TEDIM THU KIH ZAK NA LAI
EIPI KHA 1926
The Tiddim Chin Hills News
Bu 7 Nambat 4 |
A SUNG A OM THU TE
Tedim thu kih zak na lai
Leitung te hih na thu
Kawl kumpipa te
Nipi ni thu hilh na ding
TEDIM THU KIH ZAK NA LAI
Ah kih pian na kum 1919
Khalkha khua kha sim in kih bawl hi.
Lai bawl pa…………………………Sang Mang Pa
Dang ka sang te………………… Dam Khup leh Thuam Hang
Kum khat ah man hamu ah hi hi.
Khalkha khua Eipi kha ni 1, 1926.
LEI TUNG TE HIH NA THU
Kawl gam Mawlamein khua lamah cinate dam sak siam kawl siampipa khat ah om hi. Tua pa tangval laitak in ah gi lo hi. Ah teek ciangin kih sik kik a mi pha a piang hi. Ah om na khua ah neu hangin cinate in gamlapi pan in ci dam na ngah ding in hong pai hi. India gam Bombai khua nangawn panin numei nih hong pai hi. Khat vei bek lam pai ngei lohte tua pa kiangah ci dam na ah ngah hi, ah ci uh hi. A mah a gim ciangin ah thu zuite tungah vanglet na ah pia thei hangin amau in ni khat bek mi ah dam sak thei hi, ah ci hi.
Amelika khang lam khua ah khut siam pa khat ah om hi. Tua pa a pha mah mah hi. Khat vei ci na pa kiangah pai in a khut ah nga khit ciangin: ‘Tho in la nah lup na nah pua in,’ ah ci ciangin a dam pah hi. Hih thu midang ten’ a zak uh ciangin lung mang mah mah uh a, tua pa kiangah pai a, dam na ah ngen uh hi. Lam ah pai ciangin mi tampite in ah nung ah zui uh hi. Kumpite lung mang in ama thu zui te man in: ‘Nah thu hilh pa kua ah hi hiam,’ ah dot ciangin ‘Topa Zeisu hi,’ ah ci uh hi. Tua a hih ciangin thu hilh pa man a, thu khen mangpa in: Kua na hi hiam, ci in ah dot ciangin, ‘Zeisu kah hi hi. Leitungah hong kum kik kah hi hi,’ a ci hi. Mi hai nah hi hi, ci in thongah ah khia hi.
Izuap gamah mun dang dangah zin ah liing lai hi. Zamini gam Kawlon khuapihte in zan khat ah innah tum ngam loin lo laiah ah lum uh hi. Kum sawm khit ciangin Amelika khua zin liing a khuapi ah sia ding hi, ah ci uh hi.
A mau gam kih uk nuam Indiate ah-kih khen dek tak hi. Kim khat in: ‘Kumpinu in kah khua manlangin kih uk sak kei leh phiang sia pia nawn lo ding hi,’ah ci hi. Kim khat in: ‘Kumpite tawh kih lemin pha tak pi ih sin lai ding hi. Ih siam ciangin Kumpinu in hong hehpih ding hi,’ ah ci uh hi.
Matu mihingte in Phalam Mangpipa ah kaap kei hi. Khua ah tun’ ma-in lam leh giakna phuai ah bawl khawl hi.
Disemba kha sungah Amelika mipa khat Tedim khua hong tung hi. A mah in khamtungah Sia huh ding in hong pai hi. Tedim uk sungah sia thak nih kha sum kong pia ding hi ci in Khalkha Sang Mang pa kiangah ci hi. A hih hangin Aizawl lam ah pai lai takin a ci na a Champhai khua pan a si hi.
Tulkite in Mang Kang te ngei na ah zui uh hi. Ahih hangin mi kim khat te in ah pute ah pate ngeina ah deih zaw uh hi. Tua ahih ciangin kumpipa in palikte sawl a lukhu sen khuh te dan ah tat hi.
Mang Kang te gal kih do khit ciangin England te in Tuklite kiangah Mesawpawteimia gam ah sut hi. Ah sut khit uh ciangin khupih te kih uk sak a amau kumpipa ah kawih hi. A hih hangin tua kumpipa a huh lai hi. Tua gam ah min thak Izak, ah hi hi. Tulki gamgi tawh kih nai Mozul khua, Tulkiten ah deih hi. Izakte’n ah pia nuam kei hi. Tua ahih ciangin League of Nations, kih ci Mang Kaang gam khempeuh kih khawpte kiang ah ko hi. Tua upate in Muzul khua, Izakte ah pia uh hi. Tulkite heh uh a gal dona ding ah lung ngai uh hi.
