TEDIM THU KIH ZAK NA LAI
DISEMBA KHA 1926
The Tiddim Chin Hills News
Bu 7 Nambat 12 |
A SUNG A OM THU TE
Tedim thu kih zak na lai
Sang mang pa khualzin na thu
Nipi ni thu hilh na lai
TEDIM THU KIZAKNA LAI
A kipian na kum 1919
Kha simin Khalkha khua-a kibawl hi.
Lai bawl pa-------------------Sang Mang pa.
Sum Sangte----------------------------Thuam Hang, Dam Khup.
Kum Khat a man hamu a hi hi.
Khalkha Khua Disemba kha ni 1,1926.
Mun Dang Dang Pan a Kizakna Thu
Izuap khua ni suah na lam panin kidona thu kiza hi. Asawt in Lusia gamah kidona thu ki zak hangin tu-in khua dang pan a hi hi. Tu kum Galik khua mi kim khatte in a mau kumpipa hawl khia a, mi dang a kawih hi. Tu-in tua pa zong a hawl khia leu leu a, mi dang a kawih kik zel hi. A gam uk kua a hi hiam mi zawngte in a thei in ka um kei hi. Poland khua-a zong kidoh thu kiza hi. Poland gamah mi a zawng mah mah hangin mi kim khat in a gam in gam lian suak a deih ahih ciangin lung khoh kumpipa a deih hi. Tua ahih ciangin tua mihingte in kumpipa hawl khia a, mi dang a kawih hi.
Engalan gamah suang meiholh naseemte in na a seem nai kei hi. Tu ma kha ngaa bang tuate in a na sep a tawp hi ci-in na thei khin hi. Tu-in a tote in: ‘Na na seem kik le uh cin na kha sum ka khiam kei ding hangin ni simin nai lang khat na seem zaw ding hi,’ a ci uh hangin naseemte in a ut kei hi. Amau sum bei a, khua dang panin hehpihna a ngen uh hi.
Leitung mihingte in tam veipi a nawp khit uh ciangin kum 1915 kumin mipa khat in sak lam pol kici leitung a sak lam tung peena tung hi. Khua dam mah mah a hih maninah a haksa mah mah a, tua pa in gimna tampi a thuak hi. Tu kum mihing nih in van leeng in tua pol a tung hi. A khe in a pai ciangin kum khat ciangin a tung hi. Van leeng in a pai ciangin nai guk ciangin a tung uh hi.
Izuap khua-ah, Belzim kici gam neu khat a om hi. Izuap gam khempeuh mah bangin, tua Belzim gamah an haksa a, mi zawngte a gim mah mah hi. Tua ahih ciangin a sapna an bek a ne uh hi. Puan hawih leh motaka zong a zang kei hi. Kumpipa in zong a mi zawngte bangin an hawih lo bek a ne hi. Motaka thum a nei hangin khat vei bek a tuang kei hi. Tua kumpipa a pha mah mah a khuapihte in a zakta mah mah hi.
Amelika gam khua khatah mi zawng Tapidawte in Nipi ni a tui aak tui, Pasian a pia hi.
Sente gam panin thu dang kiza kei hi. Gam uk tampi a om hangin mi lian khat bek a om kei hi. Kua thu a ngai ding hiam, kua kiangah phiangsia a pia ding hiam, mi zawngte in a thei kei hi. Gal kaap pawl peuh a khuazin ciangin an khat bek a pua/keng hi, a tun’na khuapihte kiangah a sut hi.
Amelika gamah laibu bangza om hiam kithei zo kei hi. Ahih hangin sang inna om laibu bek 33,000,000 pha hi. Sang inn khatah laibu 1,000,000 a om hi.
Kum 1925 kumin Amelika gamah mihing 20,000 bang motaka in a si sak hi. Motaka a hawl siam lohte in mihingte a that mawk thei hi.
Lusia mihingte in Tapidaw tak tak hi lo hi. Zeisu bek bia loin milim zong a bia uh hi. Mang kaang te kido ma-in mi kheempeuh te in a kumpipa thu piak bangin a bia uh hi. Ahih hangin tu-in a ut bangin a bia thei hi. Ni kum 190, 000 bang tui sung kipum a Tapidaw a suah uh hi.
