Systematic Theology (Nitumna gam Pasian thuluan zia) maw
Contextual Theology (Tualsuak Pasian thuluan zia)?
Agelh ~ Tg. Kham Khual Hatzaw
Systematic theology i cih zong nitumna gamte Contextual theology/Tualsuak theology ahi hi. "Lai Siangtho bu kici laibu nam 66 tak pen telkim ding haksa bektham loin leitung piancil pan kipan a beidong ding thute agual agual in, kigelhlo ahihman in Pasian thu i theih theihtek nadingin Lai Siangtho sung panin akisam thupiteng adawl adawl (nitumna gamte in kisam asakte uh, emphasis mine), a banbanin pulakkhiat ding ngimna tawh Systematic Theology hongpiang hi." Nitum gamte pen thu khat peuhpeuh systematic tak (a dawl dawl, a banbanin) in a ngaihsun mi ahihman un Lai Siangtho thu amau telsiam ding in amau systematic takin a gual ahi uh hi. Ei zong Lai Siangtho thu limtak in saguh kheuh bangin kheuh in, exegesis bawl a tuapen ei telsiam ding in ih gualhtheih ding kisam hi.
Pawlkhat in contextual theology a san zawhlohna uh pen Contextual theology a zangkhialte in Pasian thusanzia bulphuhpi pen thutawp gen (primary le sola authoritative source of theology) pen Lai Siangtho hisak nawnlo in ei tuahkhak thute (existential experiences) ong hihsak man uh ahi hi. Tua leh pawlkhat inzong Syncreticsm (biakna gawmkhopna) leh relativism (Thuman takpi omlo) kihtak manin asang zolo om hi (hihte pen a kihtak huai mah ahi hi).
Ahi zongin, thu hoih mahmah khat akizat khialhna, kihtak manin paihkhiat ziau a, el bawl keei ding pen zong dahhuai hi. Khristian biakna nangawn paulam in gal nasim ngei uh hiven, tua hangin Khristian biakna bup nolh ding mawle?
Tua bang laulau hilo zaw in, Sia Khup Za Go gen bangin Contexutal theology model/ Tualsuak Pasian thuluanzia bulphuh thukhun tuamtuam tampi lak pan "Christ transforming culuture/Jesu in ngeina khel" cih thu bulphuh pen zang ni, a cihmah bang in Sia Thang Biak Mung in "Revitalization of culture under the regulation of Christian Faith" i ngeina sunga thu omte 'Lai Siangtho tawh kikaihlote kepbitna' cih tegel lenkip le hang Contextual theology pen nak hoih mahmah hi.
Tua hi leh, nitumna gamte in azumhuai gamtat na uh, Jesu mel siasak le Pasian umlo tampi a piansak lohna uh 'min' teng peuh, pawl tuam lungsim a neisak minte, kei Calvinism, kei Arminian, kei Bultmanian, kei Barthian, kei Pelegian, kei Augustinian kicih cih kullo ding hi. Amau i beh i phung zong hi beeklo ahihman in, tua sangin Lai Siangth pen Greek le Hebia panin ah bulsuut in ei adingin tuahphei ziauziau ni. Ei adingin banggen hiam ci in, ei sungmah ah zangpahin a laigual a mikangte’ kisel sel, tualgal nangawn a neihlawh tengpeuh uh ah ei i awkawk kulkei na ci ci ing e. Nitum gamte hong uk hun beisak ta sam leng e, Topa’n hih ciang ong tut khit buang in.
A tung aa bangteng hangin Systematic maw Contextual cici nawnlo in, Lai Siangtho in ong sinsak thute ei tual ah zangin, Lai Siangtho panin Pasian thu ei a dingin gual ni. Ni tum gamte vaci vauvau nawnlo in, Kum Zalom khatna panin Zomite ci ta ni.
Etkak:
Khup Za Go, Leivui Panin, Guwahati: Christian Literature Center, 2004.
Thang Biak Mung, Theology and Culture: Towards a Theological Interpretation and Preservation of Zo Cultural Identity, Th.M, dissertation, Dehradun, New Theological College,2017.
Pau Khan En, Nuntakpih Ding Thulaigil 30, Kalaymyo: Vandaitui Literature Ministry, 2007.
Do Suan Mung, Asia Tualsuak Upna (Asian Theology).
Wright,N.T, Scripture and the authority of God: How to read the Bible Today, New York:Harper One, 2005.
Laibu Saal / Zomi eLibrary
