TEDIM THU KIH ZAK NA LAI
DISEMBA KHA 1925
The Tiddim Chin Hills News
Bu 6 Nambat 12 |
A SUNG A OM THU TE
Tedim thu kih zak na lai
Leitung khempeuh thu
Lei dawn vuuk phuan lakah teeng mite
Kih it na thu
Nipi ni sin nahding lai
TEDIM THU KIH ZAK NA LAI
Ah kih pian’na kum 1919
Kha Simin Khalkha khua ah kih bawl hi.
Lai Bawl pa-----------------------------------Sang Mang pa.
Sum Sangte --------------------------------Thuam Hang leh Dam khup.
Kum khat ah man hamu ah hi hi.
Khalkha khua, Disemba kha 1,1925
LEITUNG KHEMPEUH THU
Tedim lai sinna lai bu ah tung zo hi. Mu khat ah man hi. Ah lei nuamte in Dam Khup kiangah ah ngah thei hi. Kum 1926 Mat kha ni 4,5,6,7ni-in Bukphil khua-ah Sivuaizi ah tung ding hi. Zanuaizi kha Thu Kih Zak Na Lai sungah kih vaihawm thu kih gelh ding hi.
Piancit leh Sapein gal kap te in Apilika gam sungah kumpi suamte tawh ah zo uh hi. Tu lai takin galte a tai uh hi. India gam leh Kawl gam sungah kum sim in sa gi lote in mihing 3,000 bang ah that lum zel hi. Sahangte in mihing 1,500, keel galte in mihing 400, vompite in mihing 80 ah that uh hi. Tua tham lo in gul gi lote in mihing 30,000 ah sun lum zel hi. Bengal uk sungah tam pen a si hi. Kum sim in sa gi lo 21,000 ah that zel hi. Kumpite in ngun 171,000 sa thaute ah pia hi.
Tu kum Mang kang gam ah tuam 55 upate in ah kih vaihawm uh hi. Thu lian pi in Tulki leh Mesapawteimia gam gi kih khena ah hi hi.Engalankumpipa in tua Mesapawteimia gam uk a hih ciang in Engaland gam leh Tulki gam gi thu bang a hi hi.
Kum 1919 kumin kumpite in India te ah gam kih uk sak pan hi. Ukna thu tawm pia in: ‘kum 10 sungah kak ze-et ding hi. Nah siam leh kih uk na ding thu kah khang sak ding hi,’ ah ci hi. Kum 5 a bei ciangin Indiate in a han suah bangin kumpite in khat vei a vaihawm kik uh hi. ‘Kum 10 a kih cin ma-in thu piak na dang ah om kei ding hi,’ ah ci hi. Tua ahih ciangin india upa vaihawm kim khatte ah dah uh hi. ‘Thahkhat mah in kah gam kah kih uk nuam hi,’ ah ci uh hi. A hih hang in 1929 kum ah cin ma in thu ah ngah kei ding hi.
Sente gam sung ah kih tuna, kih dona ah kip lai hi. Amau mi hi lo kim khat in England sang mang 6 ah man uh hang in ah kha kik uh hi. Sente in England sum ah lei nuam lo ahih manin ah England sum zuakte ading ah haksa hi.
Leitung mun tuam ah nasemte in kha sum tam zaw ah ngen uh hi. Amelika gam sung mei hol nasemte in ah ngah zo lo maninah na ah tawp uh hi. Awsteilia gam leh Apilika khang lam gamah tembaw nasemte in ah tawp uh hi. England gam ah suang mei hol nasemte in: Kah kha sum nah khang kei leh kah tawp ding uh hi, ah ci uh ciang in kumpipa in ah hehpih hi. Kawl gam tembaw nasemte in zong ah nasem ah tawp uh hi. Bang hang in kha sum tam ngen ah hi uh hiam nah ci uh leh nuntak nah ding ah haksa seem seem hi. Kha sum ngahte in kha sum ah kih cing kei hi, ah ci thei hi.
