TAVUAN HAWM SIAMNA
Agelh ~ GS Pau
Leitung ah makai lawhcing pen-a kigen Moses in a mite panmun a hawmsak ciangin amau' pilna leh kivakhna tawh kizui-in hawm sak dimdiam ahih manin mival cih lah om lo uh a, tavuan zo lah cih zong na om lo pah uh hi (Pai.18:25). Tua hi a, min leh vang deihna hang bek tawh ei' pilna in a daihloh, ei' khuak in a batloh, ei' puak zawhloh ding panmun lianpipi khawng deih pong hiauloh ding kisam hi.
Leitung makai sinna sangte ah "Mihing khat in mun khat val ah lutang seem zolo hi," ci-in kisin ngiat hi. Topa Jesu mahmah in zong, "Mikhat in to nih' na seem khawm theilo hi," ci-in na gen hi (Mate 6:24). Kawlte' paunak ah zong, "Lutang khat in beel nih puakhawm theilo," cih khat mah na om hi. Leitung tangthu ah Sen Prime Minister minthang Chou-En-Lai (1898-1976) in panmun khat kan deih ngeilo a, a mite zong panmun khat kan pia ngeilo, ci-in kigen hi.
Zogam khan'lawh hun lai-in Rev.Hau Lian Kham bekbek in thu lah gen, kam lah phen a, thusinna zong pia den lai hi. Tua ahih manin gim lua mahmah hi ding hi ven, khat veivei thu genin a ot pian teh a dip khawng hum kawm thei hi. Tua lai-in Rev.S.T Hau Go in, "AG te aw, na Sia Hau Lian Kham uh khan' tom sak nuam na hi uh hiam?" ci-in gen ngei hi.
Tavuan i hawm ciangin mikhat siam tah, kiva tah, kizen tah, ci-in tavuan a thuapin piak khak hetloh ding leh a manlah tata nasep piak behbeh khakloh ding kisam hi. Mihing khat in tavuan i hauh luat ciangin i lungsim suakta nawnlo hi. I ankam zong lim nawnlo a, i ihmu zong nuam nawnlo hi. Tua dan hong sawt pian leh kidamloh lawh thei hi. Tavuan kipiakzia zong siam kul hi. Mikhat tavuan i piak ciangin thu (order) pia ziauziau lo a, a kitangsapna thu a tel theih nadingin gencian ding leh a seem ding mite ngiat tawh sepzia ding kikup khop liailiai ding zong kisam hi. Sawlman'na lel tawh sep pong sangin, lawp tak-a sepna muibun zaw hi.
Tua banah mihingte in a gik lua lo, a hoih bek maban/tavuan khat peuh nei a, manlah den ding hoih hi. Tua dan mite a ci uh damin, zong khan'sau uh hi. Ei Zomi sungah Col. Khen Za Moong (Rtd) bang tu-in kum (88) bang pha ta napi, maban nei-in manlah den ahih manin tua in a cidam sak a, tu dong mah a khuak ciim sitset lai mawk hi. Ei Zomi tampite in i pension khit ciangin maban kinei nawnlo a, inn ah kimawk-om lua liang ahih manin ngaihsut loh ding teng kiban ngaihsun niloh kha laizang hi. Tua hangin a ni ni-in kiteek hanhan hi.
Laibu Saal / Zomi eLibrary
