TEDIM THU KIH ZAK NA LAI
EIPI KHA 1925
The Tiddim Chin Hills News
Bu 6 Nambat 4 |
A SUNG A OM THU TE
Tedim thu kih zak na lai
Kih zak na thu
Lai Siangtho tang thu 16
Thu man ngawl thu hilte
Kham thu
TEDIM THU KIH ZAK NA LAI
Ah kih pian na kum 1919
Khalkha khua kha simin kih bawl hi.
Lai bawl pa -----------------------------Sang Mang Pa
Kum khat a man hamu ah hi hi. Khalkha khua Mat kha 1, 1925.
KIH ZAK NA THU
Tu ma in kum nga ciangin kumpite in Zangvun leh Kalkata khua kih kal wan tembaw in pai nahding ah lungngai hi. Ahih hang in anung ciang in ah lungngai nawn lo. Tu kum sum buk mi pawl khat in tembaw lam bawl nahding ah lungngai uh hi. ‘Tembaw ka bawl ding hi,’ a ci uh hi. Tua Tembaw tuangin ih pai leh nai 8 in Kalkata khua panin Zangvun khua ih tung thei hi. Tui tembaw tuang in ih pai leh ni 3 in ih tung thei hi. Tembaw lam ah bawl leh namgim tui lak dingin Situi khua ah khawl ding hi.
Pibuazi kha in Tedim sia sawm, Phalam sia sagih leh Khalkha sia kua te in Khalkha khua Sang Mang Pa kiangah lai ah sin uh hi. Tedim sia leh Khalkha sia te in zolai a sin zo hang in ah siam uh hi. Ahih hang in Phalam sia te in Zo lai khat zong a siam kei hi. Hualngo pa khat bek a siam hi. Kha khat khit ciang in ah khua ah ciah a Phalam khua, Tedim khua leh Khalkha khua ah sin lai ding hi. Zo lai bek ah sin kei hi, thu hilh na dang zong ah sin uh hi.
Kum 1922 kum in Khalkha lai hilh sang in ah kang gawp hi. Tu kum Kumpinu in sang in thak a lam sak ding hi. Sang in lui sang in ah nop zaw ding hi.
Kacin mi pawl leh Khamtung mi pawl ah khat hi. Ning kum masa a maute in a mau lai sin ding kih pan hi. Masangah Kawl lai bek ah sin hi. Tu kum a maute hausa liante in Zangvun Menzi pa kiangah pai suk uh a ‘Sang in tampi ka deih hi. Kah khua pih te lai siam leh ka awi hi,’ a ci uh hi. A hih hangin Khamtung hausate kim khat in ah khuapi te lai siam ah ut kei uh hi, zo lai sin ding ah ut kei hi.
Lusia gam uk te in India khua mihing sawl a Indiate in Kumpinu suam nang ah hansuah uh hi. Tua sawltak te in zuau lai tampi gelh a mihing khempeuh pia uh hi. Khat vei vei kumpi te in tua lai gelh te man a thong sungah khum hi. Ahih hang in mi zawng te tampi in lai ah sim uh hi.
Sente kih doh uh laitakin Pasian pai galkap mangpa khat in ah zo tawntung hi. Ah galte’n a lung ngai uh ciangin Pasian a bia manin ah zo thei, ci in a um mawk hi. Tua a hih ciangin a mau in amau galkap te Tapidaw suak nahding in Sang Mang te le Siate a cial zo hi.
LAI SIANGTHO TANGTHU
16
Samuaila(Samuel)
Tua lai tak in Itazilate in kumpipa a nei kei hi. khat vei vei uk pa suak a ah si dongin gam a uk hang in ama tapa a hih hang in ah beh te ahih hang-in gam uk pa a suak kei hi. Eili in Siampipa na ah sep lai takin Elkeina min nei pasal khat a om hi. Tua pasal a zi Hena in ta a nei thei kei hi. Kum sim in Pasian biak ding in Elkeina le a zi in biakna in vah pai a ni li bang ah tam hi. Khat vei Hena in Pasian mai ah thu a nget lai tak in ah sin sungah ah nget hangin a muk ah tang hi. Eili a muh ciang in, ‘Bang ding in zu hai na hi hiam,’ ci in a dot ciang in Hena in: ‘Topa zu kah dawn kei hi, kah dah mah mah a Pasian kiang ah hehpihna ka thum hi,’ ci in ah a gen hi. Eili in: ‘Nuam in ciah in. Itazila Pasian in nah deih na pia hen,’ ah ci hi.
