TEDIM THU KIH ZAK NA LAI

MEI KHA 1926

The Tiddim Chin Hills News

A SUNG A OM THU TE​​ 

• Tedim thu kih zak na lai​​ 

• ​​ Leitung mihing te gamtat na thu​​ 

• Mang kang khuapi te thu​​ 

• Nipi ni Lai Siangtho sin​​ na​​ ding thu​​ 

TEDIM THU KIH ZAK NA LAI​​ 

A kih pan​​ 1​​ akum​​ 1919 hi

Kha sim in Khalkha khua kih bawl hi.​​ 

Lai bawlpa -------------------------------Sang Mang pa

Sum sangte------------------------------Dam Khup leh Thuam Hang​​ 

Kum khat a man hamu ah hi hi. Khalkha khua Mei kha ni 1 ni, 1926.​​ 

LEITUNG MIHING TE GAMTATNA THU​​ 

 Pibuaizi kha ni 18 ni Sang Mang Nu thak in tapa a suah hi. Tu in nih a nei zo hi.​​ Zun kha sang mangpa leh mang nu leh a tate a khua a ciah ding hi. Ni kum ciangin Pibuaizi kha ah khamtungah hong kah kik ding a Tedim khua a om ding hi. A khua a kha nga bek a om ding hi. Bang hang hiam ih cih leh khamtungah nasepna tampi a om hang hi.​​ 

 Pibuaizi kha ah sang inn uk Menzipi leh a zi khamtungah hong kah hi. Sang naupang lai​​ gelhna a muh ciangin tum dang a sa hi. Khamtung naupangte meeng meengin lai a siam thei hi, a ci hi. Mang lai a sinte zong a siam a sa hi. Kawl gamah kum thum a sin tawh kih bang a siam hi a ci hi. Tedim Phalam Khalkha Khuasak leh Lumbang te sang inn a et khit ciangin a ciah suk hi.​​ 

 Tu kum Khalkha sang inn mang lai hilh in Sang Mang nu a hi hi. Ni kum ciangin Kazian pa Po Miat siapi pa a kih kawih ding hi.​​ 

 Tu laitak Zahau leh Khuangli uk sung pan mihing tampite Lusei gam lamah lal uh hi. Tu kum inn za nih bang a lal ding kih um hi. Bang ding lal a hih hiam ih ci leh amau hausate tawh kih lem zo lo hi. Kumpinu nasepna zong a haksa a sa uh hi. A lalte lakah​​ Tapidaw zong tampia​​ om hi. Tua te in: Lusei gam lamah hausate kiangah hehpihna kah thuak zaw deuh ding hi, a ci uh hi.​​ 

 Ni kum India Menzipa upa vaihawmte in zu khamnah ding kih vaihawm hi. Indiate khempeuh te in a kham nuam uh hi. Mang Kangte a nuam kei hi. Mang Kangte in: Na kham uh leh mi golote in a ne sim ding hi, a ci uh hi.

 Tu kum Sente gam kim khatah kialpi a tung kik hi. Khua khatah mihingte mual tungah pai un buan nam khat to a a ne uh hi.​​ 

MANG KANG KHUAPITE THU​​ 

 Mang kang khua ah khuapi le khua neu tampi a om hi. Mi kim khat in khua sungah om kei hi. Tua te in lo kho pawl hi a amau lo lakah inn lam lai bek kah gelh ding hi. Leitung khua lian peen khua leh khuapihte kah gelh ding hi:

London khua -------------mihing 15,000,000

Nu Zawk khua-----------mihing 5,000,000

Cikago khua--------------mihing 3,000,000

Palit khua ----------------mihing 3,000,000

 Tua ahih ciang in leitung khua lian peen, London khua hi. Tua khuapihte in Kawl mi khempeuh zah a tam hi. Nu Zawk khua le Cikago​​ khua, Amelika gamah om hi. Palit khua, Piancit gamah om hi.​​ 

 Khuapi sungah lo om lo hi, inn vive kih mu thei hi. Tua khuapi a​​ zai​​ mah mah a Kamhau uk zah a lian hi. Lo om lo leh an​​ le tui leh sing kawi pan kih ngah hiam. An huannah ding sing kih zang kei hi, suang meihol leh dat kih zang hi. Tua suang mei hol tam pen, Amelika khua leh​​ Engalan khua om hi. Tua suang mei hol lei sung pan kih kai khit ciangin mei leeng tungah khuapi ah​​ pua a, khuapihte in a lei thei​​ hi. Bang ci in​​ kih lei a hi hiam. Khat vei tan khat ah lei hi. Tan khat in pound 2240 pha hi. Tua suang mei hol inn nuaiah a kawih khit ciangin a deih deih​​ bangin a la thei hi.​​ 