India gam sungah kum khat ah pha nai lo meigong(tagah) 600 ah pha hi. Kum nga phak nai lo 2,000 kum sawm phak nai lo 100,000 zong a pha hi. Numei note in bang ci meigong ah hi thei ding hiam ci in nah dot uh leh ah nute ah pate in tanu ah suah khit ciang in thahkhat mah in pasal tawh ah kih dong sak hi. Ah let ciang in ah kih pi sak hi. Ahih hang in ah kih dong khit ah kih teen ma in ah pasal ah sih leh nungak in meigong kih ci hi. Tua te in pasal ah nei nawn thei kei hi. Ah khial uh ahih ciang in ah pasal ah si ci in Indiate ah up mawh ahih manin meigong mawhsak in innteeng tawh kih bang ah kawih uh hi.
Mang Kangte in huih ah uk zo nai kei uh hi. Amelika khua ah van tembaw lian mah mah khat ah om hi. Ahih hang in Septemba kha huihpi in tal sak a ah sungahte ah si uh hi. Ahih hang in England khua pan ah ding tembaw ah bawl lai tak uh hi.
LEI DAWN VUUK PHUAN LAKAH TEENG MITE
Vuuk phuan leh tui khal tampi ah om gam in sak lam lei dawnah om hi. Tua gamah Eskimo kih ci mi pawl khat ah om hi. Eskimo ah khiatna in ngasa sial ne mi, ah cih nawpna hi.
Amau om na ah sung kung, lopa ah po zo lo ahih ciang in sing leh bi tawh inn ah lam zo kei uh hi. Khuadam ciang in suang tawh kih bang tui lian tung ah om tui khalte tawh inn ah lam uh hi. Tua tui khal sah uh tawh ah bawl uh tem tawh tuipi tung tui lak peuh ah khia uh hi. Tua tui khal kih um in ah cing uh a ah dawn kih tuah sak uh hi. A sung hawih ah teng uh hi. Ah kih kal vang teng vuuk phuan tawh hu uh ahih ciang in huih ah nun hang in ah sung ah tum zo kei hi. Tui khel pah mah mah khua etna kong khat in ah bawl uh hi. Ah inn in bawling khel kih kap kawih tawh kih bang hi. Leitawh kih cin ah hawm neu khat ah om hi. Tua hawm in ah inn tual ah hi hi. Ah innsung ah tum lehang ganhing kua bang in pi sawm in bawk vak sa in ih pai ding hi. Ah inn sung ah ih tang zo kei ding hi. Bang hang hiam ih ci leh Eskimo mihingte in ah ding sang lo ah hih ciang in inn zong ah sang sak lo uh hi.
Inn umna kawm tawh kih mat a vuuk phuan tawh kih bawl a ah tung sa vun kih phah mun khat ah om hi. Tua lai in ah inn neite inn kuan lupna ah hi hi. Leitung ah suang tawh kih bawl mei vak khat ah om hi. Tua mei vak sung ah ah mul nei ngasa lian thau ah vak uh hi. Tua mei in inn sung lum sak leh an huanna ah kih mang hi.
Eskimote in sazuk pawl khat tawh, mul nei ngasa lian tawh, vom tawh man uh a ah sa ne uh a ah vun puan in khui uh a, ah guh siam bawl uh hi. Amau tui pi lian gei bek ah teeng thei uh hi. Bang thu hiam ih cih leh ngasa sim lo an dang tawm bek a nei uh hi. Khua tawm a lum lai in amaute in savun buk huih in ah let zo nahding in suang tum tawh a delh uh hi.