Suzi gamah Piancit galkap te in ah zo zaw uh hi. Mi bawl siat menzi pa kumpipa in sam kik a mi pha khat ah kawih hi. Tua ahih ciangin mizawngte ah lung dam zaw uh hi. Apilika gamah zong Sapein galkap te leh Piancit galkap te in ah zo uh hi. Amau galte inn kih lem nuam uh hi.
Kawl gam ni suahna lam Situai gam ah om hi. Ah kumpipa ah zi lian in ta a suah zo kei hi. Nikum kumpipa in: Kah zi lian Kumpinu ah hi nawn kei ding hi, ci in zi no ah la hi. Tua zi no ta ah gai ciangin mi khempeuh lung dam uh a: Kumpipa in inn lua pa ah nei ding hi, ah ci uh hi. Ah hih hangin inn lua pa ngah loin tanu ah suah hi. Kha khat khit ciangin kumpipa ah si hi. Ah nau in kumpipa ah piang hi. Zapau gamah zong kumpinu in ta ah suak ciangin tanu ah hi hi. Mite ah dah uh hi.
Sente gam ah uk nuam mangpa khat mang kangte khua ah tai zo hi. Tua ahih ciang in gimna ah kiam ding hi, ci in kih um hi. Zanuaizi kha Sang Mangpa in mihing 30 val tui sung ah phum hi.
KAWL KUMPIPATE
Mang Kangte, Kawl gam ah siim mai nah tang thu tampi ah om kei hi. Tua ahih ciangin Kawlte in mi pawl dangte tawh tam veipi ah doh kei hi. Ah hih hangin khat leh khat ah kih doh tawntung hi. Mi nam khat, kum zah nih bang ah mang (Maang) thei hi. Ahih hangin ah gi lo seem seem a mi dang te in suam a amau tang ding ah mang kik hi. Tua ah thakte in kum a zah nih bang, za thum bang ah mang khit ciangin kih suam a, amau galte in ah mang uh hi. Kumpipa khat ah suak ciang in ama u nau, suahpihte le bete ah that khin hi. Bang hang hiam ih ci leh tuate in hong suam ding ah lau hi. Ahih hangin kumpipa in mi zawngte bawl sia mah mah ahih ciangin mi khat in suam a kumpipa ah suak thei hi. Tua mah bang in khang khat zawh khang khat in ah hih uh hi. Mi zawngte hehpih dingin ah om kei hi, phiangsia pia ding in ah om zaw hi.
Mang Kangte in Zangun khua ah tun uh ciangin Khamtung khua tawh kih bang hi. Inn lian ahih zongin, lam hawih ah hih zongin ah om kei hi. Tuk laiah lamah buan vive ah om hi. Zato inn khat bek ah om kei hi, sang inn zong om hi. Khuapite in hehpihna mu loin dantat na tampi ah thuak thei hi. Tu in Zangun khua sungah zato innpi in Asia gam sung zato inn lakah ah lian peen hi. Sang inn za val ah om hi. Lawm ah hawih mah mah hi.
Mandali khua lai zang ah kumpipa omna hi. Tua omna in kiu li kan mangpi nungah ah om hi. Tua kan sungah mi dang ah tum zo kei hi. Kumpipa leh ah upate in ah nawp bangin ah hih uh hi. Khat vei vei kumpipa in mi zawng khat kiu li nei sungah ah sap ciang in ah suakta ding ci in ah muangmaw kei hi. Thu khenna ngah loin ah kih that thei hi.
Tua kan Itali pa khat in ah lam sak hi. Ah sawtveipi ah seem khit ciangin ah zawh khit ciangin letsawng mu dingin kumpipa kiangah kih paipih hi. Letsawngte bang mu ah hi hiam. Kumpipa in: Hih sangin ah hawih zaw ah lam zo lo dingin ama mit nah sia sak ding hi, ci in thu ah pia hi. Tua ahih ciangin ah si dongin mittaw mah bangin ah hi hi. Kumpipa kiangah ah tumte in naupang bangin bawk vakin ah pai hi. Kumpipa maitang ah ento zo kei hi.
Kawl gam ah hong tung cil sang mangpa Mandali khua ah om hi. Bangmah khial lo hangin kumpipa in England te tungah heh man inah tua pa man a, thu khen loin thong sungah ah khum hi. An pia lo hi. Puan pia lo hi. Lei tungah lum sakin ah khe ah kai sak hi. Ah zi in khua sungah mite kiangah ah pasal an ah ngen hi. Mi zawngte in hehpih in an ah vak sak hi.