 Tui pen, mual tung pan kih ngah hi. Mihing 5,0,000 mual tung pan kih ngah hi. Mihing 5,0,000 te in tui khuk pan ahih hangin gun pan ahih hangin a tawi zo kei hi. Ton Zang khuapihte in sik lawng sungah tui a lak mah bang in khuapi mihingte in tui kih ngah hi. Tua sik lawng lam nuaiah a om hi. Ahih hangin khuapi tawh kih nai gun tui siangtho lo hi.​​ Dawn ding kih lawm kei hi. Tua ahih ciangin khua kim khat in gamla pi panin sik lawng sung ah a luang sak hi. Nu Zawk khuapihte in amau tui mual tung tai za li bang a gamla, tuili pan a ngah hi. Tua tui sik​​ lawng sungah a luang suk hi. Tua tuili sungah kuamah in lo ahih hangin puan sawp ahih hangin ah hih thei kei hi. Khua adangte in gun panin tui a la hi. Ahih hangin a dawn ma in sehnel sung pan a tit​​ hi. Tua sehnel sungah nin​​ a​​ na nusia hi. Ni dang lai inah Mang Kangte khua ah tui singatho lo ahih maninah khat vei vei pul a tung zeel hi.​​ 

 An thu a haksa​​ zaw hi. Khuapi​​ ah mei leeng lam tampi a om hi. Tua mei leeng tungah lo khote khua panin aan a pua ngitnget hi. Tua mei leng tungah sa, gah, nawi, tawbat a kihpan an nam khempuh a pua thei​​ hi. Zanah khuapihte a ihmut lai takin mei leeng nasemte in naseemin an a pua uh hi. A zing ciang in inn tek nute tho a, a duhna sumbuk panin a lei thei hi.​​ Ni khat bek an kih pua zo lo leh khuapihte a gil kialthei hi. Khat vei vei vuuk tampi kia a, lam kih khak leh khuapi liante a gim thei hi.​​ 

 Sik lawng suangah tui siangtho kih ngah mah bang​​ in​​ sik lawng sungah tui nin tawh, eek tawh, zun tui tawh kih pai khiat hi. An huante in tui nin inn tualah a bua khia kei hi. Sik lawng sungah bua a, tau sik lawng sungah lei nuaiah luang a, a tawpna ah ngunpi ahih hangin tuipi lian ahih hangin ah suak hi. Guah a zuk ciangin guah tui zong lampi luang loin tua sik lawng lianpi sungah a luang khia hi.

 Tui siangtho leh tui ninte bek lei nuai sik lawng sungah om lo hi. Dat​​ leh sik khau zong lei nuaiah kih ngah hi. Tua dat a bawlna inn pan sik lawng sungah tum a, inn khempeuh a tung hi. Tua ahih ciangin mi khat peuh mah in mei vakna deih a hi leh dat sik lawng hon sak a mei la in a deh sak thei hi. Mang Kang khuapi pai leu​​ teh​​ sik khau mu lo hangin inn khempeuh pan sik khau kam kih​​ khak thei hi. Tua sik khau lei nuaiah om hi.​​ 

 Khua luiah lam a kawi hi. Ahih hangin khua thakah lam tang bek a om hi. Tua lampi pi 60 bang pi 100 bang a​​ sau hi. Leeng painah ding lam laizangah hi. Mihing painah, lam geiah om hi. Tua mihing paina in leng paina sang in pi​​ khat bang a sang zaw hi. Tua ahih ciang in lengte mihing paina lam ah pai zo kei hi. Lampi, lei seek tawh ahih hangin suang tawh ahih hangin na hak tum dang tawh ahih hangin kih bawl hi. Lampi​​ ah buan leh tui a om hi.​​ Omna khat ah sumbuk leh sum bawlna inn bek a om hi. Tua munah innte lian mah mah a sang mah mah hi a, lam geiah kih lam hi. Tua nuai​​ ah sing kung leh lopa kung khat bek kih mu zo lo hi. Inn tual zong ah om​​ kei hi. Omna dang a hih le khuapihte teen na a hi hi. Tua omna ah innte lam geiah om kei hi. Inn tual leh sing kung le lopa zah a om hi. Pak kung zong a om hi. Ahih hang in mihing teen na mun kum khat, sum ahih hangin mihing teen na mun kim khat sum buk om na bang in inn tual nei lo in inn a lam thei hi.​​ 