Eskimote khua sungah nah tum leh in khem peuh kiimah ah kihtak huai ui ah lianpi ngia ciah pha ah om nah mu ding hi. Ahih hangin kih tak ding hi lo, ah tote nasem ding ah zual sak uh ah hi hi. Tua ui te in khat guak ah hi zong in tampi kih zom ahi zong in vuuk phuan lakah leeng ah kai hi. Tua leeng in pei ah nei kei hi. Kawlte in bi peuh ah kaih theina kih tal kaih sing luang leeng tawh kih bang hi. Ah tote in sa ah mat uh ciang leh khua ah lal uh ciangin ah vante tua leeng tung ah ah kawih uh a tua ah ui te uh a kai sak uh hi. Eskimo mite in bang hang ah lal ngitngetuh hiam ih cih leh ah mul nei ngasa a lal ciangin an leh puan nga nahding amaute in zong a zui kawi kawi uh hi. Tua tham lo in khua lum ciangin tui khal te zong tui suak ah ah inn te zong tui mang ahih ciangin amaute om na dang a zong uh hi.
Tua Eskimo uite in ah sawt veipi an ne lo in ah om thei a hih ciangin ni nih ni thum sungah khat vei bek an a pia uh hi. Ahih hangin a gil kial tawntung uh ahih ciang in ah tote an leh ah leeng kaih na sa vunte ah ne thei lo nahding in a bat zawh lo na ding in ah saangah ah kawih uh hi. Tua ui tang thu a tuam tuam in tampi kih gen zo hi. Amaute in sakawl sang in ni nih nithum tui khal leh vuuk puan sungah leeng a man langin ah kai thei zaw hi. Mihing kim khat sangin zong a pil zaw hi.
Tua uipawl te hang mah mah ahih ciangin ah zual sak nahding ah haksa mah mah hi. Kum sim in khuapi ah tua uite tai kih dem sak uh hi. Tai, khat vei ah kih dem sak ciangin ni nih ni thum bang tai sak thei uh hi. Ah zo pen in lungdamna lian ah ngah hi. Ui ah hawih pen in dangka tul tampi ah man hi.
Khat vei mi khat in ah kih zual sak nei lo ui khat ah man tampi in ah lei a, ah cing pa in ah zual sak ciangin ah ui in a puan ah kei gawp a ah that dek tak hi. Mi dang te in zong tua ui hang ah zual sak nawp hang in ah zual sak zo kei hi. Ah sawt ciangin tua ui in Alan ah min nei mipa khat kih pia hi. Tua pa in hih ui khat zual ding ci inah kih ciam hi. Ui kiangah ah pai ciangin ui in ah diang a ah ngawng bawh in, kei ding ah hi hi. Ahih hangin Alan in khut in ui ngawng ah man masa ah lutang vuuk phuan sungah ah sawn tum suk hi. Tua mah bangin nih vei, thum vei ui in Alan ngawng ah kei nawp hang in ah zo zo kei hi. Ah gim ciangin ah topa thu ah mang ngitnget a cikmah hun in ah gi lo nawn kei hi.
Tua ui te ah hat pen a min Baldi kih ci khat leh ah lawm dang te tampi Piancit khua ah ah kih pai pih a Mang Kaang te gal ah kih do lai takin mual saang pi tung ah thau tang leh mepi tang ah pai to sak uh hi. Tua mual dawn ah vuuk phuan tampi ah om ahih ciangin thau liante puak to nahdingah haksa mah mah hi. Bawdi ah kih that hi. Ahih hangin ama topa in amah hang in Piancit Kumpipa kiang ah min phat na Medal ah ngah hi.
