TEDIM THU KIH ZAK NA LAI
AUTOBA KHA 1926
The Tiddim Chin Hills News
Bu 7 Nambat 10 |
ASUNG A OM THU TE
Tedim thu kih zak na lai
Sang Mang pa khual zin na thu
Hehpih na thu
Nipi ni thu hilh na
TEDIM THU KIH ZAK NA LAI
A kipianna kum 1919
Khalkha Khua Kha Simin kibawl hi
Lai Bawl Pa----------------------------Sang Mang Pa
Dangka sang te-----------------------Dam Khup leh Thuam Hang
Kum khat a man hamu a hihi.
Khalkha khua Eipi Eipi kha ni 1, 1926.
SANG MANGPA KHUAL ZINNA THU
Izipt gam a lui mah mah hi. Babulon gam hi lo leh Izipt uk a tui peen uk a hi hi. Nidang lai inah Izipt kumpipa in leitung kumpi a lian peen hi. Tu lai takin Mang Kangte in tua Izipt gamah lei to a khang lui mihingte bawlsa inn, han pan na tampi a mu zo hi. Tua han in suang gol in kilam a pi 500 bang a sau hi. Kumpite inn a kau mah mah a suangin bek kilam hi. Tu in Izipt uk a neu mah mah hi. Ni kum dongin Engaland kumpipa in a uk hangin a hehpih a amaute a uk sak kik hi. Izipt mihing ih et ciangin kuli tawh kibang ih sa thei hi. Mi lian a hi nawn kei hi. Babulon a uk a kisia mah bang in Izipt letna kisia zo hi. Khang lai mihingte bawlna kim khat in bang ci a bawl hiam kua mah in a thei kei hi. Suang sang pipi a phut hi. Bang ci a phut hiam kithei kei hi. Sik leh enzin loin bang ci a tawi sak hiam thei ding a haksa hi.
Khang lai mihingte a kam leh lai a bei hi. Tua ciangin lei to masa belte in han sungah lai a muh ciangin a thei zo kei hi. A sawt veipi in a sim zo kei hi. Ahih hangin khat vei suang tum dang a mu hi. Tua suagn tungah lai nam thum a at hi. Khat in Galik lai, khat in Zawma lai, khat in Izipt lai hi. A khiatna a kibang ahih ciangin Galik lai a siamte in Izipt lai zong a sim thei hi. Tua lai a siam ciang in lai khempeuh a sim thei hi. Lai mal bek a at kei hi, Khamtungte tawh kibang in khang lai mihingte in gan lim leh mihing lim sing le suangah a at hi. Tua ciangin gal dona leh gan betna a kipan amau hihna tampi ih mu thei hi.
Tua lai le suang, bang hangin a muat kei hiam na dong thei hi. Tua gamah guah a zu kei hi. Kum khat sungah nga vei, gunk vei bang in a zu thei hi. Guah tui loin suang leh sing leh lai a muat thei kei hi. Khat vei leu leu in khang lai mihingte bawl na tungah seh nel huih in leen pih a tu in lei thukpi sungah a om hi. Kulite in nakpi in lei a to khit ciangin a mu hi. Lei sungah na tuam dangte a mu uh ciangin a kim khat in Izipt khua ah a nusia hi, kim khat in Mang kangte etuah ding in amau khua pua in inn lianpi sungah a kawih uh hi. Tua inn kumpite in lam a kuamah peuh in tum a, a en thei hi. Tua inn a lian peen London khua ah a om hi. Zannah tua innah ka en hi. Anung ciangin hih lai ka gelh kik ding hi.
Izipt gamah guah a zu kei leh khuapihte in bang ci an a ngah thei ding hiam. Tua gam lai zangah Nail (Nile) kici gun lianpi khat a luang hi. Kum simin nak lamah guah tampi zu a, vuuk a tui a, tui lian a, lei tungah a luang hi. Lei a kawt lai takin in lo khote in manlang in khaici vawh a, lei a ko(keu) ma in an min a a la hi. Ni dang lai inah guah a zu zaw hi. Tua ahih ciangin tua gun tawh kinai lo bek a kho thei hi. Tua gunpi a bei kha leh Izipt gam in Babulon gam tawh kibang sehnel gam a paing kha ding hi.