Eili a gen mah bang in Hena a ciah ciang in tapa khat a suak a ah min Samuaila ah phuak hi. Tua nau pang in kum sagih bang ah phak ciang –in Hena in bawng tawh Pasian biak na in ah pai to a bawng a go khit ciang in Samuaila, Eili kiang ah nusia in. ‘Topa Pasian in kah thu ngetna ah ngai manin ka deih na hong hehpih manin ka tapa Pasian mai ah tawn tung nasem ding in kah nusia ding hi,’ ah ci hi.
Siampipa Eli ah tapa nih a gi lo hi. Mihingte in Pasian biak ding hong pai uh ciangin: ‘Sa hong pia in. Nong piak kei leh kong sut ding hi,’ ah ci hi. Eli in tua khial-na thu a thei hangin ah tapate dan tat nuam lo. Tua ahih ciang in Pasian in: ‘Nah tapa ah gi lo manin nah si khit ciang in na tu na ta khat bek keima na a seem kei ding hi, kah deih mi Siampipa kah kawih ding hi,’ ah ci hi.
Tua lai tak ah zan khat ah Samuaila ah ihmut khit ciang in Pasian in a sam hi. ‘Samuaila aw,’ ah ci hi. Samuaila tho a Eli kiang-ah pai in: ‘Nah hong sam hi,’ ah ci ciang in: ‘Kah sam kei hi, kah ta,’ ah ci kik hi. Samuaila a lup khit ciang in: ‘Samuaila aw,’ ci in aw khat ah za kik hi. Samuaila tho a Eli kiang va pai a ‘Pa aw, ka om hi,’ａ cih ciang in Eli in: ‘Ka ta aw kong sam kei hi,’ ah ci hi. Samuaila a lum kik hi. Pasian in: ‘Samuaila aw,’ a sap ciang in Samuaila tho a Eli kiang ah vah pai a: ‘Nah hong sam hi,’ a cih ciang in Pasian aw a hi, Eli a thei hi. ‘Kah ta lum kik in. Aw nah zah kik leh, Pasian, Kah om hi, nah gen ding hi,’ ah ci hi. Tua a hih ciang in Samuaila ah lup kik ciang in Pasian in masa bang in ah sam hi. Samuaila in: ‘Topa kah om hi,’ ah ci hi. Pasian in ‘Eli tapate a khialna kah mu zo hi. Amau te in ah pa ah nasepna ah ngah kei ding hi. Mi dang khat kah kawih ding hi,’ ah ci hi. Zing ciangin ah thawh khit ciang in Eli in Samuaila kiangah: ‘Pasian in bang thu hong hilh ah hi hiam,’ ci in a dot ciang in Samuaila ah gen kik hi. Eli in hih thu a theih ciangin: ‘Pasian thu hi ta hen,’ ah ci hi.
Tua lai takin Samuaila in Pasian kam sang pa ah piang zo ci in Itazila mihing kheempeuh thei a ama kiang ah thu khen ding pai a ama thu pha takpi ah ngai uh hi. Samuaila in Itazila mi kheempeuh ah uk hi. Tua lai tak in Itazilate leh Philitite kih do uh hi. Ni khat ah kih doh uh ciang in Itazilate in ah tai uh hi. Mihing 4,000 bang ah si hi. ‘Bang hang in Pasian in hong mu dah a hi hiam. Pasian sing kuang siangtho biakna in panin hong la ni,’ ah ci uh ciang in ah hong pua sak hi. Sing kuang siangtho a tun’ciang in Itazila galkapte in nakpi in kih kik uh hi. Philiti galkap te in kikona aw ah zak uh ciangin lau uh a: ‘Pasian in Itazila giakna ah tung zo hi. Tua Pasian in Eguthute-le mi dang te ah zo aw hi. Ahih hang in nakpi in doh ni,’ci in ah kih han suah uh hi. Zing sang ciang in ah kih doh kik ciang in Itazilate ah tai khin uh hi. Philitite in mihing 40,000 ah that uh hi. Pasian sing kuang siangtho zong man a Eli tapa nih a that hi. Ah tapa nih ah si, Eli ah theih ciangin puk a ah si hi.