KIH ITNA THU
Pate, nute, lawm te, naute, eite in ni dang laiah ah kih phawk ngei lo kih thei ngei lo ih hih hang in ah hong it ah hong tan khia Topa Zeisu thu ih zui ciang in ei Tapidaw te kih it na lung damna thu ka gen nuam hi. Topa Zeisu gen kih it na thu kih kam pau min tek hi lo a, ah man takpi kah ngah na un kum 1925 Mat kha ni27 ni in ko tui tum khua Tapidaw leh Lawki a kih gawmin inn 17 ah khang hi. Inn hih zah lak ah Tapidaw inn thum a khang hi. Tua khit ciang in Sia Vial Nang Tedim khua ah pai ah thu a gen ciangin Tedim khua ah om siate, pate, nute leh khua kiim nai ah omte in a zak uh ciangin ah zak bek uh hi lo in tua inn kang te hehpihna in dangka 30 hong khak hi. Ni ukkhat tawh a dang Mualpi khua pan dangka peek 3 mah kah ngah uh hi. Tua ahih ciangin Topa Pasian hong heh pih na leh ah thu zui te kih it na ah man takpi ci in kah ngah uh a ah ki gen thei lo zah ding kah lung uh a dam hi. Hih thu in dah na kah thuak lai tak uh ei Topa Zeisu thu zui te kih hehpih nah ding thu Topa Zeisu in zawhang 13:34,35,36 gen bang ah tun’na ah hi hi.
Dahna, gimna in kote bek hi loin leitung ah ih om lai teng kuamah in ih thuak kha zel zel thei hi. Hih bang ah dahna ah omna in ni dangah ih pi Evua leh ih pu Adan in Topa Pasian thu piak na ah khel uh ciangin Pasian thu piak na hang ah tun’na hi, ci in ih ngaih sun ding hi. Topa Pasian in: ‘Kei thu a siat sang in van leh lei a sia zaw ding,’ ah ci zo hi. Tua ciangin ah tungah kah gensa mah bang in ni dangte’n Topa Pasian hilh sangah dawi khemna ah uk hangah tu dongin lei tung gimna dah na thuak lai ih hi hi. Hih ngaihsun loin tua Topa Zeisu hongtanna um khial kei leng vangtungah ih kha in ah kih khel ngei lo nopna thuak ding, ci in Topa zeisu hong gen kik hi.
Tua ciangin Pawlu in zong IIKawlutum 5 sungah zong nah gen lai hi. Hih thu in Topa Zeisu hong it na leh ah thu zuite kih it na lung damna kuamah in thei nah ding kah deih na in Thu Kih Zak na sungkah at hi.
Awn Za Nang
NIPI NI SIN NAHDING LAI
Disemba kha ni 6 ni
Zuap Gam Sung Thu Hilhna Kihpatna
Sawltak Tangthu 16
6.Phugi gam leh Galati gamah pai khit uh ciangin Asia gam sung Pasian thu hilh ding in khasiangtho in ah kham ahih ciangin Misia khua-ah tung hi. 7.Bitinia gam pai ni,ci in ah vaihawm uh ciangin Zeisu kha in thu a pia kei hi. 8.Misia khua ah lan uh a Tazaw khua tung uh hi. 9.Zan ciangin Pawlu in mang muna pan in Makedawni gam mihing khat in ding a: ‘Makedawni gam hong gal kah in kote hong hehpih in,’ ci in a ngen hi. 10.Ah mang mu ciangin Makedawni gam lungdamna thu hilh dingin Pasian in kote hongsam zo hi, ci in kah lung sim uh kah cih uh a tua gam meeng meeng in a pai thei nahding kah han ciam uh hi
11. Tua ahih ciang in Tawza khua pan in tembaw in kah pai uh a Samawtazia khua tang tak in pai in zing sang ciangin Napawli khua kah tung uh hi. 12.Tua khua pan in ka pai khia a thu khen mangte Zawmate khua hi a, Makedawni gam khuapi ah hi, Philipi khua kah tung uh a, ni sau pi ka om uh hi. 13.Nipini in komau, khuanawl ah pai khia a, a thu nget na ah om in kih um thei na gun geiah kah pai uh a tu in tua santak ah kih khawm sa numeite thu kah hilh uh hi. 14.Tua lai takin puan san ah zuak Tiatazi khua mi Pasian ah bia numei ah min Ludi in komau thu ah za hi. Tua numei in Pawlu thu hilh na hong ngai nahding in amah lung, Pasian in ah hon sak hi. 15.Tua numei in a inn kuanpihte tui ah kih phum khit ciangin: ‘Keima in Pasian thu pha takpi ka um note nah um uh leh keima inn ah hong pai in hong om un,’ ci in ah hong thum ah hong zol hi.
