam sung pan a suak ta sak hi. Tua a suak ta sak pa Mawsi a hi hi.
V.1. Levui: Zakoh ta khat Levui ahih maninah ama suante, Levui mi kih ci hi.
V.2. Kumpipa in: Tapate khempeuh na that ding hi, ci in thu a pia hangin tua numei in kumpipa thu a ngai kei hi.
V3. Naupang a let ciangin pawlikte in a mu thei hi. Tu in amah in kumpipa thu a ngai hangin aman takpi a that kei hi. Pasian in naupang a hehpih kha ding hi, ci in a ngaih sun hi.
V5. Nail gunpi in tai 3000 bang a sau hi. Saklam pan in guah tampi a zuk ciangin tui lian a, lo lamah luang a, an a po sak hi. Tua gun in Iziptte a vak maninah a bia uh hi. Mi khempeuh te in tua gun ah kih sil uh hi.
V6. Hebia mi, Midangte in Itazila mihingte, Hebia mi a ci uh hi. Tua mah bangin kawlte in khamtung te, cin mi, a ci uh hi.
V9. Tu in lau na ah om kei hi. Ama ta kumpipa ta nu ta a hih maninah kuamah in a that thei kei hi. Pasian in a hehpih hi.
V22. Pasian in Itazilate suak ta sak pa a deih hi. Itazilate sal hi a pil na a nei kei hi. Lai a sin man kei hi. Tua a hih ciangin Mawsi a piang sak ciangin kumpipa tanu ta a suak sak hi. Tua a hih ciangin Mawsi in lai sin a pil na a ngah hi. Izipt ngeina zong a siam thei hi. A let ciangin ama mi pawlte lam a mu sak thei hi.
Pasian in a ma thu a tung sak hi. Abiahang kiangah: ‘Na suante in Izipt gamah teng ding hi,’ ci hi. Tu in a teeng nah un a bei dek tak ta hi. Tua a hih ciangin lam mu sak pa a piang sak khawl hi. Pasian in eite hong mangngil kei hi. Eite kiangah thu a ciam zo hi., Tua ahih ciangin lung manna a om kei hi.