Kawl kumpipate ah kihpha sak mah mah hi, Khat in ama suang phut tungah hih bang in ah gelh hi: gal kap 30,000,000 kah nei hi. Ni simin pagan 100 val antang dimin kah nei hi, ah at hi. Atu in kawl gam sung mi khempeuh te 15000,000 bek om hi. Kum 1820 Kawl kumpipa in Zakha gam ah siim hi. Tua zakha gam khamtung gam pan ni tumna lam sang ah om hi. Ah kih phasak mah mah hi. Tu in leitung khempeuh kah uk ding hi, ah ci hi. Tua ahih ciangin ama gal kapte ni suahna lam gam Situai gam sim dingin ah sawl hi. Tua gal kapte in Situaite tawh kih tuak ciangin ah tai uh hi. Ahih hangin kumpipa lung kih niam kei hi. Kalkata khua kah sim ding hi. Mang Kangte kah hawl khia khit ciangin Engaland gam zong kah uk ding hi, ah ci hi. Engaland te in hih thu ah zak uh ciangin ah nui uh hi. Ahih hangin Kawl gal kapte Kalkata lam ah pai uh hi. Tua ciangin Mang Kang te heh uh a, Zangun khua ah sim uh hi. Zangun khua ah tun ah ciangin Kawl gal kapte Sui Dagon Pagoda mual tungah kih khawm uh hi. Ahih hang in Mang kaang gal kapte kihta loin in hong pai ah mu uh ciangin kihta tak tak khin uh hi.
Tua mah bang in Mandali khua ah siim to uh ciangin kumpipa ah kihpha sak hi. Mang Kangte kaap ding ah haksa kei hi. Kaap nuamte hong kuan un. Mi kah sam kei hi, ah ci hi. Mang Kangte in teembaw tawh Izuadi gun lam ah pai to uh hi. Kawl gal kapte in tua teembaw ah mu uh ciangin masa bang in kihta a, ah lui uh a, ah khempeuh ah matsa hi. Mangte in kumpipa inn ah tun uh ciangin mi gilo bangin huan sungah ah bu hi.
NIPI NI THU HILH NA DING
Eipi Kha Ni 4 Ni
Abiahang Thu
Kihpatna Lai Siangtho 12
1 Tua lai tak in Pasian in Abiahang kiangah ah thu piakna in: Nah khua pan, nah beh te khua pan, nah inn kuan pih te kiang pan pai khia in la kong mu sak ding gamah pai in. 2. Nang mi lian pawl kah piang sak ding hi. Thu pha zong kong pia ding hi. Nah min kah lian sak ding hi. Nang in mi dangte nah hehpih in. 3. Nang hong heh pihte kah hehpih ding hi. Nang hong kohsiate kah kosia ding hi. Nang mah hangah mi pawl khempeuh thu pha ah ngah ding hi uh hi, ci in thu ah pia hi.
4 Tua ahih ciang in Abiahang in Pasian thu piak bangin ah pai hi. Lawta zong ah pai hi. Abiahang in Hazan khua pan ah pai khiat lai takin ah pian zawh kum sawm sagih leh kum nga pha hi. 5. Abiahang in a zi Saza tawh ah nau ah ta Lawta taw, amau sum tawh Hazan khua sungah mihingte ah ngah teng tawh la a Kanan gamah tung ding ah pai khia uh a, Kanan gamah tung hi. 6. Abiahang in tua gam lakpan pai in Mawza tehno kungpi tawh kih nai Sikem khua ah tung hi. Tua lai takinah Kanan mihingte in tua gamah ah om uh hi.
7 Pasian in Abiahang kiangah langin: Hih gam nah suante kiangah kah pia ding hi, ah ci leh Abiahang in tua san takah ama kiangah ah lang Pasian bia dingin tau khat ah lam hi. 8. Tua san tak pan in Abiahang ding leu leu a Betila khua pan ni suahna lam mual kah mah lal a ah puan buk ah lam hi. Ama omna pan ni tumna lam Betila khua ah om hi, ah ni suahna lam eiai khua ah om hi. Tua san takah biakna tau lamin Pasian kiangah thu ah ngen hi. 9. Abiahang khang lamah ah pai leu leu hi.