Khiatna Thu
6.Phugi gam leh Galati gam Pawlu leh Banabate in ah khual zin masa ciangin tua gam ah zin ah Tapidaw tampih a ngah uh hi. Asia gam: ‘Tu lai tak Asia gam hi lo, Masa ah Asia gamin Khamtung gam bang in ah neu hi. 8. Misia leh Bitini gam gam neu nih a hi hi. Tu in tua gam ah om kei hi. Tazaw khua: Tuipi gei khua neu khat ah hi hi. 9. Makedawni gam: Tu lai takin Galik gam ah hi hi. Pawlu in mang tampi a man hi. Pasian in mang sung ah thu a pia hi. Khat vei vei sawlna thu hilh hi, khat vei vei lung kip na thu a hilh hi. Hih sungah sawlna thu a hilh hi.10. Komau: Luka in Sawltak Tang thu Lai Siangtho ah gelh hi. Tazaw khua ah amah in Pawlu tawh ah pai hi. Tua ahih ciangin, komau a gelh hi. 11.Samotasia: Tui lak gam neu ah hi hi. Zan khat tua khua ah tembaw a khawl hi. 12.Philipi khua Menzipa om na hi. Zawma khua, ah khiatna in tua khuapih te in Zawmna mi tak tak hi lo ahih hangin kumpipa in ah hehpih a Zaawmate bang in ah kawih hi. Pawlu in khuapi liante ah thu a hilh masa hi. 13.Tua khua ah Zudah mi tawm bek ah om maninah sang inn nei lo hi. Numei tawm in khuanawl ah gun gei ah kih khawm ah thu kih nget sak hi.
14.Luda.Amah khua ah gam la hi. Philipi khua naseem dingin ah om hi. Ngaihsun na ding thu nih ah om hi. khat pen, tu in Zuap gam mihing te Zeisu lung lungdamna thu ah za zo hi. A masa ah Asia gam sung bek Pasian thu kih za hi. Galik gam panin Mang kaangte Pasian thu za a h amau in khua dangah pua a tu in khua kheempeuh ah Pasian thu ah za zo hi. Khat pen, Kha Siangtho in Pawlu lam ah hilh sak hi. Tua mah bangin eite kheempeuh lam ah hilh sak nuam hi.
Disemba kha ni 13 ni
Philipi Thong Inn Vil Pa in Tawpidaw ah Suak hi.
Sawltak tang Thu 16
22.Mi honpi te amaute lang khatah ding uh hi. Thu khen mangte in zong amaute puan bal kek uh a ciang kang tawh sat nahding in thu ah pia hi. 23. A tampi ah sat khit ciang in takpi kem ding in thong inn uk pa kiangah thu ah pia khit uh ciangin thong innah ah khum uh hi. 24.Thong vil pa in tua bang kih vai khak na ah ngah khit ciang in Pawlu leh Tila thong inn ah laizang dei sungah khum a mau khe kawl bulah ah hen hi. 25.Zan kim lai tak in Pawlu leh Tila in thu ngen a Pasian min phat na la ah sa uh a thong khia mihingte in ah ngai uh hi. 26.Tua lai tak in tha khat in zin nakpi in liing a thong inn pang zong ah liing a, kong khak khempeuh kih hong a, mi khempeuh a kih hen sa sik ah kih phen hi. 27.Thong uk pa tho a kong khakte kih hongsa ah om ah mu ciangin thong kia te khempeuh suak ta khin zo hi, ci in ah up ciangin ah tem dawk a amah mah that ning, ci in ahih hi. A hih hangin Pawlu in: ‘Nang tung ah bang mah nah hih kei in. Ko kheempeuh ka om uh hi,’ ci in nakpi in ah kih ko hi. 29.Thong inn uk pa in mei vak a nget khit ciang in thahkhat in lut a kihtana tawh liing in Pawlu leh Tila mai ah ah bawk hi. 30.Amaute ah pai khiatpih khit ciangin: ‘Tote aw, keima in gupna ngah zawh nahding bang kah hih ding hiam,’ ci a ah dong hi. 31. Amaute in zong: ‘Topa zeisu nah um in. Nah up leh nangmah in, nah inn kuanpihte tawh gupna nah ngah ding uh hi,’ ah ci hi. 32.Amah ah kihpan ah inn kuanpihte kiangah Topa thu ah hilh uh hi. 33. Tua lai takin thong uk pa in amaute paipih a ah kih satna gawlte ah sawp khit ciangin ama mihing te khempeuh tawh thah khat tu in tui ah kih phum uh hi.