Amelika khua-ah tui sung kipum pawlah 8,000,000 a om hi. Tuate in pawlpi 60,000 ah om hi.
SANG MANGPA KHUALZINNA THU
London khua-ah inn lam dang tampi a om hi. Kumpipa inn a gol mah mah hi. Ka et ciangin khua khat bang ka sa hi. Tua inn sungah kumpipa in a zi leh ta nih tawh a teeng khawm hi. Dei bangza om hiam ka thei kei hi. Tua inn khat bek nei loin khua dang dangah inn libang a nei hi. Kumpipa a kha sum in dangka 200,000 bang a pha hangin mi zawng tawh kibang hi. Bang hang hiam ci leh zindona leh naseem kha sum piakna tampi om a hih ciangin a kha sum in manlang in a bei thei hi.
Kumpipa thak a suak ciangin Pasian biakna inn panin a kisuah hi. Pasian thu hilh sia a lian peen in kumpipa lu tungah kham lukhu a khuh sak ciangin kumpi za a ngah hi. Tua za a ngah lai takin tokhom lam danga tu hi. Tua tokhom in kumpipa tokhom bang hi lo hi, et nawp huai lo hi. Ahih hangin khang khat sungah khat vei beek a kizang hi. Tua tokhom nuaiah suang mawk khat a om hi. Zeisu a pian ma in Zakoh kici Itazilate pu khat a om hi. Tua Zakoh in a u Etaw a kheem khit ciangin lau a a tai hi. Gam lakah zan khat a giak lai tak in a lukhamin suang khat a kawih hi. Tua suang in kumpipa tokhom nuai om a ci mawk hi. Tua suang tak tak hi lo hangin ih pute in pate in a om ci in a um ahih ciangin Engaland kumpipa khempeuh te in tua suang tungah kumpipa za a ngah hi.
Inn lam dang khat a om lai hi. Tua inn, Museum kici hi. Leitung khua khempeuh pan sunga kawih hi. Sen gam pan India gam pan, Apilika gam pan, Amelika gam pan a kipan khua khempeuhah nate leh hiamte a om hi. Tu khangte bek hi lo, tang lai mihingte nate leh hiamte a om hi. Mang Kangte in Izipt gam lah Babalun gamah lei to a, tang lai mihingte nate leh sumte tampi mu, ci in Thu Kizakna Lai sungah khat vei vein a sim hi. Tua a mu kim khat tua Museum inn sumngah ka mu hi. A et nawp huai mah mah hi. No khamtung nate ka mu lo hang in no tawh kibang mi dangte nate ka mu hi. Tem, khau zial na, nam sau, thau, puan, hei pan a kipan khamtung hiam tampi ka mu hi. Tua inn sunga om teng kha khat ciangin kimu zo lo hi. Sang naupang aading a hawih mah mah hi. Lai sung pan bek mi pawl dangte ngeina sim lo in tua inn sungah tua mihingte a bawl na khempeuh a mu thei hi. Tang thu a sim ciangin tang lai mihingte hihna a mu thei hi.
London khua ni li ka om khit uh ciangin teembaw tungah tuang kikin Amelika khua ah ka tung hi. Tua teembaw a gol mah mah a, pi 900 bang a sau hi, Lam khatah pi 5 bek om na ngaihsut ciangin tua teembaw in bangza vei a lian hiam na ciamteh thei hi. Hih teembaw sangin a gol zaw teembaw li bek a om hi. A gol ahih maninah ih tuang lai takin leitunga a om bangin ih om hi.
A nasem 1,000 bang a pha hi. A tuang thei khempeuh 4,000 bang a pha hi. Sizang mi khempeuh 3,000 bek pha ahih maninah a khempeuh te in tua teembaw a tuang thei hi.