10. Tua gamah kialpi ah tun ciangin Abiahang Izipt khua ah ah pai suk hi. Bang hang hiam ih ci leh gam sungah kialpi lianpi ah tung hi.
Khiatna Thu
V 1. Abiahang: Ah pian na khua Uza khua ah hi hi. Ah pa dawi bia hi. Leitung ah Pasian thu um kuamah om lo hi. Ah pa Tiza, Kanan khua ah pai hang in Hazan khua ah ah si hi. Ah pa ah si khit ciangin Pasian in Abiahang sam a: Kah hilhna khua nah lal in, ci in thu ah piak ciangin ah pai hi. Hazan khua leh Kanan khua kih kal ah gamla lo hangin mihingte leh ganhingte tam ah om maninah manlangin ah pai zo kei hi. Abiahangte ading ah haksa hi. Lam thei lo lawm nei lo, kumpite thei lo, kam thei lo hi. Ah bete nusia in khua dangah pai nang ah haksa hi. Ahih hangin haksana ngaihsun loin Pasian thu a ngai hi.
V 2. ‘Ta nah nei ding hi,’ ci in Pasian in thu a piak ciangin, Abiahang ah vuai zo hi. Thu up na lung nei lo a hih leh hih thu ah zah ciangin ah lung dam kei ding hi.
V3. Pasian in Abiahang a keem hi. Leitung mi pawl khempeuh te in bang ci in Abiahang hang ah thupha ah ngah zo hiam ih ci leh Abihang in Itazila mi pawl ah piang sak pa hi. Topa Zeisu in Itazila mi a hi hi. Tua Topa singlamteh tungah ah si maninah khamtung mi kawlmi a ki pan leitung mi khempeuh te in thupha ah ngah thei hi.
V 5 . Abiahang in nau nih ah nei hi. Khat Hazan khua ah om lai hi. Lawta pa, ah si ciangin a ta Zawta, Abiahang kiangah nusia hi. Abiahang mi zawng hi lo hi, sum leh ganhing tampi ah nei hi. Kanan gam: Zeisu khan lai takin tua gam, Zudah gam kih ci hi. Tu lai takin Palestin gam kih ci hi. Tua gam Engaland kumpipa in ah uk hi.
V. 6. A biahang in Khamtungte bangin sing kungpi nuaiah Pasian ah bia hi. Kanan mihing te in milim leh dawi ah bia uh hi.
V.8. Abiahang in khua ah tum kei hi, lo ah kho kei hi, inn ah lam kei hi. Ah si dong in gam lakah ah om ngitnget hi. mun khatah lo pa ah beih ciangin mun dangah ah lal hi.
V.10 Izip gamah Zeisu ah nu a pa te ah tai uh hi. Tua gam ah an a om tawn tung hi. Ei khamtung te in Abiahang tawh ki bang in ih pate ngei na ih nusia hi. Ih suah pih te, Ih bete kiang panin ih pai khia uh hi. Abiahang in thu pha ah ngah bang in eite in zong Pasian thu pha ih ngah thei hi.
Eipe Kha ni 11 ni
Lawta in Nawpna ah Tel hi.
Kihpatna Lai Siangtho13
6.Amaute ah om khawm theinah dingin gam ah kih cing kei hi. Bang hang hiam ih ci leh amau neisa tam lua ahih man inah ah teeng khawm zo kei hi. 7. Abiahang bawng cingte leh lawta bawng cingte kih tu ah kih tawng uh hi. Tua lai takin kanan mite leh Pelizite tua gamah ah om uh hi. 8. Abiahang in Lawta kiangah: ‘Nang leh kei, nah ganhing cingte leh kah ganhing cingte kih hua kih tawng lo dingin kah thuum hi. Bang hang hiam nah ci leh u-nau ih hi hi. 9. Hih gam kheempeuh nah maiah om lo ah hi hiam. Kei tawh nah khen ding kah thuum hi. Ah tak lam nah pai le kei ziat lamkah pai ding hi. Ah ziat lam nah pai leh kei a tak lam kah pai ding hi,’ ah ci hi. 10. Lawta khua dak a, Zawdan gun lang nihah zang lei ahmu hi. Pasian in Tawdon khua leh Gawmaza khua ah siat sak ma-in Zoah gam nah pai lai Izipt gam mah bangin Pasian huan tawh kih bang mun kheempeuhah tui ah om hi, ah mu hi. 11. Tua ahih ciangin Lawta in Zawdan gun lam zang lei ah tel a, ni suahna lam pai-in ah kih khen uh hi. 12. Abiahang in Kanan gam ah teeng lai hi. lawta ah hi leh zang lei khua-ah teeng a ah puan buk Tawdon khua pamah ah lam hi. 13. Tua Tawdon khuapihte in Pasian kiangah nakpi-in ah khial ah mawh uh hi.