Khiatna Thu
Pawlu leh Tilate in khua sungah vak lai takin aaisan numei khat in Pawlu ah ko hi. Pawlu in ama sungah dawi ah hawl khiat ciangin tua nungak tote heh uh a, Pawlu leh Tila manin thu khen mangte kiangah ah paipih uh hi. ‘Hih mihingte in zui thei lo ngeina thu hong hilh hi’ ah ci uh hi. 22. Pawlu leh Tilain kih huh pa ngei lo a, mangte in ah nawp bangin amau tungah ah bawl thei hi. Pha takpi thu ah khen kei hi.
24.Tua thong inn in Khamtung thong inn tawh kih bang lo hi. Khua etna om lo, buan vive ah om hi. Zusa zong tampi ah om hi. Zanah ih mu ding ah haksa hi. 25.Pawlu leh Tila in satna ah ngah zo hi, ah gim mah mah. Tua tham lo amau khe kawl bulah ah hen ahih ciangin ah lum zo kei hi. 26.Mihingte in inn, thong inn, gal kap inn ah lam thei hi. Ahih hangin tua te kheempeuh sangin Pasian ah sial zo hi. 27. Thong khiate ah suakta leh thong vilte kih that thei hi. Ahih hangin zin a liin’ ciangin thong khiate kih ta aah tai ngam kei uh hi. 30.Thong vilpa in Pasian vang letna ah mu ciangin kihta a, Pasian dantatna tawh kih pel ding in gupna ah deih hi. Pawlu in mi dangte kiangah ah gen bangin, eite in khamtungte kiangah ih gen bangin Zeisu thu nah um in,’ci in thu a pia hi. Zeisu in lung mang mi, kihta mi, mi zawng mi, mi hau mi, ah kih pan mi kheempeuh ah gum zo hi. Zing sang ciangin Pawlu leh Tila in Tetalawni khua-ah tai uh hi.