Philiti mihingte in Pasian sing kuang siangtho ah mat khit ciang in Asdat khua pua a Deigon biakna sungah kawih uh hi. Ahih hang in zing sang ciang in ah a et ciang in Deigon mi lim kih puk a sing kuang siangtho maiah lum hi. Ah ding sak uh a a zing ciang in at et kik ciang in kih puk kik a, ah lu leh ah khut kih tan hi. Tua tham lo in Asdat khua-pite in meima tampi vei a gimna tampi a thuak uh hi. Tua ahih ciang in sing kuang siangtho Gata khua a kawih hi. A hih hang in Gata khua a tun ciangin tua khua pite in meima leh a dang gimna ah thuak uh hi. Gata te in sing kuang deih lo a Ekalon khua ah kawih nuam hi. Ekalon khuapite in: ‘Kah ut kei hi, Itazilate Pasian kah kihta uh hi. Kah khua hong kawih kei un,’ ah ci uh hi. Tua ahih ciang in Philiti kumpi ngate kih khawm uh a sing kuang siangtho Itazila gam khak kik ni, ci in ah kih vaihawm uh hi. Bawng nih leeng khat kai sak a tua leeng tungah Pasian sing kuang siangtho a kawih uh hi. Uk nei lo in bawngte in leeng lampi ah ah kai hi. Sing kuang tawh Philiti kumpite in kham tawh ki bawl mei ma le zusa nga a kawih hi. Bang ding hiam nah cih leh tua meima leh zusa kiangah gim na ah thuak uh hi. ‘Pasian kiang ah letsawng kah pia uh leh heh pihna ih ngah ding hi,’ a ci uh hi.
Bawngte in leeng ah kai lai tak in Philiti kumpite in Itazila gam gi dong in ah zui uh hi. Betsemit khua pite in lo lai ah buh a sih laitakin leeng mu uh a lung dam uh hi. Tha khat in bawng go a leeng tawh mei tu khit ciangin Pasian ah bia uh hi. A hih hangin tua khua mite in zakta lo in sing kuang sungah et mawk manin mihing 40,000a si hi. Tua ahih ciang in a mau te in sing kuang siangtho deih lo in Kiliat Zilam-te sam a: ‘sing kuang siangtho vah lak sak un,’ a ci uh hi. Kiliat Zilam khua pi te in sing kuang vah la amau khua kum 20 ah kawih hi. Amau khua pasal khat Siampipa ah kawih hi. Sing kuang siangtho in Philitite khua kha sagih ah om hi.
A kih belap ding hi.
Thu Man Ngawl Thu Hilte
Mate Lai siangtho a lian 7 ano 15 sungah Zeisu in: ‘A chin sunga ngia bang hang in tu mul puan a sil thu hil ngai lo nomate kunga hong paite na kih dawm ta vun,’a ci hi. Tua bangma in kum 1914 lai takin Pau Cin Hau le Hendam ina: ‘Pachian taw mang sunga ka vaihawm khawm thei hi,’ ci ina Sizang, Sukte leh Kamhau mihing duai lian duai-no theempo pawl khat in a zui hi. Tua zawk ciang in kipan Heilei khua-a Hauzahen in kum thum tawntung Ngun lam duaite mana ze-et na a natna a hi hi. Tua in duai lawm a nei hi. Tua in: ‘Pachian taw ka ki mu thei hi,’ ci in aisan a vak kawi kawi a kuama dang in a om zo nawn ngawl a hi hangin Tamdiang khua mihing pawl khat te leh Dal luang khua-a mi in nihte hong kheem zo lai na a hi hang in tua te in a um lai hi. Tua te a bang ci theem a hi ziam i ci le: ‘Note in duai na bia nawn heek vun. Khua na bawl heek vun. Tapidawte tatna le kam sonna bang na zui vun. Tui hi le zu na neek hangin Tha Chiangtho na nga zaw ding hi hi,’ a ci hi.