14. Lawta tawh ah kih khen khit ciang in Pasian in Abiahang kiangah: ‘Nah khua dakin. Nah omna panin sak, khang lam, ni suahna lam, ni tumna lamah nah en in. 15. Bang hang hiam na nah ci leh tua gam kheempeuh nangmah leh nah suante kiangah la kik nawn loin kah pia ding hi. 16. Nah suante lei vui tawh kih bang kah khang sak ding hi. Tua ahih ciangin lei vui sim thei ah om leh na suante zong ah sim thei ding hi,’ ah ci hi.
Khiatna Thu
V. 6. Abiahang in Izipt gam pan ah ciah ciangin sum tampi ah nei hi. Bang hang hiam ih ci leh Izipt kumpipa in ah hehpih hi. Ama ganhing leh Lawta ganhing an neek ding lopa ah cing kei hi. Tui zong tam ah om kei ahih maninah ganhingte cingte ah kih tu uh hi.
V.7. kanan gam sungah mi pawl sagih ah om hi. Tua pawl khat ah min Pelizite ah hi hi.
V.8,9. Abiahang ah ham zaw hi. Ngeina bang ah hi leh mun hawih ah ah om thei hi. Ahih hangin ah lung pha ahih maninah Lawta ah hehpih hi.
V.10. Zawdan gun: Kanan gamah mual vive ah om hi. Ahih hangin gun gei lang nihah lei zangah khua tam pi ah om hi. Tua Zawdan gun sungah Topa Zeisu in Zawhang khut tung ah tui kih phum hi. Tawdon khua leh Gawmazi khua: Tua khuate tu lai tak ah om kei hi. Mang Kangte in ah zong hang in ah mu zo kei hi. Tua khuapihte ah gi lo mah mah hi. Ah kih huai khialh na khat Mang Kangte in Tawdonte hihna, ah ci uh hi.
V 13. Lawta in thakhat in Tawdon khua ah tum kei hi, ah pamah ah om hi. Ahih hangin ah nung ciangin khua sungah tum hi. Tua mah bang in mi gilote in thakhatin ah khial kei hi. Ah cil panin mi khialte kiangah ah leeng ah to hi. Ahih hangin ah nung ciangin ah khial tak tak hi. Tua ahih ciangin mi gi lote tawh nah kih pawl leh tuate ngeina bang in nah khial kha ding hi.
V 14. Lawta ah pai zawh Pasian in Abiahang leh ah suante bek Kanan gam ah pia thei hi. Lawta in nawpna bek ah ngaihsun hi. Zawdan gun lamah lopa tam ah om hi, lo tampi ah om hi, an ah vai hi. Kham tungah ah leh nasepna haksa hi, Ahih hangin zang leiah nawpna lamah khialna, khial teemna, zeetna, kih huaina zong ah om hi. Kham tungah Abiahang kiangah siangthona, phatna, ah om hi. Lawta in nawpna ah deih hangin mi lian ah ah suak kei hi. Abiahang in phatna thu ah lungngai zaw maninah mi lian peen ah suak hi.
Eipi Kha ni 18 ni
Ismila ah Piang Hi
Kihpatna Lai Siangtho 16
1 Abiahang zi Saza in ta ah suak kei hi. Amah in Haga min nei Izipt numei nasem khat ah nei hi. 2. Tua lai takin Saza in: Ta nei dingin Pasian hong kham zo hi. Kah nasem numei kiangah pai in. Amah tung pan ta kah nei kha ding hi, ci in Abiahang kiangah gen hi. Abiahang in Saza thu ah ngai hi. 3. Abiahang in Kanan gamah kum sawm ah om zawh ah zi Saza in ama naseemte Izipt numei Haga ah zi piang nah ding in ah pasal Abiahang ah pia hi. 4. Abiahang in Haga kiangah pai a Haga in ta ah gai hi. Ta ah gai a thei ciangin ah Tonu ah mudah hi. Tua ciang in Saza in: Kei mah khialna nangmah tungah om ta in. Kah nasem numei nah awm sung ah kah pia zo hi. Ta ah gai ah theih ciangin amah kiangah mudahna bek kah thuak hi. Nang leh kei kihkal Pasian in thu khen ta hen, ci in Abiahang kiangah ah gen hi. 6. Abiahang in: Na nasem numei nah khut sungah om hi. Nah nawp bang in ama tungah nah hih in ah ci hi. Tua ahih ciangin Saza in Haga bawl siat ahih maninah ah tai hi.