Abiahang in Izipt khua khat vei a zin hi. A nung ciangin ama suan Itazilate in tua gamah kum 400 bang sila bang a om hi. Babulon kumpipa in Zezusalen khua sima, a mihingte a lak ciangin a kim kaht in Izipt gamah tai in a si uh hi. Tu in Izipt mihingte in Musalamte a hi khin hi. Tua Musalmante in Izipt gam a sim ciang in laibu ahih zongin, inn ahih zongin tampi sia sak a, bang mah siamna a deih kei hi. Hih in Musalmante ngeina a hi hi.
Izipt gam sungah na a lian peen in Suez Canal kici, teembaw hawk guam a hi hi. Ni dang lai inah Asia gam leh Apilika gam lei gek in kipeh teembaw in a tung nuam leh tai 10,000 bang Apilika gam a kiimkot hi. Mang Kangte in India gama pai ciangin Apilika gam kiimkot lo leh tua lei gekah leitung lam pai a teembaw dang a tuang hi. Ahih hang in tua lei gek lam a gutate tampi om a, ni a samah mah hi. Ka nu in Atan Apilika gam kiimkot a kha 10 a khua a tung hi. India gam lam tua bang a haksa mah mah ahih ciangin Amelika gam a mu hi. Amelika ah a pai masate in India gam lam a nai zaw zong hi. Leitung a neu a sa hi. Amelika gam a tung ciangun India gam a tung zo ci in a um mawk hi.
Tua mah bangin a sawt veipi in mihingte in gimna tawh India gam a tung hi. Ahih hangin khat vei Piancit mihing khatin: Tua lei gekah hawk guam lian khat to leng teembaw a pai thei hi, a ci hi. Mi kim khat in a nuisan hangin tua pa in sum tampi leitawi a kuli cialin lei a to sak hi. Sehnel vive ahih maninah tonah ding a aksa maninah a haksa mah mah hi. Ni nakpi sa a kuli tampi a si hi. Ahih hangin lung kia loin a nuam uh a, a zo hi. Tu-in India khua painah ding a baih hi. Teembaw kikhel loin ih tung thei hi.
Tua hawk guam tai 90 bang a sau a pi 200 bang a kau(thuk) hi. Ih et ciangin tui luang lo gunpi tawh ki bang ih sa thei hi. Ka teembaw dam takin a pai hi. Manlangin pai leteh tui a luang sak a sehnel a cim thei hi. Shenel a to enzin tampi ka mu hi. Shehnel a to ngitnget kei leh tui a dai ding hi. Khat vei vei teembaw dang tawh ka kituak hi. Tua ciangin khau lianpi tawh a geiah ka teembaw khi a, teembaw dang a pai hi. Bang hang hiam ci leh teembaw nih a pai leh a geiah sehnel a cim ding hi. Sak lam leh khang lam ka et ciangin sehnel vive a lang hi. Khat vei vei inn neu ahih zongin, kala-oh a hih zongin, ka mu hi. Lopa leh sing ka mu kei hi. Tua gamah kuamah a nung zo kei hi. A lang khat ka tun’ ciangin khua neu khat ka mu hi. Tua munah tui khuk om a, sing le lopa tampi a om hi. Ni khat sun lai takin hawk guamah ka tum hi. A zing ciangin nai 6 ciangin a lang khat tuipi lian ka tung hi. Ahih hangin teembaw dang a bang thei dingin tampi veipi ka khawl hi. Ka khawl kei leh nai 13 ciangin ka pai suak thei hi.
