Singkungpi le Naupangno Thu
Agelh ~ En Khat Thang
Hun khat lai-in ah, singkung golpi khat om hi. A hiangte ka-in, a teh, a gah khumin limci hi. Tua singkungpi a it mahmah pasalno khat om hi. Nisim phialin singkung gei ah hong khawlin, kimawl den hi. Singkung tungah kahin, singgah limci tata lo zel, ne zel, a gilvah teh singkung lim nuai ah tawlnga in ihmu zel hi. Singkungpi in zong naupangpa it lua mahmah hi. Hun hong bei toto-in, naupangno zong tangval to sim ta hi. Tangvalno pa zong manlahna tuamtuam tawh singkungpi gei ah hong om den zo nawn lo hi.
Ni khat, tangvalpa mai gum sa-in singkung kiangah hong pai hi. Singkungpi in "bawi aw, hong pai in, ka kiangah hong om in" ci-in sam hi. Tangvalpa zong "Kei zong gol sim ta hiveng, ka pai nopna tuamtuam om a, nang kiang ah hong tam om man nawn lo hing" ci-in dawng hi. Sing kungpi in zong "Hong telsiam ing ee, kong piak ding dang bangmah lah nei kei vengin ah, ka gahte lo-inla na gilvah dong ne in, na khamvalte zong zuak le teh sum ngah ding hi teh bawi no aw" a cih leh tangvalno pa zong nuam sim pian pahin singgah khempeuh lo siangin va zuak vingvengin tawlpi khat sung hong mang dildel ta hi.
Singkungpi lunglengin kum 10 sung phial hong om hi. Tua leh lamet ngam loh phial laitakin papi khat mai tai mel lo sa-in singkung nai hong zuan hi. Singkungpi in haih het lo-in, a it naupangno ahih lam tel ahih manin "hong pai in bawi aw, kei tawh kimawl ni" ci-in na dawntuah hi. "Singkungpi aw, kei tun ka zi ka ta tawh hinga, a mau nekledawn ding zongin kitaklah lua hing, ka Inn ding mahmah zong kitawm nuam ka hih manin, nang tawh hun tampi hong nei man lo ding hing, ka Inn lamna ding hong huh dih ve?" ci-in papi pa in hopihkik hi.
Singkungpi in zong "Aw hi mawk maw bawi, Inn bel hong lamsak zo het kei ve ning in mataw, a hizongin hih ka hiangteng tan inla, na Inn lamna dingin zangve leh" a cih leh papipa zong nuam hemham sa-in, sing hiangteng a Inn sing dingin sattan khin mangin paikhiat san vingveng leuleu hi. Singkungpi in ahih leh a it mipa galetin, a lungkim zo veve hi. Papipa ahih leh kum 10 sung phial hong mang dildel zel ahih manin singkungpi lungleng khuangai in hong om zel hi.
Tuk le phalbi hunte hong khengin khuakhal hun ni khat, papipa sam kang sim pianta in singkung kiangah hong pai bilbel hi. Singkungpi zong nuam lua in, "bawi aw, hong pai in kei kiangah khawl inla, kimawl in" ci-in lungdamin na muak hi. Papipa in zong "kei ka kum tamta hi veh aw, tawmvei tuipi nawl khawngah tawlnga hithiat leng ci a hong pai hi veng, gunkuang khat hoh hong pia dih ve, tua hi leh tuitungah hawl leng nuam peuhmah ding hiven" ci-in dawngkik hi. Singkung in zong, "aw, lungnop kei sing ee mataw, gunkuang lah hong pia zo lo ding ing a, hih ka kung pumpi phuk inla, gunkung dingin bawl ve leh" a cih leh, Papipa zong lungdamin, sungkung bul panin phuk pahin, gunkung ding a bawl khitteh va mang vingveng zel hi.
Hi bang teng tawh kum tam sim hong bei khit ciangin, a tawpna ah mipa singkung bulsum geiah hong pai leuleu hi. Singkung bulsum in zong "Bawi aw lungnuam kei sing ee mataw, kong piak ding mahmah nei nawn kei veng ee, ka gah, ka kungte lah bei khin ven maw" ci-in aw nemin hopih hi. Mipa in zong "phamawh kei ee, kei zong singgah nek na dingin ha zong nei nawn lo ping, singkung tung khawng zong kah ngap nawn peuhmah keng tekta ing" ci-in dawng hi.
Singkungpi in zong "bawi aw, kong piak theih lai dingin a si khin sa ka zungte bek mah om lai veh ee" ci-in kah aw tawh hopih hi. Mipa in zong "Tun ahih leh bangmah zong kisam nawn keng ee, ahi zongin mun dai dide khatah lungnuam takin tawlnga nuam ta ing" ci-in dawng hi. Singzung in zong "tua ahih leh hoih ei leh ka zung lukham in la, nuam takin ka zung nuai ah tawlnga ta in bawi aw" ci-in dawng hi. Mipa zong singzung nuai ah kingamin a tawntungin hong om suak ta hi. Singkung zung ahih leh a it naupang tawh tawlnga khawm ahih manin lungdamin khitui hong luang ta hi.
Tangthu sunga singkung in NulePate din mun, Itna tawh kidim den ahihna lak hi. Mipa ahih leh ei mihingte khempeuh a bei thei lo deihna nei den, kisapna nei den, hong it NulePa tungah telsiamna a neikik zo ngei lote i hihna lim hong lak ahi hi.
I NulePate a nuntak lai un, hong itna uh telsiamin a mau tungah thupha bawlkik zawh ding a hanciam huai lam kimu thei hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