Tua mite in Hauzahen in Mang Tung Nung pa ci hi. ‘Tapidaw Tha ciangtho bang hun ciang ka ngah tu ziam, kote in Thaciangtho ka nga ciang in lei tunga ka nei sa teng taw vantung a ka pai thei tu ziam,’ a dot ciang in: ‘Zeisu hong pai tu hi. Tua ni ciang in note van leh lei kala a hong zam to tu a tua santaka nuntak ching kung khat hong pia tu hi. Tua ching sim lo a dang nuntak na a om ngawl tu hi. Tua ching in a kha a thum a al a namtui a hi tu hi. Nat na theempo a dam tu hi. Ta sia a hi kom ina na neisa a hi le dangka sim lo in na pua thei ngawl tu hi. Dangka a hi le a tampi na pai pih thei tu hi. Atu hong nai zo hangina lo tampi na tho natu na ngaisun heek vun, a ci hang in lo tawm a tho a an a hau ngawl hangin a puk chi dektak a kum 1924 kum in khua danga an tampi a lei hi.
Kum 1923 kum in Ban Kang Pa Lophei khua a hong theng tu hi, a ci hi. Tua ni in Lophei te in Phaza buk a ki ci na mun zu taw, sa taw muak in a om pi hangin kaupe khat a mu bek hi. Tua kaupe zu pia hangin a ne thei a hi ngawl hi. Hauzahen pawl te in ei Tapidaw laka hong pai ciang in: ‘Lawmte aw note bang a Pachian thu zui tak tak ka hi hi,’ ci in a hong zol thei hi.
Kum 1923 kum ciang in Hauzahen duai lawmte in a khuapite Damkam ki ci pasal khat a sam leu leu a pasal hisia min Lam Tung Nung a phuak hi. Ama in: ‘Hauzahen bang in Pachian ta ka ki mu thei hi. Note in nong up ngawl le Pachian uital ka sam tu hi. Uital na mu le uh ten a lau tu ziam,’ a ci hi. A lawm ten: ‘Honglak in, ka lau ngawl tu hi,’ a ci ciangin lo buk mun khat a paipi a a lawmte buk sunga om sak in a ma buk tual a ding in thu ngen a Pachian ui asap ciangin humpi nel kai khat akiangah pai in a ham ciangin a lawmte a lau ma ma hi. Tua zawk ciangin: ‘Pachian hong lak in,’ a ci kik hi. Pachian ka sam tu hi. Vana na en vun, a ci ciangin van kim laia mei kuang taw ki bang sai pum cia a lian khat a lu le a taw sum a lain gen khat a mu hi. A mu zawk ciang in a mang kik hi. A zawk ciang a lawmte kunga: ‘Kei ma in van tung tha sum tul le za ngaa hong pia pa in hi pa a hi hi’ a ci hi. Atu pasal hisia pawl a nei ngawl lai. A hi hangin pawl a nga natu in hong ngaisun hi.
Ta sia a hi kom ina Zeisu a vaithakna kam mal pawl cing natu hi mite hong piang eite I thei zo bang in hi mite in atu sangin lam dang tampi a hong piang sak lai tu hi. Ke’n a man tak pi ka ci in a hi mite in Topa nei lo mi hi, ka ci hi. Ta sia a hi kom ina u le naute aw, to nei lo mite thu a kho thei ngawl hi. Hui in leitunga to nei ngawl a hi manin a kho zo ngawl hi. Mei vak nei pa in sabuai tunga a vak ciangin hui sim ngawl a dangte in a mit sak thei ngawl hi. Hui hong va ciangin hui vakna lam sang khak a hui tum zo ngawl hangin mei vak a kuang tawntung hi. A hi hang in hui in mal nei ngawl a hi kom in haksapi a kong khak kei le kong khak khawm a hui lut un a mei vak a mut thei hi.Ta sia a hi kom ina u le naute aw, hui in a kho ngawl hang in meivak a mit sak thei hi. Tatna na kho ngawl in thu lal sak hi. Na lung ngai vun.
Thang Ngin.
KHAM THU
Leitung mihing khempeuh te in kham ah deih pen hi. Bang ding hiam ih cih leh kham tawh sum a tam bik kih lei thei hi. Tua longal kham et nang ah pha mah mah. Acil pan in tu dong in kih zem nah ding in sum vot nah ding in kham kih zang zo hi. Bang ding hiam ih cih leh kham a tawm bek ah om hi. Kham in sik leh suang mei hol bang in tam ah om leh tampi deih lo ding hi. Tang lai ah Eguthu leh Itazhilate in kham a nei hi. Kham ah hak lo manin bawl nah ding ah haksa kei hi. Tua a hih ciangin kih zemna tampi kih bawl thei hi.
