Tapidawte Zudawnna A Hangte
Agelh ~ Kap Za Khai
A nungta Pasian a bia lote hi loin tapidaw a kici khempeuh lak panin zudawnte in banghang in zudawn cih thu ah a thu leh ahang tampi om kha dinga hih sungah kei muhna thu tawm hong sungkhia nuam ka hi hi.
1. Tanglai Pupa’ Zudawn Ngeina in hong zo lai ahih manin: Tanglai pupate’ ngeina sungah kihuh kipanpihna, kipawlkhopna, cih bangin ngeina hoih tampi i nuntakpih zawh kholloh hangin nopna dahna ah zu kilup le zudawn ngeina ahihleh tuni dongin tapidaw innte ah tampi omom lai hi. Tanglai pupate’ ngeina tengah tuni dong i lungsim le silesa sungah hong teeng pen zudawnna bek mah ahiam cih pen lungngaihkik huai hi. A khangkhang in zu kithupi ngaihsun lua ahih manin tuni dong mahin nopna le dahna munte ah zu mah kizang tangtang lai hi. Ngeina sungah zu in mun thupi ah om a, zu loin thusun, thului, kam ciam leh mawh kiphelh cihte nei zo lo cih theih hi. Ahi zongin tuhun ciangin zu loin thu tampi kivaihawm theita hi. Zu munah i khek ding thu tampi kithei ta ahih manin Pupa’ ngeina tampi sungpan ahoih lo hih zu zatna paihkhiat huai ta hi. Pupa’ ngeina pen siatna in zangzang nawn kei ni.
2. Mi namdangte tatzia in hong huzap luatna hang: TV leh Video tuamtuam hong khan semsem ciangin i theih ngeiloh leh i muh ngeiloh mi namdangte’ ngeina le tatzia te i mukha a, et leh muhna panin amaute’ ngeina in i lungsim sungah hong teeng semsem hi. Midangte’ tatzia huzap i ngah diak pen Japan gal khit nung 1950 pawl hi a ‘Kumpi zuu’ a kici ziauziau gamdang zu tampi Zomi galkapte hong puak tawh hong lut tawh hong tam semsem cih ding hi. Mi namdangte tawh kizopna hang ahi zongin, amau gam sungah nasepna hang ahi zongin, media tungtawn ahi zongin Zomite zudawnzia pen hong khangto semsem hi. Media a hat mahmah hun tulaitak bang khangnote in ‘Gam khangto te’n zong zudawndawn lel uh hi ven, ei zong i dawn mah kee’ kici thei hi. Media tawh kizop ciangin a puatham kizepna bekbek en loin a thutawng dong et ding kisam hi.
3. Zudawn Lawm Neihna Hangin: Lawm teng pen amau’ zia ciat in ahoih vive hi lel mah taleh pawlkhatte pen zudawnthei mawk ahih manin amau tawh a kikhawl peuhpeuh zu nekpih thei uh hi. Lawmte’ sawlna hang ahi zongin, thapiakna hang ahi zongin zudawn thei khangno tampi om hi. Lawm khat pen zudawn thei cih i theihnak leh kikholhpih loh ding hi lel hi.
4. Pasian’ Hehpihna Thu Uang Gen Luatna Hangin: Tuhun Pasian thugen atamzaw in Pasian’ hehpihna leh itna bekbek uang gen uh a, Jesuh’ nungzuih ding leh upna sungah cihtak ding, a siangtho a nuntak ding, kikhal ding cihte ahi mihingte’ lampan tavuan neihnate gen khol loin Pasian thutak pawlkhat nusia uh hi. Kamdang in genle’ng Pasian ii hong sepsaksa bekbek genin mihingte ahih leh tut hithiat ding bangin gen uha, tua pen Pasian in adeih bangbangin a hek robot bang suaksak uh hi. Mihing khat piangthak cih ciangin Jesuh’ sepsa sungah mihing in upna tawh a kihel ciang bekin a kicing thu ahi hi. Mihingte’ sep lohin Pasian hehpihna hangin upna tawh gupna ngah ihih hangin i sep theihloh sepna khempeuh Jesuh in hong sepsak in hong thuaksak hi a, hehpihna sungah om taktak hi lehang Jesuh’ thuakna i tel takpi ciangin zu akici limlim ki kih mahmah ding hi. Pasian’ hehpihna pen phengtat nading hi loin nuntak siangtho semsem nading hizaw hi. Cihnopna ah Pasian’ hong hehpihna i gen leh alang khat ah tua sungah mihingte’ dinmun zong i genkul hamtang ding cihna hi. Pasian’hehpihna ahi zongin, mihingte’ kihelna ahi zongin a nih-un gamgi neitek hi.
5. Zu Dawm Dinga Khensat Ngiatna Hangin: Kuama’n sawl lo, thapia lo napi’n ama’ ut thu tawh zudawn nuam a dawn ngiat pawlkhat om hi. Pawlkhatte ciangin nasep senpyi lohna hang ahi zongin, lawmngaih tawh kikhenna hang ahi zongin, nulepate tungah lungkim lohna hang ahi zongin thu dang tawh kiphelh thei napi’n zu ngiat mah tawh a kidiah om hi. Hihte pen kuama sawl loh amau’ khensatna tawh zudawn hi lel uh a, a zu ngiat a duhte zong ahi hi. Dawn dingin khensat kei peuhleh kuakua in hong tulh zongin kinialzo veve ding hi.
6. Zu Zatna Siamlohna Hangin: Hih leitungah zu nek zudawn pen Topa Jesuh hong paikik ni dongin a om ding thu hi taleh a zang siamte in nuntak cidam lawh uh a, a zang siam lote’n sihlawh uh hi. Rev. Dr. Do Sian Thang in ‘Jesuh in leenggah kung tawh Pasian’ gam sunga nungzuihna thu hong gen hi a (Isa. 5:1-12; Johan 15:5), Pasian thuthuk atawk lote’n leenggahzu dawnna pen nopna leh khamna bek a zang uh hi,’ ci hi. Lenggahtui pen cidam nadingin kikhalna tawh zat ding hi a, kham dinga dawn ding hilo hi. Zogam ah hong pai Sangmang pawlkhatte zong zu na zang uh a, ahi zongin Zomite zudawn ding hong phal lo bilbelkik uh hi. A hangin Zomite’n zu zatdan siamlo ci uh hi. Mipilte’n zu pen damna in zang siam uh a, Zomite’n khamna le siatna in i zat leh kikhel hunta hi.