7 Pasian lelang khat in Su lamah gampalakah om tui khut khat kiangah Haga ah mu hi. 8. Saza nasem numei Haga aw, kawi pan hong pai nah hi hiam, kawiah pai ding nah hi hiam, lelang pah ah ci hi. Haga in zong: Kah Tonu kiang panin ka tai khia hi, ah ci hi. 9. Lelang pah: Nah Tonu kiangah ciah in la, ama khut nuaiah nah om ding hi. 10. Ah kih sim zo lo na tute nah tate kah khang sak ding hi. 11. Ta nah gai zo hi. Tapa nah nei ding a, ah min Ismila nah phuak ding hi. Bang hang hiam nah ci leh Pasian in nah gimna ah mu zo hi. 12. Tua nah ta gampa lak la tawh kih bang mihingte lakah ah om ding hi. Amah in mi khempeuh gal ah hi ding hi. Mi khempuh in ama gal ah hi ding hi. Ah naute lang khat ah om ding hi, ah ci hi. 15. Haga in Abiahang aading tapa khat ah suak hi. Abiahang in Haga ah suak sa tapa Ismila ah min ah phuak hi.
Khiatna Thu
V 1. Abiahang in Izigpt gamah om lai tak in tua numei ah cial hi.
V 2. Tua mihingte in tanei lo ah hi leh ah maizum thei hi. Tua tham loin Pasian in: Nah suan lei vui leh aaksi zah bang ah tam ding hi ah ci hangin ta nei zo lo maninah numei dang tungah ta nei ding Pasian in ah ut hi, ah um mawk thei hi.
V 3. Saza in manlangin hih na ah bawl kei hi. Kum 10 ah ngak khit ciangin ta nei zo lo ahih ciangin ah hih hi.
V 4. Ta ah nei zo lo leh maizum thei hi. Tua ahih ciangin Haga in ta ah gaih ciangin Saza ah mudah hi.
V 5. Saza in ah khialna ah thei zo hi. Kah nasep numei kiang pan ta kah ngah ding, ah um mawk hangin maizum na bek ah thuak hi.
V 9. Haga in gimna ah thuak ciangin ah tai hi. Pasian in: Gimna na thuak ding hi, ah ci hi. Haga ah khial zo hi. Tua ahih ciangin dan ah thuak ding hi.
V 12. Ismila suante, Pasian lelang ah ci mah bangin mi dang tawh kih lem nuam lo hi. Tu dongin gampalak mi ah hi uh a gal kih do tawntung uh hi. Ah cilin Musalmante Ismila mi ah hi uh hi. Tua Ismilate in Itazilate tawh ah do uh hi. Pasian ah bia kei uh hi.
Abiahang ah upna ah khang mah mah hi. Ahih hangin khat vei ah kiam ciangin ah khial hi. Pasian in: Ta tampi nah nei ding hi ah khi ciam hangin kum sawm pha zo hangin ta ah nei nai kei hi. Tua ahih ciangin Lawki ngeina bangin ta ah nei hi. Pasian in ih deihna bang in man langin hong pia kei leh lung siatin lawki ngeina in zui kik ding hiam Pawlu ah cina hi Pasian kiangah thum vei hehpih na ah nget hang in ah mu kei hi. Ahih hangin in Pasian in: Kah thu pha nang aading ah cing hi, ah ci hi. Ih deihna ih ngah lo hangin Pasian thu um hi.
Eipi kha ni 25 ni
Pasian in Tawdon khua leh Gawmnaza Khua ah Sia Sak hi
Kihpatna Lai Siangtho 18, 19
33. Pasian in Abiahang tawh ah hohpih khit ciangin ah pai hi. Abiahang zong ah omna ah ciah hi.
1. Vantung mihing nihte ni tak ciangin Tawdon khua ah tung uh hi. Lawta in Tawdon khua kong pi ah tu a, tho in ah muak ciangin lei dong in ah lu ah kun hi. 2. Topate aw, na silapa innah hong tung un la giak in nah khe na silh un. A zing tung no tho un nah pai lai ding uh hi ah ci hi. Amaute in: Hi lo hi, Lampi ah zan khua vak dongin kah lum ding hi, ah ci uh hi. 3. Lawta in nakpi ah hansuah ciangin ama innah ah tung uh hi. Lawta in lung daman bawl a tilnu (silngo) kih hel lo anlum huan a ah ne uh hi.