A tuangte pawl thum hi. Sum hau peente in omna nambat khata om hi. Tua omna a hawih mah mah hi. Leitung inn hawih peen sangin a hawih zaw hi. Mihing 1,000 bang tua omna a ki om thei hi. Omna nambat nih teembaw tawh lam om a, nambat khat omna bang in a hawih lo hangin a omte in gimna a ngah kei hi. Mihing 700 bang a om hi. A taw lam a om ahih ciangin tua omna a ling tawntung hi. Bang hang hiam ci leh a nuaiah enzin leh pei golpi te om a, tua pei a kihei ciangin a ling mah mah hi. Khat vei vei lai sim ding a haksa hi. Omna thumah mi zawng peen a om hi. Tua omna a tuang te bangza pha hiam ka thei kei hi. Tua mihingte in Amelika khua sum talaw zong dingin a pai hi.
Teembaw a sang mah mah hi. Tui sungah pi 35 bang a om a, tui tungah tua sang a sang zaw hi. Mihing omna tuap 8 a pha hi. Tua nuai ah van kawih na tuap dang a om lai hi. Komau omna in tui nuaiah dek tak a om hangin a nuaiah tuap thum a om lai hi. Ka lupna dei ah khuavak a lut zo kei hi. Sun leh zan khuaphelep mei ka vak sak hi. Khua etna zong om lo ahih ciaing huih siangtho sik zawl sung panin kingah hi. Ahih hangin ka an neek na mun leh ka tona mun a hi leh, a tung peen tuapa om a, a hawih mah mah hi.
Tua teembaw ah ni sim in thu kizakna lai bawl a, leitung mihingte hihna thu ka sim thei hi. Bang ci in hih thu a zak thei hiam ci leh sik khau om lo sik khau lai kikhak thei hi. Tua ahih ciangin khua khempeuh panin a babu in thu zasak a lai bawl pawl in thu kizakna lai a bawl sak hi. Tua ahih ciang in leitung om mah bang a hi hi.
Lai ip tampi ki pua hi. Engaland khua pan Piancit khua a tung masa hi. Tua khua ah kisim zo lo lai ip a la hi. Nai li bang kulite in tua lai ip a puato hi. Piancit khua pan Itali khua pan, Sapein khua pan, Galik khua pan lai kikhak hi. Tua lai ip Amelika khua a pua hi. Tua Amelika khua ka tun ciangin mihingte a kum ma-in tua lai ip khempeuh lakha a, manlangin a kipiak sa mihingte in a ngah uh hi. Eite in sik khau lai ka khak nuam leh ka khak thei hi.
Tua teembaw a manlangin a pai hi. Kawlgam leh Engaland gam kikalah nai khat in tai 12 bek teembaw a pai hi. Engaland khua leh Amelika khua kikalah nai khat tai 50 bang teembaw a pai hi. Ni gunk khit ciangin Amelika khua ka tung hi. Teembaw ah ka tuang lai takin nipi khat a tung hi. Mi khempeuh kikhawm uh a, la sa a thu ka ngen uh hangin Pasian thu hong hilh kei hi.
Amelika gamah New York (Nu Zawk) khua ka tung masa hi. Tua khua in London khua kizom khua tam peen khua ahi hi. Mihing 4,000,000 bang pha hi. Tua khua ah kum khat sungah a tung teembawte in khua dang khat peuhah tung teembaw sangin a tam zaw hi. A tun na mun za lo ahih ciangin teembaw neu giat bang komau teembaw lu lam le taw lama sawm a dam damin a hei sak hi.
Ka kum ciangin ka van khempeuh ka kawm masa hi. Tua ciangin kumpipa naseempa khat in a en hi. Bang hang a en hiam ci leh kham ngun, nai a kipan sum man pha ka pua leh sum ka liu hi. Mi gilote in tua sum a lut sak sim hi. Tua ahih ciangin kumpi naseemte in a en hi. Kote in kawlte in a bawl ngun kizimna tawm bek ka pua ahih maninah dangka 12 bek ka liu hi. Ka kuang leh ka van khempeuh ka phel khit ciangin ka khak kik hi.
Ka ta, ka nu leh tuno a pate in hong dawn uh hi. Ka ta a lian mah mah hi. No a kim khat in tua ta Tedim khua pan na mu hi, a min Basta hi. Tu in keimah sang a sang zaw hi. A mel ken ka thei kei hi. Ka nu in zato mangpa hi a naseppna tampi a nei hi.
