TAMAR 1
Nusiatcip athuakna pan ding kik a,
Amailam ding aphukhia zo Numei
Pian 38:6-30; Ruth 4:12; 1Khang 2:4; Mat 1:3
Agelh ~ Rev. Dr. John Thang Hum &Dim Lun Zam
Kamsiatna tuak masa
Tamar pen Canan numei khat hi a, a tenna khua, anu-apa ki gen lo hi. Jacob tate 12 lak ah, Judah, Judah tapa uu pen Er tawh kiteng a, Er in Pasian thu manglo ahih manin hong si hi (1 Khang 2:3). Er in bang siatna bawl cih ki gen lo hi. Er asih ciangin Pasian in zuih ding apiaksa om bangin apa, Judah in a innkuan khang kizom to ding geel sak hi. Tua pen unau lakah, uu-pen asih leh anau in a-uu’ zi tenpih ding a, tua pan innkuan khang kisim to ding cih ahi hi. (Thuhilhna 25:5-6). Er hong sih ciangin atapa nihna Onan leh Tamar ki tengsak leuleu hi. Onan zong Pasian deihzia in gamtalo ahih manin si leuleu hi. Er in bang hihkhial cih a kigen loh hang, Onan gamtat khialhna ki gen hi. Onan in tapa aneih hangin ama’ min tawh kisim kha lo ding, a-uu’ mintawh pai ding ahih manin lungkim ngap lo-a, Tamar tawh a omkhop ciang a pasal khaici apualam ah buakhia hi. (Pian 38:9). Tua gamtatna Pasian in deihlo a, amah (Onan) zong sihna thuak hi.
Judah (a teekpa) in khembawl
Judah in a tapa nih te a sih ciangin a thumna pa Shela tawh kiten sak ding kamciam hi. Shela hong khangcing keeita napi Judah in abeisa thupiangte hangin patauhna nei ahih manin a tapa Shelah, Tamar tawh kiteng sak lo hi. Hih thu Tamar in atheih ciangin nasa lua hi. Tamar in bangci dan in a ngah ding gamh lak theih ding zia na lung ngaingai hi. Hun khat ciangin Judah khual hong zin ding cih za hi. Tua thu atheih ciangin Tamar in ngaihsutna khat phuangkhia a, Judah pai nading lampi ah pangin, lamkiangah amai khuh in numei kizuak na ki neih hi.
Tamar in Judah lunglutna amuh ciangin tetci dingin a zungbuh leh a ciangkhut a piak ding gen hi. Judah thukim a, tua teng a piakkhit ciangin Tamar omkhoppih hi. Judah in a hih leh amo ahihlam thei peuhmah lo hi. Tua teng khit ciangin Tamar in a kiseelna puante khekin meigong puan teng silh kik hi.
Tamar in athu zo
Judah khualzinna pan a ciah a, inn a tun khiat ciangin avan teng kan dingin a nasemte khat kelno khat tawh pai sakin, tua numei kizuaknu kiangah sawl hi. Ahi zongin tua munteng atun ciangin numei kizuak daan mulo a, akiim, akiang midangte adot hangin zong kuaman na theih pihlo ahih manin nasempa, a pu kiangah ciahkik in athu teng gen hi.
Asawtlo in, Tamar in nau nei cih hong kigen hiauhiau Judah in za-a, tua leh aheh hong suak pha mahmah hi. Hang gamgam in, ‘Hong paipih un, mei tawh kihal ding hi’, ci gamgam se hi. Tamar hong ki paipih ciangin, Judah in tetci dinga, apiak azungbuh leh a ciangkhut lak a, “Hih vante aneipa pen ka nau neihpih pa hi,” ci-in gen hi. Tua thu teng Judah in atheih ciangin, “Tamar kei sangin thuman zaw hi,” ci-in gen hi.
Gumpa-Mesiah Khangsimna suak
Tamar sungpan tapa nih hong suaka, khat pen Perez hi in, khat pen Zerah hong phuak hi. Matte 1:3 aa, Jesu khangsimna sungah, “Judah’ ta- Perez leh Zerah te, Tamar tawh aneih ta ahihi.” ci-in ki gelh hi. Jesu Khris khang simna ah numei li kihelte lakah amah zong khat ahi hi. Tamar in hih bang nasep na hangin Jesu khang ama’ sungpan ki sim dingin ngaihsun kha hetlo ding hi. Ahi zongin Pasian in mi ki nengniamte lamah pang hi, acih bangin, Tamar haksat thuakna panpih hi.
Thukhupna
Ih nuntakna ah i deihloh pen leh lamet loh hun in tuahsiatna hong omthei hi. Tua bang hong pianloh nading ei’ bawl theih thu zong hilo hi. Tamar in nusiat cipna ciangdong thuak hinapi angah ding kilawm hamphatna lakik thei hi. Hi bang ih cih ciangin ci-leh-sa tawh mikhem ding cihna ahi kei hi.
Hih Tamar tangthu in kha lamah i dinmun hong gen nuam ahi hi. Abeisa ih nuntakna ah supna, guallelhna khatpeuh I neih leh Pasian sungah Jesu hanga I ngah hamphatna, gamhluahza lakkik theih ding kisam hi. Pasian sungah hamphatna pen ama’ khunsa zia leh tong zui-in la thei leng a kingah ding ahi hi. Tamar in Judah kiangpan Tetci ding zunghbulh leh ciangkhut angetna pen etsakna, deihna om hi. Ciangkhut in Pasian kammal etsakna hi a, zunghbulh in Kha Siangtho etsakna ahi hi. Ih nuntakna ah hih nihte ineih nakleh Pasian’ hong kamciam (thupha, ghou) te ei ading ahi hi. Aki nusia cip Tamar in ama’ hamphatna lakik a, Jesu Khris khangsimna ah a kihel bangin eite zong Topan ama’ khangsimna ah hong zangh nuam hi.
Dotna:
Tamar in a suan leh khak kizop na ding bang ci gel hiam?
Judah in Tamar tungah sep ding agen sa te bang hang semlo hiam?
Onan bang hangin sihna thuak hiam.
Tamar din mun ah nang om le cin bangci na hih sawm hiam?