 Khuapihte in sunah sumbuk lam leh sum bawlna omna pai un, na sem uh hi. Ni a tum ciangin a innah ciah un a lum uh hi. Bang ci in nasepna munah a tung thei hiam. Mi kim khat in lam nai a om hi. Kim khat a omna tak gunk bang tak sawn bang gamla hi. Tua mihingte in mei leng ahih hangin tamka ahih hangin motaka ahih hangin tuangun a pai thei hi. Mei leengte, amau sik lampi​​ ah pai thei hi. Tamka in dat leng bang hi a khua lapi​​ ah pai hi. Tua ahih ciang in zing sang ciang leh ni tak ciang in lampi​​ ah mihing tampi a om hi. Leeng zong tampi a om hi. Tuate in nasepna lam pai lo ahih leh a inn lam a ciah uh hi.​​ 

 Ahih hangin khua lian peuhah naseemte tam lua ahih maninah tuang ding leeng kih cing zo kei hi. Tua ahih ciangin lam tung sik lei tungah meileng lam le tamka lam bawl a, tua tungah mei leng le tamka a pai hi. Nu Zawk khua le Cikago khua ah sik lei lam a om hi. Tua leng a tuangte keellei​​ ah kahto in a tuang uh hi. Ahih hang in tua sik lei hawih lo hi. A nuaiah khua mial bang a om tawntung hi. Tua ahih hangin lam dang a bawl zo hi.​​ 

 London khua, Palit khua leh Nu Zawk khua ah lam nuaiah leeng lama bawl zo hi. Tua lam nuai lamah tamka leh mei leeng a pai thei hi. Mihing om lo ahih maninah meeng meengin ah pai thei hi. Tua lam zusa kua mah bang a hi hi. Leeng khawlna munah a tuang nuamte a kia suk a kahto dingin keellei kih bawl hi.​​ Nu Zawk khua sungah leeng lam thum a om hi. Lei tungah lam khat a om hi. Lei tung sik lei tung lam khat a om hi. Lam nuaiah zong lam a om leu leuhi.​​ 

 Ahih hang in London leh Nu Zawk khua mah bang in khua in gun lang nihah om leh bang a kih hih hiam. Nu Zawk khua sumbuk omna tui tawh kih um hi. Tua omna pai nuamte in sik lei tung ahih hangin, teembaw tung ahih hangin, a pai zeel hi. Tua ahih ciangin lam topate in​​ gun nuaiah leeng lam a bawl uh hi. Tua leeng lam sik lawng lianpi hi a, tua sik lawng sungah leeng ah pai thei hi. Tua ahih ciangin gum kan tan nuamte in leeng tuangin ah​​ kan thei hi. London khua leh Nu Zawk khua ah gun nuai lam tampi ah om hi.​​ 

 Tua mei leeng leh tamka le motaka tuang man bangzah a pha hiam. Khua kim khata a man mu khat hi, kim khatah mu thum a hi hi. Ahih hangin gamlapi khua dangah ih pai nawp leh a in a haksa zaw hi. Tua lampite kumpite a hih kei hi, sum vawtte a hi hi. Khua lampi painah ding in kum simin sum a pia hi.​​ 

Kih belap ding hi.​​ 

NIPI NI LAI SIANGTHO SINNAH DING THU​​ 

Mei Kha ni 9 ni

Isaak in Zi ah Nei hi

Ki pat na Lai Siangtho 24.

50. Laban leh Bituite in: ‘Hih thu Pasian in ah bawl na thu a hihi. Kote in nang thupha, thu pha lo ka gen thei kei uh hi.​​ 51.​​ Zibeka na maiah a om hi. Paipih in. Pasian thu piak bang in nang mah Topa zi hi sak in,’ a ci uh hi. 52. Tua kam a zak ciangin Abiahang sila pa in kun a, Pasian a bia khit ciangin 53. Ngun hai, kham hai, puan silh te la khia in Zibeka a pia hi. Amah nu leh nau zong a man phat na a pia hi. 54. Amah leh a pawlte khempeuh tawh an a neek zawh zan khit zing sang ciangin tho a: ‘Ka Topa kiangah hong ciah sak in,’ a cih ciangin. 55. Zibeka nu leh nau te in; ‘Numei no ko kiangah ni sawm bang hong om sak lai in. A nung ciangin a pai ding hi, a ci uh hi. 56. Tua pa in; ‘Kei hong kham kei un. Pasian in kei hong tun’ na hong hehpih zo hi. Kah Topa kiang ka pai thei nang thu hong pia un, a cih ciangin 57. Amaute in; ‘Numei no sam in amah deih na ih dong lai ding hi, ah ci uh hi. 58. Zibeka sam a; ‘Nang hih pa tawh tu in na​​ paikhawm ding hiam, a dot ciangin: ‘Ke’n ka zui ding hi, a ci hi. 59. Tua a hih ciangin a mah naunu Zibeka leh amah cing te tawh Abiahang sila leh amah mihing te tawh a pai sak uh hi. 60. Zibeka nang kote naunu na hi. Tul sawm​​ tul za nah suak tan. Nang pawl, nang suante in ah galte kong khak te uk ta hen, ci a phat na a pia uh hi.