New York panin ka omna khua in tai 100 bek gamla a nai nih ciangin ka tung uh hi. Tua meileng a gol mah mah a manlangin a pai thei hi. Kawl gam mei leng sang in nih vei a gol zaw hi.
Ka khua ka tun ciangin lam dang ka sa hi. Ka neu lai takin ka pa inn kiimah inn tawm bek om a gampalak zapi a om hi. Tuin inn leh lam vive a om hi. Ka tate kimawlnah ding mun a nei kei hi. Kum sawm khamtungah ka om lai takin inn tul tampi kilam hi. Tua inn a tengte kawi pan a tung hiam ka thei kei hi. Khuapihte a khang mah mah hi. Sumbuuk zong a khang a, a hawih zaw hi. Khamtung ah ka om lai takin ka pa a si hi. Ka nu a pian zawh kum 79 pha hangin nipi ni simin sang inna pai in numeite thu a hilh zel hi.
Zan khat bek ka om khit ciangin Tapidaw sivuaizi-ah ka pai hi. Mang Kang khua ah Zulai leh Awgu kha ah nasepna tampi om lo a, naseemte in ni 7 ahih hangin, ni 14 ahih hangin, kha 1 ahih hangin kuan la a mi kim khat khual a zin hi, kim khat a innah om khawl hi, kim khat lai Siangtho sim dingin kikhawm uh hi. A khak peen mihingte tawh kei zong Lai Siangtho ni 14 ciangin ka om hi. Mihing 1,000 val a om hi. Thu hilh sia tampi leh sia nu tampi a om hi. Lai Siangtho hilh te a siam mah mah hi.
Ni simin nai 9 ciangin pasal siate kikhawm a, sia khat in Zeisu a khang lai lawki biana ngeina thu hong hilh hi. Nai 10 ciangin sia dang in Pasian Ki-itna thu hong hilh hi. Nai 11 ciangin mi khempeuh te in kikhawpna inn lianah kikhawm uh a, sia khat in thu dang dang hong hilh hi. Nai 12 leh ni tak nai 7 kikalah ka kikhawm kei hi, Mi kim khat gampa laka vak hi, kim khat in kimawl hi, kim khat in lai a sim hi. Kei a hi leh Zo lai ka gelh kei leh lai tawm ka sim hi.
Ni tak nai 7 ciangin inn pua ka kikhawm a lopa tungah ka tu hi. Tua lai tak in na tuam a seem mihingte in ama nasepna thu hong hilh hi. India sang mang nih Apilika sang mang khat Sen sang mangnu khat leh a dang Pasian thu hilh te in amau nasep na thu hong zasak uh hi. A nung ciang in nai 8 ciangin in kikhawm na innah kikhawm kik uh a, sia siam peen in Pasian thu hong hilh hi. Pasian thu ka za nuam mah mah a ka lungdam hi. A hih hangin tua sang in mi siangthote tawh kiho a thei ahih ciangin ka lung a dam zaw hi. Ka lungsim a khoh zaw in ka um hi. Khamtung sivuaizi bangin an kingah kei hi. An leh lupna mun dangka 150 bang ka liu hi.
Tu in Tonu a pa innah ka tung hi. Hih inn a hawih hi. Ko a vekpi in 6 ka pha uh hi. Ni sim in nai 5 bang in Zo lai ka gelh ahih ciangin ka om mawk kei hi. Tu kum in kum lam dang a hi hi. Angeina bang a hi leh zulai leh Awgu kha ah guah tawm bek zu a ni a samah mah hi. Tu kum a hi leh ni simin guah zu a ni a tang kei hi. Khualzinte a gim mah mah in, ka um hi. Tu lai tak sang inn kikhak hi. Ni 14 zawh a hon kik ding hi.
Tembaw thu khat ka mangngilh hi. Ni khat in ko a kim khat in a nuai peeng mun enzin omna ah ka tum suk a, ka en hi. Lam dang ka sa hi. Tua omna in tui nuaiah om a khua lum mah mah hi. Tua mun a naseemte in nai 4 a sep zawh nai 4 ciangin a khawl hi. Mun khatah niteptehna tawh kibang 70 bang ka mu hi. Tua ni teptehna ah nambat tampi leh khut zong a om hi. Tuate a bang ding a om hiam ci leh enzin ukpa in hihte a et ciangin enzin thu khempeuh a thei hi. Tua niteptehna leh enzin mun khempeuhah sik zawl om a tua sik zawl lai tai tawh kibang hi. Na khat peuh pha lo a hi leh, sik zawl lamah thu kikhak a, niteptehna mai tangah kilang hi. Tua ciangin enzin uk pa in a bawl sak thei hi.