12. Tua mihingte in Lawta kiangah: Hih san ah mi dang nah nei hiam. Tu tawh, tapate tawh tanute tawh ah kipan khua sungah nah bete tung hih mun panin nah pai khiat sak ding hi. 13. Bang hang hiam nah ci leh hih khua ah kihkona aw Pasian maiah ah lian zo ahih maninah kah su sia ding hi. Su sia dingin Pasian in hong sawl hi, ah ci uh hi.
23. Lawta, Tawdon khua ah tun lai takin ni in leitungah ah suah zo hi. 24. Tua ciangin Pasian in guah zu mah bang in Tawdon khua leh Gawmaza khua tunga vantung Pasian kiangah panin kat leh mei khia suk a 25. Tua khuate tawh lei zang taw, khuapihte tawh lei tung pan ah po sa teng ah su sia hi. 26. Lawta zi ah nung lam en ahih ciangin ci khuam ah suak hi. 27. Abiahang in zing tungah Pasian maiah ah dingna munah kahto a 28. Tawdon khua leh Gawtamaza khua le lei zang lamah ah et ciangin mei khu in leitung panin mei kuang pan khu ah kai bangin ah kai in ah mu hi.
29. Pasian in lei zangah om khuate ah su siat ciangin Abiahang ngaihsun a Lawta tengna khua ah su gawp ciang in tua su gawp na panin ah pai khia sak hi.
Thu Khiatna
V 33. Pasian leh Abiahang in bang thu ah kih ho uh hiam. Pasian in: Tawdon khua leh Gawmaza khuapihte gi lo maninah amaute khua kah su sia ding hi, ah ci hi. Abiahang in hih thu ah zak ciangin dah mah mah a tua khuapihte aading hehpihna ah ngen hi. Mi pha sawm bek ah om leh ka su sia kei ding hi, Pasian in ah ci hangin mi pha hih zah ah mu zo kei hi.
V 1. Khua kongpi ah to hi: Ah cil panin Lawta in Tawdon khua pamah ah teeng hi. Tu in Tawdonkhua sungah lut tham loin upa vaihawm ah suak zo hi. Tua ahih ciangin kongpi kiangah ah to thei hi. Upa ahih maninah vantung mite ama innah ah tung sak hi. Mi khat peuh mah in mi gi lote kiangah ah hawh leh mi gi lo ah suak ding hi.
V 12. Lawta in tanu nih ah nei hi. Amau pasalte in lawta thu ngai nuam lo uh hi. Tua ahih ciangin Lawta in ah zi ah tanute tawh pai khia uh a, mual tung ah ah tai uh hi.
V 24. Tu dongin tua lei zangah kat khuk ah om lai a an kung ah pho zo kei hi.
V 25. Ni dang lai inah tua lei zangah khua leh lo tampi ah om hi. Tuin bangmah ah om kei hi. Ci al tui li khat ah om hi. Tua sungah ngasa om lo ahih ciangin Si tui li, kih ci hi.
V 20. Lawta zi ah tai nuam kei hi. Tawdon khua nawpna ah lung ngai man inah dan ah thuak hi. Zeisu in: Mi khat peuhmah in lo kho ah kihpat khit ciangin ah heek kik leh vantung gam tung ding ah kih lawm kei hi, ah ci hi.
V 29. Lawta in Abiahang ta ahih maninah Abiahang hanginah ah hehpih hi. Pasian in mi gi lote kempeuh a su sia ding hi. Amaute ah ngaihsut lohna hun hong pai a dan ah tat ding hi. Ahih hangin Pasian in ah ta Zeisu ah it maninah amah thu zuite zong Zeisu hanginah ah hehpih ding hi. Eite in dan ih thuak lohna ding in Zeisu in singlamteh ah thuak hi. Eite in Zeisu ih up leh amah hangah gupna ih ngah ding hi. Ih up kei leh dan ih thuak ding hi.