61. Zibeka leh a nau numei te ding uh a Kalaoh tungah tuangun tua pasal tawh a pai khawm uh hi. Abiahang sila pa in Zibeka a pai pih hi. 63. Tua lai tak in Izet in nitum laitakin ngaihsun nuam hangin gamlakah pai a, a et ciangin kalaoh te hong pai ah mu hi. 64. Zibeka in zong lam en a Izet​​ ah mu ciangin kalaoh tung pan tuak a 65. ‘Kote hong dawn ding lo lai ah hong pai kua mi hiam, ci in silapa a dot ciangin tua silapa in:​​ ‘tua mi ka Topa hi,’​​ a cih ciangih Zibeka in a mai sit na la​​ in ah sin hi. 66. Sila pa in amah tat na khempeuh Izet kiangah a gen khit ciangin 67. Izet in a ni Saza puan buk ah Zibeka paipih a Zibeka ngai mah mah ahih ciangin a nu sih na thu pan ah sin nuam tuam sak hi.

Khiat na thu

Kanan​​ gamah dawi bia vive ah om hi. Tua ahih ciangin Izet a tangval ciangin Kanan​​ zi la in​​ Abiahang ah awi kei hi. Abiahang in Kanan gam a lal laitak in a nau Nahawa nusia hi. Tu​​ in a sila pa khat a nau khua ah a sawl hi. ‘Kanan nungak tawh ka ta​​ na teng sak kei in. ka nau​​ Nahaw inn kuan pih nah dot sak in, aci in thu a pia hi. Tua sila pa pai​​ leh, Pasian hehpih na in Izet zi a ngah hi.

v. 50. Bitui, Abiahang a nau Nahaw ta hi. Laban in ama tapa hi. Pasian thu hi: Abiahang silapa in Bitui khua a tun ciangin a thu a gen hi. Pasian aw, kei leh ka kalaoh tui dawn ding nungak te kiangah ka nget ciangin Izet zi hi ding nungak na tawi sak ding hi, ci hi. Tua ahih ciangin sila pa in​​ tui khuk tung a, nungakte kiangah tui a nget ciangin Bitu tanu Zibeka in thahkhatin a tawi sak hi.

v. 56. Abiahang om na leh​​ Bitui om na kih gam la mahmah a, silapa a din zawh a sawt zo hi. Tua a hih ciangin man langin a ciah nuam hi.​​ 

v. 60. Tua mihingte in ta tampi a deih hi. Tua ahih ciangin thupha a piak ciangin sum tampi tampi ngah ta in, a ci kei hi, ta tampi nei ta in, a ci uh hi. Galte kong khak: ah galte khua sim ta un.

v.65.Tua mihingte in Musalmante ngeina bangin nungakte maitang pasal dang ah en zo kei hi. Kalaoh, sakol sangin tampi a gol zaw hi. She nel gam bek om thei a van tampi a pua thei hi. Lam suk, lam to a pai siam kei hi. Tui vot nag amah junta zo kei hi.

zibeka a pha​​ mah mah hi. A nu a pa nusia in gamlapi khua pai a, kih mu nai lo tangval tawh a om hi. Hih thu Pasian thu hi, a up maninah kih nial lo in a pai hi.

mei kha ni 16 ni.

Etaw in a Upatna a zuak hi.

Kihpatna Lai Siangtho 25.

21. Izet a zi Zibeka in ta sel ahih ciangin Pasian kiangah hehpih na a nget ciangin Pasian in ngai a, amah zi a gai sak hi. 22. A gil sungah om nau pangte khat leh khat kih su a, a nu in: ‘Tua bang ah hi leh​​ kei bang thu tuak ding ka hiam, ci in Pasian dong dingin a pai hi. 23. Pasian in: ‘Nang gil sungah mi namnih a om hi. Nang gil sung pan ah kih lam dang mi pawl, pawl nih hong suak ding hi. Mi nam khat, khat sang in a gol zawh ding hi. A gol​​ in a neu pen sila a om ding, ah ci hi. 24. A suah hun a tun ciangin ama gil sungah tapeng gel a suak hi. 25. A suak masa pen puan mul nei bang in a pumpi in san a, tua pa Etaw ci in a min a phuak hi. 26. Tua khit ciang a nau in a u Etaw khetul len in hong suak a, Zakoh a ci in a phuak uh hi. Tua tate gel a suah laitak in Izet kum 60 a pha hi.