Tuipi ka tun’ kik ciangin tuipi lian a hih kei hi. Apilika gam leh Izip gam kikal tuipi a hi hi. Tua tuipi geiah gam tampi a om hangin ka mu zo kei hi. Ni guk khit ciangin Oran kici, khua khat ka tung hi. Tua khua Piancitte in a uk hi. Piancit mi bek ka mu a kam khat bek ka thei zo kei hi. Mi tawm in Mang kaang kam siam a, tua tawh ka hopih hi. Oran khua, Apilika gama om hi. Teembaw suang meiholh a bei ahih ciangin tua khua-ah a dang ka la hi. Kulite in seu sungah suang meiholh a pua hi. Suang meiholh a pua lai takin komaute in khua sungah vak a, mihingte ka en uh hi. Ahih hangin khua dang tawh kibang hi. Hih khua-ah sakol lian ka mu masa hi. Khamtungah sakol in ui tawh kibang a neu hi. Mang Kaang sakol a saang a hat ma ma hi. Oran khua lampi a suk le to vive a ahih maninah sakol hat lo a hi leh leeng a pua zo kei hi.
Oran khua ka tun’ ma-in Apilika gam ka mu thei hi. Tua gam Khamtung tawh kibang hi. Teembaw panin mual, tawh khua tawh, lam tawh ka mu hi. Tua mihingte Mang Kaang hi lo, Apilika mi a hi hi. Amaute khua kim khat mual tungah a om hi, kim khat tuipi geiah a om hi. Kham tung tawh ki bangin lam sialna a haksa in ka um hi.
Tua lai takin teembaw tuangte a khang zo a mi tampi a om hi. Tua ahih ciangin kimawlnah dingin kawmiti khat ka tel hi. Keimah in zong tua kawmiti mi khat ka hi hi. Teembaw tungah bawllung sui zo lo hangin mawlna ding ka bawl thei hi. Tua ahih ciangin sum ka kawm a lung damna ka lei hi. Ni simin mawlna a tuam a tuam a hih uh hi. A tawp ni-ah zan khat in ka kikhawm uh a, la siamte in la sa a, a nung ciangin kimawl a zote in lung damna a ngah uh hi.
Tu-in London khua-ah ka om hi. Hih khua leitung a lian peen khua hi a, tum dangna tampi a om hi. Zing ciangin teembaw tungah tuang kik in Amelika khua-ah ka pai kik hi. Ni sagih zawh ciangin ka khua ka tung ding hi. Ko a vekpi in ka ci dam uh hi.
Sang Mang Pa.
Engaland gamah suang meiholh naseemte leh a tote a kivaihawm lai hi. A tote in: ‘Na sum na kiam sak kei leh na na a bei ding hi,’ a ci lai hi. A naseemte in: ‘Ka kha sum a kiam leh ka si ding hi,’ a ci uh hi. Pasian thu hil pawlte in a kilem sak nuam hi. Tua ahih ciangin kumpite in: ‘Kha li ciangin masa bangin sum kong huh ding hi. Tua kha li sungah no na vaihawm lai ding hi,’ a ci hi.
Kalkatta khua-ah Musalmantete leh Hindute in a kitawng kik hi. Ni khatah mihing 9 a kithat hi.
Amelika khua-ah tu kum Zulai kha ni a sa mah mah hi. Mihingte in naseem nei loin inn tualah a ihmu uh hi. Khua tuamah mihing 100 bang khua lumin a si uh hi. Tua bangin cikmah hunin ni a sa kei hi.
Sente gamah mangte a tuam in ki do lai hi. Mi zawngte aading a haksa seem seem hi.
HEHPIHNA THU
Zawhang Lai Siangtho 1:16. Hehpihna khat panah hehpih sawnna.
1.Ui in ama hehpih te a thei a, a zui hi, cina thu aman hi. Gan dangte in zong ama hehpih tu thei a, a ngaih uh hi. Tuute in zong a cing pa thei a, a zui hi, ci-in Lai Siangtho sungah hong hilh ih thei zo hi. Tua ahih ciangin mihing gen lo, ui te, tuute in zong amau a it a, a hehpihte thei a, ngai a,a zui uh hi. Naupangte in zong a nu leh a pa ngai mah mah uh hi. A nu leh a pate in deih sak uh a, a neek tang a pia uh ahih maninah a tate in a ngai uh hi. Ahih hangin mihingte in hehpihna lam dang mah mah ih thei suah zawh lo khat a om hi. A masa-inah ganhingte’n zong a it a hehpihte a thei a, a ngai a zui, ih ci hi.