May Kha Ni 2 Ni
Pasian In ABiahang ah Ze-et hi
Kihpatna Lai Siangtho 22
1 Tua nung ciangin Pasian in Abiahang ah ze-et hi. Abiahang aw, ah cih ciangin: Kah om hi, ah ci hi. 2. Pasian in: Tu in nah it nah tapa khat bek Isak la in la Mawzia gamah pai in. Tua san takah kah hilh ding mual khat tungah keimah biaknah ding nah vah that in, ah ci hi. 3. Abiahang zing tung in tho a, ama la tona ah phat khit ciangin ama nasem tangval nih leh Isak sam a Pasian biak ding sing ah at khit ciang in Pasian ah hilh sa munah ah pai hi. 4. Ni thum ni ah phak ciangin Abiahang ah dakto a gamlapi panin mun ah mu hi. 5. Tua ciangin Abiahang in tangvalte kiangah: La tawh nah khawl un. Keimah in patang tawh hua san tak ah pai a, Pasian kah bia khit uh ciangin note kiangah kah hong pai kik ding uh hi, ah ci hi.
9. Pasian ah hilh sa munah tung uh hi. Abiahang in suang in tau lam a tua tau tungah sing ah kawih khit ciangin ah ta Isak khau tawh hen a sing tung ah tau tung ah ah kawih hi. 10. Tua ciangin Abiahang in ah tapa that ding tem ah la hi. 11. Tua ciangin vantung mi khat in vantung pan in: Abiahang aw, Abiahang aw: ci ah kihko ciangin Abiahang in kah om hi, ah ci hi. 12. Vantung mi in: Naupang tung ah nah khut nah nga kei in. Amah tung ah bangmah nah hih kei in. Bang hang hiam nah ci leh nah ta khat bek pia nuam lo nahih maninah Pasian nah kihta in ka thei hi, ah ci hi. Abiahang ah dakto a ama ki tawh kih man ling kung lakah keel tum khat ah mu a, pai in tua keel ah la khit ciangin amah ta tang ding Pasian biaknah ding ah that hi.
19. Tua ahih ciangin Abiahang in tangvalte kiangah pai kik a amau tho in Biasiba khua ah pai khawm uh hi. Abiahang in tua Biasiba khua ah teeng hi.
Thu Khiatna
Pasian ah kih ciam mah bang in Abiahang zi Saza in ta ah suah hi. Amah leh ah pasal ah lung dam uh hi. Tu in kah min ah mang kei ding hi. Kah suante ah tam ding hi, ah ci hi. Isak ah pian zawh kum sawm leh kum nih ah pha ciang in: nah that in, ci in thu ah pia hi. Isak ah no lai takin Abiahang in Haga leh a tapa Ismila ah hawl khia zo hi.
V 1. Abiahang ah upna ah lian ah hi hi. Ahih hangin Pasian in khat vei ah ze-et kik hi. masa ah ta ah nei thei lo maninah Haga ah nei zo hi.
V 2. Khamtungte sa ah go ciangin mei tawh ah hal kei hi. Zeisu ah pian ma Pasian biakte in sa mei tawh ah hal hi. Zeisu in singlamteh tungah sina ah thuak khit ciangin ah hal nawn kei hi. Kanan gamah dawi thawite in milim ah biak uh ciang in mihingte ah go thei hi. Tua ahih ciang in Pasian in: nah ta nah that ding hi, ci in thu ah piak ciang in Abiahang ah lung mang kei hi. Mawziah gam: Ah nung ciangin tua mual tungah Zezusalen khua ah kih lam hi.
V 3 Sing; Amaute in sing ah hal masa hi. Tua sing tungah sa ah kawi hi.
V 5. Ah ta ah that lai dingin mi dang mu lohnah dingin Abiahang in tangval ah khawl sak hi.
V 9. Pasian in tua keel ah piang sak hi. Abiahang leh Isak ah pai lai takin, Isak in: Sa go ding kawi ah om hiam ci in ah pa ah dot ciangin: Pasian in sa hong piang sak ding hi, ah ci kik hi. Tu in Pasian in ah piangsak zo hi. Abiahang suante in tawntung khial phelna ngah dingin keel ah go uh hi.
Abiahang ah upna ah lian hi. Ah hih kei leh ah ta ah that nuam kei ding hi. Ta khat bek ah nei hi. Ah zi ah ah teek zo hi, ta dang ah suah zo kei hi. Pasian in: Nah suante lei vui tawh kih bang ah tam ding hi, ah ci hang in ah ta khat bek ah that sak hi. Abiahang aading ah haksa hangin Pasian thu el loin ah ta ah that hi. Eite in ze-et na ih thuak thei hi. Mihing khat peuhmah in naseem lo ah hi leh ah hat zo kei hi. Eite in gimna bawl siatna ih thuak kei leh ih sin ih lung ah kip kei ding hi. Pasian in khial hong teem kei hi, ah hong ze-et hi.