Disemba kha ni 20 ni
Zeisu Suahna Thu
Mate 2
1.Zudah gam ah Hezoh kumpipa ah man lai takin Betleng khua-ah Zeisu ah suak khit ciangin Mi pilte in ni suahna lam gam panin Zezusalen khuapi ah tung uh a; ‘Tu lai tak ah suak Zudah kumpipa kawi lai ah om hiam. Ni suah na gam lam pan ama aaksi ka mu zo uh hi. Ah biah dinginah kah hong tung uh hi,’ ci in ah dong uh hi. 3.Hezoh kumpipa in tua thu ah zak ciang in Zezusalen khuapi ah mihing khempeuh tawh ah lung hi mawh uh a. 4.Pasian siampi, leh lai thei teng khawm a: ‘khazih in kawi laiah suak ding ah hi hiam’ ci in ah dong hi. 5.Amaute in: ‘Pasian kam sang pa khat in: Zudah gam Betleng aw, Zudah gam khuapi lak ah nang in khua neu, khua gi na lo nah hih kei hi. Bang hang hiam na ci leh keima mi pawl Itazilate cing ding in nangma sungah mang pa khat ah piang ding hi,’ ci in Lai Siangtho sungah ah kih gelh mah bang in. 6. Zudah gam Betleng khua ah khazih ah suak ding hi, ci in kumpipa kiangah ah gen uh hi. 7. Hezoh in Mi Pil te sam sim a, aaksi lang hun pha takpi a dot khit ciangin. 8.‘Note pai un la, tua naupang vah zong un. Nah mu uh leh kei kiang ah hong pai kik uh la hong gen un. Kei zong pai-in tua naupang kah bia ding hi,’ ci in vaikhak a, Betleng khua-ah ah pai sak hi. 9.Amau in kumpipa thu ah zak khit uh ciang in paikhia uh a, ni suah na gam lamah musa aaksi in amau mai ah vah pai anaupang om na tung ah ah tun’ ciangin ah khawl hi. 10.Mi pilte in tua aaksi ah mu uh ciang in nuam mah mah uh a.11. Inn sungah ah lut uh leh naupang leh ah nu Mazih ah mu uh ciangin bok in a bia uh hi. Amau van ah suah khit uh ciangin kham leh pak nam tui ah pia uh hi. 12.Tua nung ciangin Hezoh kiangah ah pai nawn lo nahding uh ah mang sungah uhah kih hilh a, amaute khua-ah ciah ding in lamdang ah ton uh hi.
Thu Khiatna
Zeisu in Disemba kha ni 25 ni-in Betleng khua ah suah hi. Tua ni-in Tapidaw lung damna ni ah hi hi. Bang hang hiam ih cih leh tua ni ah eite hong gumpa in leitung ah hong kum suk hi. 1.Hezoh: kumpipa tak tak hi lo, Zawma kumpipa khat nuai ah menzi pa ah hi hi. Amau in aaksi thu ah siam mah mah hi. Zezusalen khua kumpipa om na khua ah hi hi.
2. Aaksi tuam ah kih lang ciang in eite kumpipa ah suak ding hi, ci in Zudah mihingte ah um hi. Mi pil te in Zudah mi hi lo uh hang in, hih thu thei zo a, aaksi tuam a lang ciangin kumpipa ah zong hi. 3.Hezoh ah lung mang hi: Bang hang hiam ih cih leh kumpipa thak a suak leh ama nasep na za ah mang ding, ci in ah kih ta hi. 4.Tua phui samte leh lai thei te in Lai Siangtho sungah hih thu ah sim zo hi.
6.Betleng khua: Zezusalen khua tawh kih nai khua neu ah hi hi. Ahih hang in ah mak sung ah Pasian tapa suak ah hih ciangin khua lian mah bang ah hi hi. 8. Hezoh in ah kheem siam hi. Amah in zeisu a bia nuam kei hi, ah that nuam hi. 9.Aaksi khat vei ah lang kik a, Mi pilte lam mu sak hi. 11.Kham leh pak nam tui kumpipa leh phui sam pa piak nahding ah hi hi. Zeisu in eite kumpipa ah hi, eite phui sam pa zong ah hi hi.
12.Hezoh in Zeisu ah that nuam hang in Pasian in ah kham hi. Mipilte in khua ah ciah khit ciangin Hezoh in Betleng khua sung kum nih nuai naupang khempeuh ah that sak hi. Ahih hang in Pasian in Zawta ahilh khawl leh Zawtah in Izip gamah a tai hi.
Zeisu leitung ah hong pian’ ciangin kumpipa, mi lian tawh kih bang ah suak kei hi. Ahih hangin tu in leitung kumpi ah lian bel te in Zeisu ah bia uh hi. Sum hau tawh kih bang ah suak kei hi. A hih in tu lai takin leitung sum hau belte in Zeisu ah bia uh hi. Bang hang hiam ih cih leh Zeisu in leitung kumpipa tak tak ah hi hi.