27. Naupangte a gol ciangin Etaw in gamsa man thei​​ a hi hi. Zakoh in buk ah om a thu hawih pa a hi hi. 28. Izet in Etaw a piak sa te ne ahih ciangin amah a it hi. Zibeka in Zakoh a it hi.​​ 29. Ni khat ciangin Zakoh an huan laitak Etaw gamlak pan ah tawlin hong ciah ahih ciangin 30. Zakoh kiangah ‘Tua a san​​ neek theite tawh kei hong vak in, kei ka tawl hi, a ci hi. Tua hun​​ in a mah min Edun kih ci hi. 31. Zakoh in: ‘Tu ni in nang upat na kei hong zuak in,’ a ci hi.

32.Etaw in: ‘Kei si dek zo ka hih ciangin tua​​ upatna om na in bang pha tuam hiam,’ a ci hi. 33. Zakoh in: ‘Tu in​​ a​​ mahin kei tungah tomlo in Zakoh kiangah a upat na a zuak hi. 34. Tua ciangin Zakoh in khomun leh bemeh Etaw pia a, a neek khit siangin a pia hi. Tua bang Etaw in a upat na a mawk na a suak sak hi.​​ 

 ​​ ​​ ​​ ​​ ​​ ​​ ​​ ​​ ​​ ​​ ​​ ​​​​ Khiat na thu

Izet in zi a neih zawh a sawtvei dongin ta a nei zo kei hi. Pasian kiangah thu ngen ahih ciangin ta​​ a nei thei hi. Tua ta nih bek a nei hi. Abiahangzi l hi.

V. 23. Hih thu Pasian a pia khawlna thu hi. A tate nih in nam​​ tuam a piang sak te hi. Zakoh in Itazila mi pawl a piang sak hi. Etaw in Edun mi pawl a piangsak hi. Edun te sang in Itazilate a hak zaw hi. A kih do ciangin Itazilate in a zo tawn tung hi. Etaw a u pa hangin a mah suangte in Zakoh suangte nuai ah hi hi.

V. 25. Etaw: San, a khiat na hi. Zakoh: khe tul len a khiat na hi.

V. 27. Tu dong in Edaw suante gampalak ah ah om hi. Khua lianpi lam nuam lo uh hi. Zakoh suan te ahih leh khua sung mi a hi hi. Tu laitakin Itazilate in lo kho siam loin khua sungah sum vawt a om zaw hi.

V. 30. Edun: Etaw khiat na tawh kih bang hi.

V. 31. Ni dang lai in ah Mang Kang khempeuh te in hih ngei na a zui uh hi. Ta upa in a pa sum khempeuh ah lua hi. Ah nau te in mun dangah nasep na a zong uh hi. Tu a hi leh, mihingte a nawp bang in a sum a lua sak thei hi. Etaw in ah pa inn lua a hi leh, Zakoh in bang mah a ngah kei ding hi.

V.32. Hih thu mi hai thu tawh kih bang hi.​​ Etaw in nau pang tawh kih bang hi. A mit in a muh teng a deih hi. Thu dang a ngaih sun zo kei hi. Zakoh an a nap ciangin bang mah dang peuh ngaihsun lo in a duh hi. Tua pa inn lua ding a kih lawm kei hi.

V.33. Etaw in a upat na a mudah hi. Nai khat lungdam na ngah nuamin kum tampi phat a vak khia hi. Ei Tapidaw te inn lua ka hi uh hi. Pawlu in: ‘Ei te in Pasian inn lua ih hi a, Zeisu tawh inn luah khawm ih hi uh hi, a ci hi. Lei tung lah van tung ah om teng ih luah​​ ding hi. Tua a hih ciangin kha khat bek lung damna ngah dingin tawntung lungdam ih mudah kei ding hi.

Mei kha ni 23 ni

Izet in Tui Khuk a To hi.