Mihing in zong hong hehpih tute tawh ih om leh nuam mah mah hi. Tua hi a bang hangin mihingte in hehpihna a lian bel leh a tawp bel a, amah hingna nangawn hong piak dong a hong hehpih Topa Zeisu ih thei thei lo hiam. A hi hi, Topa Zeisu ih hehpih na, ih ngaih thei lona dawi nasepna a hi hi. Tapidawte in a pai khia ta uh Topa Zeisu nu leh pate bangin a it uh hi. Ahih hangin Tapidawte a kim khat in hih dawi mangpa nasepna pai khia thei lo a, Topa Zeisu eite mihing pih bangin a hehpih thei kei hi. Eite in Topa Zeisu in hong itna ei tangah gimna hong thuakna thu thei leeng kua in hehpihna ci lo thei hi hiam. A hi hi, Topa Zeisu in hehpihna bek hong pia lo a hehpihna khat panah hehpih sawn sawnna hong pia a hih maninah ki seel a, a zong lote aading in mu suah haksa hi. A hi hi, Tu-in gante leh nu tapa ki-itna in Topa Zeisu hong itna thu a lang sak ta hi.
2. Hehpihna sawn sawn a sang zaw leh a thuk zaw in en kik eluleu ding uh hi. Pa in ta a hehpih na a lian bel ahih ciangin mipa khat in tapa khat bek nei a it mah mah hi. Angen khempeuh piak a tum a. a nei lo nangawn a zawn sak hi. Ahih hangin ni khat sang kah nang dak a ging lai takin a tapa a pai nuam kei a, a pa in heh mah mah a, a pai ma sang siah ua a sat a an ngawl sak a gim bawl mah mah hi. Hehpihna nei lo mah tawh kibang hi. A khuapihte in zong: Tua ci lawm lawm in bang hangin a ta khat nei a bawl hiam. Ni dang in mi taitna leh amaa ta itna zong kibang lo a it mah mah hi lo ahi hiam. A ci uh hi. A it mah mah hi. Tua pa in a ta bawlna hehpih tung suanna a sawn sawn ahih manin a khuapite in a thei kei a, hehpih lo tawh kibangin a ngaihsun uh hi. Tua ahih ciangin hehpihna panah hehpih sawmna a sang zaw leh a thuak zawte ci mihing in ih thei thei kei hi. Tua pa in a tapa in lai sim kei leh lo kho in a om ding a mi kuli pua in gim mah mah in a om ding hi, ci a thei a, lai sim leh a theih ciangin mi nuam sa in a om ding a, kei ka si khit nung ciangin zong a lung mang kei ding hi, ci a ngahsutna in a ta tua ci bawl hi.
Tua ci bang in a hehpihna Pasian in hong pia nuam a, a hih hangin a thei siam haks mah mah hi. Eite in naupang tawh kibangin ih pumpi bek in hehpih thei hi. Topa Pasian in pumpi sang a lian zaw in kha a hehpih manin upna a tawm neite lung kiatna khawp bangin zeetna a piang sak thei hi. Bang hangin Sang Mangte a tenna gam taisan in gimna tampi thuakin ei khamtung gamah a sam hiam. Aih kei leh bang hangin mihing nam kim lai Pasian in si dingin a sam hiam/ Tiate khempueh hehpih tung tuanna a hi hi. Hehpihna bek hi leh leitung gah ih pumpi nuntak laiah ih nawp sakna hun a sa ding hi. Kha sinagtho nuntakna a ngah kei ding hi. Hehpihna sawn ahih hangin pumpi nungakna sang a hawih zaw hi. Kha Siangtho nuntakna leh lung damna ngah dingin a sam hi. Zawba thuakna thu ih thei tek ding uh hi. Tua pa bangah a thuakte in hehpihna a ngah ding a duh sakna deih sakna a ngah ding uh hi.