Tua enzin kihei sak na in suang meihol hih lo hi, nam gim tui kizang hi. A man ham lua hi lo ahi hiam na dong thei hi. A kivan nah ding nam gim tui hi lo hi, a man a ol zaw pawl a hi hi. Tua nam gim tui kangna mun a khua lum mah mah a, tampi ka khua ul thei hi. Engin taktak in sik kuang suang a om ahih ciangin ko ka mu zo kei hi.
Sang Mang Pa
NIPI NI THU HILH NA LAI
Disemba kha ni 12 ni
Naupang Siamuaila Thu
1 Dahnah Tangthu 3
3 naupang Siamuaila in Elisia kiang panin Pasian na a seem hi. Tua lai tak in Pasian a kam a mik a tawm hi, a kilang a lam dang bangma om kei hi. 2. Khat vei Eli in a lupna a lum a, a mit mial a, a mu lo lai takin 3. Pasian sing kuang siangtho omna Pasian biakna innpi ah meivak a mit ma in Siamuaila zong a lup lai takin 4 Pasian in Siamuaila a sam hi. Siamuaila in: Topa kei ka om hi, ci in a dawng a, Eli kianga tai a: 5 Topa nong sam a, kong pai hi, a ci leh Eli in: Ken kong sam kei hi. Lum ta in, a ci bang ma in Siamuaila pai in a lum kik hi. Khat vei Pasian in: Siamuaila aw, ci in a sam kik leh, Siamuaila in tho a Eli kianga pai in: Topa nong sam a, kei hong pai hi, a ci leh Eli in: Ken hongsam kei hi ka ta aw. Lum in a ci hi. 7. Siamuaila in Pasian a thei nai kei hi, mangmuna a ngah nai kei hi. 8. Thum vei dong ah Pasian in: Siamuaila aw, ci in a sam a Siamuaila tho a Eli kianga pai a: Nong sam ahih ciangin kei kong pai hi, a ci leh Pasian in tua naupang a sam a hih na thu Eli in a zeh theih ciangin: 9 Pai in la lum in. Tu nung ciangin khat vei hongsam kik leh Pasian aw thu hong pia ta in. Na sila pa in ka za zo ta hi, ci-aa Siamuaila a thu khak bang ma in Siamuaila pai a, ama omna ah a lum hi.
10. Pasian in a masa bang ma in hong ding kik a: Siamuaila aw, Siamuaila aw ci in a sam leh Siamuaila in: Aw Topa Pasian thu hong pia ta in. Na sila pa in kaza hi, a ci hi. 15. Siamauaila in zing sang dongah a ihmu khit ciangin Paian inn khak a hong hi. Tua a na mute inn Eli kiangah a gen ngam kei hi. 17. Eli in zong: Kawi bang thu hong pia hiam kei kiangah 1ongi m kei in, a ci leh 18. Simuaila in khat zong im loin a gen kik hi. Eli in: Pasian a deih bang in hi ta hen, ci in a mang hi.
Khiatna Thu
Itazilate thu khen mang a khak peen pa in Siamuaila a hi hi. Tua pa in lian peen zong a hi hi. A kipian lai takin Itazilate a gim mah mah hi. Gidon leh a dang thu khente in khat veivei a galte a zo thei hangin Piliti kici gal a lian peen kuamah in a zo zo kei hi, Pilite in Itazila gamah pai in khua a sim ngeite uh hi. Itazila siampte te zong gi lo a, Pasian biak na ding a haksa hi. Tua lai takin numei khat in nakpi thu a nget ciang in tapa nei atua tapa Pasian nasep dingin a pia hi. A min Siamuaila kici hi.