Kih patna Laisiangtho 26

12. Izet in tua gamah lo kho a a kum khat sungah zah za khat a ngah hi. Pasian in thu pha a pia hi. 13. Izet a lian seem seem a hau seem seem a mi lian a suak hi. 14. Bawng tampi tuu leh keel tampi, inn kuanpi tampi a nei ahih ciangin Piliti pawlte in a eeng uh hi. 15. Izet a pa Abiahang a to sa tui khuk, Piliti mihingte in lei tawh a khak kik zo hi. 16. Amimilek hong pai a: Kote sang in mi lian zaw na hi maninah ka kiang panin va pai khia in, Ozet kiangah a gen hi. 17. Izet​​ pai in Giza gamah omna a bawl khit ciang in a teeng hi.​​ 

18. Izet in a pa Abiahang khang lai a to sa​​ tui khuk a to kik hi. Bang hang hiam ih ci leh Abiahang a sih khit ciang in Piliti mihingte in lei in a khak​​ khin zo hi. A pa min a phuak bangin a phuak kik hi. 19. Izet silate in tua gamah lei to a, tui a ngah hi. 20. Giza tuu cingte in Izet tuu cingte tawh kih to in: Hih tui ko mau tui hi, a ci uh hi. Amaute in amah tawh kih tu ahih ciang in Izet tua tui khuk Esek a min a phuak hi. 21. Amaute in tui khuk a to kik uh ciangin a kih tu kik uh ahih ciangin Setna a min a phuak hi. 22. Izet in talai mun pan pai khia in tui khuk a to leu leu hi. Tua tui khuk hangah ah kih tu kei ahih ciangin Zihabat a min a phuak a: Pasian in eite omna hong pia zo ahih ciangin gah tampi ih gah ding hi, a ci hi.​​ 

26. Tua ciangin Abimilek leh a lawmpa Ahuzat leh gal kaap mangpa Pikalte, Giza pan Izet kiangah ah pai uh hi. 27. Izet in: Nah hong huat maninah bang hang kah kiangah hong pai​​ nah hi uh hiam, ci in ah dot ciangin 28. Pasian​​ in nang tawh ah om khawm a tel takpi ka thei uh hi. 29. Kote in nang ka bawl siat lo leh thu pha longal nang tungah bang mah​​ bawl loin thu pha pia in nang ka pai sak bang in eite tungah bangmah pha lohna hong bawl loin thu kih ciam hi. Nang in​​ Pasian thu pha na ngah hi, a ci uh hi. ​​ 30. Izet in zin do a ah ne tui a dawn uh hi. 31. Azing sang ciangin amaute tho uh a a kih dam khit uh ciangin a pai uh hi.​​ 

Thu Khiatna​​ 

Izet nungtakna thu Lai Siangtho sungah tawm bek a om hi. Tui khuk, to pa hi, mi kim khat ah min ah phuak hi.​​ 

V 14. Piliti mihingte: Kanan​​ mi hi a,​​ a tawntung Itazila galte hi. Davuih longal kuamah in amau gam a uk zo kei hi.​​ 

V 15. Abiahang in tui khuk to ahih maninah tui khuk ki​​ om a om lei a uk thei maninah tui khuk a siat sak uh hi.​​ 

V 16. Abimilek: Philiti innpi pa hi.

V 20. ​​ Tua gam ah​​ tui haksa mah mah hi. Tuk laiah gun tampi ah om hangin khua khal ciangin tui​​ ah kang khin hi. Tui khuk om lo leh ganhing zuat zo lo hi. Tua ahih ciangin a kih tu thamlo in Izek in ha min a phuak hi.​​ 

V 27. Tua mihingte in Izet a hawl khia zo hi. Tu in amah tawh kih lem nuam hi. Bang hang hiam Pasian in Izet thu pha pia ahih ciangin ah lian zo hi. Khat vei vei khamtung hausate in Tapidaw a hawl khiat ciangin: Tu in Pasian thu ah mang ding, ci in ah up mawk hi. Ahih hangin Zeisu ah gen mah bangin Pasian thu a neu khat ah mang zo kei hi.​​ 

Izet a kihta hiam. Mi kim khat in: Izet a pha kei hi. Bang hang in a tui khuk suttee ah nang kei hiam, a ci thei​​ hi. Pasian in tua mah bang in ah gen kei hi. Ei Tapidawte in kih hau tawntung ding hiam Pawlu in: Bawl siat na na thuak ding hi, hi a ci hi. Mi dang tawh ih kih​​ heh​​ tawntung leh Pasian in hong hehpih kei ding hi. Ih lel kha leh bangmah sam kei. Ih galte tungah ih zo sangin Pasian thu pha ah pha zaw hi. A kih hau pa in a zo thei hang in ah lung kih sia thei hi.​​ 