Sia Za Huat
NIPI NI THU HILH NA
Autoba Kha ni 17 ni
Mawsi a Si Hhi
Thu Hilhna Lai Siangtho
32:45 Tua bangah Mawsi in a kam a kicing a Itazila im pawlte khempeuh kiagnah a bei dongah a gen khit ciangin: 46 note in tu niah kei teciah ka panna kam teng na lung sim uah kawih ta uh.No na tate in hih thu khamna kam khempeuh na tanna dingun hihte kithuap in kong vaikhak ding hi. 47. Hih thu in thu gihna lo peuh a hih kei hi. Note nuntakna tawh a kipawl a thu a hi hi. Zawdan gn ngapah na neeknah ding uh gamah hih thu teng tang in gamta leuh cin na khan uh a sawt ding hi a ci hi.
48. Tua ni in Pasian in: Zelikhaw lang khat Mawba gamah Abazeng mual Nibawng mual dawnah kah hi. 49. Itazila mi pawlte ken a uknah ding a ka piak Kanan gam en in 50. Na nau Azong in Hamza mual tung a si a a mi pawlte kikhawpna a tung bang mah n nang zong kahto a, hih mual tungah na si ding hi. Nang na mi pawlte kikawpna ah tung in. 51. Bang ding hiam ua ci le note in Zina gam lak Kadisiah khua Meliba tui kianah Itazila mi pawlte maiah kei nong zahtak kei a, n khial khin hi. 52. Tua ahih caingin Itazila mi pawlte ka piak gam nang in na mit tawh na mu hangin tua gam na tung kei ding hi, ci in Mawsi kinagha a gen hi.
34:5 Tua Pasian thu hangmah in a Pasian sila Mawsi in Mawba gam tua munah a si a, 6. Phetpegu khuapi lang khatah Mawba gam mun khat peuhmah hanah a kivui hi. Mawsi si han in atu dongin kuamah in a thei zo kei hi. 7. Mawsi a si laitakin a kum za khat leh sawm nih a pha hi. Tua pa a mit a mial nai kei hi. A tha zong a kiam kei hi. Itazila mi pawlte in Mawsi a ngaihsuna Mawba zang lei munah ni sawm li tawntung kap in a om hi.
Khiatna Thu
Itazilate, Kanan gam a lut ngam lo khit uh ciangin kum 30 val gampa lakah a om hi. Tua nung ciangin Kanan gam lut nang lam dang pan a pai kik hhi. Lam nai pen lam. Edun gam lam ahi hangin tua gam kumpipa in: Ka gam tawn kei un, ci in a kham hi. Tua ahih ciangin tua gam kiimkot a pai hi. Khat veivei amaute in a nute a pate bang in Pasian thungah a pau khial hangin Pasian a hehpih lai hi. Edun gam kiim a pai khit ciangin in nisuah na lam a tung hi. Zawdan gun gei ah a sawtveipi a tam lai takin Pasian thu kham a mangngil lohnah dingin Mawsi in a khempeuh a hilh kik hi. Tua thu hilhna thu khempuh thu hilh lai Siangtho sungah a om hi.
46. Naupangte in Pasian thu amaute a nute a pate kiang panin a zak leh a man zam si. Siapa in a hilh thei hangin a nute a pate kiang pan a zak leh a let ciangin a mangngilh kei ding hi.
47. Zawdan gun in Khamtung gun tawh kibang in Kanan gam lei zangah a luang suk hi. Tua gun gungah Zeisu tui sungah kiphum hi.
49. Tua mual sangpi panin Mawsi in ni tumna lam en in Kana kam a mu thei hi.
50. Lampi a pai laitakun Azong a si a,a tapa in ama za a laih hi. Mawsi leh Pasian a maw sak hi. Mawsi heh a: Note aading tui ka luang sak ding hiam, ci in Pasian min a phat kei hi.
6. A si loin Mawsi vantung khua a tung lo hangin mi dang bang in a si kei hi
7. Mawsi in Izipt kumpi pa tam innah kum 40 a om hi. Kum 40 ganhing a cing hi. Kum 40 Itazilate lam a hilh sak hi.
Pasian in khialna a ngaimaw hi. Mawsi mi lian mah mah ahih hangin Pasian a maizum sak manihah dan a thuak hi. Bantnga tung hangin leitungah thu pha a ngah kei hi. Tua ahih ciangin in mi dangte in dan tawh, bang ci a kipel thei ding hiam.