V 1. Tua lai takin Lai Siangtho om lo a, Kam sangte in Pasian thu a hilh hi. Tua Kam sang tawm bek a om hi.
V 2. Eli in siampi uk pa hi a, a tek zo a a si dek tak hi. Siamuaila in tua pa a huh hi.
V 3. Khua a mial ciangin mei inn de a aaka kuan dongin a van hi.
V 7. Siamuaila a pian zawh kum 12 bek ahih maninah Pasian thu a tel takpi a siam kei hi.
V15. Pasian in Samuaila kiangah a genna in, Eli suan ka bei sak ding hi, Siampi dang ka kawih ding hi, a ci hi. Eli tapa a gi lo hangin a pa in a nial ngam kei hi.
V 18. Pasian in dan a piak ciang in Eli in bangmah thu a nial zo kei hi.
Khatvei Pasian in ih lungsim sungah thu hong pia hi. Hih thu ih zak ciangin ih ngai ding hiam.
Zeisu Suahna Thu
Disemba Kha ni 19 ni
Luke 2
8 Tua gamah tuu cingte un gampa laka giak uh a, amau tuu honte zanah a cing uh hi. 9. Topa vantung mihing khat in amaute kiangah ding a, a kiimkotah khat in amaute kiangah ding a, a kiimkotah Pasian vang a tang a, amaute a kihta mah mah hi. 10 Ahih hangin vantung mi in: Kihta kei un. Mihing khempeuh aading nakpi nuamna thu ken no kiangah kong za sak hi. 11. Tu ni in Davuih khua ah Topa Khazih a hi, hong gum pa in note aading a suak hi. 12. Note in a bang limin thei ding na hi uh hiam, na ci uh leh nau ngek in puan in kituna, bong an neekna kuang sung kisial a, a om na mu ding uh hi, a ci khit ciangin 13 tua vantung mi tawh vantung galkap tampite in thahkhatin a om uh a:
14 Van a sang belna Pasian min thang ta hen, Leitung a deih mite tungah nawpna om ta hen, ci in Pasian min a phat uh hi.
15 Vantung mihingte in vantung a ciah khit uh ciangin tuu cingte in: Eite Betlen khua ah pai ni. Pasian hong lak hih a piang sa thu va en hi ci in khat leh khat a kihohpih uh ciangin 16 a pai meeng meeng uh a Mali leh Zawta ahih hangin bong an nekna kuang sungah kisial a, a om nau ngek a mu uh hi. 17. A mu khit uh ciangin amau a tungah kici sa tua nau ngek a thu teng a za sak uh hi. 18. Tuu cingte thu genna a zakte khempeuh in lam dang a sa uh hi. 19 Mali a hi leh tua thu khempeuh ciamteh a a lung sungah a lungngai hi. 20. Tuu cingte in amau kianga gensamah bangin a za a musa khempuh hangah Pasian min phat lasa in a ciah hi.
Khiatna Thu
Topa Zeisu in Disemba kha ni 25 ni in a suah hi. Tua ahih ciangin tu ni tua a hingna thu ih sim ding hi. Kum khat sungah nipi tampi a om hangin tu kha ni 25 ni sangin a lian zaw ni khat beek a om kei hi. Khamtungte Kawlte, Sente, Indiate, Apilikate, Mang Kangte leitung Tapidaw teng in tua ni in naseem loin lung damin a om hi.
V 8. Tuu cingte in a tuute khua sungah a ciahpih kei hi. Tua gam ah khua tampi dam lo ahih ciangin gampa lakah a giak thei hi.
V 10. Tua lung damna thu, mi khempeuh aading a hi hi. Mi nam khat bang nih bang aading vantung mihing in thu hong pia kei hi, mi khempeuh aading a hi hi.
V 11. Davuih khua, Itazila kimpipa a lian peen Davuih in Betlen khua pan a kipiang hi. Hong gum pa: Leitung mihingte lam etna, gimna dawi mangpa tung pan in hong gum dingin Zeisu in a suah hi.
V 12. Zeisu nu leh a Pa khua in Nazazet khua hi. Ahih hangin kumpipa in mi khempeuh sim dingin a pute a pate khua a khawm hi. Zawta keh Mazi te in a pute a pate khua Betlen khua a tun ciangun talap innah om an a om lo maninah bong inna giak hi. Tua a giak uh lai takin Mazi in ta a suah hi.