Mei Kha ni 30 ni

Zakoh a Mang a Mu Hi

Kihpatna Lai Siangtho 28

10. Zakoh, Bazibah khua pan Hazan gamah pai lai tak in 11. Mun khat ah tun ciangin nitum ah hih manin giak a, a lu kham ding suang la in a lum hi. 12. Ah mang in lei pan van dong keel​​ lei kih tung in Pasian​​ vantung mi​​ te tua keel lei panah tuak a kah hi. 12. Topa Pasian​​ keel lei dawn nah ding hi. Kei na pa Abiahang Topa, Izet Topa, kah hi hi. Nah lupna lei in nang leh na pawl lei vui​​ zah a tam ding leh mai lam a nung lam a tak lam a vei lam na khang ding hi. Leitung mi nam khempeuh te in nang tungah thu pha a ngah nam khempeuhte in nang tungah thu pha a ngah ding uh hi. 15. Nang tawh ka om khawm hi Na paina khempeuh kong kem ding a, tua gam pan khat vei kong paipih ding hi. Bang hang hang hiam nah ci leh kih ciamna ah cin mahteng kong keem​​ ding hi, ah ci hi. Zakoh lupna pan ah thawh ciangin Hih san takah Pasian omna thu kah thei kei hi. 17. Hih san, zak huai hi. A dang hih lo hi. Pasian vantung sang inn kong khat hi, ci in ah lau hi.​​ 

18.​​ Zing tung in Zakoh tho a, lu kham suang la in a teptehna in a phut a, suang don pan sa thau a bua hi. 19. Tua san Betila, ci in a min a phuak hi. Tua khua ah min masa Laz hi.​​ 20. Tua ciang in Zakoh in: Pasian kei lamah om a ka paina hong keem an neek ding puan silh ding kei khat vei ka pa inn nuam ka tung kik leh 22. Topa Pasian ka Topa a hi leh teptehna ka phut suang in Topa Pasian sang innpi a hi ding hi. Hong hehpihna khempeuh she sawm suah she khat kong pia ding hi, ci in a ciam hi.​​ 

Thu Khiatna​​ 

Zakoh in a u Etaw nih vei kheem ahih ciangin Etaw in: Ka nau Zakoh tawh ka kih mu leh ka that ding hi, a ci hi. Zakoh kihta a, a a tai hi. A pa kiangah: Zi zong dingin ka nute khua ah ka pai ding hi, a ci hi. Lam a pai lai takin hih mangmatna a thuak hi.​​ 

V 10. Hazan khua, Zakoh omna pan tai 400 bang gamla hi.​​ 

V 11. Tua munah suang vive om a, Zakoh ihmut ma in tua suang mu a, suang keel lei mang sungah a mu hi.​​ 

V 13,14. Ni dang lai inah Pasian in hih bang in Zakoh pu Abiahang kiangah a ciam hi. Abiahang leh Izet a​​ nungta lai ah hih thu a tung kei hi. Ahih hang in Pasian in a am kei hi.​​ 

V 15. Zakoh gamlapi a pai ding hi. Tua Hazan khua sawtveipi a om ding hi. Tua ahih ciangin hih thu Pasian a piak ciangin Zakoh a lung dam thei hi.​​ 

V 17. Pasian inn sung bek a om kei hi. Biakna inn sung bek a om kei hi. Kawi lam, kawi lam ah om thei hi. Lawkite in dawi ah biak ciang in ah inn pan ahih hang in a khua pan ahih hangin a biak vek thei hi. Ahih hangin Tapidawte in a omna pan a bia thei​​ hi. Davuih in: Lei mong dong in ka tai hangin na omna pan ka siakhia zo kei hi, a ci hi.​​ 

V 18. Sa thau in tua suang a siangtho sak hi. Tua nung ciang in Itazilate in siampite a kawih ciangin lu ah sa thau a bua hi. Zakoh in hih suang bia lo hi. Khamtungte kim khat in suang a bia uh hi.​​ 

V 19. Betelo: Pasian inn a ci nawp na hi.​​ 

V 22. She sawm suah she khat: Itazilate in tu dongin she sawm suah she khat Pasian a pia uh hi. Mang Kang Tapidaw kim khat zong tua mah bang in sumpi a pia uh hi.

Zakoh ciamna pha lo hi. Tapidaw kim khat in: Pasian hong hehpih a, ci dam lu damna hong pia leh ka bia ding hi, a ci uh hi. Tua ahih ciang in gimna a thuak caing in a tawp uh hi. Lai Siangtho​​ sung ah tang lai mipa dang​​ nungta na thu ah om hi. Tua pa in: Pasian hong that hang in bia lai ding hi, a ci hi. Eite in hih bangin Pasian thu um hi.​​ 