Autoba kha 24
Itazilate Uk Pa Thak Zawsu
Vakna Lai Siangtho leh Zawsu Lai Siangtho
27:18 Pasian in: Kha Siangtho a ngah nan ta Zawsu sam a: Nang na khut in tua tungah nga in 19. Pasian simpipa Itaza maiah mihing khempeuh maiah kawih in la vaikhak hi. 20. Itazila mihing khempeuh in ama thu azngaihna dingin nang vang letna amah tungah na kawih in, ci in Mawsi a vaikhak hi.
1 Topa Pasian sila Mawsi a si khit ciangin Mawsi nuaia om Nan ta Zawsu kiangah Paian in: 2. Ka sila Mawsi a sit a hi. Tua ahih ciangin nang leh na kianga na ompihte khempeuh tu in tho un Zawdan gun na ngap un a, gal khatah Itazila mi pawlte ka pia k gam in no na nei ta un. 3. Mawsi kiangah ka gen mah bang in note na sikna mun in note ken kong pia ding hi. 4. Tu lai gam leh Lebanan mual pan a kipan, Uphazat gunpi dongin Hetti gam kuam khempeuh leh nni tumna lam tuipi lian dongah note gam mong ahi ding hi. 5. Na junta lain a maiah kuamah in hong nang zo kei ding hi. Mawsi tawh kibang ka om mah bangin nang tawh ka om ding hi. Kei iu nang kong pai khia kei ding hi. Nang kong mawh sak kei ding hi.
6. Na tha khauh sak in la hang ta in. A pute a pate khan laiah a hong pia ning ci ka thu ciamna gam tu in nang in hih mihinngte na lau sak ding hi. 7. Tua ahih ciangin ka sila Mawsi ka vaikhakna thu bang na tatnah dingin ngak in la na tha kawh sak in la, nakpi in hang in na ngaihsutna khempuh na zawhnah ding in tua thu lapi zui in na tak lam, na vei lam bial kei in. 8. Na thu kham hih liabu na kam sung pan a pai khia kei ding hi. Tua laibu sungah ki at bangin na gamtatnah dingin sun tawh zan tawh na ciamteh in. Tua bang ahih lecin lam khempeuhnah na zo ding hi. 9. Nang ken kong vaikhak zo hi lo ka hi hiam. Na tha khauh sak in la hang ta in. Lau kei in, lung kia kei in. Na paina mun khempeuh ah na Pasian Zahova nang tawh ba om khawm hi, ci in thu a pia hi.
Thu Khiatna
Zawsu in Mawsi lai at pa leh Itazilate gal kaap mangpa hi. Tua tham loin Kanan gam a en kawlte lakah Zawsu zong a om hi. Tua ahih ciangin Mawsi a si ma in ama tha laih pa dingin Pasian in a zong ciangin Zawsu a ngaihsun hi.
V 19. Haza in Azong tapa hi a, a pa a si khit ciangin a a a laih hi. Tu lai takin mang Kangte in kumpipa a kawih ciangin siampipa peen khut nuaiah a kawih hi.
Zawsu Lai Siangtho, Zawsu in a at kei hi. Ama nungtakna thu ahih maninah am min a pia hi. Tua Lai Siangtho sungah Itazilate in Kanan gam a simna t bek a om hi.
V 2. Itazilate tamna pual leh Kanan gam kikalah Zawdan gun a om hi.
V 4. Tua gam Itazilate in thakhatin a sim kei hi. Kum 570 zawh Davuih kumpipa a man lai takin a uk khin hi.
V 8. Mihing in Pasian thu a ngai leh a zo ding hi. Lawki kim khat in sum hau ahih zongin mi lian ahih zongin a suak thei hangin amaute in thu khempeuh a zo zo kei ding hi.
Zawsu a neu lai takin pha takpi na seem ahih maninah a let ciangin Itazila uk pa a suak hi. Tua mah bang in tangval khat peuh in a nei lai takin naseem loin a tha dah leh a let ciangin tha dah a hi lai ding hi. Mang Kang a lian peen mi a neu lai takin nakpi peen na seemte a hi hi. Zawsu a lung mang thei hangin Pasian in: Nang tawh ka om khawm ding hi, ci in thu a pia hi.