V 16. Zawta leh Mazi in Zeisu a pa a a nu a hi hi.
V 19. Mazih a pha mah mah hi. A kipha sak kei hi, a lung niam numei hi a, Pasian thu piak bang in nial loin a hih hi.
Zeisu hong pai ahih ciangin gupna lung daman muan na lawpna a om hi. Ih lung dam hangin a kilawm hi.
Disemba Kha ni 26 ni
Siamuaila Thu Khenna Thu
1 Dahna Tang Thu 7
3 Siamuaila in Itazilate kiangah a thu piakna in: Na lungsim khempuh tawh Pasian kiangah kihei na hi uh leh, mi pawl dang pasiante leh Asila milim na bawl khia un la, Pasian thu lungngai in ama na na seem ding hi. Tua na hih uh leh Pailite khut sung panin Pasian in no hong gum khia ding hi, a ci hi, 4. Tua ciangin Itazila mihingte in Bala leh Aila milim hawl khia in Pasian bek a bia uh hi.
5 Siamuaila in: Itazila mihing khempeuh Mizpah khua ah kikawm ta un la, nomau aading thu ka ngen sak ding hi, a cih ciangin a kikhawm uh hi. 6. Tuah ciangin amaute in tui tawi a Pasian maia bua uh a tua ni in an a tang uh hi. Pasian maiah ka khial uh hi, a ci hi. Siamuaila in tua Mizpah khua ah Itazila mihingte thu a khen sak hi. 7. Itazila mihingte in Mizpah khua a kikhawm ci in Piliti mihingte in a thei ciangun amau gal kap mangte in a do dingin a pai to uh hi. Itazilate in hih thu a theih uh ciagin Pilitete a kihta uh a 8 Siamuaila kiangah Pilite mihing te khut panin Pasian in hong suakta sak dingin ama kiangah thu ngen tawp kei in, ci in a thum uh hi.
10. Siamuaila in biakna sa a go lai takin Pilitete in Itazilate a nai uh hi. Ahih hangin tua ni in Pasian in Pilitite tungah van nakpi ging sak a a lau sak ahih ciangin Itazilate maiah lel uh hi. 11 Itazila mihingte in Mizpah khua pan pai khia in Betlen khua dongin Pilitite del uh a, a sat lum uh hi. 13. Tua ciangin Siamuaila in suang khat la a, Mizpah khua leh Sen khua kikal phut a: Tu dongin Pasian in hong huh hi, ci in Ebeneza min a phuak hi. 15. A si dongin Siamuaila in Itazilate a thu a khen sak hi.
Khiatna Thu
Siamuaila a neu lai takin Itazilate in Pilitite tawh do a, a lel uh ahih maninah amau sila a kai uh hi. Tua ahih ciangin Pilitite leh a dang mite dawi a bia uh hih. Pasian heh a, a hehpih kei hi. Ahih hang in a sawt zawh ciangin Pasian thu a lungngai kik hi.
V 3. Asila in dawi milim hi a, an a po sak, a ci hi.
V 7. Bala in zong dawi milim hi a ganhing ta a hing sak hi, ci in a um uh hi.
V 5. Mizpah khua mi mual sangpi dawn om a, gamlapi panin kimu thei hi.
V 6. Tui a buah ciangin amau lung kiniamna a lang sak hi. Tua tham loin a kiciamna tetci a hi hi, amau dahna zong a kilang sak hi.
V 10. Itazilate in Pasian a biak ciangin sa a go hi. Piliti mihingte a lung pil lo maninah van ging a lau mah mah uh a, a gal do zo kei hi.
V 12. Tua suang in Pasian hehpihna teci a hi hi. Khat vei Zawsu in zong kiciamna teci suang a phut hi.
Itailate in dawi leh milim a bia uh lai takin Pasian kiangah hehpihna a ngah zo kei hi. Eite in zong khialna ih nei leh, Pasian kiangah thu ngetna in a mawkna hi. Zeisu in khat vei in: Pasian na bialai takin na u na nau tungah na khialna na nei leh ciah in la, na u na nau tawh na kilem khit ciangin hong pai kik in la, thu na ngen ding hi, a ci hi.