Disemba kha ni 27 ni
Pawlu in Aaten khua-ah Tung Hi
Sawltak Tangthu 17
16. Pawlu in Aaten khua ah Tila leh Timawte ah ngak ah om lai tak in, tua khua mi lim ah dim tak ah om ah mu ciangin ah lung mang hi. 17.Tua ahih ciangin kih khawpna sang inn ah Zudah mihing te ah kihpan Pasian bia mite leh sum buk ah ni simah ah kih tuak mite tawh ahih hang in thu kih kum in ah om hi. 18.Tua lai takin Epikulia mi leh Stawik mi pilte kiimkhat in Pawlu tawh thu kih nial uh hi. Mi kim khat te in: ‘hih kam tam nei pa in bang gen nuam ah hi hiam,’ ah ci uh hi. Kim khat te in zong: ‘Amah in Pasian tum dang thu hilh mi bang in ah om hi,’ ah ci uh hi. Bang hang hiam ih cih leh Pawlu in Zeisu thu leh nungta kik na thu ah hilh hi. 19.Tua lai takin tua mite in Pawlu sam a, Aiapaguh mual tung ah ah pai pih khit ciang in: ‘Nang na hilh na hih thu thak in kote thei thuak ahi hiam, 20. Kote za ngei lo thu te nah hong za sak hi. Tua nate in bang ci nawp in kah thei nuam hi,’ ah ci uh hi. 21.Aaten khua mihingte kheempeuh leh ah zin te khempeuh in thu thei nah ding, thu ngai nahding sim lo ah dang na khat bek a seem kei uh hi. 22. Pawlu in A-aipaguh mual tungah ding leh thu ah hilh hi.
32. Amaute in mi site hing kikna thu ah zak ciangin kim khat in ah ko sia uh hi. Kim khat in: ‘Hih thu in ah nung ciangin kah ngai ding uh hi,’ ah ci uh hi. 33.Tua bang ah cih uh ciang in Pawlu ah pai khia hi. 34.Mihing kim khat in Pawlu nung ah zui uh hi
Thu Khiatna.
Pilipi khua panin Pawlu ah pai khiat ciangin Tetawlih khua ah tung hi. 16.Aaten khua: Ni dang lai inah leitung uk kumpipa khua ah hi hi. Pawlu ah khang lai tak lung pil pente omna ah hi hi. Ahih hang in amau in milim ah bia uh hi. Aaten khua sungah mihing sangin milim ah tam zaw hi. 18.Epikulia mi pawl: Zing ciang in si kha ding ahih ciang in tu ni in lung dam ni, ci in ah hilh uh hi. Stawik mi pawl: Leitung nate leh deihna teng pha lo hi. Tua ah hih ciangin ah deih na nah nial ding hi,’ ah ci uh hi.Tho kik na thu: ‘Ih si khit ciang in bangmah nung ta kikna om kei hi,’ ci Aatente ah um uh hi. Amaute in Zeisu min ah za ngei kei hi. 19.A-iapaguh: khua pamah mual no khat ah om hi. Tua mual dawn ah biakna inn leh kih khenna inn tampi ah om hi. Tua ahih ciang in mi pilte in Pawlu thu tel takpi ah ngai thei nahding in tua mual dawn ah ki khawm uh hi.
Pawlu thu hilhna in: Pasian in eite sapna khempeuh hong pia hi, leitung leh van tung ah piang sak hi. Tua ahih ciangin bangmah eite kiangah ah sam kei hi. Ni dang lai in ah siamna ih nei kei hi. Ahih hang in tu lai tak in Pasian in hong hehpih nawn kei ding hi. Pasian ah bia lo khempeuh te in thu khenna ah thuak ding uh hi,’ah ci hi.
32.Aatente in khamtungte tawh kih bang in, thu thak ah ngaihsun zo kei hi, ah ngeina ah hih kei hi. Ahih hang in mi tawm cik Pasian thu um a Pawlu tawh kih tuak hi.
Laibu Saal /Zomi eLibrary
www.zomielibrary.com