Autoba kha ni 31 ni
Zu Hai na pan a Piang Gimna Thu
Totan Lai Siangtho 23
29. Kuate in dah thei a hi hiam. Kuate in lung mang thei ahi hiam.Kuate in kitawng thei a hi hiam. Kuate in awng a kiko thei a hi hiam. Tuate in thu om lo pi in kisu kha a a na thei a hi hiam. Kuate in a mit tang a san thie a hi hiam. 30 Leeng gah zu tui sawtvei veipi a neekte leh za tui tawh kihel lengah tui a zong theute in tua bang a lim hong piang hi. 31. Hai sungah ki kawh a,mel a v ang tagn a san kikel a khuam tuak mah mah a lem tuak zute na en kei un. 32. Tuate in a nung ciangin gul bang in hong tuh thei hi. Gul bangin na in hong na sak thei hi. Na mit tang in a tum dang nate a mu ding hi. Na lung sim in thu lam dang a gen ding hi. 34. Tua teng bang ahih ciangin nang in tuipi lai zangah lumte, teembaw, nung dawn a lumte bangamah in an om ding hi. 35. Tuate in: Kei hong sak uh ahih hang in ka na kei hi. Hong tup hangin ken ka thei kei hi. A bang hun ciangin kei ka khanglo ding hiam. Khat vei ka zong kik ding hi, nang na ci hi.
Khiatna Thu
Totan lia Siangtho sungah gamtat na thu hilhna lai a om hi. Sawlomon kumpipa in a tam peen a gelh hi. Tua Sawlomon in kumpipa hi a, amah a gelh sa lai in tangval leh nungak aading a hawih mah mah hi.Mi dangte in zong tua Totan lai a gelh hi. A nung ciangin mihing khat in tua lai khempeuh bu khat sungah a kawih hi.
Hih lai at pa in zo neekna ngeina a siam hi. Ama mi pawl zu neekna ngaina leh khamtung mihingte ngeina a kibang hi.
V 29. Hih thu a man hi. No a vekpi in na mu zo hi. Zu haite in gimna thuak thei hi.
V 30. Tua mihingte in zu khum sak dingin za tui tawh a hel hi.
V 31. Mang Kangte in leng gah tui in zu a bawl hi. zu tawh kihel ma ju leng gah tui a khum mah mah hi. Tua tui a san hi.
V 32. Kuamah gul gilo tawh a kimawl kei ding hi. Ahih hangin zu neek peuhmah in tua tawh kibang hi.
V 33. Teembaw khuam a sang mah mah hi. Zu lai pa in kawi sung a om hiam a thei kei hi. Tui sunga om hiam. Khuam tunga om hiam a thei kei hi.
Khamtung mi kim khatte in: Zu ka ne kei leh ka tha a kiam ding hi, a ci thei hi. Hih thu a man hiam. Mang Kang te gal kido ciangin Zamini gamah zu kikham hi. Tua ahih ciangin zu hai zato inna tumte she sawm suah she kua a kiam hi. Engaland gamah zong zu kikawhm a zu in sihna a thuakte she nga suah she li a kiam hi. Mang Kang numeite in zu a hai ciangin zanah a tate tung tum mawkk a si sak thei hi. Zu a kikawm lai takin tua bang kithat nau ngekte she ni suah she khat a kiam hi. Mang Kangte tai kidem ciangin ahih hangin kimawl ciangin ahih hangin zu a ne kei hi. Bang hang hiam ci leh a tha a kiam ding hi.
Novemba Kha ni 7 ni
Zelikhaw Khua a Sim Hi
Zawsu Lai Siangthong 6
12 Zing sang tungah Zawsu in tho baih mah mah a, Pasian siampite in sing kuang siangtho a pua uh hil. 13 Topa Pasian sing kuangpi maiah keel ki pengkul pum sagih pua in Pasian siamptie sagih in a pai a, peng kui a tum uh hi. Hiam kul tum a, a paih ciangin a nungah gal kapte in sing kuang siangtho nung a zui uh hi. 14. A ni nih ni in a khuapi khat vei a kiimkot khit ciangin in a galkap sung a ciah kik hi. Tua bangin ni gunk tawntung a hih uh hi. 15. A ni sagih ni ciangin zing sang khua vak in tho a ni dang bang mah in sagih vei dongin a kiimkot uh hi.