Zannuaizi kha ni 2 ni
Zeisu Nungzuina Thu
Maku 1: 16 Galile tuili geiah a pai lai takin Simon leh Andazite unau tui sungah ngen pai uh a om a mu hi. Bang hang hiam ci leh amau in nga bengte a hi uh hi. 17. Zeisu in: Kei nung hong zui un. Mihing nga siate kong piang sak ding hi, a ci hi. 18. Amaute in thahkhatin a ngen nusia uh a, Zeisu nung a zui uh hi. 19. A tawm kha a pai khit ciangin Zibide a ta Zakoh leh a nau Zawhang in gun kuang sungah a ngen bawl kik uh a om a mu hi. 20. Thakhatin a sam leh amaute in gun kuang sungah tha cialte tawh a pa uh Zivese nusia uh a, a nung a zui uh hi.
Maku 2: 13-17 Tua lai takin Zeisu in tuili geiah a pai kik leh, mi honpi khempeuh in a kiangah pai uh a, amaute thu hilh hi. 14. Ama lam a pai lai takin Alaphe tapa Levuih in sia donna buuk sungah a tu a mu hi. Ka nung hong zui in a cih ciangin a ding in a zui hi.
15 Zeisu in inn sungah an a ne lai takin sia dongte leh mawh nei tampite in Zeisu kipan a nungzuite tawh a tu khawm uh hi. Bang hang hiam ci leh tua mite a om uh a, a nung hong zui uh hi. 16. Zeisu in mawh nei te leh sia dongte tawh an ne khawm uh Pazisete leh lai thei te in a mu uh ciangin a nungzuite kiangah: Amah in sia dongte leh mawh neite tawh bang ding in an ne khawm leh tui dawn khawm a hi hiam, a ci uh hi. 17. Zeisu in a zak ciangin: Ci dam te in zato a deih kei hi. Ci nate bek in a deih uh hi.
Mimawh nei lote sam dingin hong pai ka hih ke hi. Mawh neite sam dingin hong pai ka hi hi, a ci hi.
1 Zawhang 2:5 Amah tawh ih om innah tua bangin ih thei hi. 6. Amah tawh ka om khawm a cite in amah a pai bang mah in a pai ding hi.
Khiatna Thu
Tu kum kha gunk sungah Tapidaw gamtatna thu ih sim ding hi. Tua kha gunk a bei khit ciangin tang laite gamtatna thu ih sim kik ding hi.
1:16 Galile tuili a sau lo hangin a sungah ngasa tampi om a, nga bengte tampi a om hi. A geiah khua tampi zong a om a, tua khua khatah Zeisu a teeng hi.
V 17. Tua mihing li in a masa in Tui Phumpa Zawhang a nung a zui uh hangin Zeisu a zui hi. Khat vei a ciah uh a, na a seem kik hi. Tu in Zeisu in a sam kik a, a si dongin ama na a seem uh hi.
2:14 Tua Lezui a min dang in Mate a hi hi.
V 16. Pazisete in Itazilate thu hilh pawl hi. Amaute in Zeisu thu deih loin a nial tawntunga, a tawp peenin a that uh hi. sia dong te, mi gi lo a, Itazila te in amau tawh kikum kei hi. Tua ahih ciangin Zeisu in Pasian thu hilh napi in sia dongte tawh kipawl a om a mu uh ciangin a mawh sak hi.
V 17. Ci damte in mawh nei lote hi. Ci nate in mi gi a hi hi. Pazisete in mi siangtho hi lo hangin: Khialna ka nei kei hi, a ci uh hi.
Zawhang in a ci mah bang in mihing peuh in Zeisu nung a zui leh ama ahih bang in ahih ding hi. Zeisu in: Kei nong it leh ka thu na ngai ding hi, a ci hi. Eite in Pitazu leh a lawmte bang in nasepna dang nusia in Zeisu na bek ih seem man kei hi. Ahih hangin khialna mawhna, pha lohna khempeuh hawlkhia in amah deih bang in ih hih thei ding hi.