Zun kha ni 6 ni

Zakoh leh Etaw Kih Si hi

Kihpatna Lai Siangtho 33

1​​ Zakoh en to a Etaw leh mihing za li tawh hong pai a mu hi. Tua ciang in Lia leh Zakhila leh a sila numeite tung ah a tate a hawm hi. 2. Sila numei leh a tate tawh mailamah kawih hi. Tuate nungah Lia leh a tate ah kawih hi. A nung peenah Zawta leh Zakhila a kawih hi. 3. Amah mah mai ah pai in vei sagih​​ bei dong in ah kun khit ciangin a u a nai hi. 4. Etaw in tui​​ a dawn a, a gawnah buan a, a nap khit ciangin a kap uh hi.​​ 

5 Etaw​​ ento a, numei te leh tate a muh ciangin in: Nang tawh a om kawm hih mi kua mi a hi hiam, a dot ciangin: Hihte in Pasian in na sila pa hong hehpih ka tate a hi hi, a ci hi.​​ 6. Tua ciang in sila numei leh a tate hong nai a, a bia uh hi. 7. Lia le a tate hong pai a, a bia uh hi. A nungah Zawta​​ leh Zahilate hong nai a ah bia uh hi. 8. Etaw in: Bang hang ah ganhing tampi hong khak na hi hiam a cih ciangin: Ka Topa kiangah hehpihna ngah ding in ka khak hi, Zakoh in a ci hi. 9. Etaw in: Ka nau aw, sum tampi ka nei hi.​​ Na nei sa na nei lai ding hi a ci hi. Nong heh pih leh ka khut sung pan lungdamna na sang ding hi. Bang hang hiam na ci leh mi khat in Pasian maitang a mu bangin na maitang ka mu zo a, kei​​ amah tungah na lung dam hi, ci in a hansuah ciangin Etaw in a sang hi.

18. Tua ciangin Zakoh in Padanazam khua panin hong ciah ciangin Kanan​​ gam Sikhem khua tung a, khua pamah a buk a lam hi. 19 Abuk lumna lei Sikhem pa Hamaw kiangah dangka za khat in a lei hi. 20. Tua san takah biakna tan khat lam a Ei Elohe Itazila, a min a phuak hi.​​ 

Thu Khiatna

Zakoh in mang a mu khit ciangin a nute khua ah tung hi. A nau Zakhila a dot ciangin a pa in: Kum sagih ka na na seem sak le kong pia ding hi. a ci ciangin Zakoh in a seem hi. Kum sagih a cin ciangin a pa in kheem a, Zkhila u Lia a pia hi. Tua ciangin Zakoh in kum sagih a seem a Zhila a nei hi. Kum sawm nih ah bei khit ciangin a zi a tate tawh a ciah hi. Tu in sum a hau mah mah a bawng, keel, sakol tuu tampi a nei hi. A khua a naih ciang in a u Etaw zong ding in mi a sawl hi.​​ 

V 1. Zakoh in Etaw le mihing 400 ah muh ciangin a​​ lau mah mah hi. Tu in ka u in hong that ding hi, a ci hi. Lia leh Zakhilate u nau a hi hi.​​ 

V 2. Zakoh in Zakhila a it peen hi. Ta khat​​ bek a nei hi. Tua ahih ciangin a nung peenah ah kawih hi.​​ 

V 3. Sagih vei: nambat sagih a kih cinna nambat kih ci hi.​​ 

V 4. Khang lai pasalte ah kih nam thei hi. Tu lai tak nu pa leh numei bek kih nam thei hi. Etaw hehna bei ta hi. Anau khialna a maisak hi. Amaute kum sawm nih bang kih mu kei hi.​​ 

V 5. Na sila pa: Zakoh a lung kih niam mah mah hi.​​ 

V 8. Etaw hehpihna ngah ding in Zakoh in bawng, keel leh ganhing tamipi ah pia zo hi.​​ 

V 11. Tampi ka nei hi: Thu man hi. Pasian in thu ah ciam mah bangin Zakoh ah hehpih zo hi.​​ 

V 19. Khat vei Zeisu in Siamazi numei tawh kih hoh ciangin tua lo sung ah a om hi.​​ 

V 20. Ei: Pasian khatna hi. Itazila: Zakoh a khua a ciah lai takin Pasian in Itazila min thak a pia hi. Tua ahih ciangin a suante, Itazila pawl kih ci hi.​​ 

Zakoh in Etaw tungah nakpi a khial zo hi. A nuam leh Etaw in Zakoh a that thei hi. A phukha leh a khial kei hi, ki​​ ci thei hi. Ahih hangin a nau khialna lungnga loin a maisak hi. Eite in Pasian tungah nakpi ih khial​​ zo hi. Pasian in ih khial na a maisak bang in mi dangte khialna​​ ih maisak hi.