Ahih hang in kham tak tak ah nip lua hi. Tua a hih ciangin ngun tawh a hih hangin dak tawh a hih hangin ah hel hi. Dak tawh kih hel leh ah sen zaw a suak hi. Ngun tawh kih hel leh ah ngo zaw hi. Kham dangka a hi leh se sawm suah se kua in kham hi, se khat in dak hi. India mi leh sen mite in dak kham a deih zaw hi.
India numei te in nak sungah, bil sungah kham tampi a kawih thei hi. Khut zung bu zong kham in ah bawl hi. Tu laitak in India mihingte in kum sim in kham kih bawl na se li suah se khat ah lei uh hi. Mang kang te in kham in khut zung bu bawl a suang manpha kawih na zong ah bawl hi. Kumpite an neek na kuang in khawm ah hi thei hi.
Kham in lung mei hol le sik bang in mun khat ah tampi ah om kei. Leitung gam khempeuh ah tawm cik ah om thei hi. Ahih hang in tang no cik in kih mu thei hi. Gam khempeuh ah om hang in Apilika gam, Awsteilia gam le Amelika gam sung tam pen kih ngah lai hi.
Mihingte in kham ah mu mawk hi. Lei tung ih et ciang in ah sungah kham ah om kuamah ah thei zo kei hi. Amelika khua sung kham a mu cil in hi bangin ah mu hi. Mihing khat in ah in ah lam lai takin khuam ah phut hi. Lei ah teh ciangin kham ah mu hi. Ah khuapi te ah theih uh ciang in ah na sep na nusia a lei sung ah kham ah zong hi. Khua dangte in zong hong pai a tu dong mahtengin kham ah ngah thei hi. Ahih hangin mi khempeuhte in kham ah mu thei kei. Mi kim khat in sum tampi ah ngah hi, mi kim khat in bangmah ah ngah kei hi. Keimah kah no laitak in ah khua dam mah mah khua Alaska khua kham kih mu hi. Mi tampite in a neisa teng zuak a tua gam ah pai uh hi. Mi tampi te in khua dam in ah si hi. Mi tampite in kham tampi ah ngah hi.
A cil pan in kham zongte in ngun leh tuival sehnel sung a ah ngah hi. Tuan gun leh tuivalte in mual tung pan in kham tang no ah pai hi. Kham in a gik hang in ah kia a sehnel in kih vui hi. Tu in sum neite in mualtung pan in kham a la hi.
Acil in hih bang in kham a ngah hi. Kuang beem sungah sehnel leh tui ah kawih hi. Tuah ciangin tua kuangah vai hi. Tui leh sehnel dam dam in kuang sung pan ah kia hi. Kham a gik manin kuang sung tang lam ah kia hi. Tui leh sehnel ah bei ciangin kham ah la thei hi. Kuang khat ah bawl khit ciangin ah bawl kik leu leu hi. Khat vei vei tui leh sehnel a bei ciangin kham tang no ah om hi, khat vei vei ah om kei hi. Hih bang bawl na damdam bawl na ah hi hang in kham zongte in sum tampi ah sam kei hi.
Sum haute in ngeina dang ah zong hi. Khat vei sehnel leh tui, puan tungah napkin ah luangsak hi. Kham a gik manin puan tawh kih man thei hi. Khat vei vei puan kih sil a kham ah la thei hi. Ngei na dang a hih leh lei tampi to a tui tawh tui dot kiak sa sungah ah luang sak hi. Lei ah gik la man in a luang pai thei hi. A hih hang in kham a gik manin sing kiak sung ah kia a mihingte in ah la thei hi.
Ahih hang in kham tang a no pen la nang ah haksa thei hi. Tua a hih ciangin lak nahding khat ah nei hi. A tui ngun tawh kih bang mercury ah om hi. Tua mercury in kham tawh kih man thei hangin lei tawh kih man lo hi. Tua a hih ciangin hih mercury lei lakah luang sak hi. Kham tawh kih si ciangin kih man hi. Anung ciang in mercury ah la kik ciang in kham zong ah ngah hi.
Ni dang lai inah Izauadi Ngun sungah Mang kang te in kham ah ngah hi. Tui sung pan in sehnel enzin tawh to a atungah kih gelh bangin kham ah la hi.
Leitungah kham sangin sum a man ham zaw ah om hi. A hih hangin atawntung dangka bawl dingin kham ah kih zang ding hi.
Sang Mang Pa.
Laibu Saal /Zomi eLibrary
www.zomielibrary.com