16. Sagih vei a cin ciang in Pasian siampite in a peeng kul a tum uh hi. Zawsu in: Kiko un. Topa Pasian in note khuapi hong pia diing hi. 17. Khuapi tawh kibangin a khuapi a om khempeuh kiciam in Topa Pasian in pia ding hi. Tua ciangin su zuak Zakhat in keite ih pai sak mihingte a seel ahih ciangin tuate tawh kibangin tua inn a om khempeuh zong a nawp sak na ih pia ding hi. 18. Note in kiciam ding a kilawmte ngaihsun in tang ta un. A hih kei a tuate na kep uh leh note na hi uh zongin, Itazila galkap ahih zongin, kiciam na hong thuak sak ding a hong simmawhnah ding lung himawhna om hi. 19. Kham, dangka ahi zong in sumngo sumte ahih zongin sum a om peuhmah ahih zongi nPasian adding siagntho sak un la sumpi kawih na sungah kawih ni, ci in mi tampite Zawsu in a vaikhak hi. 20. Tua bang ah pengkul a tum ciangin mihingte in a awngin a kiko uh hi. Peng kel aw ging za a, aw nakpi a ging tawh a kiko ciangin a khua kulhpi in a vekpi a cim khin a mihingte in khuapi sungah a tum khit ciangin a la uh hi.
Khiatna Thu
Mawsi a si khit ciangin Itazilate Zawdan gun ngap a, a pute a pate omna Kanan gam a tum uh hi. Zilakhaw khua a tung masa hi. Tua khua ah kulh sangpi a kiimkot hi. Zelikaw khua sim loin Itazila pawlte in a mai a pai ngam kei hi. Tu lai tak tua khua a om kei hi. Zilakhwa khuapih te in gal do a siam kei hi. Tua ahih ciangin Itazilate hong pai ciangin a ngang kei uh hi.
V 13. Tua kell ki lawi ki tawh kibang a sau hi. Amaute a kiimkot lai takin kuahah in kam kht vek a gen kei hi. Amaute in khua a sim kei hi. Gal kapte in tal tawh a kap kei hi. Kam pau thei lo mi bang in ni simin khua kiimkot hi. Ni sagih ni in sagih vei dongin a kiimkot hi.
V 17. Zawdan gal khata om laitakun Zawsu in mihing nih sawl in: Tua khua pai in la mihing kita hiam kia lo hiam ci in en sim in thu a pia hi. Tuate khua a tum ciangin khua pihte in thei a, a man nuam hangin tua numei gilo in hehpih a ama inn sungah sunah a seel hi. Zanah amaute a ciah sim hi. Tua ahih ciangin Itazilate in tua numei a hehpih uh hi. A nung ciangin Itazila pasal khat in tua numei nei a, a gilo nawn kei hi.
V 18. Pasian in amaute a huh maninah sum a hawih peen in Pasian a hi hi. A tawntung Itazilate in amau sum sungpan she sawm suah she khat Pasian a pia ngei uh hi.
V 20. Bang ci in kulh a cim hiam kithei kei hi. Ahih hangin Pasian in thu a piak ciangin a cim khin hi. Mihing khempeuh amau maiah pai in, khua sungah tum a, mihing te a that khin hi.
Gal do loin Pasian in Itazilate bang hang in a sim sak hiam.Pasian kihuh loin amaute in bangmah a bawl zo kei hi. Khua cil in amaute letna in a sim leh a kipha sak thei hi. Tua ahih ciangin Pasian in amah khut tung panin tua khua a pia hi. Eite ngaihsutnah ding a hawih hi. Pasian hong huh kei leh bang ih bawl zo ding hiam. A kipha sakte a kiniam khiat ding hi. Ahih hangin Pasian in mi pha sakte a huh zo kei ding hi.
